5
Dios ribö́ cazëꞌ nútiꞌtës bixúz lo ladaj bönachi,
en ruzóëꞌ lëꞌ para gunëꞌ yuguꞌ le runëꞌ lahuëꞌ Dios uláz quégaca bönachi,
en cuꞌë lahuëꞌ Dios yuguꞌ le tuꞌnödzaj bönachi,
en yuguꞌ böaꞌ bëdxi tútigaquiëꞌ-baꞌ lu bucugu láꞌayi tuꞌ nözi dul-laꞌ nabágaꞌgaquiëꞌ.
2 Bixúz lo naꞌ,
tuꞌ raca queëꞌ lë́bisö ca raca quégaca bönachi,
gaca gáquiëꞌ zxön ladxiꞌ len nupa nácagaca yuguꞌ bönniꞌ canö́z,
en nupa taꞌchixi taꞌnigui.
3 Que lë ni naꞌ,
tuꞌ náquiëꞌ bixúz lo naꞌ bönáchisö,
ral-laꞌ cuꞌë lahuëꞌ Dios böaꞌ bëdxi naꞌ tútigaquiëꞌ-baꞌ lu bucugu láꞌayi niꞌa que dul-laꞌ nabagaꞌ cazëꞌ,
ca naꞌ runëꞌ caꞌ niꞌa que dul-laꞌ nabágaꞌgaca bönachi.
4 Cuntu nu gaca gun cuini bixúz lo,
pero Dios rulidzëꞌ nu ral-laꞌ gaca bixúz lo,
ca naꞌ bulidzëꞌ Aarón.
5 Lëscaꞌ caní guca queëꞌ Cristo.
Bitiꞌ ben cuinëꞌ bixúz lo,
pero Dios buzóëꞌ Lëꞌ ca bixúz lo.
Ca naca lë ni,
Dios gudxëꞌ Lëꞌ:
Liꞌ nacuꞌ Zxíꞌinaꞌ.
Buzóaꞌ Liꞌ naꞌa.
6 Lëscaꞌ caní gudxëꞌ Lëꞌ le nazúaj ga yúbölö,
gunnë́ꞌ:
Liꞌ nácaticaꞌsuꞌ bixúz,
ca naꞌ gúquiëꞌ Melquisedec bixúz.
7 Cristo,
cateꞌ niꞌ zoa cazëꞌ yödzölió ni,
bulidzëꞌ Dios,
en gútaꞌyuëꞌ lahuëꞌ.
Gurö́dxiꞌë,
en gurödxëꞌ lahuëꞌ Dios,
Bönniꞌ guca usölë́ꞌ Lëꞌ lu yöl-laꞌ guti,
ateꞌ Dios biyönnëꞌ Lëꞌ tuꞌ gúdxinëꞌ Lëꞌ idú ládxëꞌë.
8 Sal-laꞌ gúquiëꞌ Zxíꞌinëꞌ Dios,
bizë́dëꞌ gunëꞌ ca rnna xtídzëꞌë Dios tuꞌ gulaca queëꞌ yuguꞌ le gudíꞌi guzxáquëꞌë.
9 Cateꞌ chigúquiëꞌ Cristo idú ca ral-laꞌ gáquiëꞌ tu bixúz lo,
Dios benëꞌ Lëꞌ Bönniꞌ rusölë́ꞌ tsaz yúguꞌtë nupa tun ca rnna xtídzëꞌë.
10 Níꞌirö Dios buzóëꞌ Lëꞌ para gáquiëꞌ bixúz lo ca naꞌ gúquiëꞌ Melquisedec naꞌ bixúz lo.
Zoa bönadxi queë́ruꞌ huö́aj ládxiꞌruꞌ, en táꞌbagaꞌruꞌ-nëꞌ Cristo
11 Ca naca lë ni,
zián le ral-laꞌ güíꞌilentuꞌ libíꞌiliꞌ didzaꞌ,
le naca böniga quíxjöiꞌituꞌ libíꞌiliꞌ,
tuꞌ cabí réajniꞌiniliꞌ.
12 Chigudödi dza ral-laꞌ gaca usédiliꞌ bönachi xtídzëꞌë Dios,
tuꞌ chibiyö́niliꞌ xidzé,
pero riquíniliꞌ nu quíxjöiꞌi libíꞌiliꞌ leyúbölö yuguꞌ le cabí naca böniga nazíꞌ lu nëꞌe nu siꞌ réajlëꞌ.
Nagáꞌanaliꞌ ca yuguꞌ biꞌi huë́ꞌënidoꞌ taꞌquínibiꞌ nidxiꞌ,
en calëga laꞌ huagu tsutsu.
13 Yúguꞌtë bönniꞌ naquíniguequinëꞌ nu usedi légaquiëꞌ lë naꞌ bitiꞌ naca böniga,
nácagaquiëꞌ ca yuguꞌ bíꞌidoꞌ téꞌajbiꞌ nidxiꞌ.
Bitiꞌ nazë́dagaquiëꞌ ca saꞌyéaj le naca tsahuiꞌ.
14 Laꞌ huagu tsutsu tuꞌzíꞌ xibé nupa chinál-lágaca,
nupa naꞌ gaca iléquibeꞌe le naca dxiꞌa,
en le cabí naca dxiꞌa,
tuꞌ nugúngaquiëꞌ dxin yöl-laꞌ réajniꞌi quégaquiëꞌ.