4
Naꞌa,
tsanni ni nagáꞌana le guzxíꞌ lu nëꞌë Dios queë́ruꞌ para gaca tsúꞌuruꞌ lataj queëꞌ ga uzíꞌ ládxiꞌruꞌ,
ral-laꞌ gádxiruꞌ para cabí unítiruꞌ lataj tsúꞌuruꞌ niꞌ.
2 Biyönruꞌ rëꞌu didzaꞌ dxiꞌa ca naꞌ bilaꞌyönnëꞌ légaquiëꞌ,
pero légaquiëꞌ bitiꞌ buluꞌziꞌë xibé didzaꞌ naꞌ bilaꞌyönnëꞌ,
tuꞌ cabí gulaꞌyéajlëꞌë Dios cateꞌ bilaꞌyönnëꞌ le.
3 Rëꞌu ni réajlëꞌëruꞌ Dios,
en tsúꞌuruꞌ lataj queëꞌ ga uzíꞌ ládxiꞌruꞌ.
Raca ca naꞌ gunnë́ꞌ Dios:
Que lë ni naꞌ gulédaꞌ légaquiëꞌ
en benaꞌ tsutsu xtídzaꞌa,
gunníaꞌ:
Bitiꞌ tsúꞌugaquiëꞌ ga uluꞌzíꞌ ládxiꞌlenëꞌ nedaꞌ.
Dë lataj tsúꞌuruꞌ rëꞌu ga uzíꞌ ládxiꞌlenruꞌ-nëꞌ Dios,
sal-laꞌ budxi benëꞌ Dios xichinëꞌ dza niꞌte cateꞌ niꞌ benëꞌ yödzölió ni,
en chiruzíꞌ ládxëꞌë.
4 Nazúaj lu guichi láꞌayi ga ruíꞌi didzaꞌ ca naca que dza igadxi,
le rnna:
“Buzíꞌ ládxëꞌë Dios dza igadxi yuguꞌ lu dxin benëꞌ.”
5 Ga yúbölö rnna:
“Bitiꞌ tsúꞌugaquiëꞌ ga uluꞌzíꞌ ládxiꞌlenëꞌ nedaꞌ.”
6 Nupa niꞌ bilaꞌyöni zíꞌalö didzaꞌ dxiꞌa,
bitiꞌ guyúꞌugaca niꞌ tuꞌ cabí gulún ca rnna xtídzëꞌë Dios.
Que lë ni naꞌ,
ral-laꞌ tsúꞌugaca bönachi yúbölö niꞌ.
7 Que lë ni naꞌ caꞌ,
Dios buluꞌe tu dza yúbölö,
gunnë́ꞌ:
“Naꞌa dza.”
Caní naca,
cateꞌ chigudödi iz zián,
bëꞌë didzaꞌ Dios lu ruꞌë David,
ca naꞌ nazúaj lu guichi láꞌayi le rnna:
Naꞌa dza,
channö riyö́niliꞌ didzaꞌ ruꞌë Dios,
bitiꞌ gácaliꞌ zidi lu icja ládxiꞌdoꞌoliꞌ.
8 Laꞌtuꞌ benëꞌ Josué ga buluꞌzíꞌ ládxiꞌgaquiëꞌ cateꞌ gulaꞌyuꞌë lu xiyúgaquiëꞌ,
bitiꞌ bëꞌë Dios didzaꞌ gudödi niꞌ que iaꞌturö dza cateꞌ nu uzíꞌ ládxiꞌlen Lëꞌ.
9 Que lë ni naꞌ,
nagáꞌana quégaca bönachi queëꞌ Dios lataj ilaꞌdéliꞌnëꞌ ga uluꞌzíꞌ ládxiꞌgaquiëꞌ.
10 Nupa tsúꞌugaca ga uluꞌzíꞌ ládxiꞌlengaca Dios,
uluꞌzíꞌ ládxiꞌgaquiëꞌ lu dxin tunëꞌ,
ca naꞌ buzíꞌ ládxëꞌë Dios yuguꞌ lu dxin benëꞌ Lëꞌ.
11 Que lë ni naꞌ,
ral-laꞌ güíꞌi ládxiꞌruꞌ tsúꞌuruꞌ ga niꞌ uzíꞌ ládxiꞌlenruꞌ-nëꞌ Dios.
Bitiꞌ ral-laꞌ táꞌbagaꞌruꞌ xtídzëꞌë ca naꞌ gulún nupa niꞌ bitiꞌ gulaꞌyéajlëꞌ Dios,
en bitiꞌ gulaꞌyuꞌë niꞌ.
12 Xtídzëꞌë Dios naca ban caz,
en napa caz yöl-laꞌ huáca.
Richúgurö ga rëꞌ ca guíë tuchiꞌ natuchiꞌ iropa ruíꞌi.
Richugu ridxín ga taꞌdzaga böꞌ naca cázaruꞌ,
en le zoa lu icja ládxiꞌdoꞌoruꞌ,
encaꞌ röxaj ga ridxintë lu dxita lu bin.
Run ga naca bëꞌ le ribequi ícjaruꞌ,
en le rizáꞌ ládxiꞌruꞌ.
13 Bitiꞌ bi gaca ucáchiꞌruꞌ ga bitiꞌ gaca iléꞌenëꞌ Dios le.
Yúguꞌtë le nun cazëꞌ Dios naláꞌ lahui,
en narúaj ga lináꞌ lahuëꞌ Dios.
Lahuëꞌ Lëꞌ run bayudxi quíxjöꞌöruꞌ le nunruꞌ.
Jesús náquiëꞌ bixúz lo, Nu nácatërö zxön
14 Zoa queë́ruꞌ tu bixúz lo,
nácatërëꞌ zxön,
Nu naꞌ gudödi niꞌ yehuaꞌ yubá,
Jesús,
Zxíꞌinëꞌ Dios.
Que lë ni naꞌ ral-laꞌ ugáꞌanaruꞌ tsutsu ca naca le nazíꞌ lu náꞌaruꞌ.
15 Zoa queë́ruꞌ tu bixúz lo,
Nu gaca huéchiꞌ ladxiꞌ rëꞌu ca nácagaca le raca queë́ruꞌ,
tuꞌ guzxíꞌ bëꞌ tuꞌ xihuiꞌ Lë cazëꞌ idútë ca naꞌ rizíꞌ bëꞌ tuꞌ xihuiꞌ naꞌ rëꞌu,
pero bitiꞌ bi dul-laꞌ benëꞌ Lëꞌ.
16 Que lë ni naꞌ,
idú ládxiꞌruꞌ ral-laꞌ ibígaꞌruꞌ galaꞌ ga röꞌë rinná bëꞌë Dios,
Bönniꞌ ruzáꞌ ladxëꞌë queë́ruꞌ,
en inábaruꞌ lahuëꞌ huéchiꞌ ládxëꞌë rëꞌu,
en uzáꞌ ládxëꞌë queë́ruꞌ,
para gácalenëꞌ rëꞌu cateꞌ bi raca queë́ruꞌ.