4
1,2 Niꞌa queëꞌ Xanruꞌ Dios, encaꞌ Xanruꞌ Jesucristo, rinná béꞌedaꞌ liꞌ gunuꞌ libán que xtídzëꞌë Xanruꞌ. Lë cazëꞌ uchiꞌa usörö́ëꞌ nupa ni nabángaca, en nupa chinátigaca, dza niꞌ huödëꞌ idinná bëꞌë. Bëꞌ ladxiꞌ gunuꞌ lë ni channö raca dxiꞌa quiuꞌ o bitiꞌ raca dxiꞌa. Lu yöl-laꞌ zxön ladxiꞌ, guléaj ga lináꞌ le tun bönachi. Busáꞌ ládxiꞌgaquiëꞌ, en guchiza icja nágagaquiëꞌ ca naca lë naꞌ rusédiruꞌ. 3 Caní ral-laꞌ gunuꞌ tuꞌ idxín dza cateꞌ bitiꞌ uluꞌzë́ nágagaquiëꞌ xibá tsahuiꞌ,
pero ilë́ꞌëninëꞌ ilaꞌyönnëꞌ le taꞌdánisinëꞌ.
Ca taꞌzësö ládxiꞌgaquiëꞌ uluꞌtubëꞌ quégaquiëꞌ nupa uluꞌsedi légaquiëꞌ.
4 Uluꞌcáꞌanëꞌ le naca idútë li,
en ilaꞌzíꞌ lu náꞌagaquiëꞌ yuguꞌ didzaꞌ ridasö.
5 Naꞌa,
ral-laꞌ gacuꞌ zxön ladxiꞌ lu yúguꞌtë le runuꞌ.
Biáꞌ gulén le uluꞌsacaꞌ liꞌ ziꞌ.
Ben libán que didzaꞌ dxiꞌa.
Idú ládxuꞌu ben dxin le budödëꞌ Cristo lu noꞌo gunuꞌ.
6 Ca naca quiaꞌ nedaꞌ,
nudödi cuinaꞌ lu nëꞌë Dios,
ateꞌ chizóa ilútiëꞌ nedaꞌ tuꞌ runaꞌ xichinëꞌ,
ateꞌ dza uzáꞌa yödzölió ni chizóa idxín.
7 Ca runëꞌ tu bönniꞌ idú ládxëꞌë rejëꞌ gudil-la,
lëscaꞌ caní benaꞌ nedaꞌ dxin,
en chibudxi benaꞌ le budödëꞌ Cristo lu naꞌa gunaꞌ,
tuꞌ benaꞌ idú ca saꞌyéaj le réajlëꞌëruꞌ Cristo.
8 Iaꞌstú,
naca löza quiaꞌ idéliꞌdaꞌ le ral-laꞌ ilaꞌzíꞌ nupa nácagaca tsahuiꞌ,
le gunnëꞌ Xanruꞌ quiaꞌ dza niꞌ,
ateꞌ tsahuiꞌ naca ca ruchiꞌa rusörö́ëꞌ rëꞌu.
Calë́gasö quiaꞌ nedaꞌ gunnëꞌ le,
pero lëscaꞌ gunnëꞌ le quégaca yúguꞌtë nupa taꞌdxíꞌi Lëꞌ,
en idú ládxiꞌguequi taꞌböza dza huödëꞌ.
Le buzúajëꞌ lu guichi Pablo gunbiꞌ Timoteo
9 Bëꞌ ladxiꞌ guídateoꞌ ga ni zoaꞌ
10 tuꞌ guléaj ládxëꞌë Demas nedaꞌ,
tuꞌ nadxíꞌinëꞌ le ruziꞌë xibé yödzölió ni,
ateꞌ guyijëꞌ yödzö Tesalónica.
Crescente guyijëꞌ luyú Galacia,
ateꞌ biꞌi Tito guyéajbiꞌ luyú Dalmacia,
tuꞌ caní ben bayudxi ilunëꞌ.
11 Tuzëꞌ Lucas zóalenëꞌ nedaꞌ.
Guchë́ꞌë-biꞌ biꞌi Marcos para guídalenbiꞌ liꞌ tsözxö́n,
tuꞌ nácabiꞌ gúnlenbiꞌ nedaꞌ tsözxö́n xichinëꞌ Cristo.
12 Gusö́l-laꞌa-biꞌ biꞌi Tíquico lu yödzö Éfeso.
13 Cateꞌ guíduꞌ,
biáꞌ quiaꞌ lariꞌ guitsaꞌ naꞌ bucáꞌanaꞌ lu yödzö Troas lu yuꞌu lidxëꞌ Carpo,
en biáꞌ caꞌ quiaꞌ yuguꞌ guichi,
en le naca lo,
biáꞌ quiaꞌ yuguꞌ guichi néquiguequini guídi.
14 Alejandro,
bönniꞌ gubëdxi guíë,
zián le biꞌë döꞌ quiaꞌ.
Lë cazëꞌ Xanruꞌ ubiꞌë queëꞌ ca nácagaca le benëꞌ bönniꞌ ni quiaꞌ.
15 Ben chiꞌi cuinuꞌ queëꞌ bönniꞌ ni,
tuꞌ ridáꞌbagaꞌdëꞌë didzaꞌ runruꞌ libán que.
16 Cateꞌ le zíꞌalö luzuí bidxinaꞌ lógaquiëꞌ bönniꞌ yúlahuiꞌ,
cuntu nu gúcalen nedaꞌ,
pero buluꞌbéaj ládxiꞌgaca yúguꞌtë bönachi nedaꞌ.
Bitiꞌ rë́ꞌëndaꞌ uzíꞌ lëbëꞌ Dios légaquiëꞌ.
17 Guzóalenëꞌ Xanruꞌ nedaꞌ,
en butipëꞌ ládxaꞌa para údxi gunaꞌ libán que xtídzëꞌë para ilaꞌyöni yúguꞌtë bönachi izáꞌa le.
Caní guca,
busölë́ꞌ Xanruꞌ nedaꞌ,
ateꞌ guca quiaꞌ tsca burúajaꞌ lu ruáꞌabaꞌ bëdxi guixiꞌ.
18 Lë cazëꞌ Xanruꞌ usölë́ꞌ nedaꞌ lu yúguꞌtë le cabí raca dxiꞌa,
en gun chiꞌë nedaꞌ ga idxínteaꞌ ga rinná bëꞌë Lëꞌ niꞌ yehuaꞌ yubá.
¡Gácaticaꞌsö queëꞌ yöl-laꞌ ba yúguꞌtë dza záꞌgaca!
¡Caꞌ gaca!
Pablo rugapëꞌ Dios bönachi queëꞌ Cristo
19 Bugapa Dios Priscila,
en Aquilo,
encaꞌ bönachi nacuáꞌ lidxëꞌ Onesíforo.
20 Bugáꞌanëꞌ Erasto lu yödzö Corinto,
ateꞌ bucáꞌanaꞌ-nëꞌ Trófimo luyú Mileto tuꞌ réꞌenëꞌ.
21 Bëꞌ ladxiꞌ guíduꞌ ga zoaꞌ zíꞌalö cateꞌ idxín beoꞌ ziaga.
Eubulo,
en Pudente,
en Lino,
en Claudia,
en yúguꞌtë böchiꞌ luzáꞌaruꞌ ni tuꞌgapëꞌ Dios liꞌ.
22 Rinábidaꞌ-nëꞌ Xanruꞌ Jesucristo sóalenëꞌ liꞌ.
¡Gácalen liꞌ le ruzáꞌ ládxëꞌë Dios quiuꞌ!
¡Caꞌ gaca!