Ca ilaca bönachi dza tsöjsétëgaca
3
Lëscaꞌ ral-laꞌ inö́zinuꞌ lë ni:
Dza tsöjsétëgaca ilaca dza ilaꞌguíꞌi ilaꞌzacaꞌ bönachi.
2 Yuguꞌ dza niꞌ ilaꞌcuꞌë bönniꞌ ilácagaquiëꞌ caní:
Ilaꞌdxíꞌi laꞌ cuíngacasëꞌ,
en uluꞌhuídiꞌnëꞌ.
Ilún ba zxön cuíngaquiëꞌ,
en uluꞌluíꞌi cuíngaquiëꞌ zxön.
Ilaꞌnnë́ ziꞌë que le naca láꞌayi.
Ilaꞌdáꞌbaguëꞌë xuz xináꞌagaquiëꞌ.
Ilácagaquiëꞌ bönniꞌ cabí taꞌyaza ládxiꞌgaquiëꞌ.
Bitiꞌ ilunëꞌ ca rë́ꞌënëꞌ Dios.
3 Bitiꞌ ilaꞌdxíꞌinëꞌ ca ral-laꞌ ilunëꞌ.
Ilácagaquiëꞌ zidzaj ladxiꞌ.
Ilaꞌnnë́ꞌ que luzáꞌagaquiëꞌ.
Bitiꞌ ilaꞌnná beꞌe cuíngaquiëꞌ.
Ilácagaquiëꞌ bönniꞌ dzaꞌa.
Bitiꞌ ilaꞌléꞌenëꞌ dxiꞌa le naca dxiꞌa.
4 Ilácagaquiëꞌ hueti luzë́ꞌe,
en bitiꞌ ilaꞌdzáguiëꞌ dxiꞌa.
Uluꞌluíꞌi cuíngaquiëꞌ ca bönniꞌ nayë́pisëgaquiëꞌ.
llaꞌdxíꞌinëꞌ le ilaꞌyázasö ládxiꞌgaquiëꞌ,
en calëga Dios.
5 Uluꞌluíꞌi cuíngaquiëꞌ ca bönniꞌ núnbëꞌgaquiëꞌ Dios.
Ilaꞌdáꞌbaguëꞌë le ruzáꞌ ládxëꞌë Dios queë́ruꞌ.
Gucuíta ga nacuáꞌ bönachi caní.
6 Lëscaꞌ caní,
lu yöl-laꞌ banísa quégaquiëꞌ ilaꞌyazëꞌ gapa naca lu yuꞌu,
en ilaꞌzíꞌ yéꞌenëꞌ yuguꞌ nigula bitiꞌ bi nö́zguequinu para ilaꞌzíꞌ lu náꞌagacanu le uluꞌsédinëꞌ.
Ilaꞌbágaꞌnu nigula naꞌ dul-laꞌ zián,
en iluíꞌi ládxiꞌgacanu yuguꞌ le ilaꞌzësö ládxiꞌgacanu le cabí nazacaꞌ.
7 Ilaꞌyö́niticaꞌsinu nigula ni didzaꞌ ilún libán que bönachi,
pero bitiꞌ caꞌ ilaꞌdéliꞌnu ilaꞌyéajniꞌininu le naca idútë li.
8 Ca naꞌ guláquiëꞌ Janes,
en Jambres,
bönniꞌ niꞌ gulaꞌdáꞌbaguëꞌë Moisés,
lëscaꞌ caní ilácagaquiëꞌ bönniꞌ ni,
ilaꞌdáꞌbaguëꞌë le naca idútë li.
Ilácagaquiëꞌ chul-la niti,
en ilaꞌchíxinëꞌ ca naca le réajlëꞌëruꞌ Cristo.
9 Bitiꞌ ilaꞌdéliꞌrönëꞌ,
pero gaca bëꞌ nácagaquiëꞌ bönniꞌ bitiꞌ bi nö́zguequinëꞌ lógaca yúguꞌtë bönachi,
ateꞌ gaca quégaquiëꞌ ca naꞌ guca quégaquiëꞌ Janes,
en Jambres naꞌ.
Le riguꞌë Pablo lu náꞌabiꞌ biꞌi Timoteo
10 Nöz quézinuꞌ ca naca le rusédidaꞌ bönachi,
en ca runaꞌ.
Nö́zinuꞌ caꞌ le ruíꞌi ládxaꞌa gunaꞌ,
en ca réajlëꞌa Cristo,
en ca nacaꞌ nöxaj ladxiꞌ,
en ca nadxíꞌidaꞌ luzáꞌa,
en ca ribözaꞌ zxön ladxiꞌ.
11 Nö́zinuꞌ caꞌ yuguꞌ le gulaꞌbía ládxiꞌgaca bönachi nedaꞌ,
en yuguꞌ le gudíꞌi guzxácaꞌa,
le gulaca quiaꞌ lu yödzö Antioquía,
en lu yödzö Iconio,
encaꞌ lu yödzö Listra.
Yuguꞌ le gulaꞌbía ládxiꞌgaca bönachi niꞌ nedaꞌ biáꞌ gulénaꞌ,
ateꞌ Xanruꞌ Jesús busölë́ꞌ nedaꞌ lu yúguꞌtë lë naꞌ.
12 Yúguꞌtë nupa të́ꞌëni ilaca idú dxiꞌa tuꞌ néquiguequi queëꞌ Jesucristo,
lëscaꞌ ilaꞌguíꞌi ilaꞌzáquiëꞌ yuguꞌ le ilaꞌbía ládxiꞌgaca bönachi légaquiëꞌ.
13 Naꞌa,
bönniꞌ tuáꞌ döꞌ,
en bönniꞌ taꞌzíꞌ yëꞌë ilácarëꞌ xihuiꞌ.
Ilaꞌzíꞌ yéꞌenëꞌ bönachi,
ateꞌ ilaꞌzíꞌ yeꞌe bönachi caꞌ légaquiëꞌ.
14 Naꞌa,
ben chiꞌi yuguꞌ le buzëduꞌ,
en le guzxíꞌ lu noꞌo,
tuꞌ nunbëꞌ cazuꞌ nupa buluꞌsedi liꞌ.
15 Ga gudelaꞌ nacuꞌ bíꞌidoꞌ núnbëꞌu le nazúajgaca lu guichi láꞌayi,
le huáca uluꞌzéajniꞌideꞌe liꞌ para ulóꞌ tuꞌ réajlëꞌu Jesucristo.
16 Yúguꞌtë le nazúajgaca lu guichi láꞌayi guchíziëꞌ Dios icja ládxiꞌdoꞌgaca bönachi queëꞌ,
nupa naꞌ buluꞌzúaj lu guichi didzaꞌ naꞌ bëꞌë Dios.
Lë naꞌ nazúaj lu guichi nácadaꞌ lesacaꞌ usedi rëꞌu,
en ubéaj ga lináꞌ le runruꞌ,
en ugúꞌu rëꞌu tu nöza,
en usedi rëꞌu para gácaruꞌ tsahuiꞌ.
17 Caní run,
para gaca sinaꞌ nu naca queëꞌ Dios,
en gácadaꞌ gun yúguꞌtë le naca dxiꞌa.