Ral-laꞌ gácabiꞌ Timoteo ca tu bönniꞌ idú ládxëꞌë rejëꞌ gudil-la
2
Naꞌa,
zxíꞌinaꞌdoꞌ,
butipa ládxuꞌu ca naca le ruzáꞌ ládxëꞌë Jesucristo quiuꞌ.
2 Didzaꞌ biyönnuꞌ bëꞌa lógaca zián nupa tun ba nalí que,
didzaꞌ ni budödi lu náꞌagaquiëꞌ bönniꞌ tunëꞌ ca taꞌnnë́ꞌ,
bönniꞌ gaca uluꞌsédinëꞌ caꞌ iaꞌbal-la bönachi.
3 Ral-laꞌ guáꞌ ilenuꞌ le uluꞌsacaꞌ liꞌ ziꞌ ca naꞌ ruáꞌ rilén nu naca bönniꞌ queëꞌ Jesucristo idú ládxëꞌë rejëꞌ gudil-la.
4 Nu bönniꞌ rejëꞌ gudil-la,
bitiꞌ caꞌ gútsëꞌë yuguꞌ le tun bönachi yödzölió ni,
para tsaza ládxëꞌë bönniꞌ naꞌ nuzóëꞌ lëꞌ gáquiëꞌ bönniꞌ queëꞌ rejëꞌ gudil-la.
5 Lëscaꞌ caní,
nu nutsaꞌ lu huitaj,
bitiꞌ bi ideliꞌ channö cabí run ca ral-laꞌ gun.
6 Nu bönniꞌ gúz gúꞌuna runëꞌ dxin,
zíꞌalö lëꞌ uziꞌë xibé lë naꞌ razëꞌ.
7 Busáꞌ ládxuꞌu lë ni reaꞌ liꞌ,
ateꞌ Xanruꞌ caz gunëꞌ ga tséajniꞌinuꞌ yúguꞌtë.
8 Yöjné ca guca queëꞌ Jesucristo.
Guljëꞌ,
en gúquiëꞌ zxíꞌini xiꞌsóëꞌ David,
en gudödi gútiëꞌ,
bubanëꞌ lu yöl-laꞌ guti.
Caní rnna didzaꞌ dxiꞌa runaꞌ libán que.
9 Tuꞌ runaꞌ libán que didzaꞌ dxiꞌa,
riguíꞌi rizácaꞌa le raca quiaꞌ,
ga ridxintë nágaꞌa lidxi guíë ni,
ca raca queëꞌ tu bönniꞌ huíaꞌ döꞌ,
pero bitiꞌ caꞌ nágaꞌtë xtídzëꞌë Dios.
10 Que lë ni naꞌ ruáꞌ rilénaꞌ yúguꞌtë lë ni tuꞌ nadxíꞌidaꞌ nupa gurö́ëꞌ Dios,
para uluꞌlë́ꞌ caꞌ légaquiëꞌ.
Jesucristo caz runëꞌ ga uluꞌlágaca bönachi naꞌ para ilaꞌcuáꞌ lu beníꞌ idú queëꞌ.
11 Catëz naca lë ni rnna:
Channö nátilenruꞌ Lëꞌ,
sóalenruꞌ-nëꞌ caꞌ ibanruꞌ.
12 Channö guáꞌ ilenruꞌ le quíꞌi sácaꞌruꞌ,
inná bë́ꞌlenruꞌ caꞌ Lëꞌ.
Channö ridáꞌbagaꞌruꞌ Lëꞌ,
Lëꞌ táꞌbaguëꞌë caꞌ rëꞌu.
13 Sal-laꞌ bitiꞌ runruꞌ ca rnnaruꞌ,
Lëꞌ rúnticaꞌsëꞌ ca rnnëꞌ.
Lëꞌ bitiꞌ gaca táꞌbaguëꞌë le náquiëꞌ.
Nu bönniꞌ huen dxin queëꞌ Cristo rurúajëꞌ dxiꞌa
14 Busáꞌ ládxiꞌgaca nupa nacuáꞌ ga niꞌ zuꞌ ca naca lë ni,
ateꞌ niꞌa queëꞌ Xanruꞌ Dios gunná beꞌe légaquiëꞌ para cabí ilaꞌdil-la dídzëꞌë ca nácagaca didzaꞌ cabí nazácaꞌgaca.
Yuguꞌ didzaꞌ caní tun ga ilaꞌniti nupa tuꞌzë́ nagui léguequi.
15 Bë́ꞌticaꞌsö ládxuꞌu urúajuꞌ dxiꞌa lahuëꞌ Dios para gacuꞌ ca tu bönniꞌ huen dxin bitiꞌ rutuíꞌinëꞌ ca naca dxin nunëꞌ.
Dxíꞌadoꞌ ral-laꞌ ugunuꞌ dxin didzaꞌ idútë li.
16 Naꞌa,
gucuíta ga nacuáꞌ nupa tuíꞌi didzaꞌ bitiꞌ nazacaꞌ,
en didzaꞌ cáꞌasö,
tuꞌ tun didzaꞌ caní ga ilunrëꞌ le cabí rë́ꞌënëꞌ Dios.
17 Ilaꞌzë́ didzaꞌ tuꞌë ca rizxö́n huëꞌ nudzuꞌ le ridúduꞌ rilá.
Himeneo,
en Fileto nabábagaquiëꞌ nupa tuíꞌi didzaꞌ caní.
18 Iropëꞌ ni gulaꞌchixi gulaꞌníguinëꞌ ca naca le naca idútë li,
tuꞌ taꞌnnë́ꞌ chigudödi dza ral-laꞌ uluꞌbán nupa chinátigaca,
ateꞌ gulaꞌbéquiëꞌ barö́li bal-la bönachi ga ridxintë bítiꞌrö taꞌyéajlëꞌ Cristo.
19 Le benëꞌ tsutsu Dios zóaticaꞌsö,
en dë tu le naca bëꞌ,
le rnna:
“Núnbëꞌë Dios nupa néquiguequi queëꞌ.”
Rnna caꞌ:
“Guliꞌcuíta ga raca le ruáꞌ döꞌ,
yúguꞌtëliꞌ libíꞌiliꞌ néquiliꞌ queëꞌ Cristo.”
20 Tu lu yuꞌu zxön yúꞌugaca le néquini,
calë́gasö oro,
en plata,
pero lëscaꞌ le néquini yaga,
en yu.
Bal-la tuꞌgún bönachi léguequi dxin ga lináꞌ,
ateꞌ iaꞌbal-la tuꞌgún léguequi dxin ga bitiꞌ naca lináꞌ.
21 Para gácaruꞌ ca naca lë naꞌ tuꞌgún bönachi dxin ga lináꞌ,
en para gaca gunruꞌ le naca dxiꞌa,
en gácaruꞌ lesacaꞌ ugunëꞌ Xanruꞌ rëꞌu dxin,
ral-laꞌ ucuítaruꞌ ga raca le ruáꞌ döꞌ.
Channö gunruꞌ caní,
gácaruꞌ lesacaꞌ gunruꞌ yúguꞌtë dxin dxiꞌa.
22 Gurúꞌuna le tun ga nu së ladxiꞌ le ruáꞌ döꞌ ca raca quégaquiëꞌ bönniꞌ raꞌbandoꞌ.
Bëꞌ ladxiꞌ gacuꞌ tsahuiꞌ.
Ben le run ga réajlëꞌu Cristo,
en le run ga nadxíꞌinuꞌ yuguꞌ luzóꞌo,
en le run ga ribözuꞌ dxíꞌadoꞌ.
Ca nácagaca lë ni,
ben tsözxö́n nupa tuꞌlidza Xanruꞌ,
naca idú dxiꞌa icja ládxiꞌdoꞌguequi.
23 Naꞌa,
gurúꞌuna yuguꞌ didzaꞌ cáꞌasö,
en didzaꞌ bitiꞌ nazacaꞌ,
tuꞌ chinö́z quézinuꞌ tun didzaꞌ caní ga taꞌdil-la didzaꞌ bönachi.
24 Bönniꞌ huen dxin queëꞌ Xanruꞌ bitiꞌ ral-laꞌ tíl-lalenëꞌ bönachi didzaꞌ,
pero ral-laꞌ gáquiëꞌ nöxaj ladxiꞌ lógaca yúguꞌtë bönachi.
Ral-laꞌ gaca usédinëꞌ bönachi,
en gáquiëꞌ caꞌ zxön ladxiꞌ.
25 Lu yöl-laꞌ nöxaj ladxiꞌ ral-laꞌ uzéajniꞌinëꞌ nupa taꞌdáꞌbagaꞌ le runëꞌ libán que.
Channö gunëꞌ caní,
nadxi caꞌ Dios guꞌë légaquiëꞌ lataj uluꞌbíꞌi ládxiꞌgaquiëꞌ para ilúnbëꞌë le naca idútë li.
26 Caní uluꞌlë́ꞌ lu yalaj que tuꞌ xihuiꞌ ga nadzúngaquiëꞌ,
ateꞌ uluꞌhuöáquiëꞌ tsahuiꞌ para ilunëꞌ ca rë́ꞌënëꞌ Dios.