5
Naꞌa,
ca naca dza naꞌ,
o rëla naꞌ cateꞌ ilaca lë ni,
bitiꞌ run bayudxi uzúajaꞌ queë́liꞌ lu guichi,
böchiꞌ luzáꞌatuꞌ.
2 Libíꞌiliꞌ chinö́z quéziliꞌ dxiꞌa ca gaca dza cateꞌ huödëꞌ Xanruꞌ.
Idxinëꞌ tsálidoꞌos ca ridxinëꞌ gubán chiꞌi dzö́ꞌölö.
3 Cateꞌ ilaꞌnná bönachi:
“Raca dxiꞌa queë́ruꞌ,
en bitiꞌ bi gaca queë́ruꞌ”,
níꞌirö laꞌ idxintë le usuniti léguequi,
lë naꞌ idxín quéguequi ca naꞌ ridxín le riguíꞌi rizácaꞌnu nigula naꞌ chizóa sóabiꞌ bíꞌidoꞌ queë́nu,
ateꞌ cuntu nu nutsaꞌ ladaj bönachi yödzölió ni nu ulá cateꞌ gaca lë naꞌ gaca dza naꞌ.
4 Naꞌa,
böchiꞌ luzáꞌatuꞌ,
bitiꞌ zóaliꞌ chul-la niti,
en que lë ni naꞌ bitiꞌ idxín dza niꞌ queë́liꞌ bagáchiꞌsö ca ridxinëꞌ bönniꞌ gubán.
5 Yúguꞌtëliꞌ nácaliꞌ bönachi que beníꞌ,
en que lahuiꞌ dza.
Bitiꞌ nácaruꞌ bönachi que chiꞌi dzö́ꞌölö,
en calëga que le naca chul-la.
6 Que lë ni naꞌ,
bitiꞌ ral-laꞌ tödi yëla loruꞌ ca raca quégaca nupa bitiꞌ nabábagaca rëꞌu,
pero ral-laꞌ usubán ládxiꞌruꞌ,
en cö́zaruꞌ baꞌa ládxiꞌdoꞌ.
7 Nupa tasi,
chiꞌi dzö́ꞌölö tasi,
en nupa taꞌzudxi,
chiꞌi dzö́ꞌölö caꞌ taꞌzudxi.
8 Naꞌa,
rëꞌu ni,
nácaruꞌ que lahuiꞌ dza,
en ral-laꞌ cö́zaruꞌ baꞌa ládxiꞌdoꞌ,
tuꞌ chinácuruꞌ zxaruꞌ le run chiꞌi rëꞌu,
le naca yöl-laꞌ réajlëꞌ queë́ruꞌ Dios,
en yöl-laꞌ nadxíꞌi,
ateꞌ le runruꞌ löza uláruꞌ naca ca tu luꞌu guíë le run chiꞌi ícjaruꞌ.
9 Caní naca,
tuꞌ nuzóëꞌ Dios rëꞌu ni,
calëga para idxinruꞌ ga ichúguiëꞌ queë́ruꞌ,
pero para uláruꞌ tuꞌ ruzxöni ládxiꞌruꞌ-nëꞌ Xanruꞌ Jesucristo,
10 tuꞌ gútiëꞌ Jesús uláz queë́ruꞌ para sóaruꞌ ibanruꞌ tsözxö́n len Lëꞌ cateꞌ huödëꞌ,
sal-laꞌ chinátiruꞌ o sóaruꞌ ibanruꞌ dza niꞌ.
11 Que lë ni naꞌ ral-laꞌ utípaliꞌ ládxiꞌliꞌ tuliꞌ iaꞌtuliꞌ,
en gunliꞌ tsutsu tuliꞌ iaꞌtuliꞌ ca naꞌ chirunliꞌ.
Pablo richíziëꞌ icja nágagaquiëꞌ böchiꞌ luzë́ꞌë taꞌyéajlëꞌë Cristo
12 Rátaꞌyutuꞌ loliꞌ,
böchiꞌ luzáꞌatuꞌ,
gúnbëꞌëliꞌ nupa tun xichinëꞌ Xanruꞌ ga zóaliꞌ,
nupa naꞌ taꞌnná beꞌe libíꞌiliꞌ uláz queëꞌ Xanruꞌ,
en tuꞌsáꞌ ládxiꞌliꞌ.
13 Rátaꞌyutuꞌ loliꞌ caꞌ,
gunliꞌ légaquiëꞌ bal lu yöl-laꞌ nadxíꞌi queë́liꞌ,
tuꞌ tunëꞌ dxin naꞌ.
Guliꞌcöza dxíꞌadoꞌ tuliꞌ len iaꞌtuliꞌ.
14 Lëscaꞌ caní richízatuꞌ icja nágaliꞌ,
böchiꞌ luzáꞌatuꞌ,
para usáꞌaliꞌ ládxiꞌgaca nupa bitiꞌ túngaca dxin,
en utípaliꞌ ládxiꞌgaca nupa tuꞌhuö́aj ládxiꞌguequi,
en gácalenliꞌ nupa bitiꞌ naca tsutsu ca taꞌyéajlëꞌ Cristo,
en gácaliꞌ nöxaj ladxiꞌ lógaca yúguꞌtë bönachi.
15 Guliꞌgún chiꞌi cuinliꞌ para cabí uzíꞌ lëbi luzáꞌaliꞌ,
en cabí guáꞌaliꞌ döꞌ que nu ruáꞌ döꞌ queë́liꞌ,
pero guliꞌgüíꞌ ládxiꞌliꞌ gúnticaꞌsiliꞌ le naca dxiꞌa que luzáꞌaliꞌ tuliꞌ iaꞌtuliꞌ,
en quégaca yúguꞌtë bönachi.
16 Buliꞌdzéjaticaꞌsö,
17 en buliꞌlídzaticaꞌsëꞌ Dios,
18 en guliꞌguíëꞌ Lëꞌ:
“Xclenuꞌ.”
Caní ral-laꞌ gunliꞌ niꞌa que yúguꞌtë le raca queë́liꞌ,
tuꞌ nácagaca lë ni le rë́ꞌënëꞌ Dios gunliꞌ tuꞌ nácaliꞌ queëꞌ Jesucristo.
19 Bitiꞌ uzóa dxiliꞌ le rulídzaticaꞌsëꞌ Dios Böꞌ Láꞌayi libíꞌiliꞌ.
20 Bitiꞌ uzóaliꞌ tsöláꞌalö xtídzëꞌë bönniꞌ ruꞌë didzaꞌ uláz queëꞌ Dios.
21 Guliꞌsíꞌ bëꞌ yúguꞌtë,
en guliꞌsíꞌ lu náꞌaliꞌ le naca dxiꞌa.
22 Bitiꞌ bi gútsaꞌliꞌ le ruáꞌ döꞌ.
23 Lë cazëꞌ Dios,
Nu run ga zoa dxi icja ládxiꞌdoꞌoruꞌ,
gunëꞌ ga gácaliꞌ idú dxiꞌa,
en gun chiꞌë böꞌ naca cázaliꞌ,
en icja ládxiꞌdoꞌoliꞌ,
en idútë le nácaliꞌ,
ateꞌ cuntu nu gaca bi innë́ queë́liꞌ dza niꞌ huödëꞌ Xanruꞌ Jesucristo.
24 Runëꞌ Dios ca rnnëꞌ,
Bönniꞌ naꞌ bulidzëꞌ libíꞌiliꞌ.
Lë cazëꞌ gunëꞌ yuguꞌ lë ni.
Pablo riguꞌë yuguꞌ böchiꞌ luzë́ꞌë lu nëꞌë Dios
25 Böchiꞌ luzáꞌatuꞌ,
buliꞌlidzëꞌ Dios,
en inábiliꞌ-nëꞌ gácalenëꞌ netuꞌ.
26 Buliꞌgapa Dios yúguꞌtë böchiꞌ luzáꞌaruꞌ,
en unídaꞌliꞌ légaquiëꞌ lu yöl-laꞌ nadxíꞌi queë́liꞌ.
27 Niꞌa queëꞌ Xanruꞌ Dios ruchiꞌa libíꞌiliꞌ ulábaliꞌ guichi ni lógaca yúguꞌtë böchiꞌ luzáꞌaruꞌ nabábagaquiëꞌ Cristo.
28 Rinábidaꞌ-nëꞌ Xanruꞌ Jesucristo uzáꞌ ládxëꞌë queë́liꞌ le nácagaca dxiꞌa queëꞌ.
¡Caꞌ gaca!