Le runruꞌ le raza ládxëꞌë Dios
4
Iaꞌstú,
böchiꞌ luzáꞌatuꞌ,
niꞌa queëꞌ Xanruꞌ Jesús rátaꞌyutuꞌ loliꞌ,
en richízatuꞌ icja nágaliꞌ para gunliꞌ ca naca le chinazë́daliꞌ lu naꞌtuꞌ ca ral-laꞌ gunliꞌ le raza ládxëꞌë Dios.
Ca naꞌ chirunliꞌ,
caꞌ ral-laꞌ gúnticaꞌsiliꞌ.
2 Chinö́z quéziliꞌ yuguꞌ le gunná béꞌetuꞌ libíꞌiliꞌ uláz queëꞌ Xanruꞌ Jesús.
3 Le rë́ꞌënëꞌ Dios naca gácaliꞌ idú dxiꞌa,
en bítiꞌrö gunliꞌ le cabí naca tsahuiꞌ,
4 en inö́ziliꞌ tu tuliꞌ nacxi ral-laꞌ sóalenliꞌ-nu nigula que queë́liꞌ idú ca saꞌyéaj le naca láꞌayi,
en gunliꞌ légacanu bal.
5 Bitiꞌ ral-laꞌ sóalenliꞌ-nu nigula queë́liꞌ lu yöl-laꞌ rizë́ ladxiꞌ le ruáꞌ döꞌ,
ca naꞌ tun bönachi bitiꞌ nabábagaca Dios,
en bitiꞌ núnbëꞌgaca Dios.
6 Ca nácagaca lë ni,
cuntu nu ral-laꞌ tödi bëꞌ,
en cabí siꞌ yeꞌe böchiꞌ luzë́ꞌe bagáchiꞌsö,
tuꞌ ichúguiëꞌ Lë cazëꞌ Xanruꞌ quégaca yúguꞌtë nupa tun le caní,
gunëꞌ ca naꞌ chigúdxituꞌ libíꞌiliꞌ,
en bentuꞌ ba nalí que loliꞌ.
7 Dios bulidzëꞌ rëꞌu,
calëga para gunruꞌ le ruáꞌ döꞌ,
pero para gácaruꞌ idú dxiꞌa.
8 Caní naca,
nu ruzóa tsöláꞌalö lë ni,
calëga bönáchisö ruzóa tsöláꞌalö,
pero Dios caz ruzóa tsöláꞌalö,
tuꞌ gusö́l-lëꞌë Lë cazëꞌ Dios Böꞌ Láꞌayi queë́ruꞌ,
Nu ruíꞌi caní didzaꞌ.
9 Bitiꞌ run bayudxi uzúajaꞌ queë́liꞌ lu guichi ca ral-laꞌ idxíꞌigacaliꞌ-nëꞌ böchiꞌ luzáꞌaliꞌ,
tuꞌ chinazë́daliꞌ laꞌ libíꞌisiliꞌ lu nëꞌë Dios idxíꞌiliꞌ luzáꞌaliꞌ tuliꞌ iaꞌtuliꞌ.
10 Le nácatë nadxíꞌigacaliꞌ-nëꞌ yúguꞌtë böchiꞌ luzáꞌaruꞌ nacuꞌë luyú Macedonia.
Naꞌa,
rátaꞌyutuꞌ loliꞌ,
böchiꞌ luzáꞌatuꞌ,
para idxíꞌigacaröliꞌ-nëꞌ caꞌ yúguꞌtë böchiꞌ luzáꞌaliꞌ.
11 Rátaꞌyutuꞌ loliꞌ caꞌ,
güíꞌi ládxiꞌliꞌ cö́zaliꞌ dxíꞌadoꞌ,
en gunliꞌ yuguꞌ le dë lu náꞌasiliꞌ,
en gunliꞌ dxin len naꞌa cuinliꞌ ca naꞌ chigunná béꞌetuꞌ libíꞌiliꞌ.
12 Gunná béꞌetuꞌ libíꞌiliꞌ caní para gaca gunliꞌ le naca dxíꞌadoꞌ lógaca nupa bitiꞌ nabábagaca libíꞌiliꞌ,
en caní gaca,
bitiꞌ bi yadzaj queë́liꞌ.
Ca gaca cateꞌ huödëꞌ Xanruꞌ Jesucristo
13 Lëscaꞌ,
böchiꞌ luzáꞌatuꞌ,
rë́ꞌënituꞌ inö́ziliꞌ ca raca quégaca nupa chinátigaca,
para cabí huíꞌiniliꞌ ca tun iaꞌzícaꞌrö bönachi bitiꞌ zoa le tun löza.
14 Channö réajlëꞌëruꞌ gútiëꞌ Jesús,
en bubanëꞌ,
lëscaꞌ caní ral-laꞌ uzxöni ládxiꞌruꞌ-nëꞌ Dios gunëꞌ ga huö́dalengaca tsözxö́n Jesús nupa niꞌ chigulati,
en gulaꞌyéajlëꞌ Lëꞌ.
15 Que lë ni naꞌ riguíxjöiꞌituꞌ libíꞌiliꞌ xtídzëꞌë Xanruꞌ le rnna caní:
“Rëꞌu ni zóaruꞌ nabanruꞌ,
en ugáꞌanaruꞌ ga idxinrö dza huödëꞌ Xanruꞌ Jesucristo,
bitiꞌ tsöjtságaruꞌ-nëꞌ Cristo zíꞌalö ca nupa chigulati.”
16 Caní gaca,
tuꞌ huötjëꞌ Lë cazëꞌ Xanruꞌ,
en irúajëꞌ yehuaꞌ yubá,
ateꞌ yön chiꞌë,
len yöl-laꞌ unná bëꞌ ulidzëꞌ,
ateꞌ yön caꞌ chiꞌë gubáz láꞌayi lo,
ateꞌ yön caꞌ luzu ucödxëꞌ Dios,
ateꞌ uluꞌbán nupa naꞌ chigulati,
en gulaꞌyéajlëꞌ Cristo.
17 Níꞌirö rëꞌu ni zóaruꞌ nabanruꞌ,
en nagáꞌanaruꞌ luyú ni,
uchisëꞌ rëꞌu tsözxö́n len léguequi lu böaj lúzxiba para tsöjtságaruꞌ-nëꞌ Xanruꞌ lu böꞌös.
Caní gaca,
sóalenticaꞌsiruꞌ-nëꞌ Xanruꞌ.
18 Que lë ni naꞌ,
guliꞌhuíꞌ zxön luzáꞌaliꞌ tuliꞌ iaꞌtuliꞌ ca nácagaca didzaꞌ ni.