3
Que lë ni naꞌ,
cateꞌ bítiꞌrö guca guáꞌ ilentuꞌ,
ben xtídzaꞌtuꞌ ugáꞌanatuꞌ chópatuꞌ lu yödzö Atenas,
2 ateꞌ gusö́l-laꞌtuꞌ-biꞌ biꞌi bö́chiꞌruꞌ,
Timoteo ga zóaliꞌ.
Nácabiꞌ biꞌi huen dxin queëꞌ Dios,
en rúnlenbiꞌ nedaꞌ tsözxö́n libán que didzaꞌ dxiꞌa queëꞌ Cristo.
Gusö́l-laꞌtuꞌ-biꞌ ga zóaliꞌ para cuéquibiꞌ libíꞌiliꞌ tsutsu,
en ichízabiꞌ icja nágaliꞌ ca ral-laꞌ tséajlëꞌëliꞌ Cristo,
3 para cabí soa nu gaca chopa ladxiꞌ niꞌa que le tuꞌsacaꞌ ziꞌ bönachi ni netuꞌ.
Nöz quéziliꞌ zóaruꞌ yödzölió ni para guáꞌ ilenruꞌ le caní.
4 Lëscaꞌ cateꞌ niꞌ guzóalentuꞌ libíꞌiliꞌ,
busiyöntuꞌ libíꞌiliꞌ ca chizóa gaca le uluꞌsacaꞌ ziꞌ rëꞌu,
le gaca ca naꞌ chiguca queë́tuꞌ,
ateꞌ nöz quéziliꞌ lë naꞌ.
5 Que lë ni naꞌ,
cateꞌ bítiꞌrö guca guáꞌ ilenaꞌ,
gusö́l-laꞌa-biꞌ biꞌi Timoteo ga zóaliꞌ,
para ududíxjöiꞌibiꞌ nedaꞌ ca naca queë́liꞌ ca réajlëꞌëliꞌ-nëꞌ Cristo,
en channö cabí gulúꞌu tuꞌ xihuiꞌ libíꞌiliꞌ nöza dul-laꞌ,
nu naꞌ rigúꞌu bönachi nöza dul-laꞌ,
en channö cabí böáca nítisö dxin naꞌ bentuꞌ ga zóaliꞌ.
6 Cateꞌ buzáꞌabiꞌ biꞌi Timoteo ga zóaliꞌ,
en budxinbiꞌ ga zóatuꞌ,
busiyönbiꞌ netuꞌ le naca dxiꞌa.
Bë́ꞌëbiꞌ didzaꞌ ca naꞌ réajlëꞌëliꞌ Cristo,
en ca naꞌ nadxíꞌigacaliꞌ-nëꞌ yuguꞌ böchiꞌ luzáꞌaruꞌ,
en ca naꞌ,
lu yöl-laꞌ dxiꞌi ladxiꞌ queë́liꞌ röjnéticaꞌsiliꞌ netuꞌ,
encaꞌ ca naꞌ raca ládxiꞌliꞌ uléꞌeliꞌ netuꞌ,
ca naꞌ netuꞌ raca ládxiꞌtuꞌ caꞌ uléꞌetuꞌ libíꞌiliꞌ.
7 Que lë ni naꞌ,
böchiꞌ luzáꞌatuꞌ,
cateꞌ niꞌ gudíꞌi guzxácaꞌtuꞌ yúguꞌtë lë ni,
en zián le guca queë́tuꞌ,
bidxín didzaꞌ queë́tuꞌ le buíꞌi zxön netuꞌ cateꞌ biyö́nituꞌ ca réajlëꞌëliꞌ-nëꞌ Cristo.
8 Naꞌa,
nuhuöáca ládxiꞌtuꞌ tuꞌ riyö́nituꞌ rö́ꞌöliꞌ tsutsu ca réajlëꞌëliꞌ-nëꞌ Xanruꞌ.
9 ¿Nacxi caz gaca guíëtuꞌ-nëꞌ Dios:
“Xclenuꞌ” ca ral-laꞌ guntuꞌ niꞌa que yúguꞌtë le run ga rudzeja ládxiꞌtuꞌ lahuëꞌ Dios queë́ruꞌ niꞌa que le nácaliꞌ libíꞌiliꞌ?
10 Bayudxi rulidztuꞌ-nëꞌ Dios,
en rinábituꞌ-nëꞌ rëla,
en të dza para gaca uléꞌetuꞌ libíꞌiliꞌ,
en usáꞌatuꞌ le riyadzaj queë́liꞌ ca naca le réajlëꞌëliꞌ-nëꞌ Cristo.
11 Naꞌa rinábituꞌ-nëꞌ Xúziruꞌ Dios,
encaꞌ Xanruꞌ Jesucristo,
cuꞌë netuꞌ nöza ga idxintuꞌ ga zóaliꞌ.
12 Lëscaꞌ rinábituꞌ-nëꞌ Xanruꞌ gunëꞌ ga gala,
en gaca idú ca nadxíꞌiliꞌ luzáꞌaliꞌ tuliꞌ iaꞌtuliꞌ,
en ca nadxíꞌiliꞌ yúguꞌtë bönachi,
ca naꞌ netuꞌ nadxíꞌituꞌ caꞌ libíꞌiliꞌ.
13 Rinábituꞌ-nëꞌ gunëꞌ ga gaca tsutsu,
en idú dxiꞌa icja ládxiꞌdoꞌoliꞌ lahuëꞌ Xúziruꞌ Dios ca saꞌyéaj le naca láꞌayi,
ateꞌ gunëꞌ caní ga idxinrö dza huödëꞌ Xanruꞌ Jesucristo,
dzágagaca bönachi láꞌayi queëꞌ Lëꞌ.