Xichinëꞌ Dios benëꞌ Pablo yödzö Tesalónica
2
Böchiꞌ luzáꞌatuꞌ,
nöz quéziliꞌ bitiꞌ guca nítisö dxin queëꞌ Dios bentuꞌ cateꞌ niꞌ bidxintuꞌ ga zóaliꞌ.
2 Nö́ziliꞌ ca guca queë́tuꞌ lu yödzö Filipos,
ca naꞌ gudíꞌi guzxácaꞌtuꞌ,
ateꞌ guluáꞌ döꞌ bönachi niꞌ queë́tuꞌ.
Níꞌirö cateꞌ bidxintuꞌ ga zóaliꞌ gúcatuꞌ rugu ladxiꞌ tuꞌ guzóalenëꞌ Dios queë́ruꞌ netuꞌ,
ateꞌ bentuꞌ libán loliꞌ que didzaꞌ dxiꞌa le budödëꞌ Dios lu naꞌtuꞌ.
Caní bentuꞌ sal-laꞌ gulaꞌdáꞌbagaꞌdaꞌ bönachi ládzaliꞌ netuꞌ.
3 Cateꞌ niꞌ guchízatuꞌ icja nágaliꞌ xtídzëꞌë Dios,
bë́ꞌëtuꞌ didzaꞌ,
calëga tuꞌ nazíꞌi yeꞌe netuꞌ,
en calëga tuꞌ bi guzë́ ládxiꞌtuꞌ le dë queë́liꞌ,
en bitiꞌ guzxíꞌ yéꞌetuꞌ libíꞌiliꞌ.
4 Tuꞌ nuzxöni ládxëꞌë Dios netuꞌ,
budödëꞌ lu naꞌtuꞌ guntuꞌ libán que didzaꞌ dxiꞌa queëꞌ,
ateꞌ canísö ruíꞌituꞌ didzaꞌ.
5 Nöz quéziliꞌ catu caz bë́ꞌlentuꞌ libíꞌiliꞌ didzaꞌ le gun zxön libíꞌiliꞌ,
en bitiꞌ guléaj tsahuiꞌ cuintuꞌ ca run nu bi rizë́ ladxiꞌ le dë queë́liꞌ.
Nöz quézinëꞌ Dios naca caní.
6 Bitiꞌ gudíljatuꞌ yöl-laꞌ ba le naca que yödzölió ni,
lë naꞌ cúꞌuliꞌ libíꞌiliꞌ netuꞌ,
en calëga le ilaꞌgúꞌu bönachi netuꞌ.
Sal-laꞌ dë lu naꞌtuꞌ inná béꞌetuꞌ libíꞌiliꞌ tuꞌ nácatuꞌ gubáz nasö́l-lëꞌë Cristo
7 guzóalentuꞌ libíꞌiliꞌ dxiꞌi ládxiꞌdoꞌ,
en bentuꞌ ca runnu xináꞌagacabiꞌ biꞌi huë́ꞌënidoꞌ,
run chíꞌinu légacabiꞌ dxiꞌi ládxiꞌdoꞌ.
8 Caní guca,
bidxíꞌideꞌetuꞌ libíꞌiliꞌ,
ga bidxintë gúꞌunituꞌ udö́dituꞌ lu náꞌaliꞌ,
calë́gasö didzaꞌ dxiꞌa queëꞌ Dios,
pero láꞌtuꞌbiquiꞌ udödi caztuꞌ yöl-laꞌ naꞌbán queë́tuꞌ,
tuꞌ nadxíꞌideꞌetuꞌ libíꞌiliꞌ.
9 Röjneliꞌ,
böchiꞌ luzáꞌatuꞌ,
ca naꞌ guca cateꞌ niꞌ bentuꞌ libán loliꞌ que didzaꞌ dxiꞌa queëꞌ Dios,
ca bénticaꞌstuꞌ dxin ziꞌi,
ateꞌ rëla,
en të dza bentuꞌ dxin para cabí usacaꞌ zíꞌituꞌ nituliꞌ libíꞌiliꞌ.
10 Libíꞌiliꞌ naꞌ réajlëꞌëliꞌ Cristo,
huáca gunliꞌ ba nalí,
ateꞌ nö́zinëꞌ Dios ca naꞌ gudálentuꞌ libíꞌiliꞌ idú ca raza ládxëꞌë Dios,
en idú dxíꞌadoꞌ,
en ca naꞌ cuntu nu gaca bi innë́ que.
11 Lëscaꞌ caní nö́ziliꞌ ca bentuꞌ ca runëꞌ tu bönniꞌ quégacabiꞌ zxíꞌinëꞌ,
guchízatuꞌ icja nágaliꞌ,
en butípatuꞌ ládxiꞌliꞌ tu tuliꞌ.
12 Busáꞌatuꞌ ládxiꞌliꞌ gunliꞌ ca ral-laꞌ gun nu nequi queëꞌ Dios.
Lë cazëꞌ bulidzëꞌ libíꞌiliꞌ para gaca tsúꞌuliꞌ ga naꞌ rinná bëꞌë Lëꞌ lu beníꞌ queëꞌ.
13 Que lë ni naꞌ caꞌ,
rë́ticaꞌstuꞌ-nëꞌ Dios:
“Xclenuꞌ.”
Caní runtuꞌ tuꞌ guzxíꞌ lu náꞌaliꞌ xtídzëꞌë Dios le biyö́niliꞌ bë́ꞌëtuꞌ didzaꞌ,
calëga ca xtidzaꞌ bönáchisö,
pero ca le nácatë naca,
xtídzëꞌë Dios naca.
Xtídzëꞌë naꞌ run dxin lu icja ládxiꞌdoꞌoliꞌ libíꞌiliꞌ,
réajlëꞌëliꞌ Cristo.
14 Böchiꞌ luzáꞌatuꞌ,
raca queë́liꞌ ca raca quégaca bönachi queëꞌ Dios,
nupa néquiguequi queëꞌ Jesucristo luyú Judea.
Caní naca tuꞌ chigudíꞌi guzxácaꞌdaꞌaliꞌ lu náꞌagaca bönachi uládz queë́liꞌ,
lë́bisö ca naꞌ gulaꞌguíꞌi gulaꞌzáquiëꞌ légaquiëꞌ lu náꞌagaca bönachi uládz quégaquiëꞌ,
nupa niꞌ nácagaca bönniꞌ judío.
15 Yuguꞌ bönniꞌ judío naꞌ gulútiëꞌ Xanruꞌ Jesús,
en gulútiëꞌ caꞌ yuguꞌ bönniꞌ guluꞌë didzaꞌ uláz queëꞌ Dios.
Gulaꞌbía ládxiꞌgaquiëꞌ,
en buluꞌláguëꞌ caꞌ netuꞌ.
Bitiꞌ tunëꞌ le raza ládxëꞌë Dios,
tuꞌ cabí taꞌléꞌenëꞌ dxiꞌa yúguꞌtë bönachi izáꞌa.
16 Tuꞌzáguëꞌë caꞌ xinöztuꞌ,
para cabí guntuꞌ libán lógaca bönachi izáꞌa naꞌ bitiꞌ nabábagaca légaquiëꞌ,
tuꞌ ruíꞌilentuꞌ léguequi didzaꞌ para uluꞌlágaca.
Caní raca,
tuꞌzánticaꞌsëꞌ dul-laꞌ nabágaꞌgaquiëꞌ,
en chinabágaꞌgaquiëꞌ xíguiaꞌ le run ga ichúguiëꞌ Dios quégaquiëꞌ.
Pablo rë́ꞌënëꞌ tsöjyúëꞌ bö́chiꞌruꞌ nacuꞌë Tesalónica
17 Naꞌa,
böchiꞌ luzáꞌatuꞌ,
ruhuíꞌinituꞌ ca runëꞌ tu bönniꞌ uzëbi tuꞌ nuláꞌalentuꞌ libíꞌiliꞌ tu chíꞌidoꞌ,
pero sal-laꞌ bitiꞌ riléꞌetuꞌ libíꞌiliꞌ,
bitiꞌ nál-la ládxiꞌtuꞌ libíꞌiliꞌ.
Que lë ni naꞌ,
ruíꞌi ládxiꞌrötuꞌ uléꞌetuꞌ loliꞌ,
tuꞌ rizëdaꞌ ládxiꞌtuꞌ guntuꞌ caní.
18 Que lë ni naꞌ caꞌ gúꞌunituꞌ guídatuꞌ ga zóaliꞌ,
ateꞌ nedaꞌ,
Pablo,
le nácatë bëꞌ ládxaꞌa guídaꞌ chopa tsonna luzuí,
pero Satanás,
tuꞌ xihuiꞌ,
buzagaꞌ xinöztuꞌ.
19 ¿Bizxi caz naca le run ga runtuꞌ löza,
o le run ga rudzéjatuꞌ,
o le ral-laꞌ idéliꞌtuꞌ,
le uzíꞌituꞌ xibé lahuëꞌ Xanruꞌ Jesucristo cateꞌ huödëꞌ?
¿Naruꞌ cabí libíꞌi cázaliꞌ naꞌ?
20 Libíꞌi cázaliꞌ nácaliꞌ le run ga nácatuꞌ bicaꞌ ba,
en le run ga rudzéjatuꞌ.