4
Libíꞌiliꞌ,
núlöliꞌ nácaliꞌ xángaca bönachi,
guliꞌgún le naca tsahuiꞌ,
en le naca dxiꞌa
ca rugunliꞌ dxin yuguꞌ bönniꞌ huen dxin queë́liꞌ.
Guliꞌtsöjné zoa caꞌ Xanliꞌ yehuaꞌ yubá.
2 Libíꞌiliꞌ,
yúguꞌtëliꞌ,
buliꞌlídzaticaꞌsëꞌ Dios.
Buliꞌsubán ládxiꞌliꞌ ulídzaliꞌ-nëꞌ Dios,
en guliꞌguíëꞌ:
“Xclenuꞌ.”
3 Laꞌ náꞌasö cateꞌ rulídzaliꞌ-nëꞌ Dios,
guliꞌnabi-nëꞌ caꞌ gácalenëꞌ netuꞌ,
en gunnëꞌ netuꞌ lataj quíxjöꞌötuꞌ xtídzëꞌë Xanruꞌ,
para gaca uzéajniꞌituꞌ bönachi le bigachiꞌ ca naca queëꞌ Cristo.
Tuꞌ runaꞌ caní nadzunaꞌ lidxi guíë ni.
4 Guliꞌnabi-nëꞌ caꞌ Dios,
gunnëꞌ nedaꞌ lataj usalaj láꞌanaꞌ le bigachiꞌ naꞌ ca ral-laꞌ gunaꞌ.
5 Lu yöl-laꞌ réajniꞌi queë́liꞌ,
guliꞌgún le runliꞌ lógaca nupa bitiꞌ taꞌyéajlëꞌ Cristo.
Guliꞌgundaꞌ dxin yuguꞌ dza uzáꞌ ládxëꞌë Dios queë́liꞌ,
gunliꞌ xichinëꞌ.
6 Ral-laꞌ güíꞌiliꞌ didzaꞌ ca raza ládxëꞌë Dios,
en ca ral-laꞌ gun nupa néquiguequi queëꞌ.
Ral-laꞌ inö́ziliꞌ caꞌ naca ral-laꞌ ubíꞌiliꞌ didzaꞌ,
bi guië́liꞌ tu tu bönachi.
Yuguꞌ bönachi queëꞌ Cristo tuꞌgapa Dios luzë́ꞌeguequi
7 Tíquico quíxjöiꞌinëꞌ libíꞌiliꞌ le raca quiaꞌ ni.
Náquiëꞌ bö́chiꞌruꞌ nadxíꞌiruꞌ-nëꞌ.
Náquiëꞌ caꞌ huen dxin idú queëꞌ Xanruꞌ,
en rúnlenëꞌ nedaꞌ tsözxö́n dxin queëꞌ Xanruꞌ.
8 Que lë ni naꞌ risö́l-laꞌa-nëꞌ ga zóaliꞌ,
para uzéajniꞌinëꞌ libíꞌiliꞌ le raca quiaꞌ,
en utipëꞌ ládxiꞌliꞌ.
9 Onésimo,
bö́chiꞌruꞌ naꞌ nabábalenëꞌ libíꞌiliꞌ saꞌyéajlenëꞌ lëꞌ tsözxö́n .
Náquiëꞌ caꞌ bö́chiꞌruꞌ nadxíꞌiruꞌ-nëꞌ,
en réajlëꞌë Xanruꞌ.
Chopëꞌ ni uluꞌsiyönnëꞌ libíꞌiliꞌ yúguꞌtë le raca ni.
10 Aristarco,
bönniꞌ naꞌ yúꞌulenëꞌ nedaꞌ tsözxö́n lidxi guíë rugapëꞌ Dios libíꞌiliꞌ.
Biꞌi Marcos,
biꞌi bönniꞌ queë́nu nigula zanëꞌ Bernabé rugápabiꞌ Dios caꞌ libíꞌiliꞌ.
Chigudxaꞌ libíꞌiliꞌ bi gunliꞌ queë́biꞌ biꞌi Marcos naꞌ.
Channö huídabiꞌ ga zóaliꞌ,
guliꞌgún-biꞌ bal.
11 Bönniꞌ ni lëꞌ Jesús,
en zoa iaꞌtú lëꞌ Justo lëscaꞌ rugapëꞌ Dios libíꞌiliꞌ.
Nacuáꞌ zián bönachi judío taꞌyéajlëꞌ Cristo,
pero tsónnasëꞌ ni ladaj bönachi judío tunëꞌ dxin que le rinná bëꞌë Dios tsözxö́n len nedaꞌ,
en tuꞌhuíꞌ zxö́ndëꞌë nedaꞌ.
12 Epafras,
bönniꞌ ni nababëꞌ caꞌ libíꞌiliꞌ rugapëꞌ Dios libíꞌiliꞌ.
Náquiëꞌ huen dxin queëꞌ Cristo,
en idú ládxëꞌë rulidzëꞌ Dios,
en rátaꞌyuticaꞌsëꞌ lahuëꞌ gácalenëꞌ libíꞌiliꞌ para gácaliꞌ idú ladxiꞌ,
en sóaliꞌ caꞌ sinaꞌ gunliꞌ yúguꞌtë le rë́ꞌëni quézinëꞌ Dios.
13 Runaꞌ ba nalí queëꞌ Epafras naꞌ,
ruíꞌidaꞌ ládxëꞌë libíꞌiliꞌ encaꞌ nupa nacuáꞌ yödzö Laodicea,
en nupa nacuáꞌ yödzö Hierápolis.
14 Demas,
encaꞌ Lucas tuꞌgapëꞌ Dios libíꞌiliꞌ.
Náquiëꞌ Lucas bönniꞌ naꞌ ruúnëꞌ bönachi,
ateꞌ nadxíꞌiruꞌ-nëꞌ.
15 Guliꞌgapa Dios bö́chiꞌruꞌ nacuꞌë Laodicea,
encaꞌ Ninfas,
en bönachi queëꞌ Cristo nacuáꞌ lídxinu Ninfas naꞌ.
16 Cateꞌ údxi ulábaliꞌ guichi ni ga niꞌ zóaliꞌ,
guliꞌgún ga uluꞌlaba le bönachi queëꞌ Cristo nacuáꞌ Laodicea.
Buliꞌlaba caꞌ libíꞌiliꞌ guichi naꞌ ilaꞌsöl-laꞌ bönachi Laodicea naꞌ queë́liꞌ.
17 Guliꞌguíëꞌ Arquipo:
“Bëꞌ ládxuꞌu gunuꞌ dxin naꞌ budödëꞌ Xanruꞌ lu noꞌo.”
18 Nedaꞌ,
Pablo,
ruzúaj cazaꞌ lu guichi dídzaꞌdoꞌ ni,
rnníaꞌ:
Rugapaꞌ Dios libíꞌiliꞌ.
Guliꞌtsöjné ca raca quiaꞌ nadzunaꞌ lidxi guíë ni.
Rinábidaꞌ-nëꞌ Dios uzáꞌ ládxëꞌë queë́liꞌ le naca dxiꞌa.
¡Caꞌ gaca!