3
Naꞌa,
channö nubánlenliꞌ-nëꞌ Cristo,
guliꞌgüíꞌ ladxiꞌ le nácagaca que yehuaꞌ yubá ga niꞌ röꞌë Cristo cuita lëꞌë ibëla Dios,
ga náquiëꞌ lo.
2 Guliꞌsáꞌ ladxiꞌ le taca xitsáꞌalö,
en calëga le taca luyú ni.
3 Naca queë́liꞌ tsca chinátiliꞌ,
ateꞌ yöl-laꞌ naꞌbán queë́liꞌ rapa chiꞌë Cristo ga niꞌ zoa cazëꞌ Dios.
4 Cristo nabániliꞌ libíꞌiliꞌ.
Cateꞌ uluíꞌi lahuëꞌ Lëꞌ,
níꞌirö uluíꞌi loliꞌ caꞌ libíꞌiliꞌ tsözxö́n len Lëꞌ lu beníꞌ queëꞌ.
Yöl-laꞌ naꞌbán gula, en yöl-laꞌ naꞌbán cubi
5 Que lë ni naꞌ,
guliꞌgún ga ilaꞌniti le nacuáꞌlen libíꞌiliꞌ que yödzölió ni:
Yuguꞌ le ruáꞌ döꞌ,
en le nácagaca xihuiꞌ,
en yuguꞌ le rizë́ ládxiꞌliꞌ le ruáꞌ döꞌ,
en yuguꞌ le rizë́ ládxiꞌliꞌ le naca xihuiꞌ,
en yöl-laꞌ ruhuidiꞌ.
Yöl-laꞌ ruhuidiꞌ naca lëbi ca nu reaj ladxiꞌ budóꞌ guiö́j budóꞌ yaga,
tuꞌ cabí reaj ladxiꞌ Dios nu ruhuidiꞌ.
6 Tun bönachi yuguꞌ le caní,
ateꞌ gunëꞌ Dios xíguiaꞌ yúguꞌtë nupa bitiꞌ túngaca ca rnna xtídzëꞌë.
7 Yuguꞌ dul-laꞌ caní benliꞌ caꞌ libíꞌiliꞌ cateꞌ niꞌ nadö́diliꞌ lu në́ꞌeguequi.
8 Naꞌa,
bítiꞌrö gunliꞌ yuguꞌ lë ni:
Bítiꞌrö idzáꞌaliꞌ,
en bítiꞌrö leliꞌ.
Bítiꞌrö nu gunliꞌ ziꞌ,
en bítiꞌrö innë́ xíhuiꞌliꞌ.
Bítiꞌrö innaliꞌ le ruáꞌ döꞌ.
9 Bitiꞌ siꞌ yéꞌeliꞌ luzáꞌaliꞌ tuliꞌ iaꞌtuliꞌ tuꞌ chinucáꞌanaliꞌ le gúcaliꞌ zíꞌalö,
en yuguꞌ le benliꞌ zíꞌalö.
10 Chinácaliꞌ bönachi cubi,
ateꞌ tu tu dza ricúbiliꞌ,
ruhuöácaröliꞌ ca naca Nu naꞌ bun libíꞌiliꞌ,
para gúnbëꞌëliꞌ Lëꞌ idú ca náquiëꞌ Lëꞌ.
11 Tuꞌ chidzágaruꞌ-nëꞌ Cristo:
Bítiꞌrö nácaruꞌ bönniꞌ ziꞌtuꞌ,
en bönniꞌ judío.
Bítiꞌrö nácaruꞌ bönniꞌ narugu lu xipë́laꞌgaquiëꞌ le naca bëꞌ nu daꞌ Dios,
en bönniꞌ bitiꞌ narugu lu xipë́laꞌgaquiëꞌ lë naꞌ naca bëꞌ.
Bítiꞌrö nácaruꞌ bönniꞌ taꞌyéajniꞌinëꞌ,
en bönniꞌ bitiꞌ taꞌyéajniꞌinëꞌ.
Bítiꞌrö nácaruꞌ bönniꞌ nadóꞌogaquiëꞌ,
en bönniꞌ bitiꞌ nadóꞌogaquiëꞌ.
Naꞌa,
Cristo náquiëꞌ yúguꞌtë le nácagaca lesacaꞌ,
en dzáguiëꞌ yúguꞌtëruꞌ.
12 Dios nadxíꞌinëꞌ libíꞌiliꞌ,
en gurö́ëꞌ libíꞌiliꞌ para guéquiliꞌ quez queëꞌ.
Que lë ni naꞌ,
ral-laꞌ:
Güíꞌi ládxiꞌliꞌ luzáꞌaliꞌ,
en gácaliꞌ dxiꞌi ladxiꞌ,
en nöxaj ladxiꞌ,
en cuidiꞌ ladxiꞌ,
en cö́zaliꞌ zxön ladxiꞌ.
13 Channö raca didzaꞌ bizxaj tuliꞌ len iaꞌtuliꞌ,
guliꞌguáꞌ ilén luzáꞌaliꞌ tuliꞌ iaꞌtuliꞌ,
en buliꞌniti lo luzáꞌaliꞌ tuliꞌ iaꞌtuliꞌ ca naꞌ benëꞌ Cristo,
buniti lahuëꞌ libíꞌiliꞌ.
14 Le nazácaꞌtërö ca yúguꞌtë lë ni,
ral-laꞌ idxíꞌiliꞌ yúguꞌtë bönachi,
tuꞌ naca yöl-laꞌ nadxíꞌi le run ga nácaruꞌ tuz,
en ga nácaruꞌ idú.
15 Guliꞌgüíꞌ lataj le ribequi dxi icja ládxiꞌdoꞌoruꞌ inná bëꞌ lu icja ládxiꞌdoꞌoliꞌ,
lë naꞌ runnëꞌ Dios queë́ruꞌ.
Que lë ni naꞌ bulidzëꞌ libíꞌiliꞌ,
para gácaliꞌ tuz lu idútë le naca cazëꞌ Cristo.
Guliꞌguíëꞌ Dios:
“Xclenuꞌ.”
16 Guliꞌsíꞌ lu náꞌaliꞌ xtídzëꞌë Cristo le gaca queë́liꞌ tu yöl-laꞌ tsahuiꞌ zxön.
Tuꞌ zóalen libíꞌiliꞌ yöl-laꞌ réajniꞌi queëꞌ Dios,
buliꞌsedi,
en buliꞌzéjniꞌi luzáꞌaliꞌ tuliꞌ iaꞌtuliꞌ.
Idú ládxiꞌliꞌ guliꞌgul-la yuguꞌ salmo queëꞌ Dios,
en yuguꞌ le rul-la yöl-laꞌ ba,
en yuguꞌ le rul-la láꞌayi,
ateꞌ guië́liꞌ-nëꞌ Dios:
“Xclenuꞌ.”
17 Yúguꞌtë le runliꞌ,
le naca didzaꞌ ruíꞌiliꞌ o le naca dxin runliꞌ,
guliꞌgún yúguꞌtë lu Lëꞌ Xanruꞌ Jesús,
en guië́liꞌ-nëꞌ Dios Xuz:
“Xclenuꞌ”,
dzáguiëꞌ Cristo libíꞌiliꞌ.
Le ral-laꞌ gunruꞌ que luzáꞌaruꞌ tuꞌ néquiruꞌ queëꞌ Cristo
18 Libíꞌiliꞌ,
nigula nutsaga náꞌalenliꞌ bönniꞌ queë́liꞌ,
guliꞌgún ca rnna xtídzaꞌgaquiëꞌ bönniꞌ que queë́liꞌ
ca ral-laꞌ gunliꞌ,
tuꞌ néquiliꞌ queëꞌ Xanruꞌ.
19 Libíꞌiliꞌ,
bönniꞌ nutsaga náꞌalenliꞌ nigula queë́liꞌ,
guliꞌdxíꞌi nigula que queë́liꞌ,
en bitiꞌ uzéliꞌ bach légacanu.
20 Libíꞌiliꞌ,
biꞌi raꞌbán,
guliꞌgún ca rnna yúguꞌtë xtídzaꞌgaquiëꞌ xuz xináꞌaliꞌ.
Lë ni raza ládxëꞌë Xanruꞌ.
21 Libíꞌiliꞌ,
núlöliꞌ nácaliꞌ xúzgaca bíꞌidoꞌ,
bitiꞌ tödi bëꞌ usínaꞌliꞌ zxíꞌiniliꞌ,
para cabí huö́aj ládxiꞌgacabiꞌ.
22 Libíꞌiliꞌ,
núlöliꞌ nácaliꞌ bönniꞌ nadóꞌogaquiëꞌ,
guliꞌgún ca rnna yúguꞌtë xtídzaꞌgaquiëꞌ xanliꞌ luyú ni.
Calë́gasö gunliꞌ caní cateꞌ tuꞌyúëꞌ libíꞌiliꞌ
ca naꞌ tun nupa të́ꞌëni ilún ga ilaꞌyaza ládxiꞌgaca bönachi,
pero idú ládxiꞌliꞌ guliꞌgún xichíngaquiëꞌ
ca ral-laꞌ ilún nupa tadxi Dios.
23 Ca naca yúguꞌtë le runliꞌ,
guliꞌgún idú ládxiꞌliꞌ,
gaca ca runliꞌ xichinëꞌ Xanruꞌ,
en calë́gasö ca runliꞌ xichíngaca bönachi.
24 Chinö́z quéziliꞌ ubiꞌë Xanruꞌ queë́liꞌ,
gunnëꞌ queë́liꞌ le chinupë́ꞌë Dios quégaca nupa nácagaca zxíꞌini cazëꞌ.
Caní gaca,
tuꞌ runliꞌ xichinëꞌ Xanruꞌ Jesucristo.
25 Nu ruáꞌ döꞌ,
ubiꞌë Xanruꞌ que nu naꞌ ca naca döꞌ ruáꞌ nu naꞌ,
tuꞌ cabí utsë́ꞌë Dios ca ral-laꞌ ubiꞌë que queë́gaca bönachi.