Ral-laꞌ udzéjalenticaꞌsiruꞌ-nëꞌ Xanruꞌ
4
Que lë ni naꞌ,
böchiꞌ luzáꞌadoꞌ,
guliꞌgaca tsutsu ca réajlëꞌëliꞌ-nëꞌ Xanruꞌ.
Nadxíꞌideꞌedaꞌ libíꞌiliꞌ,
en rë́ꞌëndaꞌ uduyúaꞌ libíꞌiliꞌ.
Runliꞌ ga rudzéjadaꞌ,
en nácaliꞌ ca tu le ruziꞌa xibé.
2 Libíꞌiliꞌ,
Evodia,
en Síntique,
rátaꞌyuaꞌ loliꞌ gácaliꞌ tuz ca ral-laꞌ ilaca nupa néquiguequi queëꞌ Xanruꞌ.
3 Naꞌa,
bö́chaꞌa idú,
rë́ꞌëndaꞌ gácalenuꞌ irópanu ni,
tuꞌ gulúnlennu nedaꞌ dxin,
cateꞌ bentuꞌ libán que didzaꞌ dxiꞌa.
Lëscaꞌ buluꞌdzáguiëꞌ Clemente,
en iaꞌzícaꞌrëꞌ luzáꞌa naꞌ netuꞌ.
Chinazúajgaca lágaquiëꞌ yehuaꞌ yubá ga naꞌ nazúajgaca lágaca nupa chinadéliꞌgaca yöl-laꞌ naꞌbán idú.
4 ¡Buliꞌdzéjalenticaꞌsö-nëꞌ Xanruꞌ!
Leyúbölö,
rnníaꞌ:
¡Buliꞌdzeja!
5 ¡Guliꞌgaca dxiꞌi ladxiꞌ len yúguꞌtë bönachi!
¡Chizóa huödëꞌ Xanruꞌ!
6 Bitiꞌ ubi uguíꞌiliꞌ,
pero guliꞌnabi-nëꞌ Dios le riquíniliꞌ,
en guliꞌguíëꞌ:
“Xclenuꞌ” ca naca yúguꞌtë lë naꞌ rinábaliꞌ.
7 Dios gunëꞌ ga gaca queë́liꞌ le cuéqui dxi icja ládxiꞌdoꞌoliꞌ,
lë naꞌ nadö́dirö bëꞌ ca le gaca ilaꞌyéajniꞌi bönachi.
Lë naꞌ ribequi dxi icja ládxiꞌdoꞌoruꞌ gun chiꞌi icja ládxiꞌdoꞌoliꞌ,
en le rizáꞌ ládxiꞌliꞌ tuꞌ nácaliꞌ tuz len Jesucristo.
Ral-laꞌ saꞌ ládxiꞌruꞌ le nácagaca dxiꞌa
8 Ga ruúdxitë,
böchiꞌ luzáꞌadoꞌ,
guliꞌsáꞌ ládxiꞌliꞌ:
Yúguꞌtë le naca dxiꞌa,
en le naca bicaꞌ ba,
en le naca idútë li,
en le naca idú,
en le naca tsahuiꞌ,
en le naca baꞌa,
en le naca lachi,
en le ral-laꞌ gunruꞌ bal.
9 Guliꞌgún ca naꞌ busédidaꞌ libíꞌiliꞌ,
lë naꞌ guzxíꞌ lu náꞌaliꞌ tsca naꞌ bë́ꞌlenaꞌ libíꞌiliꞌ didzaꞌ,
en tsca naꞌ benaꞌ ga niꞌ zóaliꞌ.
Dios,
Nu runna queë́ruꞌ le ribequi dxi icja ládxiꞌdoꞌoruꞌ sóalenëꞌ libíꞌiliꞌ.
Le tsahuiꞌ gulunëꞌ yuguꞌ bönniꞌ Filipos queëꞌ Pablo
10 Rudzéjalendaꞌ-nëꞌ Xanruꞌ tuꞌ ruíꞌi ládxiꞌliꞌ nedaꞌ leyúbölö.
Bitiꞌ rnníaꞌ gul-la ládxiꞌliꞌ nedaꞌ,
pero bitiꞌ gutaꞌ queë́liꞌ lataj gácalenliꞌ nedaꞌ zíꞌalö.
11 Lëscaꞌ caní,
bitiꞌ rnníaꞌ caní tuꞌ zoa bi riyadzaj quiaꞌ,
tuꞌ nazëdaꞌ tsaza ládxaꞌa le dësö quiaꞌ.
12 Chigudödaꞌ lu yöl-laꞌ yechiꞌ,
en lu yöl-laꞌ tsahuiꞌ.
Nazëdaꞌ soaꞌ nácatiꞌtës,
sal-laꞌ nö́ljadaꞌ o nabila ridunaꞌ,
en sal-laꞌ dëdaꞌ quiaꞌ o zoa bi riyadzaj quiaꞌ.
13 Yúguꞌtë huazéquiꞌdaꞌ tuꞌ rutipëꞌ Cristo ládxaꞌa.
14 Benliꞌ dxiꞌa cateꞌ niꞌ gúcalenliꞌ nedaꞌ,
en butípaliꞌ ládxaꞌa cateꞌ gudíꞌi guzxácaꞌa.
15 Libíꞌiliꞌ,
bönniꞌ Filipos,
nöz quéziliꞌ ca guca quiaꞌ dza niꞌ cateꞌ buzáꞌa luyú Macedonia,
para yöjenaꞌ libán que didzaꞌ dxiꞌa.
Tsca nacuáꞌ bönachi queëꞌ Cristo,
cúnturö nu gúcalen nedaꞌ,
pero libíꞌisiliꞌ gúcalenliꞌ nedaꞌ.
Gusö́l-laꞌliꞌ quiaꞌ bi bunö́dzjaliꞌ,
tuꞌ guzxíꞌ lu náꞌaliꞌ libán benaꞌ nedaꞌ.
16 Tsanni niꞌ guzóaꞌ yödzö Tesalónica,
tu chopa luzuí gusö́l-laꞌliꞌ quiaꞌ le bunö́dzjaliꞌ cateꞌ niꞌ biyadzaj quiaꞌ.
17 Bitiꞌ ruíꞌi ládxaꞌa bi siꞌa,
pero rë́ꞌëndaꞌ gátaꞌrö queë́liꞌ le uzíꞌiliꞌ xibé yehuaꞌ yubá.
18 Reaꞌ libíꞌiliꞌ:
Chiguzxiꞌa yúguꞌtë lë naꞌ gusö́l-laꞌliꞌ quiaꞌ,
ateꞌ gudö́ditë bëꞌ tsca le biyádzjadaꞌ.
Ben ga naca caní lë naꞌ gusö́l-laꞌliꞌ lu náꞌabiꞌ biꞌi Epafrodito.
Lë naꞌ bunö́dzjaliꞌ naca ca tu le riláꞌ zxixi le ridxintë lahuëꞌ Dios,
en ca tu le rigúꞌuruꞌ lahuëꞌ Dios le raza ládxëꞌë.
19 Dios gunnëꞌ queë́liꞌ yúguꞌtë le riyadzaj queë́liꞌ,
tsca naca yöl-laꞌ tsahuiꞌ röꞌö yehuaꞌ yubá,
tuꞌ nácaliꞌ tuz len Jesucristo.
20 ¡Gácaticaꞌsö queëꞌ Xúziruꞌ Dios yöl-laꞌ ba!
¡Caꞌ gaca!
Yuguꞌ bönachi queëꞌ Cristo tuꞌgapa Dios luzë́ꞌeguequi
21 Uláz quiaꞌ nedaꞌ,
guliꞌgapa Dios nupa niꞌ néquiguequi queëꞌ Dios tuꞌ nácagaca tuz len Jesucristo.
Tuꞌgapëꞌ Dios libíꞌiliꞌ böchiꞌ luzáꞌaruꞌ núngaquiëꞌ nedaꞌ tsözxö́n ni.
22 Lëscaꞌ yúguꞌtë nupa ni néquiguequi queëꞌ Dios,
tuꞌgapa Dios libíꞌiliꞌ,
en lëscaꞌ caní,
yuguꞌ bönniꞌ huen dxin nacuꞌë lidxëꞌ bönniꞌ rinná bëꞌë idú luyú Roma tuꞌgapëꞌ Dios libíꞌiliꞌ.
23 Rinábidaꞌ-nëꞌ Xanruꞌ Jesucristo uzáꞌ ládxëꞌë queë́liꞌ yúguꞌtëliꞌ.
¡Caꞌ gaca!