Le naca idú tsahuiꞌ
3
¡Naꞌa,
böchiꞌ luzáꞌadoꞌ,
buliꞌdzeja tuꞌ nácaliꞌ tuz len Xanruꞌ!
Bitiꞌ rupizxaj nedaꞌ uzúajaꞌ queë́liꞌ leyúbölö lë naꞌ buzúajaꞌ queë́liꞌ zíꞌalö,
tuꞌ gácalen lë ni libíꞌiliꞌ.
2 Guliꞌgún chiꞌi cuinliꞌ lógaca nupa niꞌ tuáꞌ döꞌ.
Nácagaca ca yuguꞌ böꞌcuꞌ síniaꞌ,
nupa naꞌ tun bayudxi irugu lu xipë́laꞌgaquiëꞌ bönniꞌ le naca bëꞌ nazíꞌ lu náꞌgaquiëꞌ xtídzëꞌë Dios.
3 Rëꞌu nadéliꞌruꞌ lë naꞌ naca idútë li,
le naca bëꞌ nazíꞌ lu náꞌaruꞌ le runnëꞌ queë́ruꞌ Dios.
Tuꞌ réajlëꞌëruꞌ Dios,
zóalenëꞌ Dios Böꞌ Láꞌayi rëꞌu,
ateꞌ rudzéjaruꞌ tuꞌ nácaruꞌ tuz len Jesucristo.
Bitiꞌ caꞌ ruzxöni ládxiꞌruꞌ tu le runruꞌ rácasö queë́ruꞌ.
4 Laꞌtuꞌ ruzxöni ládxiꞌruꞌ lë ni,
lëscaꞌ nedaꞌ chinadéliꞌdaꞌ bi uzxöni ládxaꞌa.
Channö zoëꞌ nu bönniꞌ réquinëꞌ ulë́ꞌ tuꞌ nacuáꞌ le nunëꞌ,
nedaꞌ nadéliꞌrödaꞌ ca bönniꞌ naꞌ:
5 Gurugu lu xipë́laꞌa lë naꞌ naca bëꞌ cateꞌ niꞌ gúquidaꞌ xunuꞌ dza.
Guljaꞌ ladaj diꞌa dza quégaca bönachi Israel.
Nababaꞌ zxíꞌini xiꞌsóëꞌ Benjamín.
Xuz xináꞌa nácagaquiëꞌ idú bönachi hebreo.
Gucaꞌ bönniꞌ yudoꞌ fariseo ca naꞌ benaꞌ ca rinná bëꞌ xibá queëꞌ Dios.
6 Bëꞌdaꞌ ládxaꞌa xibá naꞌ ga bidxintë gudxía ládxaꞌa bönachi queëꞌ Cristo.
Tsca gaca gáquiëꞌ tsahuiꞌ tu bönniꞌ tuꞌ runëꞌ ca rinná bëꞌ xibá naꞌ,
cuntu nu bi guca innë́ quiaꞌ.
7 Naꞌa,
yúguꞌtë lë naꞌ benaꞌ zxön zíꞌalö,
nuzóaꞌ tsöláꞌalö tuꞌ néquidaꞌ queëꞌ Cristo.
8 Calë́gasö yuguꞌ lë naꞌ,
pero nuzóaꞌ caꞌ tsöláꞌalö yúguꞌtë le dë,
para gaca gúnbeꞌedaꞌ-nëꞌ Xanruꞌ Jesucristo,
le nácatërö lesacaꞌ ca yúguꞌtë lë naꞌ.
Para gúnbeꞌedaꞌ Lëꞌ gurúꞌunaꞌ níꞌilö yúguꞌtë,
en réquidaꞌ naca ca bëbu,
para uziꞌa xibë́ꞌ Cristo,
9 en para gacaꞌ tuz len Lëꞌ.
Nuhuöácaꞌ tsahuiꞌ,
calëga tuꞌ runaꞌ ca rinná bëꞌ xibá naꞌ,
pero Dios caz bunëꞌ nedaꞌ tsahuiꞌ tuꞌ réajlëꞌa Cristo,
ca naꞌ ruúnëꞌ tsahuiꞌ yúguꞌtë nupa taꞌyéajlëꞌ Lëꞌ.
10 Rë́ꞌënisidaꞌ gúnbëꞌa-nëꞌ Cristo,
en sóalen yöl-laꞌ huáca queëꞌ Dios nedaꞌ,
lë naꞌ busubán Cristo lu yöl-laꞌ guti,
ateꞌ gunaꞌ Lëꞌ tsözxö́n,
quiꞌi sacaꞌa ca naꞌ gudíꞌi guzxáquëꞌë Lëꞌ,
en soaꞌ sinaꞌ gátiaꞌ ca gútiëꞌ Lëꞌ,
11 tuꞌ runaꞌ löza Dios,
usubanëꞌ caꞌ nedaꞌ lu yöl-laꞌ guti.
Le runruꞌ para idxinruꞌ xilátjaruꞌ
12 Bitiꞌ rnníaꞌ chinadéliꞌdaꞌ yúguꞌtë lë ni gunnëꞌ quiaꞌ,
en bitiꞌ réquidaꞌ chinacaꞌ idú tsahuiꞌ.
Naꞌa,
runaꞌ bayudxi idéliꞌdaꞌ yúguꞌtë lë naꞌ,
tuꞌ chibidéliꞌnëꞌ Jesucristo nedaꞌ.
13 Böchiꞌ luzáꞌadoꞌ,
bitiꞌ caꞌ nadéliꞌdaꞌ yuguꞌ lë ni,
pero tuz le runaꞌ bayudxi.
Ruzál-la ládxaꞌa le chibidéliꞌdaꞌ,
ateꞌ runaꞌ bayudxi idéliꞌdaꞌ le zaꞌ.
14 Runaꞌ ca runëꞌ tu bönniꞌ rixítiꞌdëꞌë para idxinëꞌ xilatjëꞌ para idéliꞌnëꞌ tu le uziꞌë xibé.
Caní runaꞌ para idéliꞌdaꞌ lë naꞌ bulidzëꞌ Dios rëꞌu para gataꞌ queë́ruꞌ niꞌ yehuaꞌ yubá tuꞌ nácaruꞌ tuz len Jesucristo.
15 Caní ral-laꞌ gunruꞌ yúguꞌtëruꞌ rëꞌu,
naca idú ca réajlëꞌëruꞌ Cristo.
Channö réquiliꞌ bál-laliꞌ ral-laꞌ gunliꞌ tu le yúbölö,
rinábidaꞌ-nëꞌ Dios uzéajniꞌinëꞌ libíꞌiliꞌ.
16 Naꞌa,
ca naca lë naꞌ bidéliꞌruꞌ,
ral-laꞌ gúnticaꞌsiruꞌ caní.
17 Böchiꞌ luzáꞌadoꞌ,
guliꞌgún ca naꞌ runaꞌ nedaꞌ.
Chibuluíꞌituꞌ libíꞌiliꞌ ca ral-laꞌ gunliꞌ.
Buliꞌyú ca tun nupa naꞌ tun ca naꞌ bentuꞌ netuꞌ.
18 Chigudxi cazaꞌ libíꞌiliꞌ zián luzuí,
ateꞌ reaꞌ libíꞌiliꞌ leyúbölö len yöl-laꞌ ribödxi quiaꞌ,
rnníaꞌ:
Le tunëꞌ zián bönniꞌ run ga nácagaquiëꞌ ca nupa bitiꞌ taꞌléꞌe Cristo dxiꞌa,
tuꞌ tuꞌzóëꞌ tsöláꞌalö le ben cazëꞌ Lëꞌ lëꞌe yaga cruz.
19 Yuguꞌ bönniꞌ tunëꞌ caní,
tsöjáquiëꞌ lu guíꞌ gabila,
tuꞌ naca le taꞌzësö ládxiꞌgaquiëꞌ dios quégaquiëꞌ,
ateꞌ tun ba zxön cuíngaquiëꞌ niꞌa que lë naꞌ ral-laꞌ gun ga uluꞌtuíꞌinëꞌ.
Tuíꞌi ládxiꞌsë le dë yödzölió ni,
20 pero rëꞌu ni ruíꞌi ládxiꞌruꞌ le dë yehuaꞌ yubá ga nabábaruꞌ,
en ribö́zaruꞌ dza huödëꞌ Xanruꞌ Jesucristo,
Nu rusölá rëꞌu,
urúajëꞌ yehuaꞌ yubá naꞌ.
21 Lëꞌ utsë́ꞌë idútë le naca cázaruꞌ,
le riniti caz,
en gunëꞌ ga huöáca ca naca idútë le naca cazëꞌ Lëꞌ,
le sóaticaꞌsö.
Caní gunëꞌ len yöl-laꞌ huáca zxön queëꞌ le ugunëꞌ dxin para inná béꞌenëꞌ yúguꞌtë.