Gúquiëꞌ Cristo nöxaj ladxiꞌ, ateꞌ bidéliꞌnëꞌ yöl-laꞌ zxön
2
Cristo runëꞌ ga rutipa ládxiꞌliꞌ,
en lu yöl-laꞌ nadxíꞌi queëꞌ ruhuéchiꞌ ládxëꞌë libíꞌiliꞌ,
en runëꞌ ga nácaliꞌ tuz len Dios Böꞌ Láꞌayi,
en ga nadxíꞌiliꞌ luzáꞌaliꞌ,
en ga ruhuéchiꞌ ládxiꞌliꞌ luzáꞌaliꞌ tuliꞌ iaꞌtuliꞌ.
2 Naꞌa guliꞌgún ga udzéjarö ládxaꞌa.
Para gunliꞌ caní,
ral-laꞌ gácaliꞌ tuz len luzáꞌaliꞌ,
en gaca lë́bisö ca nadxíꞌiliꞌ luzáꞌaliꞌ tuliꞌ iaꞌtuliꞌ.
Lëscaꞌ caní ral-laꞌ gácaliꞌ tuz lu böꞌ naca cázaliꞌ,
en ca rizáꞌ ládxiꞌliꞌ.
3 Ca naca le runliꞌ,
bitiꞌ bi ral-laꞌ gunliꞌ lu yöl-laꞌ rudul-liꞌ queë́liꞌ,
o para gun ba zxön cuinliꞌ,
pero dxíꞌadoꞌ ral-laꞌ gunliꞌ yúguꞌtë,
en cabí guéquiliꞌ nadéliꞌröliꞌ libíꞌiliꞌ ca luzáꞌaliꞌ.
4 Guliꞌgüíꞌ ladxiꞌ gaca dxiꞌa caꞌ que luzáꞌaliꞌ,
en calëga queë́ziliꞌ.
5 Ral-laꞌ gácaliꞌ nöxaj ladxiꞌ ca naꞌ gúquiëꞌ Jesucristo nöxaj ladxiꞌ.
6 Lëꞌ naca cazëꞌ lë́bisö ca náquiëꞌ Dios caz,
pero bitiꞌ gúquinëꞌ ral-laꞌ gunëꞌ bayudxi ugáꞌanëꞌ lë́bisö ca naꞌ náquiëꞌ Dios.
7 Bucáꞌana cazëꞌ yúguꞌtë le napëꞌ,
en ben cuinëꞌ ca tu bönniꞌ nadóꞌo.
Guljëꞌ ca talaj bönachi,
en gúquiëꞌ idú bönachi.
8 Cateꞌ niꞌ náquiëꞌ bönniꞌ,
gúquiëꞌ nöxaj ladxiꞌ,
en benëꞌ ca rnna xtídzëꞌë Dios,
en gútiëꞌ.
Gudë́ꞌë lëꞌe yaga cruz ca naꞌ raca queëꞌ nu bönniꞌ nabáguëꞌë dul-laꞌ.
9 Que lë ni naꞌ Dios buchisëꞌ Lëꞌ,
en benëꞌ ga náquiëꞌ lo niꞌ yehuaꞌ yubá,
en benëꞌ ga lëꞌ tu le nácatërö lo ca yúguꞌtë lágaca bönachi.
10 Caní benëꞌ Dios para cateꞌ ilaꞌyöni ca naꞌ lëꞌ Jesús,
uluꞌzechu zxíbigaca yúguꞌtë nupa nacuáꞌ yehuaꞌ yubá,
en lu yödzölió,
en lu lataj chul-la.
11 Yúguꞌtëꞌ ilaꞌguíxjöꞌë yálajdoꞌ Jesucristo náquiëꞌ Xanruꞌ para gaca yöl-laꞌ ba queëꞌ Xúziruꞌ Dios.
Ral-laꞌ gácaruꞌ ca tu le taꞌgúꞌu beníꞌ yödzölió ni
12 Que lë ni naꞌ,
böchiꞌ luzáꞌadoꞌ,
ca naꞌ benliꞌ ca rnna xtídzaꞌa cateꞌ niꞌ zóalenaꞌ libíꞌiliꞌ,
runrö bayudxi gunliꞌ ca rnna xtídzaꞌa naꞌa,
tsanni ni zoaꞌ ziꞌtuꞌ ga zóaliꞌ.
Guliꞌgún xichinëꞌ Xanruꞌ ga idxintë dza údxi usölë́ꞌ libíꞌiliꞌ.
Guliꞌgún caní lu yöl-laꞌ radxi queë́liꞌ Lëꞌ,
en lu yöl-laꞌ rizxizi.
13 Lë cazëꞌ Dios runëꞌ dxin lu icja ládxiꞌdoꞌoliꞌ.
Runëꞌ ga rë́ꞌëniliꞌ gunliꞌ le raza ládxëꞌë Lëꞌ,
en runëꞌ caꞌ ga séquiꞌliꞌ gunliꞌ lë naꞌ.
14 Guliꞌgún yúguꞌtë le ral-laꞌ gunliꞌ,
en bitiꞌ bi innëliꞌ que,
en bitiꞌ til-la dídzaꞌliꞌ.
15 Caní ral-laꞌ gunliꞌ,
para cabí gaca nu bi innë́ queë́liꞌ,
pero caní gácaliꞌ ca zxíꞌini cazëꞌ Dios,
nácaliꞌ idú dxiꞌa yödzölió ga ni zóaliꞌ ladaj bönachi bitiꞌ nácagaca tsahuiꞌ,
en nucáꞌanagaca Dios.
Libíꞌiliꞌ rigúꞌuliꞌ beníꞌ ládjagaquiëꞌ ca naꞌ taꞌgúꞌu beníꞌ bölaj lúzxiba cateꞌ ni naca chul-la,
16 cateꞌ ruíꞌiliꞌ lógaquiëꞌ didzaꞌ ibániguequinëꞌ.
Channö caní gunliꞌ,
huáca udzéjadeꞌedaꞌ niꞌa que le naca cázaliꞌ dza huödëꞌ Cristo,
tuꞌ inözdaꞌ bitiꞌ guca nítisö guzóa bönadxi gátiaꞌ,
en calëga nítisö benaꞌ dxin.
17 Yöl-laꞌ réajlëꞌ queë́liꞌ Cristo naca tu le raza ládxëꞌë Dios.
Sal-laꞌ gun bayudxi gátiaꞌ para gaca idú yöl-laꞌ réajlëꞌ queë́liꞌ Lëꞌ,
udzéjadaꞌ,
en uzíꞌlenaꞌ xibé tsözxö́n yúguꞌtëliꞌ.
18 Lëscaꞌ caní ral-laꞌ udzéjaliꞌ libíꞌiliꞌ,
en uzíꞌlenliꞌ tsözxö́n nedaꞌ xibé.
Ca tunbiꞌ biꞌi Timoteo, en biꞌi Epafrodito
19 Channö caní rë́ꞌënëꞌ Xanruꞌ Jesús,
runaꞌ löza isö́l-laꞌteaꞌ-biꞌ biꞌi Timoteo ga zóaliꞌ,
ateꞌ níꞌirö udzéjadaꞌ cateꞌ huö́dabiꞌ ududíxjöiꞌibiꞌ nedaꞌ cátëze raca queë́liꞌ.
20 Túzibiꞌ lëbiꞌ rizáꞌ ládxiꞌbiꞌ ca naꞌ rizáꞌ ládxaꞌa nedaꞌ,
en ruíꞌidaꞌ ládxiꞌbiꞌ libíꞌiliꞌ.
21 Yúguꞌtë bönniꞌ iaꞌzícaꞌrö,
le naca quégacasëꞌ tuíꞌi ládxiꞌgaquiëꞌ.
Bitiꞌ tuíꞌi ládxiꞌgaquiëꞌ xichinëꞌ Cristo.
22 Nöz quéziliꞌ ca benbiꞌ biꞌi Timoteo,
ca naꞌ burúajbiꞌ dxiꞌa.
Bénlenbiꞌ nedaꞌ tsözxö́n dxin que didzaꞌ dxiꞌa,
ateꞌ nácabiꞌ quiaꞌ ca tubiꞌ biꞌi bönniꞌ rúnlenbiꞌ-nëꞌ tsözxö́n xúzibiꞌ dxin.
23 Isö́l-laꞌa-biꞌ biꞌi Timoteo ga zóaliꞌ cateꞌ inözdaꞌ nacxi gaca quiaꞌ ni
24 sal-laꞌ ruzxöni ládxaꞌa-nëꞌ Xanruꞌ gunëꞌ ga uduyúteaꞌ libíꞌiliꞌ.
25 Lëscaꞌ réquidaꞌ run bayudxi isö́l-laꞌa-biꞌ bíꞌi bö́chiꞌruꞌ Epafrodito ga zóaliꞌ.
Biꞌi ni bénlenbiꞌ nedaꞌ tsözxö́n dxin queëꞌ Cristo,
ateꞌ gudíl-lalentuꞌ tuꞌ xihuiꞌ.
Libíꞌi cázaliꞌ gusö́l-laꞌliꞌ-biꞌ ga zoaꞌ para gácalenbiꞌ nedaꞌ.
26 Lë cázabiꞌ rë́ꞌënibiꞌ uduyúbiꞌ libíꞌiliꞌ,
en ruíꞌidaꞌ ládxiꞌbiꞌ libíꞌiliꞌ tuꞌ biyö́niliꞌ ben bayáꞌ queë́biꞌ.
27 Le nácatë güíꞌibiꞌ,
en guqui gátibiꞌ,
pero buéchiꞌ ládxëꞌë-biꞌ Dios,
en calë́gasö lëbiꞌ,
pero buéchiꞌ ládxëꞌë caꞌ nedaꞌ,
para cabí isë́birö ládxaꞌa ca naꞌ risëbi ládxaꞌa naꞌa.
28 Que lë ni naꞌ,
gúꞌunirödaꞌ isö́l-laꞌa-biꞌ queë́liꞌ para gaca udzéjaliꞌ leyúbölö cateꞌ uléꞌeliꞌ-biꞌ,
en bítiꞌrö isëbi ládxaꞌa nedaꞌ.
29 Guliꞌsíꞌ lu náꞌaliꞌ lëbiꞌ lu yöl-laꞌ rudzeja queë́liꞌ,
tuꞌ nácabiꞌ biꞌi bö́chiꞌruꞌ réajlëꞌëbiꞌ Cristo.
Guliꞌgún bal yúguꞌtë bönachi nácagaca ca nácabiꞌ lëbiꞌ,
30 tuꞌ guzóa bönadxi queë́biꞌ gátibiꞌ tuꞌ benbiꞌ xichinëꞌ Cristo,
en tuꞌ gúcalenbiꞌ nedaꞌ uláz queë́liꞌ.