Ral-laꞌ gácalenruꞌ luzáꞌaruꞌ turuꞌ iaꞌturuꞌ
6
Naꞌa,
böchiꞌ zánaꞌdoꞌ,
channö iléꞌeliꞌ runëꞌ dul-laꞌ tu bönniꞌ bö́chiꞌliꞌ,
nuliꞌ zóalenëꞌ Dios Böꞌ láꞌayi libíꞌiliꞌ,
ral-laꞌ gunliꞌ ga ubíꞌi ládxëꞌë bönniꞌ naꞌ,
pero run bayudxi gunliꞌ caní lu yöl-laꞌ nöxaj ladxiꞌ queë́liꞌ,
en uyú cuinliꞌ tsateꞌ cuꞌu tuꞌ xihuiꞌ libíꞌiliꞌ nöza dul-laꞌ.
2 Guliꞌgácalen luzáꞌaliꞌ tuliꞌ iaꞌtuliꞌ tsca naca yuáꞌ nabágaꞌliꞌ.
Channö gunliꞌ caní uzóaliꞌ didzaꞌ le gunná béꞌenëꞌ Cristo rëꞌu.
3 Channö zoa nu réqui chinadeliꞌ yöl-laꞌ nayë́pisë,
en bitiꞌ bi nadeliꞌ nu naꞌ,
nu ni naꞌ rizíꞌ yeꞌe laꞌ cuinsi.
4 Tuhuéaj tuhuéajëꞌ bönniꞌ ral-laꞌ uchiꞌa usörö́ëꞌ que le runëꞌ.
Níꞌirö channö urúajëꞌ dxiꞌa,
huáca gun ba zxön cuinëꞌ niꞌa que le chinunëꞌ,
en bitiꞌ gun bayudxi uyúëꞌ ca núngaca iaꞌzícaꞌrö bönachi channö ba benrëꞌ dxiꞌa o cabí.
5 Tuhuéaj tuhuéajëꞌ bönniꞌ ral-laꞌ guꞌë le nusubáguëꞌë Dios lëꞌ.
6 Channö zoa nu rusedi libíꞌiliꞌ ca naca le rinnë́ dxiꞌa,
ral-laꞌ unö́dzjaliꞌ nu naꞌ rusedi libíꞌiliꞌ latiꞌ que yúguꞌtë le doꞌ dë queë́liꞌ.
7 Bitiꞌ siꞌ yeꞌe cuinliꞌ tuꞌ cuntu nu gaca siꞌ yeꞌe Dios.
Ulápaliꞌ tsca naca le rázaliꞌ.
8 Channö le rázaliꞌ naca yuguꞌ le runliꞌ ca rizësö ládxiꞌliꞌ lu yöl-laꞌ bönáchisö queë́liꞌ,
le ulápaliꞌ gaca yöl-laꞌ guti.
Channö le rázaliꞌ naca yuguꞌ le runliꞌ ca raza ládxëꞌë Dios Böꞌ Láꞌayi,
ulápaliꞌ le gunnëꞌ Dios Böꞌ láꞌayi queë́liꞌ,
le naca yöl-laꞌ naꞌbán idú.
9 Caní naca,
bitiꞌ ral-laꞌ huöa ládxiꞌruꞌ gunruꞌ le naca dxiꞌa,
tuꞌ channö cabí huöa ládxiꞌruꞌ,
idxín dza uláparuꞌ.
10 Que lë ni naꞌ,
bátatiꞌtës gataꞌ queë́ruꞌ lataj,
ral-laꞌ gunruꞌ le naca dxiꞌa quégaca yúguꞌtë bönachi,
en le naca lo,
ral-laꞌ gunruꞌ caní quégaca böchiꞌ zanruꞌ taꞌyija ladxiꞌ Cristo.
Le buzúajëꞌ Pablo lu guichi ga ruúdx
11 Buliꞌyú cateꞌ bach didzaꞌ ni ruzúajaꞌ lu guichi len naꞌ cuinaꞌ.
12 Nupa naꞌ të́ꞌëni ilún ga irugu lu xpë́laꞌliꞌ ca rinná bëꞌ xibá queëꞌ Moisés,
túngaca caní para uluꞌrúaj dxiꞌa lógaca bönachi,
en cabí bi ilún quéguequi tuꞌ túngaca libán ca gútiëꞌ Cristo lëꞌe yaga cruz.
13 Yuguꞌ bönniꞌ naꞌ taꞌzíꞌ lu náꞌagaquiëꞌ le narugu lu xpë́laꞌgaquiëꞌ ca rinná bëꞌ xibá queëꞌ Moisés,
bitiꞌ tuꞌzóëꞌ didzaꞌ idutë ca rnna xibá naꞌ.
Të́ꞌënëꞌ ilunëꞌ ga irugu lu xpë́laꞌliꞌ para gaca ilún ba zxön cuíngaquiëꞌ tuꞌ taꞌnná béꞌenëꞌ libíꞌiliꞌ para irugu lu xpë́laꞌliꞌ caní.
14 Ca naca quiaꞌ nedaꞌ,
cúꞌusaꞌ yöl-laꞌ ba le benëꞌ Xanruꞌ Jesucristo cateꞌ gútiëꞌ lëꞌe yaga cruz.
Tuꞌ nözi le benëꞌ Cristo lëꞌe yaga cruz,
yuguꞌ le dë yödzölió ni naca quiaꞌ ca tu le chinati,
bitiꞌ ruíꞌi ládxaꞌa le,
ateꞌ nedaꞌ nacaꞌ quégaca bönachi yödzölió ni ca tu bönniꞌ nati,
bitiꞌ tuíꞌi ladxiꞌ nedaꞌ.
15 Channö nácaruꞌ tuz len Jesucristo,
bitiꞌ bi run channö narugu lu xpë́laꞌruꞌ ca rinná bëꞌ xibá naꞌ o channö cabí narugu lu xpë́laꞌruꞌ caní.
Le run bayudxi naca gácaruꞌ bönachi cubi niuꞌ lëꞌe ládxiꞌdoꞌoruꞌ.
16 Yúguꞌtë bönniꞌ naꞌ tunëꞌ ca rinná bë xibá runaꞌ ni,
en yúguꞌtë bönniꞌ naꞌ néquiguequinëꞌ queëꞌ Dios,
rinábidaꞌ-nëꞌ Dios gunëꞌ ga soa dxi ládxiꞌdoꞌgaquiëꞌ,
en huéchiꞌ ládxëꞌë légaquiëꞌ.
17 Naꞌa zë lo,
cuntu nu bönniꞌ ral-laꞌ utsë́ꞌë nedaꞌ,
tuꞌ nácagaca bëꞌ butsóa zóagaca lu xpë́laꞌa nacaꞌ huen dxin queëꞌ Xanruꞌ Jesús.
18 Naꞌa,
böchiꞌ zánaꞌdoꞌ,
rinábidaꞌ-nëꞌ Xanruꞌ Jesucristo uzáꞌ ládxëꞌë queë́liꞌ yúguꞌtëliꞌ.
Caꞌ caz.