Guliꞌgún chiꞌi cuinliꞌ, ugáꞌanaliꞌ lu yöl-laꞌ nazán
5
Chinazanruꞌ tuꞌ busanëꞌ Cristo rëꞌu.
Guliꞌsóa tsutsu channö,
ugáꞌanaliꞌ lu yöl-laꞌ nazán naꞌ.
Bitiꞌ uzóa cuinliꞌ leyúbölö lu xibá queëꞌ Moisés para cabí gácaliꞌ ca tu bönniꞌ,
tsaz náquiëꞌ huen dxin.
2 Buliꞌzë́ nágaliꞌ nedaꞌ.
Nedaꞌ,
Pablo,
reaꞌ libíꞌiliꞌ,
channö ruíꞌiliꞌ lataj nu ichugu lu xpë́laꞌliꞌ ca rinná bëꞌ xibá naꞌ,
bitiꞌ caꞌ uzíꞌiliꞌ xibé le benëꞌ Cristo.
3 Leyúbölö rë́ꞌëndaꞌ guíaꞌ nútiꞌtës bönniꞌ ruꞌë lataj nu ichugu lu xpë́lëꞌë caní,
run bayudxi gunëꞌ idutë ca le rinná bëꞌ xibá queëꞌ Moisés.
4 Nuliꞌ réquiliꞌ huöácaliꞌ tsahuiꞌ lahuëꞌ Dios tuꞌ runliꞌ ca rinná bëꞌ xibá naꞌ,
chibuláꞌalenliꞌ-nëꞌ Cristo.
Chibusán náꞌaliꞌ le ruzáꞌ ládxëꞌë Dios queë́ruꞌ.
5 Rëꞌu ni ruzxöni ládxiꞌruꞌ huöácaruꞌ tsahuiꞌ lahuëꞌ Dios niꞌa que yöl-laꞌ huáca queëꞌ Dios Böꞌ láꞌayi tuꞌ reja ládxiꞌruꞌ Cristo.
6 Channö nácaruꞌ tuz len Jesucristo,
bitiꞌ bi run channö narugu lu xpë́laꞌruꞌ ca rinná bëꞌ xibá naꞌ o channö cabí narugu caní lu xpë́laꞌruꞌ.
Le run bayudxi naca tseja ládxiꞌruꞌ Cristo,
le run ga idxíꞌiruꞌ luzáꞌaruꞌ.
7 Dxíꞌadoꞌ guca ca gusí loliꞌ runliꞌ dza niꞌ.
¿Nuzxi ben ga bucáꞌanaliꞌ le nácatë?
8 Bitiꞌ benëꞌ Dios,
Bönniꞌ rulidzëꞌ libíꞌiliꞌ,
ga benliꞌ caní.
9 Bitiꞌ gal-la ládxiꞌliꞌ lë naꞌ rnna:
“Látiꞌsö cúa zi que yöta xtila ruhuöázx idutë cúa ga nayúꞌu cúa zi naꞌ.”
10 Tuꞌ nácaruꞌ tuz len Xanruꞌ,
runaꞌ löza ca naca queë́liꞌ,
saꞌ ládxiꞌliꞌ tuz ca rizáꞌ ládxaꞌa nedaꞌ,
ateꞌ Dios gun ziꞌë bönniꞌ naꞌ rutsë́ꞌë libíꞌiliꞌ,
nútiꞌtës nu naca bönniꞌ naꞌ.
11 Ca naca quiaꞌ nedaꞌ,
böchiꞌ zánaꞌdoꞌ,
nacuáꞌ nupa taꞌnná rusédidaꞌ bönachi ral-laꞌ irugu lu xpë́laꞌguequi ca rinná bëꞌ xibá queëꞌ Moisés.
Channö runaꞌ caní,
¿bizx queë taꞌbía nahuëꞌ bönniꞌ judío nedaꞌ?
Laꞌtuꞌ rusédidaꞌ caní,
cuntu nu ilé nedaꞌ tuꞌ runaꞌ libán ca gútiëꞌ Cristo lëꞌe yaga cruz.
12 Ca naca que nupa niꞌ tuꞌtsáꞌ libíꞌiliꞌ,
të́ꞌëni irugu lu xpë́laꞌliꞌ lë naꞌ,
nácöru laꞌ ilaꞌchugu tsaz cuínguequi.
13 Ca naca queë́liꞌ,
böchiꞌ zánaꞌdoꞌ,
Dios bulidzëꞌ libíꞌiliꞌ para gácaliꞌ bönachi nazángaca.
Bitiꞌ ugunliꞌ dxin yöl-laꞌ nazán naꞌ para gunliꞌ ca rizësö ládxiꞌliꞌ,
pero para gunliꞌ dxin que luzáꞌaliꞌ,
tuliꞌ iaꞌtuliꞌ,
tuꞌ nadxíꞌiliꞌ luzáꞌaliꞌ.
14 Yúguꞌtë le rinná bëꞌ xibá queëꞌ Dios rusudxín nu naꞌ run ca rinná bëꞌ xibá naꞌ rnna:
“Ral-laꞌ idxíꞌinuꞌ luzóꞌo ca nadxíꞌi cuinuꞌ.”
15 Channö rizíꞌ quídzaꞌliꞌ luzáꞌaliꞌ tuliꞌ iaꞌtuliꞌ,
runliꞌ ca tunbaꞌ böaꞌ guíꞌa síniaꞌ,
táguyaꞌabaꞌ,
en tágubaꞌ luzáꞌabaꞌ.
Buliꞌyú tsateꞌ usulu usunítiliꞌ luzáꞌaliꞌ tuliꞌ iaꞌtuliꞌ.
Le runruꞌ lu yöl-laꞌ bönáchisö queë́ruꞌ, en le runruꞌ len yöl-laꞌ huáca queëꞌ Dios Böꞌ láꞌayi
16 Lë ni naꞌ reaꞌ libíꞌiliꞌ:
Guliꞌgüíꞌ latja inná béꞌenëꞌ libíꞌiliꞌ Dios Böꞌ láꞌayi,
ateꞌ níꞌirö bítiꞌrö gunliꞌ ca rizësö ládxiꞌiliꞌ lu yöl-laꞌ bönáchisö queë́liꞌ.
17 Yuguꞌ le rizë́ ládxiꞌru gunruꞌ lu yöl-laꞌ bönáchisö queë́ruꞌ bitiꞌ röjlö́z le rë́ꞌënëꞌ Dios Böꞌ láꞌayi gunruꞌ,
ateꞌ lë naꞌ rë́ꞌënëꞌ Dios Böꞌ láꞌayi bitiꞌ röjlö́z le rë́ꞌëniruꞌ gunruꞌ lu yöl-laꞌ bönáchisö queë́ruꞌ.
Chopa ni,
bitiꞌ röjlö́zgaca,
en que lë ni naꞌ bitiꞌ gaca gunliꞌ ca rë́ꞌëni quéziliꞌ.
18 Channö ruíꞌiliꞌ lataj inná béꞌenëꞌ Dios Böꞌ láꞌayi libíꞌiliꞌ,
bítiꞌrö inná beꞌe xibá queëꞌ Moisés libíꞌiliꞌ.
19 Naca bëꞌ le tun bönachi lu yöl-laꞌ bönáchisö quéguequi.
Tun dul-laꞌ le riguitsaj xibá que yöl-laꞌ nutsaga naꞌ,
encaꞌ dul-laꞌ le lëꞌë.
Tun yuguꞌ le naxihuiꞌ,
en yuguꞌ le catsahuiꞌ.
20 Téquiguequi le bach budóꞌ néquiniguequi.
Tun yöl-laꞌ gudzáꞌ.
Tuꞌdíꞌi luzë́ꞌeguequi,
en taꞌdíl-lalen léguequi.
Tuꞌzxéꞌe luzë́ꞌeguequi,
en taꞌlé nupa naꞌ,
en tuꞌhuídiꞌ.
Taꞌrúaj choplö,
en tuꞌbéaj tsöláꞌalö nupa dáꞌgaca léguequi.
21 Taꞌzë́ ladxiꞌ le dë que luzë́ꞌeguequi,
en taꞌguilaj xíguiaꞌ.
Taꞌzudxi,
en tagu lëꞌe.
Tuꞌdödi bëꞌ ca túnguequi.
Le zián le caní túnguequi.
Nedaꞌ ruxösaꞌ ládxiꞌliꞌ naꞌa para cabí gunliꞌ caní ca naꞌ buxösaꞌ ládxiꞌliꞌ zíꞌalö,
rnníaꞌ:
Nupa túngaca caní bitiꞌ caꞌ ilaꞌdeliꞌ ilaꞌyúꞌu ga naꞌ rinná bëꞌë Dios.
22 Channö zóalen Dios Böꞌ láꞌayi rëꞌu runruꞌ caní:
Nadxíꞌiruꞌ luzáꞌaruꞌ.
Rudzeja ládxiꞌruꞌ.
Zoa dxi ládxiꞌdoꞌoruꞌ.
Ribö́zaruꞌ zxön ladxiꞌ.
Ruíꞌi ládxiꞌruꞌ luzáꞌaruꞌ.
Nácaruꞌ dxiꞌi ladxiꞌ.
Rusudxinruꞌ xtídzaꞌruꞌ.
23 Nácaruꞌ nöxaj ladxiꞌ.
Rinná beꞌe cuinruꞌ.
Bitiꞌ caꞌ gunná bëꞌë Moisés rëꞌu para cabí gunruꞌ yuguꞌ le caní.
24 Nupa néquiguequi queëꞌ Cristo bítiꞌrö tun ca të́ꞌëni quez,
en cabí tun le taꞌzësö ladxiꞌ lu yöl-laꞌ bönáchisö quéguequi.
25 Dios Böꞌ láꞌayi runnëꞌ yöl-laꞌ naꞌbán queë́ruꞌ.
Lëꞌ cazëꞌ ral-laꞌ inná béꞌenëꞌ rëꞌu ca naca yúguꞌtë le runruꞌ.
26 Bitiꞌ ral-laꞌ gun ba zxön cuinruꞌ,
en cabí utsáꞌaruꞌ luzáꞌaruꞌ,
en cabí uzxéꞌeruꞌ luzáꞌaruꞌ turuꞌ iaꞌturuꞌ.