4
Lë ni le rë́ꞌëndaꞌ inníaꞌ:
Tsanni ni ribö́zabiꞌ tu biꞌiꞌ bö́nniꞌdoꞌ síꞌibiꞌ bi ral-laꞌ gunnëꞌ xúzibiꞌ queë́biꞌ,
niꞌ nácabiꞌ bíꞌidoꞌ,
en bitiꞌ nayë́pisëtëröbiꞌ ca raca que tu nu naca tsaz huen dxin,
sal-laꞌ le nácatë nequi queë́biꞌ yúguꞌtë.
2 Tsanni niꞌ nácabiꞌ bíꞌidoꞌ,
nacuáꞌ nupa tun chiꞌi lëbiꞌ,
en tuꞌgún dxin le nequi queë́biꞌ ga idxintë dza chinuzóëꞌ xúzibiꞌ queë́biꞌ.
3 Lës caní raca caꞌ queë́ruꞌ.
Tsanni niꞌ gúcaruꞌ ca bíꞌidoꞌ,
gunná beꞌe xibá naꞌ rëꞌu ca raca quégaca bönachi yödzölió ni.
4 Cateꞌ bizáꞌa dza,
Dios gusö́l-lëꞌë zxíꞌini cazëꞌ ni.
Gúquiëꞌ zxíꞌininu tu nigula ca nácaruꞌ rëꞌu,
en gunná beꞌe le zoa lu xibá quégaca bönniꞌ judío Lëꞌ.
5 Caní guca queëꞌ para guca busölë́ꞌ nupa naꞌ rinná beꞌe le zoa lu xibá léguequi,
para gaca huöácaruꞌ biꞌi queëꞌ Dios.
6 Para gaca bëꞌ chinácaliꞌ biꞌi queë cazëꞌ,
Dios guchizëꞌ Dios Böꞌ láꞌayi ládxiꞌdoꞌoliꞌ,
ateꞌ Lë cazëꞌ rulidzëꞌ Dios uláz queë́liꞌ,
rnnëꞌ:
“Xuzaꞌ.”
7 Caní naca,
chinácaliꞌ biꞌi queëꞌ Dios,
en bítiꞌrö nácaliꞌ ca yuguꞌ bönniꞌ tsaz nácagaquiëꞌ huen dxin.
Naꞌa,
tuꞌ nácaliꞌ biꞌi queë cazëꞌ Dios,
Lë cazëꞌ nazíꞌ ladxiꞌ nëꞌë guequi queë́liꞌ le nequi queëꞌ tuꞌ nácaliꞌ tuz len Cristo.
Pablo ruíꞌi ládxëꞌë bönniꞌ Galacia taꞌyija ládxëꞌë Cristo
8 Cateꞌ niꞌ bitiꞌ núnbëꞌëliꞌ-nëꞌ Dios,
gúcaliꞌ ca yuguꞌ bönniꞌ,
tsaz nácagaquiëꞌ huen dxin,
en benliꞌ dxin quégaca budóꞌ néquini.
Bitiꞌ caꞌ nácagaca budóꞌ naꞌ Dios.
9 Naꞌa,
tuꞌ núnbëꞌëliꞌ-nëꞌ Dios,
o huáca innaruꞌ:
Tuꞌ núnbëꞌë Dios libíꞌiliꞌ,
¿bizx queë rë́ꞌëniliꞌ ubíꞌiliꞌ yuguꞌ lu xibá cané naꞌ cabí nu uzíꞌ xibé?
¿Rë́ꞌëniliꞌ huöácaliꞌ huen dxin tsaz,
en gunliꞌ ca rinná bëꞌ xibá naꞌ?
10 Rápaliꞌ tu iaꞌtú dza,
encaꞌ tu iaꞌtú beoꞌ,
encaꞌ tu iaꞌtú cusu na,
en tu iaꞌtú iz.
11 Rádxidaꞌ bi gaca queë́liꞌ.
¿Naruꞌ nuhuöáca nítisö dxin benaꞌ para gúnbëꞌëliꞌ le nácatë?
12 Rátaꞌyuáꞌ loliꞌ,
böchiꞌ zánaꞌdoꞌ,
gácaliꞌ ca nacaꞌ nedaꞌ,
nuláꞌ naꞌa lu naꞌ xibá benëꞌ Moisés.
Caní ral-laꞌ gácaliꞌ tuꞌ böácaꞌ nedaꞌ ca gúcaliꞌ libíꞌiliꞌ.
Bitiꞌ bi le cabí naca dxiꞌa benliꞌ quiaꞌ nedaꞌ.
13 Chinö́z quéziliꞌ bizx queë naꞌ gusí lahuaꞌ runaꞌ libán loliꞌ que le rinnë́ dxiꞌa.
Benaꞌ libán niꞌ tuꞌ güíꞌidaꞌ.
14 Bitiꞌ bucáꞌanaliꞌ nedaꞌ cané,
en cabí buzóaliꞌ nedaꞌ tsöláꞌalö sal-laꞌ bigútiliꞌ ca guca yödzöhuë́ꞌ quiaꞌ naꞌ.
Benliꞌ nedaꞌ bal,
tuz ca gunliꞌ bal tu gubáz láꞌayi queëꞌ Dios,
o ca runliꞌ bal Jesucristo caz.
15 Budzéjalëꞌëliꞌ dza niꞌ.
¿Bizxi guca queë́liꞌ tuꞌ cabirö raca caní?
Lë ni gaca inníaꞌ ca guca queë́liꞌ:
Laꞌtuꞌ huáca gunliꞌ,
bubéajliꞌ guiö́j lo quéziliꞌ,
le gúnnaliꞌ quiaꞌ.
16 Naꞌa,
¿réquiliꞌ nuhuöácaꞌ tu nu rilédeꞌe libíꞌiliꞌ tuꞌ gudxaꞌ libíꞌiliꞌ le nácatë?
17 Bönniꞌ niꞌ tuꞌtsë́ꞌë libíꞌiliꞌ tuíꞌi ládxëꞌë libíꞌiliꞌ,
pero calëga para gaca dxiꞌa queë́liꞌ.
Të́ꞌënëꞌ ilunëꞌ ga ucáꞌanaliꞌ netuꞌ para güíꞌi ládxiꞌliꞌ légaquiëꞌ.
18 Naꞌa,
naca dxiꞌa zoa nu ruíꞌi ladxiꞌ libíꞌiliꞌ,
pero tuz channö naca para gaca dxiꞌa queë́liꞌ.
Caní ruíꞌiticaꞌsö ládxaꞌa libíꞌiliꞌ,
en calë́gasö cateꞌ niꞌ zóalenaꞌ libíꞌiliꞌ.
19 Libíꞌiliꞌ,
zxíꞌinaꞌdoꞌ.
Ca naꞌ raca queë́nu nigula chizóa sóabiꞌ bíꞌidoꞌ queë́nu,
riguíꞌi rizácaꞌnu,
lës caní riguíꞌi rizácaꞌa nedaꞌ niꞌa queë́liꞌ leyúbölö ga idxinrö dza gácaliꞌ idú ca náquiëꞌ Cristo.
20 Nácaru laꞌ zóalenaꞌ libíꞌiliꞌ naꞌa para gaca güíꞌilenaꞌ libíꞌiliꞌ didzaꞌ nadzáꞌalö,
tuꞌ ruúbi ruguíꞌilëꞌëdaꞌ niꞌa queë́liꞌ.
Le rucudzuꞌ didzaꞌ ca guca quégacanu Agar en Sara
21 Naꞌa,
libíꞌiliꞌ,
nuliꞌ rë́ꞌëniliꞌ uzóa cuinliꞌ lu xibá queëꞌ Moisés,
guliꞌnáꞌtsöcaꞌ didzaꞌ ni guꞌa.
¿Catu caz buzë́ nágaliꞌ le rnna xibá naꞌ?
22 Rnna xibá naꞌ caní:
gulaꞌcuáꞌabiꞌ chópabiꞌ biꞌi bö́nniꞌdoꞌ queëꞌ Abraham.
Tubiꞌ gúcabiꞌ zxíꞌininu tu nigula tsaz nácanu huen dxin,
ateꞌ iaꞌtubiꞌ gúcabiꞌ zxíꞌininu nigula nazannu.
23 Zxíꞌininu nigula huen dxin naꞌ gúlajbiꞌ lu niꞌa lu naꞌ tu bönniꞌ tsca tálajbiꞌ yúguꞌtë bíꞌidoꞌ,
pero zxíꞌininu nigula nazannu naꞌ gúlajbiꞌ tuꞌ guzxíꞌ lu nëꞌë Dios gunëꞌ ga gálajbiꞌ.
24 Lë ni naca ca tu le rucudzuꞌ didzaꞌ.
Ca guca quégacanu chópanu nigula ni saꞌyéaj ca naca chopa didzaꞌ Dios bénlenëꞌ bönachi.
Tu didzaꞌ naꞌ naca le buzóëꞌ Dios lu guíꞌa Sinaí,
le saꞌyéaj lë naꞌ guca queë́nu Agar.
Nupa naꞌ rinná beꞌe xibá naꞌ léguequi,
nácagaca ca zxíꞌininu Agar,
en nácagaca ca huen dxin tsaz lu xibá naꞌ.
25 Le gúcanu Agar naꞌ saꞌyéaj caꞌ ca naca guíꞌa Sinaí naꞌ le zoa luyú Arabia,
en saꞌyéaj caꞌ ca naca yödzö Jerusalén naꞌa dza,
tuꞌ naca yödzö naꞌ ca tu bönniꞌ tsaz náquiëꞌ huen dxin tsözxö́n len nupa nacuáꞌ lu yödzö naꞌ.
26 Jerusalén naꞌ zoa yehuaꞌ yubá nazán,
ateꞌ rëꞌu ni nácaruꞌ bönachi uládz que yödzö niꞌ.
27 Nazúaj lu guichi láꞌayi le rnna:
Budzeja,
nigula huödx,
cabí nacuáꞌ zxíꞌinuꞌ.
Lu yöl-laꞌ rudzeja quiuꞌ gurö́dxiꞌa,
sal-laꞌ catu caz guca quiuꞌ le riguíꞌi rizácaꞌnu nigula
chizóa sóabiꞌ bíꞌidoꞌ queë́nu.
Budzeja tuꞌ sal-laꞌ nusán në́ꞌeguequi bönachi liꞌ,
gunëꞌ Dios ga ilaꞌyántërö zxíꞌinuꞌ
ca biꞌi queë́nu nigula zóalennu bönniꞌ queë́nu.
28 Libíꞌiliꞌ,
böchiꞌ zánaꞌdoꞌ,
rëꞌu ni nácaruꞌ ca gúcabiꞌ Isaac,
zxíꞌinëꞌ Abraham.
Nácaruꞌ ca yuguꞌ zxíꞌini xiꞌsóëꞌ Abraham,
guzxíꞌ lu nëꞌë Dios gataꞌ queëꞌ.
29 Dza niꞌ,
biꞌi naꞌ gúlajbiꞌ ca tálajbiꞌ yúguꞌtë bíꞌidoꞌ,
gudxía náꞌabiꞌ biꞌi naꞌ gúlajbiꞌ tuꞌ nözi yöl-laꞌ huáca queëꞌ Dios Böꞌ láꞌayi.
Lës caní raca caꞌ queë́ruꞌ naꞌa,
taꞌbía no bönachi yödzölió ni rëꞌu.
30 ¿Bizxí rnna le zoa lu guichi láꞌayi?
Caní rnna:
“Gurúꞌuna-nu nigula naꞌ tsaz nácanu huen dxin tsözxö́n len zxíꞌininu,
tuꞌ bitiꞌ gaca zxíꞌininu nigula naꞌ síꞌibiꞌ tsözxö́n zxíꞌininu nigula nazannu le guzxíꞌ lu nëꞌë Dios guequi queë́biꞌ zxíꞌininu nigula nazannu naꞌ.”
31 Caní naca,
böchiꞌ zánaꞌdoꞌ.
Bitiꞌ nácaruꞌ ca nácabiꞌ zxíꞌininu nigula naꞌ,
tsaz gúcanu huen dxin,
pero nácaruꞌ ca zxíꞌininu nigula nazannu naꞌ.