Le rinná bëꞌ xibá queëꞌ Moisés, en le reja ládxiꞌruꞌ Cristo
3
Libíꞌiliꞌ,
tuꞌ canö́z,
libíꞌiliꞌ,
bönniꞌ Galacia.
¿Nuzxi gulúꞌutsö libíꞌiliꞌ nëbi para cabirö uzóaliꞌ didzaꞌ le nácatë?
Gate ga rëꞌ buluíꞌituꞌ libíꞌiliꞌ le saꞌyéaj ca gútiëꞌ Jesucristo lëꞌe yaga cruz.
2 Gudíxjöiꞌi nedaꞌ lë ni.
¿Bidisóalenëꞌ libíꞌiliꞌ Dios Böꞌ láꞌayi tuꞌ benliꞌ ca rinná bëꞌ xibá queëꞌ Moisés o tuꞌ guyija ládxiꞌliꞌ le rinnë́ dxiꞌa biyö́niliꞌ?
3 ¿Nacxi guca nácaliꞌ tuꞌ canö́z caní?
Gusí loliꞌ nácaliꞌ bönachi queëꞌ Dios tuꞌ zóalenëꞌ libíꞌiliꞌ Dios Böꞌ láꞌayi.
¿Réquitseliꞌ huáca udxi gunliꞌ ga guéquiliꞌ queëꞌ Dios rácasö queë́liꞌ?
4 ¿Guca nítisö guca queë́liꞌ yúguꞌtë lë naꞌ guzxacaꞌ gudíꞌiliꞌ?
¡Bitiꞌ caꞌ guca caní!
5 Cateꞌ Dios risö́l-lëꞌë queë́liꞌ Dios Böꞌ láꞌayi,
en ruꞌë libíꞌiliꞌ lataj gunliꞌ yuguꞌ yöl-laꞌ huáca que yehuaꞌ yubá,
¿runëꞌ caní tuꞌ runliꞌ ca rinná bëꞌ xibá queëꞌ Moisés o tuꞌ reja ládxiꞌliꞌ le rinnë́ dxiꞌa naꞌ biyö́niliꞌ?
6 Lu guichi láꞌayi rnna:
Abraham guyija ládxëꞌë Dios,
ateꞌ Dios gunnë́ꞌ náquiëꞌ bönniꞌ tsahuiꞌ tuꞌ guyija ládxëꞌë Lëꞌ.
7 Que lë ni na naꞌ ral-laꞌ inö́ziliꞌ,
nupa naꞌ taꞌyija ladxiꞌ Dios nácagaca idú zxíꞌini xiꞌsóëꞌ Abraham.
8 Lu guichi láꞌayi ruíꞌi didzaꞌ zíꞌatëlö ca gunëꞌ Dios,
innë́ꞌ nácagaquiëꞌ tsahuiꞌ bönniꞌ izáꞌa ilaꞌyija ládxëꞌë Lëꞌ.
Que lë ni naꞌ Dios gudíxjöiꞌinëꞌ Abraham zíꞌatëlö ca naca le rinnë́ dxiꞌa,
gunnë́ꞌ:
“Lu nëꞌë Zxíꞌini xiꞌsúꞌ gunaꞌ ga gaca dxiꞌa quégaca bönachi idutë yödzölió.”
9 Caní naca,
Abraham guyija ládxëꞌë Dios,
ateꞌ Dios benëꞌ ga guca dxiꞌa queëꞌ.
Lës caní caꞌ naꞌa,
Dios runëꞌ ga raca dxiꞌa quégaca yúguꞌtë nupa taꞌyija ladxiꞌ Lëꞌ.
10 Nupa naꞌ tuꞌzxöni ladxiꞌ uluꞌhuöáca tsahuiꞌ tuꞌ túngaca ca rinná bëꞌ xibá queëꞌ Moisés,
nabágaꞌgaca xíguiaꞌ.
Caní naca tuꞌ nazúaj lu guichi láꞌayi,
le rnna:
“Yúguꞌtë nupa naꞌ cabí túngaca idutë ca rinná bëꞌ xibá naꞌ nabágaꞌgaca xíguiaꞌ.”
11 Naꞌa,
naca bëꞌ cuntu nu huöáca tsahuiꞌ lahuëꞌ Dios tuꞌ run nu naꞌ le rinná bëꞌ xibá naꞌ,
tuꞌ zoa lu guichi láꞌayi le rnna:
“Nu naꞌ nuhuöáca tsahuiꞌ lahuëꞌ Dios soa ibán tuꞌ reja ladxiꞌ Lëꞌ.”
12 Ca naꞌ nuhuöáca tsahuiꞌ lahuëꞌ Dios nu naꞌ reja ladxiꞌ Cristo nadzáꞌ ca naca que nu naꞌ ruzxöni ladxiꞌ nuhuöáca tsahuiꞌ tuꞌ run ca rinná bëꞌ xibá queëꞌ Moisés.
Zoa lu guichi láꞌayi le rnna:
“Nu naꞌ run idutë ca rinná bëꞌ xibá naꞌ soa ibán tuꞌ run caní.”
13 Cristo busölë́ꞌ rëꞌu lu le richugu queë́ruꞌ le rinná bëꞌ xibá naꞌ tuꞌ bëꞌë latja nu guchugu queëꞌ uláz queë́ruꞌ.
Caní naca tuꞌ zoa lu guichi láꞌayi le rnna:
“Narugu quégaca yúguꞌtë nupa naꞌ dáꞌgaca lëꞌe yaga.”
14 Caní guca queëꞌ Cristo para gaca gunëꞌ Dios ca naꞌ guzxíꞌ lu nëꞌë queëꞌ Abraham,
gunëꞌ ga gaca dxiꞌa quégaca bönachi izáꞌa lu nëꞌë Jesucristo,
en para gaca gunëꞌ ga idisóalenëꞌ Dios Böꞌ láꞌayi rëꞌu channö uyija ládxiꞌruꞌ Lëꞌ,
ca naꞌ guzxíꞌ lu nëꞌë Dios gunëꞌ.
Le rinná bëꞌ xibá queëꞌ Moisés, en le guzxíꞌ lu nëꞌë Dios gunëꞌ queë́ruꞌ
15 Naꞌa,
böchiꞌ zánaꞌdoꞌ,
uzúajaꞌ queë́liꞌ tu le rucudzuꞌ didzaꞌ,
tu le raca queë́ruꞌ.
Cateꞌ chopa bönniꞌ chigulunëꞌ tuz xtídzaꞌgaquiëꞌ,
en chigulunëꞌ tsutsu didzaꞌ naꞌ,
cuntu nu gaca utsáꞌ didzaꞌ naꞌ,
en cabí gaca nu bi udáꞌ lëꞌe didzaꞌ naꞌ.
16 Dios guzxíꞌ lu nëꞌë bi gunëꞌ queëꞌ Abraham,
en que zxíꞌini xiꞌsóëꞌ.
Ga zoa lu guichi lë ni,
bitiꞌ rnna:
“Quégaca zxíꞌini xiꞌsúꞌ”,
le ruíꞌi didzaꞌ que zián bönachi,
pero rnna:
“Que zxíꞌini xiꞌsúꞌ.”
Lë ni ruíꞌi didzaꞌ que tuz bönniꞌ,
Lëꞌ Cristo.
17 Lë ni naꞌ le rë́ꞌëndaꞌ inníaꞌ:
Dios benëꞌ tuz didzaꞌ len Abraham,
en guzxíꞌ lu nëꞌë gunëꞌ ca naꞌ gunnë́ꞌ.
Le nazúaj lu xibá queëꞌ Dios,
le benëꞌ Dios tapa gayuáꞌ yuꞌ chi-uruáꞌ iz gudödi niꞌ cateꞌ gudxëꞌ caní Abraham,
bitiꞌ gaca ugúa lë naꞌ guzxíꞌ lu nëꞌë Dios gunëꞌ,
en cabí gaca usulu le.
18 Naꞌa,
channö ral-laꞌ gunruꞌ ca rinná bëꞌ xibá naꞌ para síꞌiruꞌ le guzxíꞌ lu nëꞌë Dios gunsëꞌ,
bítiꞌrö naca tu le guzxíꞌ lu náꞌasëꞌ gunëꞌ.
Dios runsëꞌ caní tuꞌ caní guzxíꞌ lu nëꞌë bi gunëꞌ queëꞌ Abraham.
19 Channö caní naca,
¿bizx queë gunná bëꞌë Dios xibá naꞌ nazúajgaca lu didzaꞌ queëꞌ?
Dios gunná bëꞌë caní para gaca bëꞌ xíguiaꞌ nabágaꞌruꞌ,
pero gúcasö caní ga bidxintë dza naꞌ biláꞌ lahuëꞌ zxíꞌini xiꞌsóëꞌ Abraham naꞌ,
Bönniꞌ naꞌ guzxíꞌ lu nëꞌë Dios gunëꞌ queëꞌ lë naꞌ.
Yuguꞌ le gunná bëꞌë Dios lu xibá queëꞌ,
gusö́l-lëꞌë yödzölió ni lu náꞌagaquiëꞌ gubáz láꞌayi queëꞌ,
ateꞌ Moisés budödëꞌ didzaꞌ ca nácagaca xibá naꞌ.
20 Bitiꞌ naquín nu udödi didzaꞌ cateꞌ naca tuz nu run tuz didzaꞌ,
ateꞌ Dios,
tuz náquiëꞌ.
Bizx queë gunná bëꞌë Dios le zóagaca lu xibá queëꞌ
21 Le nazúajgaca lu xibá queëꞌ Dios,
¿taꞌdáꞌgaca lë naꞌ guzxíꞌ lu nëꞌë Dios gunëꞌ?
¡Bitiꞌ caꞌ!
Laꞌtuꞌ gunná bëꞌë Dios tu xibá le gaca gun ga sóaruꞌ ibanruꞌ tsaz,
níꞌirö huáca huöácaruꞌ tsahuiꞌ lahuëꞌ Dios channö gunruꞌ ca naꞌ rinná bëꞌ xibá naꞌ.
22 Tsca naca lë naꞌ nazúaj lu guichi láꞌayi,
yúguꞌtëruꞌ nabágaꞌruꞌ dul-laꞌ.
Caní naca para gaca síꞌiruꞌ lë naꞌ guzxíꞌ lu nëꞌë Dios gataꞌ queë́ruꞌ cateꞌ tseja ládxiꞌruꞌ Jesucristo.
23 Zíꞌatëlö ga bidxín dza gaca tseja ládxiꞌruꞌ Cristo,
le rnna xibá naꞌ gunná beꞌe rëꞌu,
ca naꞌ zoa le rinná beꞌe tu bönniꞌ yuꞌë lidxi guíë.
Caní guca ga bidxintë dza biláꞌ lahui gaca huöácaruꞌ tsahuiꞌ channö uyija ládxiꞌruꞌ Lëꞌ.
24 Caní naca,
le nazúaj lu xibá queëꞌ Dios gunná beꞌe rëꞌu,
lë naꞌ busedi rëꞌu ca tu bönniꞌ usedi ga bidxintë dza biláꞌ lahuëꞌ Jesucristo,
para gaca huöácaruꞌ tsahuiꞌ lahuëꞌ Dios channö uyija ládxiꞌruꞌ Lëꞌ.
25 Naꞌa,
tuꞌ bidxín dza gaca huöácaruꞌ tsahuiꞌ channö uyija ládxiꞌruꞌ Cristo,
bítiꞌrö inná beꞌe rëꞌu lë naꞌ busedi rëꞌu.
26 Yúguꞌtëliꞌ nácaliꞌ biꞌi queë cazëꞌ Dios tu reja ládxiꞌliꞌ-nëꞌ Jesucristo,
en chinácaliꞌ tuz len Lëꞌ.
27 Yúguꞌtë nupa nadílagaca nisa para huöácagaca tuz len Jesucristo,
nuhuöácagaca ca náquiëꞌ Lë cazëꞌ.
28 Bítiꞌrö narúaj choplö bönniꞌ judío,
en bönniꞌ izáꞌa,
en cabí narúaj choplö bönniꞌ náquiëꞌ tsaz huen dxin,
en bönniꞌ nazán,
en cabí narúaj choplö bönniꞌ,
en nigula,
tuꞌ cateꞌ böácaliꞌ tuz len Jesucristo,
yúguꞌtëliꞌ böácaliꞌ caꞌ tuz len luzáꞌaliꞌ tuliꞌ iaꞌtuliꞌ.
29 Naꞌa,
channö néquiliꞌ queëꞌ Cristo,
nácaliꞌ caꞌ zxíꞌini xiꞌsóëꞌ Abraham,
ateꞌ nazíꞌiliꞌ lë naꞌ guzxíꞌ lu nëꞌë Dios gunnëꞌ queëꞌ Abraham.