Pablo ruzéajniꞌinëꞌ bönachi Corinto, en rugapëꞌ Dios légaquiëꞌ
13
Le bunni luzuí ni guídaꞌ ga zóaliꞌ.
Nazúaj lu guichi láꞌayi le rnna:
“Run bayudxi ilaꞌcuáꞌ chopa tsonna nupa ilún ba nalí channö nu bi uzegui luzë́ꞌe didzaꞌ.”
2 Chibuzéajniꞌidaꞌ nupa gulún dul-laꞌ cateꞌ niꞌ guzóalenaꞌ libíꞌiliꞌ le buropi luzuí,
ateꞌ naꞌa ruzéajniꞌidaꞌ légaquiëꞌ leyúbölö,
encaꞌ yúguꞌtë nupa tun dul-laꞌ,
sal-laꞌ ni zoaꞌ ziꞌtuꞌ,
rnníaꞌ:
Channö guídaꞌ ga zóaliꞌ leyúbölö bitiꞌ gacaꞌ nöxaj ladxiꞌ para til-laꞌ légaquiëꞌ.
3 Rinábaliꞌ tu le gaca bëꞌ ruáꞌa didzaꞌ uláz queëꞌ Cristo.
Lë naꞌ gunaꞌ gaca bëꞌ ruáꞌa caní didzaꞌ.
Bitiꞌ caꞌ ricuídiꞌnëꞌ Cristo cateꞌ bi runëꞌ queë́liꞌ,
pero lu yöl-laꞌ huáca zxön queëꞌ runëꞌ bi runëꞌ queë́liꞌ.
4 Le nácatë gudë́ꞌë lëꞌe yaga cruz ca nu ricuidiꞌ,
pero zoëꞌ nabanëꞌ tuꞌ zóalen yöl-laꞌ huáca queëꞌ Dios Lëꞌ.
Netuꞌ caꞌ ricuídiꞌtuꞌ tsözxö́n len Lëꞌ,
pero tuꞌ nácatuꞌ tuz len Lëꞌ nabantuꞌ,
ateꞌ zóalen netuꞌ yöl-laꞌ huáca queëꞌ Dios bi guntuꞌ ga niꞌ zóaliꞌ.
5 Buliꞌyú cuinliꞌ channö réajlëꞌëliꞌ Cristo o cabí.
Guliꞌsíꞌ bëꞌ laꞌ cuínsiliꞌ.
¿Naruꞌ cabí nö́ziliꞌ zóalenëꞌ Jesucristo libíꞌiliꞌ channö le nácatë réajlëꞌëliꞌ Lëꞌ?
6 Runtuꞌ löza chinö́z quéziliꞌ le nácatë netuꞌ réajlëꞌëtuꞌ Cristo.
7 Rulídzatuꞌ-nëꞌ Dios rinábituꞌ-nëꞌ gácalenëꞌ libíꞌiliꞌ,
para cabí guáꞌaliꞌ döꞌ,
calëga para urúajtuꞌ dxiꞌa netuꞌ,
pero para gunliꞌ libíꞌiliꞌ le naca tsahuiꞌ sal-laꞌ guéquiliꞌ richixi riníguituꞌ netuꞌ.
8 Bitiꞌ caꞌ gaca táꞌbagaꞌtuꞌ le naca idútë li,
pero gácasö guntuꞌ ca saꞌyéaj le naca idútë li.
9 Que lë ni naꞌ rudzéjatuꞌ cateꞌ ricuídiꞌtuꞌ,
ateꞌ libíꞌiliꞌ ridipa ládxiꞌliꞌ.
Rulídzaticaꞌstuꞌ-nëꞌ Dios,
rinábituꞌ-nëꞌ gunëꞌ ga gaca idú ca réajlëꞌëliꞌ Cristo.
10 Que lë ni naꞌ ruzúajaꞌ queë́liꞌ lu guichi lë ni tsanni ni zoaꞌ ziꞌtuꞌ ga zóaliꞌ.
Níꞌirö cateꞌ guídaꞌ ga zóaliꞌ bitiꞌ gun bayudxi usacaꞌ ziꞌa libíꞌiliꞌ,
pero ugunaꞌ dxin yöl-laꞌ unná bëꞌ nudödëꞌ Xanruꞌ lu naꞌa,
le naca para utipaꞌ ládxiꞌliꞌ,
en calëga para usunítiaꞌ libíꞌiliꞌ.
11 Naꞌa,
böchiꞌ luzáꞌadoꞌ,
dipa ládxiꞌliꞌ.
Guliꞌgüíꞌ ládxiꞌliꞌ gaca idú ca réajlëꞌëliꞌ Cristo.
Guliꞌgüíꞌ ládxiꞌliꞌ caꞌ lë ni reaꞌ libíꞌiliꞌ.
Guliꞌgaca tuz len luzáꞌaliꞌ,
en guliꞌcöza dxíꞌadoꞌ.
Rinábidaꞌ-nëꞌ Dios sóalenëꞌ libíꞌiliꞌ.
Lëꞌ nadxíꞌinëꞌ rëꞌu,
en runëꞌ ga ribö́zaruꞌ dxíꞌadoꞌ.
12 Guliꞌgapa Dios luzáꞌaliꞌ,
tuliꞌ iaꞌtuliꞌ,
en unídaꞌliꞌ luzáꞌaliꞌ.
13 Yúguꞌtë böchiꞌ luzáꞌaruꞌ ni tuꞌgapëꞌ Dios libíꞌiliꞌ.
14 Rinábidaꞌ-nëꞌ Dios gunëꞌ ga gataꞌ queë́liꞌ yúguꞌtëliꞌ le ruzáꞌ ládxëꞌë Xanruꞌ Jesucristo queë́ruꞌ,
en idxíꞌinëꞌ caꞌ libíꞌiliꞌ,
en gunëꞌ ga gácaliꞌ tuz len Dios Böꞌ Láꞌayi.
¡Caꞌ gaca!