Yuguꞌ le buluíꞌinëꞌ Dios Pablo
12
Le nácatë bitiꞌ ral-laꞌ gun ba zxön cuinaꞌ.
Sal-laꞌ caní naca,
naꞌa guꞌa didzaꞌ ca nácagaca le buluíꞌinëꞌ Xanruꞌ nedaꞌ,
en le buzéajniꞌinëꞌ nedaꞌ.
2 Núnbëꞌa-nëꞌ tu bönniꞌ réajlëꞌë Cristo,
chiguca chidáꞌ iz zoa nu guchë́ꞌ lëꞌ yehuaꞌ yubá.
Bitiꞌ nözdaꞌ channö guyijëꞌ niꞌ lu idútë le naca cazëꞌ,
o lu böꞌ naca cazëꞌ.
Tuzëꞌ Dios nö́zinëꞌ.
3 Nözdaꞌ guyáziëꞌ lataj lachi queëꞌ Dios,
nazíꞌi le paraíso.
Bitiꞌ nözdaꞌ channö guyijëꞌ niꞌ lu idútë le naca cazëꞌ,
o cabí.
Tuzëꞌ Dios nö́zinëꞌ.
4 Tsanni niꞌ zoëꞌ ga naꞌ,
biyönnëꞌ le tun ga nu rubani,
yuguꞌ le bitiꞌ dë lataj nu güíꞌi didzaꞌ que.
5 Bönniꞌ ni huáca gunaꞌ lëꞌ zxön,
pero bitiꞌ gun ba zxön cuinaꞌ.
Tuz gun ba zxön cuinaꞌ tuꞌ ricuídiꞌdaꞌ.
6 Laꞌtuꞌ guë́ꞌënidaꞌ gun ba zxön cuinaꞌ,
bitiꞌ gacaꞌ bönniꞌ bitiꞌ bi nö́zinëꞌ,
channö inníaꞌ le naca idútë li.
Naꞌa,
bitiꞌ gun ba zxön cuinaꞌ tuꞌ cabí rë́ꞌëndaꞌ nu gunrö nedaꞌ bal tsca le biléꞌe benaꞌ nedaꞌ,
o tsca naca didzaꞌ biyö́ni bëꞌa nedaꞌ.
7 Níꞌirö,
para cabí tödi bëꞌ gun ba zxön cuinaꞌ tuꞌ biléꞌedaꞌ lë naꞌ tun ga nu rubani,
Dios buzóëꞌ tu huëꞌ lu xipë́laꞌa le riládaꞌ ca rilá ga rinë́ꞌ tu yötsiꞌ.
Huëꞌ naꞌ guca ca tu le bugún dxin tuꞌ xihuiꞌ,
para busacaꞌ ziꞌ nedaꞌ.
Caní guca quiaꞌ para cabí tödi bëꞌ gun ba zxön cuinaꞌ.
8 Tsonna luzuí gútaꞌyuaꞌ lahuëꞌ Xanruꞌ,
en gunábidaꞌ Lëꞌ ugǘëꞌ xihuëꞌa naꞌ.
9 Xanruꞌ gudxëꞌ nedaꞌ:
“Nácatë quiuꞌ le ruzáꞌ ládxaꞌa quiuꞌ.
Uzíꞌtëruꞌ xibé le ruzáꞌ ládxaꞌa quiuꞌ cateꞌ ricuídiꞌnuꞌ.”
Que lë ni naꞌ,
rudzéjadeꞌedaꞌ tuꞌ ricuídiꞌdaꞌ.
Tuꞌ raca caní quiaꞌ,
rácalentërö yöl-laꞌ huáca queëꞌ Cristo nedaꞌ.
10 Que lë ni naꞌ,
tuꞌ nadxíꞌidaꞌ-nëꞌ Cristo,
rudzéjadaꞌ cateꞌ ricuídiꞌdaꞌ,
en cateꞌ nu rulidza nedaꞌ ziꞌ,
en cateꞌ bi riyadzaj quiaꞌ,
en cateꞌ nu ribía ladxiꞌ nedaꞌ,
en cateꞌ bi raca quiaꞌ.
Cateꞌ nacuídiꞌdaꞌ,
nápatërö cazaꞌ yöl-laꞌ huáca queëꞌ Lëꞌ.
Pablo ruíꞌi ládxëꞌë bönachi queëꞌ Cristo nacuáꞌ Corinto
11 Nacaꞌ tu bönniꞌ bitiꞌ bi nö́zinëꞌ tuꞌ bëꞌa didzaꞌ ca naca le dxiꞌa benaꞌ nedaꞌ.
Libíꞌi cázaliꞌ benliꞌ bayudxi benaꞌ caní.
Libíꞌiliꞌ ral-laꞌ gunliꞌ nedaꞌ bal,
ateꞌ sal-laꞌ bitiꞌ bi nacaꞌ nedaꞌ,
bitiꞌ caꞌ nácaraꞌ cuidiꞌ ca nácagaquiëꞌ bönniꞌ niꞌ nácadaꞌgaquiëꞌ lo,
taꞌnnë́ꞌ nácagaquiëꞌ gubáz queëꞌ Cristo.
12 Yuguꞌ le benaꞌ lu yöl-laꞌ riböza zxön ladxiꞌ quiaꞌ ga niꞌ zóaliꞌ nácagaca bëꞌ nacaꞌ gubáz queëꞌ Cristo.
Biléꞌeliꞌ yuguꞌ le benaꞌ,
le nácagaca bëꞌ,
en le tun ga nu rubani,
en yuguꞌ yöl-laꞌ huáca zxön que yehuaꞌ yubá.
13 Tuz le cabí benaꞌ ga zóaliꞌ le benaꞌ ga nacuáꞌ iaꞌzícaꞌrö cöꞌ bönachi queëꞌ Cristo.
Bitiꞌ busacaꞌ ziꞌa libíꞌiliꞌ bi gúnnaliꞌ le guíꞌaj gahuaꞌ.
Buliꞌniti lo nedaꞌ tuꞌ cabí benaꞌ caní queë́liꞌ.
14 Chizóa guídaꞌ ga zóaliꞌ le bunni luzuí.
Bitiꞌ bi inabaꞌ gúnnaliꞌ quiaꞌ.
Rë́ꞌëndaꞌ gunna cuin cázaliꞌ quiaꞌ,
en calëga bi dë queë́liꞌ.
Yuguꞌ biꞌi huë́ꞌënidoꞌ,
bitiꞌ run bayudxi uluꞌgágubiꞌ xuz xináꞌagacabiꞌ.
Xuz xináꞌagacabiꞌ naꞌ ral-laꞌ uluꞌgahuëꞌ zxíꞌinigaquiëꞌ.
15 Idú ládxaꞌa utö́aꞌ yúguꞌtë le dë quiaꞌ,
en udödi cuinaꞌ niꞌa queë́liꞌ para gaca bi uzíꞌiliꞌ xibé,
sal-laꞌ réquidaꞌ cateꞌ nadxíꞌirödaꞌ libíꞌiliꞌ,
zeaj ruhuéchiꞌ yöl-laꞌ nadxíꞌi queë́liꞌ nedaꞌ.
16 Nöz quéziliꞌ bitiꞌ busacaꞌ ziꞌa libíꞌiliꞌ.
Naꞌa,
bál-laliꞌ innaliꞌ gucaꞌ sinaꞌ,
ateꞌ len didzaꞌ bitiꞌ nácatë buziꞌa xibaliꞌ.
17 ¿Naruꞌ réquitseliꞌ guzxíꞌ yéꞌedaꞌ libíꞌiliꞌ cateꞌ gusö́l-laꞌa yuguꞌ gubáz quiaꞌ ga zóaliꞌ?
18 Gútaꞌyuaꞌ lobiꞌ biꞌi Tito tséajbiꞌ ga zóaliꞌ,
ateꞌ gusö́l-laꞌa-nëꞌ bö́chiꞌruꞌ naꞌ tsözxö́n len lëbiꞌ.
¿Naruꞌ réquitseliꞌ buzíꞌibiꞌ xibaliꞌ biꞌi Tito?
¿Naruꞌ cabí bentuꞌ laꞌ lë́bisö ca runtuꞌ biꞌi Tito,
en nedaꞌ,
encaꞌ laꞌ lë́bisö didzaꞌ bë́ꞌëtuꞌ?
19 ¿Naruꞌ réquitseliꞌ rubéaj cuintuꞌ dxiꞌa loliꞌ libíꞌiliꞌ?
Lahuëꞌ Dios ruíꞌituꞌ didzaꞌ uláz queëꞌ Cristo,
böchiꞌ luzáꞌadoꞌ,
ateꞌ yúguꞌtë le runtuꞌ nácagaca para gácarö idú yöl-laꞌ réajlëꞌ queë́liꞌ Cristo.
20 Rádxidaꞌ bitiꞌ gácaliꞌ ca rë́ꞌëndaꞌ gácaliꞌ cateꞌ guídaꞌ ga zóaliꞌ,
ateꞌ nedaꞌ bitiꞌ gacaꞌ ca rë́ꞌëniliꞌ libíꞌiliꞌ gacaꞌ.
Rádxidaꞌ ridil-la dídzaꞌliꞌ,
en ruzxéꞌeliꞌ luzáꞌaliꞌ,
en rileliꞌ luzáꞌaliꞌ,
en rulidza dítjaliꞌ luzáꞌaliꞌ,
en rnnëliꞌ que luzáꞌaliꞌ,
en run ba zxön cuinliꞌ,
en rutsátsaliꞌ.
21 Cateꞌ guídaꞌ ga zóaliꞌ,
channö caní raca queë́liꞌ,
rádxidaꞌ gunëꞌ Dios ga utuíꞌidaꞌ ca naca queë́liꞌ,
ateꞌ gun bayudxi cödxaꞌ niꞌa quégaca zián nupa niꞌ gulún dul-laꞌ,
en bitiꞌ buluꞌbíꞌi ládxiꞌgaca ca nácagaca le cabí naca tsahuiꞌ gulúngaca,
en yuguꞌ le gulaꞌzë́ ládxiꞌguequi le cabí naca dxiꞌa.