Ca nácagaquiëꞌ Pablo, en bönniꞌ tun cuíngaquiëꞌ gubáz queëꞌ Cristo
11
Rë́ꞌëndaꞌ guáꞌ ilenliꞌ nedaꞌ tsanni ni guꞌa didzaꞌ lu yöl-laꞌ bitiꞌ bi nözi quiaꞌ.
Buliꞌsáꞌ ládxiꞌliꞌ quiaꞌ.
2 Ruíꞌi ládxaꞌa libíꞌiliꞌ ca naꞌ Dios caz ruíꞌi ládxëꞌë libíꞌiliꞌ,
tuꞌ nácaliꞌ ca nácabiꞌ tubiꞌ biꞌi nigula raꞌbandoꞌ,
naca idú ládxiꞌbiꞌ,
rusudxinaꞌ-biꞌ lahuëꞌ Cristo para utsaga náꞌalenbiꞌ Lë cazëꞌ.
3 Rádxidaꞌ idxín queë́liꞌ nu siꞌ yeꞌe libíꞌiliꞌ,
en gun ga usanliꞌ ca nadxíꞌiliꞌ-nëꞌ Cristo idú ládxiꞌliꞌ,
ca naꞌ guca queë́nu Eva,
nigula queëꞌ Adán,
cateꞌ guzxíꞌ yeꞌe Satanás tuꞌ xihuiꞌ lënu lu yöl-laꞌ sinaꞌ que.
4 Caní rnníaꞌ tuꞌ idú ládxiꞌliꞌ ruíꞌiliꞌ nu zaꞌ queë́liꞌ lataj,
en run libán que xibá queëꞌ Jesús,
le nadzáꞌ ca naca xibá naꞌ bentuꞌ netuꞌ libán que,
ateꞌ rizíꞌ lu náꞌaliꞌ tu böꞌ,
en tu didzaꞌ dxiꞌa le nadzáꞌgaca ca nácagaca Böꞌ Láꞌayi naꞌ,
en didzaꞌ dxiꞌa naꞌ guzxíꞌ lu náꞌaliꞌ lu naꞌtuꞌ netuꞌ.
5 Réquidaꞌ bitiꞌ nácaraꞌ cuídiꞌsö ca nácagaquiëꞌ bönniꞌ niꞌ nácatërögaquiëꞌ lo,
ateꞌ réquiliꞌ nácagaquiëꞌ gubáz queëꞌ Cristo.
6 Nadxi caꞌ nacaꞌ cuídiꞌsö ca ruáꞌa didzaꞌ,
pero bitiꞌ nacaꞌ cuídiꞌsö ca naca yöl-laꞌ réajniꞌi napaꞌ.
Zián luzuí,
en zián ca buluíꞌituꞌ libíꞌiliꞌ ca naca yöl-laꞌ réajniꞌi nápatuꞌ.
7 Nadxi caꞌ bitiꞌ naca dxiꞌa tu le benaꞌ,
bitiꞌ bi buquizxjaꞌ libíꞌiliꞌ cateꞌ benaꞌ libán ga zóaliꞌ que didzaꞌ dxiꞌa.
Ben cuinaꞌ cáꞌasö,
ateꞌ benaꞌ ga gúcaliꞌ libíꞌiliꞌ zxön.
8 Bugunaꞌ dxin le nequi quéguequi iaꞌzícaꞌrö cöꞌ bönachi queëꞌ Cristo,
tuꞌ guzxiꞌa dumí buluꞌnödzjëꞌ légaquiëꞌ quiaꞌ para guca benaꞌ dxin ga zóaliꞌ libíꞌiliꞌ.
9 Cateꞌ guzóalenaꞌ libíꞌiliꞌ,
en biyadzaj quiaꞌ,
bitiꞌ busacaꞌ ziꞌa nituliꞌ libíꞌiliꞌ,
pero lë naꞌ biyadzaj quiaꞌ,
gulunnëꞌ quiaꞌ bö́chiꞌruꞌ bilaꞌrúajëꞌ luyú Macedonia,
en bilaꞌdxinëꞌ ga zoaꞌ.
Catu caz busacaꞌ ziꞌa libíꞌiliꞌ,
ateꞌ laꞌ lë́bisö ca gunaꞌ.
10 Niꞌa que le naca idútë li queëꞌ Cristo le zóalen nedaꞌ,
bitiꞌ soaꞌ dxisö,
gun ba zxön cuinaꞌ ca naca lë ni idú luyú Acaya.
11 ¿Naruꞌ réquitseliꞌ rnníaꞌ caní tuꞌ cabí nadxíꞌidaꞌ libíꞌiliꞌ?
Nö́zinëꞌ Dios nadxíꞌidaꞌ libíꞌiliꞌ.
12 Gúnticaꞌsaꞌ ca runaꞌ naꞌa,
para cabí gataꞌ quégaquiëꞌ lataj ilún ba zxön cuíngaquiëꞌ bönniꞌ niꞌ taꞌnnasëꞌ nácagaquiëꞌ gubáz queëꞌ Cristo,
en taꞌnnë́ꞌ tunëꞌ xichinëꞌ Lëꞌ ca runtuꞌ netuꞌ.
13 Bitiꞌ caꞌ nácagaquiëꞌ gubáz nasö́l-lëꞌë Cristo.
Taꞌzíꞌ yëꞌë ca naca dxin tunëꞌ,
en tun cuíngacasëꞌ gubáz queëꞌ Cristo.
14 Bitiꞌ ral-laꞌ ubániruꞌ ca tunëꞌ bönniꞌ naꞌ.
Lëscaꞌ Satanás caz,
tuꞌ xihuiꞌ,
ruluíꞌi cuini ca tu gubáz láꞌayi queëꞌ Dios,
ridë́ꞌ lu beníꞌ.
15 Que lë ni naꞌ bitiꞌ ral-laꞌ ubániruꞌ channö yuguꞌ huen dxin que tuꞌ xihuiꞌ naꞌ tuꞌluíꞌi cuíngaquiëꞌ ca nupa tun xichini Nu naꞌ naca tsahuiꞌ.
Udxi quégaquiëꞌ ca saꞌyéaj le tunëꞌ.
Yuguꞌ le gudíꞌi guzxáquëꞌë Pablo
16 Leyúbölö reaꞌ libíꞌiliꞌ:
Cuntu nu ral-laꞌ guequi nachixi icjaꞌ.
Channö réquiliꞌ nachixi icjaꞌ,
guliꞌgüíꞌ nedaꞌ lataj guꞌa didzaꞌ ca tu bönniꞌ nachixi icjëꞌ,
para gun ba zxön cuinaꞌ tu chíꞌidoꞌ.
17 Didzaꞌ ni ruáꞌa bitiꞌ naca le rinná bëꞌë Xanruꞌ,
pero ruáꞌa didzaꞌ ca tu bönniꞌ nachixi icjëꞌ,
run ba zxön cuinaꞌ.
18 Nacuꞌë zián bönniꞌ tun ba zxön cuíngaquiëꞌ ca nácagaca le tunëꞌ lu yöl-laꞌ bönáchisö quégaquiëꞌ.
Que lë ni naꞌ,
nedaꞌ caꞌ gun ba zxön cuinaꞌ.
19 Tuꞌ réquiliꞌ rácadaꞌaliꞌ,
idú ládxiꞌliꞌ ruíꞌiliꞌ lataj iluꞌë didzaꞌ yuguꞌ bönniꞌ nachixi ícjagaquiëꞌ.
20 Ruíꞌiliꞌ caꞌ lataj nu gun libíꞌiliꞌ bönniꞌ nadóꞌogaca,
o nu cúa le dë queë́liꞌ,
o nu inná beꞌe libíꞌiliꞌ,
o nu ucáꞌana libíꞌiliꞌ cáꞌasö,
o nu capaꞌ rúꞌaliꞌ.
21 Rutuíꞌidaꞌ rnníaꞌ lë ni:
Bitiꞌ bentuꞌ caní queë́liꞌ tuꞌ gudödi bëꞌ gúcatuꞌ nöxaj ladxiꞌ.
Channö zoa nu naca rugu ladxiꞌ para gun ba zxön cuini,
nedaꞌ caꞌ gacaꞌ rugu ladxiꞌ,
en guꞌa didzaꞌ ca tu bönniꞌ nachixi icjëꞌ.
22 ¿Naruꞌ nácagaquiëꞌ bönniꞌ hebreo?
Lëscaꞌ nacaꞌ nedaꞌ.
¿Naruꞌ nácagaquiëꞌ bönniꞌ Israel?
Lëscaꞌ nacaꞌ nedaꞌ.
¿Naruꞌ nácagaquiëꞌ zxíꞌini xiꞌsóëꞌ Abraham?
Lëscaꞌ nacaꞌ nedaꞌ.
23 ¿Naruꞌ nácagaquiëꞌ huen dxin queëꞌ Cristo?
Lëscaꞌ nácatëraꞌ nedaꞌ.
(Naꞌa ruáꞌa didzaꞌ ca tu bönniꞌ nachixi icjëꞌ cateꞌ rnníaꞌ caní.)
Béntëraꞌ dxin ca gulunëꞌ légaquiëꞌ.
Guyuꞌa lidxi guíë ziánrö luzuí ca gulaꞌyuꞌë légaquiëꞌ.
Gulaꞌzéꞌedaꞌ nedaꞌ yu bönachi ziánrö luzuí ca guca quégaquiëꞌ.
Guzóa bönadxi gátiaꞌ ziánrö luzuí ca guzóa quégaquiëꞌ.
24 Gayuꞌ luzuí yuguꞌ bönniꞌ judío gulaꞌguínëꞌ nedaꞌ guídi.
Tu tu luzuí naꞌ gulaꞌguínëꞌ nedaꞌ chënna uruáꞌ luzuí.
25 Tsonna luzuí gulaꞌguínëꞌ nedaꞌ gubáꞌayi.
Tu luzuí buluꞌladxëꞌ nedaꞌ guiö́j.
Tsonna luzuí guzóaꞌ tu lëꞌe barco le guca ditaj,
en bötaj lu nísadoꞌ.
Tu luzuí guzóaꞌ idú tu yëla,
en tu dza lu nisa que nísadoꞌ.
26 Zián luzuí cateꞌ niꞌ yuꞌa nöza,
gudödaꞌ gapa guzóa bönadxi quiaꞌ yuguꞌ lu yegu,
en gapa guzóa bönadxi quiaꞌ lu náꞌagaquiëꞌ gubán,
en gapa guzóa bönadxi quiaꞌ lu náꞌagaquiëꞌ bönniꞌ uládz quiaꞌ,
en gapa guzóa bönadxi quiaꞌ lu náꞌagaquiëꞌ bönniꞌ ziꞌtuꞌ,
en gapa guzóa bönadxi quiaꞌ lu yödzö,
en gapa guzóa bönadxi quiaꞌ lu lataj cáꞌasö,
en gapa guzóa bönadxi quiaꞌ lu nísadoꞌ,
en gapa guzóa bönadxi quiaꞌ lu náꞌagaquiëꞌ bönniꞌ taꞌzíꞌ yëꞌë,
taꞌnnë́ꞌ nácagaquiëꞌ bö́chiꞌruꞌ taꞌyéajlëꞌë Cristo.
27 Benaꞌ dxin ziꞌi,
en gudú ládxaꞌa.
Zián luzuí bitiꞌ gutaꞌ quiaꞌ lataj gásiaꞌ.
Gudunaꞌ,
en gubidxaꞌ nisa.
Zián luzuí bitiꞌ gutaꞌ quiaꞌ bi gahuaꞌ,
o ga utsëꞌe cuinaꞌ,
o lariꞌ gácuaꞌ.
28 Iaꞌstú,
yúguꞌtë dza ruúbi ruguíꞌidaꞌ tuꞌ ruíꞌidaꞌ ládxaꞌa yúguꞌtë cöꞌ bönachi queëꞌ Cristo.
29 Cateꞌ nu ricuidiꞌ,
nedaꞌ caꞌ ricuídiꞌdaꞌ.
Cateꞌ nu run ga ichixi iníguinëꞌ tu bö́chiꞌruꞌ,
riledaꞌ nu run caní.
30 Channö run bayudxi gun ba zxön cuinaꞌ,
gun ba zxön cuinaꞌ ca naca le nácagaca bëꞌ ricuídiꞌdaꞌ.
31 ¡Dios,
Xuzëꞌ Xanruꞌ Jesucristo,
gácaticaꞌsö queëꞌ yöl-laꞌ ba!
¡Lëꞌ nö́zinëꞌ ruáꞌa didzaꞌ idútë li!
32 Cateꞌ niꞌ guzóaꞌ lu yödzö Damasco,
bönniꞌ niꞌ gutaꞌ lu nëꞌë uláz queëꞌ bönniꞌ rinná bëꞌë,
lëꞌ Aretas,
bucuꞌë yuguꞌ bönniꞌ gulaꞌbö́ꞌ nísiëꞌ para ilaꞌzönëꞌ nedaꞌ,
33 pero yuguꞌ bö́chiꞌruꞌ niꞌ buluꞌdödëꞌ nedaꞌ tu ga raꞌa beníꞌ que yuꞌu,
yuꞌa tu gaꞌböra zxön,
en buluꞌzötjëꞌ nedaꞌ níꞌilö lu zöꞌö run chiꞌi yödzö naꞌ.
Caní guca,
buláꞌ lu náꞌagaquiëꞌ bönniꞌ niꞌ gulaꞌbö́ꞌ nísiëꞌ nedaꞌ.