Yöl-laꞌ unná bëꞌ dë lu nëꞌë Pablo
10
Taꞌnná bönachi nacaꞌ nöxaj ladxiꞌ cateꞌ zóalenaꞌ libíꞌiliꞌ,
pero cateꞌ zoaꞌ ziꞌtuꞌ ga zóaliꞌ nacaꞌ rugu ladxiꞌ ca ruzúajaꞌ lu guichi.
Tuꞌ náquiëꞌ nöxaj ladxiꞌ,
en dxiꞌi ladxiꞌ Cristo,
nedaꞌ,
Pablo,
rátaꞌyuaꞌ loliꞌ
2 cabí gunliꞌ ga gun bayudxi gacaꞌ rugu ladxiꞌ len libíꞌiliꞌ cateꞌ idxinaꞌ ga zóaliꞌ.
Chizóa gacaꞌ rugu ladxiꞌ len nupa niꞌ taꞌnná runtuꞌ dxin ni lu yöl-laꞌ bönáchisö queë́tuꞌ.
3 Le nácatë nácatuꞌ bönachi,
pero calëga rácasö queë́tuꞌ runtuꞌ xichinëꞌ Dios.
4 Yuguꞌ le rudíꞌinituꞌ lu gudil-la,
bitiꞌ nácagaca ca le tuꞌdíꞌini bönachi yödzölió ni lu gudil-la,
pero yuguꞌ le rudíꞌinituꞌ lu gudil-la nápagaca yöl-laꞌ huáca queëꞌ Dios,
le ruguntuꞌ dxin para usunítituꞌ le nál-lagaca que tuꞌ xihuiꞌ.
5 Rusunítituꞌ yuguꞌ didzaꞌ bitiꞌ nácatë le tuꞌzxöni ládxiꞌgaca bönachi,
en yúguꞌtë le tun ga tun ba zxön cuínguequi,
en le tun ga cabí ilunbëꞌ Dios.
Runtuꞌ ga gaca ilaꞌnná béꞌenëꞌ yúguꞌtë le taꞌzáꞌ ládxiꞌgaquiëꞌ,
lë naꞌ tun ga taꞌdáꞌbaguëꞌë Dios,
ateꞌ runtuꞌ caꞌ ga tunëꞌ ca rnnëꞌ Cristo.
6 Tödi gunliꞌ le gaca bëꞌ naca idú ca runliꞌ ca rnna xtídzëꞌë Cristo,
sóatuꞌ sinaꞌ guntuꞌ xíguiaꞌ yúguꞌtë nupa niꞌ taꞌdáꞌbagaꞌ xtídzëꞌë.
7 Ruyuliꞌ le naláꞌ láhuisö.
Channö réquinëꞌ nu bönniꞌ dzáguiëꞌ libíꞌiliꞌ néquinëꞌ queëꞌ Cristo,
ral-laꞌ guéquibeꞌenëꞌ caꞌ lë ni:
Ca naꞌ lëꞌ néquinëꞌ queëꞌ Cristo,
lëscaꞌ caní netuꞌ néquituꞌ queëꞌ Cristo.
8 Bitiꞌ caꞌ rutuíꞌidaꞌ sal-laꞌ gudödi bëꞌ ben ba zxön cuinaꞌ ca naca yöl-laꞌ unná bëꞌ budödëꞌ Xanruꞌ lu naꞌtuꞌ.
Lë naꞌ dë lu naꞌtuꞌ naca para guntuꞌ ga gácarö idú ca réajlëꞌëliꞌ Cristo,
en calëga para usunítituꞌ libíꞌiliꞌ.
9 Bitiꞌ rë́ꞌëndaꞌ guéquiliꞌ rë́ꞌëndaꞌ gun gádxidaꞌ libíꞌiliꞌ niꞌa que le ruzúajaꞌ queë́liꞌ lu guichi ni.
10 Nacuáꞌ niꞌ nupa ilaꞌnná:
“Yuguꞌ le ruzúajëꞌ Pablo queë́ruꞌ lu guichi,
rulidza ziꞌë rëꞌu,
en ralëꞌ didzaꞌ,
pero cateꞌ zóalenëꞌ rëꞌu runëꞌ nöxaj ladxiꞌ,
en didzaꞌ gúladoꞌ ruꞌë.”
11 Nu naꞌ ruíꞌi caní didzaꞌ ral-laꞌ guéquibeꞌe lë ni:
Ca naꞌ nácatuꞌ cateꞌ bi ruzúajtuꞌ queë́liꞌ lu guichi tsanni ni zóatuꞌ ziꞌtuꞌ ga zóaliꞌ,
gácatuꞌ caꞌ lu le guntuꞌ cateꞌ niꞌ sóalentuꞌ libíꞌiliꞌ.
12 Le nácatë bitiꞌ nácatuꞌ rugu ladxiꞌ para innatuꞌ nácatuꞌ lëbi ca nácagaca nupa niꞌ tun ba zxön cuínguequi.
Nácagaca nupa niꞌ yuguꞌ bönniꞌ bitiꞌ bi nö́zguequinëꞌ.
Lu le taꞌzaꞌsö ládxiꞌgaquiëꞌ tuꞌzóëꞌ ca ral-laꞌ ilaca bönachi,
en tuꞌchiꞌa tuꞌsörö́ëꞌ laꞌ légacasëꞌ tsca naca lë naꞌ taꞌzaꞌsö ládxiꞌgaquiëꞌ.
13 Netuꞌ bitiꞌ gunrö ba zxön cuintuꞌ ca ral-laꞌ guntuꞌ,
pero ca nácatë dxin budödëꞌ Dios lu naꞌtuꞌ,
ateꞌ lu dxin ni,
ral-laꞌ guntuꞌ le ga niꞌ zóaliꞌ libíꞌiliꞌ.
14 Channö budödëꞌ Dios lu naꞌtuꞌ dxin guntuꞌ ga zóaliꞌ,
bitiꞌ caꞌ gudödi bë́ꞌëtuꞌ ca bentuꞌ cateꞌ bidxintuꞌ ga zóaliꞌ,
en bentuꞌ libán que didzaꞌ dxiꞌa ga naꞌ zóaliꞌ.
15 Bitiꞌ run ba zxön cuintuꞌ ca naca dxin núngaca iaꞌzícaꞌrö bönachi,
pero ca nácasö dxin naꞌ budödëꞌ Dios lu naꞌtuꞌ.
Runtuꞌ löza gácarö idú ca réajlëꞌëliꞌ Cristo para gaca guntuꞌ dxin ga zóaliꞌ le nácarö lesacaꞌ,
tsca naca le budödëꞌ Dios lu naꞌtuꞌ guntuꞌ.
16 Níꞌirö gaca guntuꞌ libán que didzaꞌ dxiꞌa ga nacuáꞌ yödzö dzöꞌö zíꞌtuꞌrö ga zóaliꞌ.
Caní gaca,
bitiꞌ gun bayudxi gun ba zxön cuintuꞌ niꞌa que dxin núngaca iaꞌzícaꞌrö bönachi,
lë naꞌ budödëꞌ Dios lu në́ꞌeguequi.
17 Nazúaj lu guichi láꞌayi le rnna:
Nu rë́ꞌëni bi gun zxön,
le ben cazëꞌ Xanruꞌ ral-laꞌ gun zxön.
18 Nurúajëꞌ dxiꞌa tu bönniꞌ cateꞌ rnnëꞌ Xanruꞌ nurúajëꞌ dxiꞌa,
en calëga cateꞌ ruꞌë caní didzaꞌ bönniꞌ naꞌ que laꞌ cuinsëꞌ.