Ca naca dumí rutúbiruꞌ le gácalen yuguꞌ bö́chiꞌruꞌ
9
Ca naca le runö́dzjaliꞌ quégaquiëꞌ bö́chiꞌruꞌ taꞌyéajlëꞌë Cristo,
bitiꞌ run bayudxi uzúajaꞌ queë́liꞌ lu guichi ni.
2 Chinözdaꞌ ca rë́ꞌëniliꞌ gunliꞌ lë ni,
ateꞌ ruáꞌa didzaꞌ lógaca bönachi taꞌyéajlëꞌ Cristo luyú Macedonia ni ca naca le dxiꞌa runliꞌ.
Riguíxjöiꞌidaꞌ légaquiëꞌ ca naca queë́liꞌ,
zóaliꞌ luyú Acaya,
chiguca tu iz chizóa gunliꞌ lë ni,
ateꞌ tuꞌ ruíꞌi ládxiꞌliꞌ gunliꞌ lë ni,
bidipa ládxiꞌgaca láꞌtuꞌbiquiꞌ yúguꞌtë bönachi ni taꞌyéajlëꞌ Cristo.
3 Naꞌa,
risö́l-laꞌa yuguꞌ bö́chiꞌruꞌ ni queë́liꞌ para gaca bëꞌ naca idútë li didzaꞌ ruíꞌituꞌ ca naca queë́liꞌ,
ateꞌ naca ca naꞌ chigunníaꞌ queë́liꞌ,
chizóa gunliꞌ lë naꞌ gácalen yuguꞌ luzáꞌaruꞌ.
4 Channö ilaꞌzáꞌalen bal-la bönachi Macedonia taꞌyéajlëꞌ Cristo nedaꞌ tsözxö́n,
ateꞌ gaca bëꞌ bitiꞌ zuíni gunliꞌ lë naꞌ,
níꞌirö utuíꞌituꞌ tuꞌ buzxöni ládxiꞌtuꞌ libíꞌiliꞌ,
ateꞌ libíꞌi cázaliꞌ caꞌ ral-laꞌ utuíꞌiliꞌ.
5 Que lë ni naꞌ gúquidaꞌ ral-laꞌ isö́l-laꞌa yuguꞌ bö́chiꞌruꞌ ni para ilaꞌdxinëꞌ ga zóaliꞌ zíꞌalö ca nedaꞌ,
ateꞌ ilácalenëꞌ libíꞌiliꞌ para udxi utúbiliꞌ lë naꞌ guzxíꞌ lu náꞌaliꞌ unö́dzjaliꞌ.
Caní gaca,
údxi utúbiliꞌ dumí naꞌ zíꞌalö ca idxinaꞌ,
ateꞌ gaca bëꞌ runö́dzjaliꞌ tuꞌ rë́ꞌëni cázaliꞌ,
en calëga tuꞌ rinná béꞌetuꞌ libíꞌiliꞌ bi unö́dzjaliꞌ.
6 Guliꞌtsöjné lë naꞌ rnna:
Nu raza ruzóa látiꞌdoꞌos,
látiꞌdoꞌos caꞌ uzíꞌ.
Nu raza ruzóa sizxöni,
sizxöni caꞌ uzíꞌ.
7 Tu tuliꞌ ral-laꞌ unö́dzjaliꞌ tsca naꞌ chinuzóaliꞌ icja ládxiꞌdoꞌoliꞌ,
en calëga lu yöl-laꞌ ruhuíꞌini queë́liꞌ o tuꞌ run bayudxi,
tuꞌ nadxíꞌinëꞌ Dios nu runödzaj idú ladxiꞌ.
8 Dios gaca gúnnadëꞌë queë́liꞌ ca riquíniliꞌ para gataꞌ queë́liꞌ yúguꞌtë lë naꞌ riquíniliꞌ,
ateꞌ ugáꞌana queë́liꞌ para gaca gácalenliꞌ nu bi riyadzaj que.
9 Lëscaꞌ caní nazúaj lu guichi láꞌayi le rnna:
Idú ládxëꞌë bunödzjëꞌ quégaca bönachi yechiꞌ.
Naca bë́ꞌticaꞌsö yöl-laꞌ dxiꞌi ladxiꞌ queëꞌ.
10 Dios,
Nu runna queë́ruꞌ bi gaz uzóaruꞌ,
encaꞌ bi guíꞌaj gáguruꞌ,
gunnëꞌ caꞌ queë́liꞌ bi unö́dzjaliꞌ,
le naca ca lë naꞌ nu raza ruzóa,
en gunëꞌ caꞌ ga ilaꞌyán le ilápaliꞌ le nácagaca yuguꞌ le dxiꞌa runliꞌ.
11 Dios gunëꞌ ga gátaꞌdaꞌ queë́liꞌ yöl-laꞌ tsahuiꞌ para gaca unö́dzjadaꞌaliꞌ.
Caní gaca,
yuguꞌ le unö́dzjaliꞌ,
lë naꞌ quísituꞌ uláz queë́liꞌ,
gun ga ilaꞌnná bönachi zián:
“Xclenëꞌ Dios.”
12 Lë naꞌ runö́dzjaliꞌ le gácalen yuguꞌ bö́chiꞌruꞌ,
calë́gasö güíꞌi quégaquiëꞌ le taꞌyádzjanëꞌ,
pero gun ga ilaꞌnnë́ꞌ:
“Xclenëꞌ Dios.”
13 Cateꞌ gunliꞌ caní,
ilaꞌguꞌë Dios yöl-laꞌ ba tuꞌ gaca bëꞌ runliꞌ ca rnna didzaꞌ dxiꞌa queëꞌ Cristo ca naꞌ rnnaliꞌ runliꞌ.
Ilaꞌguꞌë Lëꞌ yöl-laꞌ ba caꞌ,
tuꞌ nácaliꞌ dxiꞌi ladxiꞌ,
runö́dzjaliꞌ quégaquiëꞌ,
encaꞌ quégaca iaꞌzícaꞌrö bönachi.
14 Uluꞌlidzëꞌ Dios,
en ilaꞌnábinëꞌ Lëꞌ gácalenëꞌ libíꞌiliꞌ tuꞌ nadxíꞌiguequinëꞌ libíꞌiliꞌ niꞌa que le buzáꞌ ládxiꞌdëꞌë Dios queë́liꞌ.
15 ¡Xclenëꞌ Dios,
bennëꞌ tu le nácadaꞌ lesacaꞌ queë́liꞌ!