Ca ral-laꞌ unödzaj nu réajlëꞌ Cristo le dë que
8
Naꞌa,
böchiꞌ luzáꞌadoꞌ,
rë́ꞌënituꞌ quíxjöiꞌituꞌ libíꞌiliꞌ ca naca le buzáꞌ ládxëꞌë Dios quégaca yuguꞌ cöꞌ bönachi queëꞌ Cristo luyú Macedonia.
2 Sal-laꞌ yenniꞌ gulaꞌguíꞌi gulaꞌzáquiëꞌ lu yuguꞌ le guzxíꞌ bëꞌ légaquiëꞌ,
buluꞌdzéjadeꞌenëꞌ,
en idú ládxiꞌgaquiëꞌ buluꞌnö́dzjadëꞌë sal-laꞌ nácagaquiëꞌ bönachi yechiꞌ.
3 Nedaꞌ runaꞌ ba nalí quégaquiëꞌ,
idú ládxiꞌgaquiëꞌ buluꞌnö́dzjadëꞌë tsca gulaꞌzéquiꞌnëꞌ,
en buluꞌnö́dzjarëꞌ tsca gulaꞌzéquiꞌnëꞌ.
4 Gulaꞌnábideꞌenëꞌ netuꞌ,
en gulátaꞌyudëꞌë lotuꞌ güíꞌituꞌ légaquiëꞌ lataj tsözxö́n len netuꞌ ilácalenëꞌ bö́chiꞌruꞌ taꞌyéajlëꞌë Cristo.
5 Gulunrëꞌ ca guqui ícjatuꞌ ilunëꞌ.
Buluꞌdödi cuíngaquiëꞌ zíꞌalö lu nëꞌë Xanruꞌ,
encaꞌ lu naꞌtuꞌ netuꞌ,
le naca le raza ládxëꞌë Dios.
6 Que lë ni naꞌ gunábituꞌ-biꞌ biꞌi Tito údxi gunbiꞌ xichinbiꞌ ga niꞌ zóaliꞌ,
en utúbibiꞌ dumí runö́dzjaliꞌ lu yöl-laꞌ dxiꞌi ladxiꞌ queë́liꞌ,
ca naꞌ gusí lobiꞌ benbiꞌ zíꞌalö.
7 Nácaliꞌ lo ca naca yúguꞌtë le runliꞌ,
ca réajlëꞌëliꞌ Cristo,
en ca réajniꞌiliꞌ,
en ca ruzéajniꞌiliꞌ bönachi,
en ca ruíꞌi ládxiꞌliꞌ luzáꞌaliꞌ,
encaꞌ ca nadxíꞌiliꞌ netuꞌ.
Lëscaꞌ caní ral-laꞌ gácaliꞌ lo ca gácalenliꞌ luzáꞌaliꞌ,
lu yöl-laꞌ dxiꞌi ladxiꞌ queë́liꞌ bi unö́dzjaliꞌ quégaquiëꞌ.
8 Bitiꞌ rinná béꞌedaꞌ libíꞌiliꞌ gunliꞌ caní.
Ruáꞌa didzaꞌ ca tun iaꞌzícaꞌrö bönachi,
tuꞌnödzaj idú ládxiꞌgaca,
para gunaꞌ ga gunliꞌ le gaca bëꞌ naca idú ca nadxíꞌiliꞌ luzáꞌaliꞌ.
9 Nöz quéziliꞌ le buzáꞌ ládxëꞌë Xanruꞌ Jesucristo queë́ruꞌ.
Biléꞌenëꞌ yöl-laꞌ tsahuiꞌ
pero para gácalenëꞌ libíꞌiliꞌ
böáquiëꞌ yechiꞌ
para gataꞌ queë́liꞌ yöl-laꞌ tsahuiꞌ,
tuꞌ gúquiëꞌ Lëꞌ yechiꞌ.
10 Caní runi nedaꞌ:
Dxíꞌarö gaca queë́liꞌ údxi gunliꞌ lë naꞌ gusí loliꞌ runliꞌ chiguca tu iz.
Gúcaliꞌ lo,
calë́gasö ca bunö́dzjaliꞌ,
pero lëscaꞌ ca gúꞌuniliꞌ unö́dzjaliꞌ.
11 Naꞌa,
idú ládxiꞌliꞌ buliꞌsiyudxi gunliꞌ lë naꞌ gusí loliꞌ runliꞌ,
idú ládxiꞌliꞌ bunö́dzjaliꞌ.
Buliꞌnödzaj naꞌa tsca séquiꞌliꞌ.
12 Channö rë́ꞌëniliꞌ bi unö́dzjaliꞌ,
Dios runëꞌ bal le runö́dzjaliꞌ tsca naca le dësö queë́liꞌ.
Bitiꞌ rinabëꞌ unö́dzjaröliꞌ tsca le dësö queë́liꞌ.
13 Bitiꞌ rë́ꞌëndaꞌ gunaꞌ ga unö́dzjaliꞌ le gácalen iaꞌzícaꞌrö bönachi ga idxintë yadzaj queë́liꞌ.
14 Rë́ꞌëndaꞌ gaca tuz ca dë queë́liꞌ,
en quégaquiëꞌ.
Naꞌa dëdaꞌ queë́liꞌ le gaca unö́dzjaliꞌ para bi gataꞌ quégaca nupa niꞌ riyadzaj quéguequi.
Níꞌirö cateꞌ bi yadzaj queë́liꞌ,
légaquiëꞌ huáca bi uluꞌnödzjëꞌ queë́liꞌ para caní gaca tuz ca dë queë́liꞌ,
en quégaquiëꞌ yúguꞌtëliꞌ.
15 Lëscaꞌ caní nazúaj lu guichi láꞌayi le rnna:
“Nu naꞌ butúbidaꞌ,
bitiꞌ bugáꞌana que,
ateꞌ nu naꞌ butubi látiꞌdoꞌos,
bitiꞌ biyadzaj que.”
Ca runbiꞌ biꞌi Tito, encaꞌ nupa dzágagaca lëbiꞌ
16 ¡Xclenëꞌ Dios,
tuꞌ benëꞌ Lëꞌ ga ruíꞌi ládxiꞌbiꞌ biꞌi Tito libíꞌiliꞌ,
ca naꞌ ruíꞌi ládxaꞌa nedaꞌ libíꞌiliꞌ!
17 Calë́gasö runbiꞌ ca rnna xtídzaꞌa bi rinábidaꞌ-biꞌ,
pero tuꞌ ruíꞌi ladxiꞌ cázabiꞌ libíꞌiliꞌ,
rácasö queë́biꞌ gúꞌunibiꞌ tsöyubiꞌ libíꞌiliꞌ.
18 Risö́l-laꞌtuꞌ-nëꞌ tsözxö́n len lëbiꞌ bö́chiꞌruꞌ naꞌ tun lëꞌ bal yúguꞌtë cöꞌ bönachi queëꞌ Cristo,
tuꞌ runëꞌ dxiꞌa dxin que didzaꞌ dxiꞌa.
19 Iaꞌstú,
gulaꞌbö́ yuguꞌ cöꞌ bönachi queëꞌ Cristo bönniꞌ ni,
para tséajlenëꞌ tsözxö́n netuꞌ guáꞌatuꞌ lë naꞌ runö́dzjaliꞌ,
para gaca yöl-laꞌ ba queëꞌ Xanruꞌ,
en gaca bëꞌ caꞌ ruíꞌi ládxiꞌruꞌ luzáꞌaruꞌ taꞌyéajlëꞌë Cristo.
20 Caní gaca,
gunëꞌ netuꞌ tsözxö́n para cuntu nu bi gaca innë́ queë́tuꞌ,
ca rúnlentuꞌ dumí naꞌ runö́dzjadaꞌaliꞌ,
le gácalen bönachi yechiꞌ.
21 Ruíꞌi ládxiꞌtuꞌ guntuꞌ le naca dxiꞌa,
calë́gasö lahuëꞌ Xanruꞌ,
pero lëscaꞌ lógaca bönachi.
22 Risö́l-laꞌtuꞌ-nëꞌ caꞌ iaꞌtúëꞌ bö́chiꞌruꞌ tsözxö́n len légaquiëꞌ,
ateꞌ zián luzuí guzxíꞌ bë́ꞌëtuꞌ lëꞌ,
ateꞌ naca bëꞌ rë́ꞌënëꞌ gácalenëꞌ rëꞌu idú ládxëꞌë.
Iaꞌstú,
tuꞌ ruzxöni ládxëꞌë libíꞌiliꞌ,
rë́ꞌënitërönëꞌ caꞌ gácalenëꞌ rëꞌu lu dxin ni.
23 Channö nu bi inaba ca nácabiꞌ biꞌi Tito,
nácabiꞌ luzáꞌa,
rúnlenbiꞌ nedaꞌ tsözxö́n dxin para gácalentuꞌ libíꞌiliꞌ.
Channö nu bi inaba ca nácagaquiëꞌ iaꞌzícaꞌrëꞌ bö́chiꞌruꞌ naꞌ,
nasö́l-laꞌgaca yuguꞌ cöꞌ bönachi queëꞌ Cristo légaquiëꞌ,
ateꞌ tunëꞌ ga gaca yöl-laꞌ ba queëꞌ Cristo.
24 Guliꞌgún ga gaca bëꞌ nadxíꞌiliꞌ légaquiëꞌ para iléquibeꞌe yuguꞌ cöꞌ bönachi queëꞌ Cristo runliꞌ caní,
en ilaꞌnözi naca idútë li didzaꞌ dxiꞌa ruíꞌituꞌ ca naca queë́liꞌ.