7
Böchiꞌ luzáꞌadoꞌ,
néquiguequi queë́ruꞌ yuguꞌ lë ni guzxíꞌ lu nëꞌë Dios.
Que lë ni naꞌ ral-laꞌ un cuinruꞌ dxiꞌa,
en ubéajruꞌ yúguꞌtë le rucáꞌana cáꞌasö idútë le naca cázaruꞌ,
en böꞌ naca cázaruꞌ.
Lu yöl-laꞌ radxi queë́ruꞌ Dios ral-laꞌ guéquiruꞌ quez queëꞌ Lëꞌ.
Ca buluꞌbíꞌi ládxiꞌgaca nupa taꞌyéajlëꞌ Cristo
2 Guliꞌsíꞌ lu náꞌaliꞌ netuꞌ.
Cuntu nu biáꞌatuꞌ döꞌ que,
nu dzaga libíꞌiliꞌ.
Cuntu nu bentuꞌ ga ichixi inigui.
Cuntu nu guzxíꞌ yéꞌetuꞌ.
3 Ruáꞌa caní didzaꞌ,
calëga para usubágaꞌa libíꞌiliꞌ xíguiaꞌ,
pero naca ca naꞌ chigunníaꞌ zíꞌalö,
rnníaꞌ:
Zoaꞌ sinaꞌ ibánlenaꞌ libíꞌiliꞌ o gátilenaꞌ libíꞌiliꞌ tuꞌ ruíꞌi ládxaꞌa libíꞌiliꞌ.
4 Ruzxö́nidaꞌ ládxaꞌa libíꞌiliꞌ,
en rúndaꞌa libíꞌiliꞌ zxön.
Sal-laꞌ zián le riguíꞌi rizácaꞌtuꞌ,
nadípadaꞌ ládxaꞌa,
en rudzéjadeꞌe ládxaꞌa.
5 Cateꞌ bidxintuꞌ luyú Macedonia,
ga ridxintë naꞌa dza,
bitiꞌ rataꞌ queë́tuꞌ lataj uzíꞌ ládxiꞌtuꞌ,
pero zián le taca queë́tuꞌ.
Taꞌdíl-lalen bönachi netuꞌ,
ateꞌ lu icja ládxiꞌdoꞌotuꞌ yúꞌugaca le tun ga rádxituꞌ.
6 Níꞌirö Dios,
Nu rutipa ladxiꞌ nu chizóa gaca chopa ladxiꞌ,
butipëꞌ ládxiꞌtuꞌ cateꞌ budxinbiꞌ biꞌi Tito ga guzóatuꞌ.
7 Bitiꞌ gúcasö tuꞌ budxinbiꞌ queë́tuꞌ,
pero tuꞌ gudíxjöiꞌibiꞌ caꞌ netuꞌ ca naꞌ libíꞌiliꞌ butípaliꞌ ládxiꞌbiꞌ.
Gudíxjöiꞌibiꞌ netuꞌ ca naꞌ rë́ꞌënideꞌeliꞌ uléꞌeliꞌ nedaꞌ,
en ca naꞌ ruhuíꞌiniliꞌ niꞌa que lë naꞌ guca niꞌ,
encaꞌ ca ruíꞌi ládxiꞌliꞌ nedaꞌ.
Yúguꞌtë lë ni ben ga rudzeja ládxaꞌa.
8 Sal-laꞌ le buzúajaꞌ queë́liꞌ lu guichi zíꞌalö ben ga buíꞌiniliꞌ,
bitiꞌ ruhuíꞌindaꞌ naꞌa.
Zíꞌalö buíꞌinidaꞌ cateꞌ gúquibeꞌedaꞌ ben ga buíꞌiniliꞌ libíꞌiliꞌ tu chíꞌidoꞌ,
9 pero naꞌa rudzéjadaꞌ,
calëga tuꞌ buíꞌiniliꞌ,
pero tuꞌ ben yöl-laꞌ ruhuíꞌini queë́liꞌ naꞌ ga bubíꞌi ládxiꞌliꞌ.
Dios bugunëꞌ dxin yöl-laꞌ ruhuíꞌini queë́liꞌ,
para cabí ichixi iníguiliꞌ niꞌa que le bentuꞌ netuꞌ.
10 Yöl-laꞌ ruhuíꞌini naꞌ rugunëꞌ dxin Dios run ga nu ubíꞌi ladxiꞌ para ulá nu naꞌ,
ateꞌ que lë ni naꞌ bitiꞌ ral-laꞌ huíꞌiniruꞌ que.
Yöl-laꞌ ruhuíꞌini le naca que yödzölió ni run ga ilátigaca bönachi.
11 Buliꞌyútsöcaꞌ ca bugunëꞌ Dios dxin yöl-laꞌ ruhuíꞌini queë́liꞌ naꞌ.
Ben ga ruíꞌi ládxiꞌliꞌ-nëꞌ Dios.
Ben ga gúꞌuniliꞌ urúajliꞌ dxiꞌa.
Ben ga guléliꞌ nu naꞌ ben dul-laꞌ.
Ben ga rádxiliꞌ-nëꞌ Dios.
Ben ga bëꞌ ládxiꞌliꞌ gunliꞌ ca rnna xtídzëꞌë Dios.
Ben ga nadxíꞌiliꞌ-nëꞌ Dios idú ládxiꞌliꞌ.
Ben ga gúꞌuniliꞌ gunliꞌ xíguiaꞌ nu naꞌ ben dul-laꞌ.
Benliꞌ le naca bëꞌ bitiꞌ bi dul-laꞌ nabágaꞌliꞌ niꞌa que lë naꞌ guca.
12 Que lë ni naꞌ,
sal-laꞌ buzúajaꞌ caní lu guichi naꞌ,
bitiꞌ guca niꞌa que nu naꞌ ben dul-laꞌ,
en calëga niꞌa que nu naꞌ gudíꞌi guzxacaꞌ,
pero para gaca bëꞌ lahuëꞌ Dios le nácatë ruíꞌi ládxiꞌliꞌ netuꞌ.
13 ¡Lë ni butipa ládxiꞌtuꞌ!
Calë́gasö bidipa ládxiꞌtuꞌ,
pero rudzéjadeꞌe ládxiꞌtuꞌ tuꞌ rudzéjabiꞌ biꞌi Tito niꞌa que le benliꞌ libíꞌiliꞌ,
tuꞌ butípaliꞌ ládxiꞌbiꞌ.
14 Benaꞌ libíꞌiliꞌ zxön lobiꞌ Tito,
ateꞌ bitiꞌ benliꞌ ga utuíꞌidaꞌ.
Bë́ꞌlenticaꞌstuꞌ libíꞌiliꞌ didzaꞌ idútë li,
ateꞌ lëscaꞌ caní naca idútë li didzaꞌ bë́ꞌlentuꞌ-biꞌ Tito cateꞌ bentuꞌ libíꞌiliꞌ bal.
15 Zeaj rácarö idú ca nadxíꞌibiꞌ biꞌi Tito libíꞌiliꞌ cateꞌ röjnebiꞌ ca naꞌ benliꞌ ca rnna xtídzaꞌtuꞌ,
en ca naꞌ benliꞌ-biꞌ bal lu yöl-laꞌ radxi Dios queë́liꞌ en lu yöl-laꞌ nöxaj ladxiꞌ queë́liꞌ.
16 Rudzéjadeꞌedaꞌ tuꞌ gaca uzxöni ládxaꞌa libíꞌiliꞌ idú ládxaꞌa.