6
Tuꞌ runtuꞌ dxin tsözxö́n len Dios,
rátaꞌyutuꞌ loliꞌ,
rnnatuꞌ:
Bitiꞌ udö́diliꞌ cáꞌasö le ruzáꞌ ládxëꞌë Dios queë́liꞌ.
2 Nazúaj lu guichi láꞌayi ca gunnë́ꞌ Dios le rnna:
Tu dza buzáꞌ ládxaꞌa quiuꞌ,
biyöndaꞌ liꞌ,
ateꞌ dza benaꞌ ga gaca ulóꞌ,
gúcalenaꞌ liꞌ.
¡Buliꞌyútsöcaꞌ!
¡Naꞌa naca dza ruzáꞌ ládxëꞌë queë́ruꞌ!
¡Naꞌa naca dza gaca uláruꞌ!
3 Bitiꞌ rë́ꞌënituꞌ bi guntuꞌ le gun ga nu ichixi inigui,
para cabí soa nu ucáꞌana cáꞌasö dxin ni runtuꞌ.
4 Niꞌa que bítiꞌtës bi runtuꞌ,
ruíꞌi ládxiꞌtuꞌ gaca bëꞌ nácatuꞌ huen dxin queëꞌ Dios.
Que lë ni naꞌ,
len yöl-laꞌ riböza zxön ladxiꞌ ruáꞌ rilentuꞌ yuguꞌ le riguíꞌi rizácaꞌtuꞌ,
en yuguꞌ le riyadzaj queë́tuꞌ,
en yuguꞌ le tun ga rö́ꞌötuꞌ böniga.
5 Caní bentuꞌ sal-laꞌ gulaꞌzéꞌedeꞌe bönachi netuꞌ yu,
en gulaꞌguꞌë netuꞌ lidxi guíë,
en gulaꞌbía diꞌi netuꞌ.
Gudödi bëꞌ bentuꞌ dxin,
en bitiꞌ gutaꞌ lataj queë́tuꞌ gásituꞌ o bi gágutuꞌ.
6 Bëꞌ ládxiꞌtuꞌ gaca bëꞌ nácatuꞌ huen dxin queëꞌ Dios.
Guca bëꞌ lë ni:
Tuꞌ nácatuꞌ baꞌa ladxiꞌ,
en tuꞌ nápatuꞌ yöl-laꞌ réajniꞌi,
en tuꞌ riböztuꞌ zxön ladxiꞌ,
en tuꞌ nácatuꞌ dxiꞌi ladxiꞌ,
en tuꞌ zóalenëꞌ Dios Böꞌ Láꞌayi netuꞌ,
en tuꞌ naca idú ca nadxíꞌituꞌ luzáꞌatuꞌ.
7 Ruíꞌituꞌ didzaꞌ idútë li,
ateꞌ zóalen netuꞌ yöl-laꞌ huáca queëꞌ Dios.
Le naca tsahuiꞌ naca ca tu le rudíꞌinituꞌ lu gudil-la,
encaꞌ le run chiꞌi netuꞌ lu gudil-la naꞌ.
8 Nacuáꞌ nupa tun netuꞌ bal,
encaꞌ nupa tuꞌzóa netuꞌ tsöláꞌalö.
Nacuáꞌ nupa tuꞌlidza ditaj netuꞌ,
encaꞌ nupa tuꞌlidza tsahuiꞌ netuꞌ.
Sal-laꞌ taꞌnná bönachi rizíꞌ yë́ꞌëtuꞌ,
ruíꞌituꞌ didzaꞌ idútë li.
9 Sal-laꞌ nacuáꞌ bönachi bitiꞌ núnbëꞌgaquiëꞌ netuꞌ,
nacuáꞌ caꞌ nupa núnbëꞌgaca netuꞌ.
Ridatuꞌ ga zoa bönadxi gátituꞌ,
pero ni zóatuꞌ nabantuꞌ.
Tunëꞌ netuꞌ xíguiaꞌ,
pero bitiꞌ tutiëꞌ netuꞌ.
10 Tuꞌsuhuíꞌini netuꞌ,
pero rudzéjaticaꞌstuꞌ.
Nácatuꞌ bönniꞌ yechiꞌ,
pero runtuꞌ ga rataꞌ yöl-laꞌ tsahuiꞌ idú quégaca bönachi zián.
Sal-laꞌ bitiꞌ bi dë queë́tuꞌ,
nequi queë́tuꞌ yúguꞌtë le dë.
11 Idú ládxiꞌtuꞌ ruíꞌilentuꞌ libíꞌiliꞌ didzaꞌ,
böchiꞌ luzáꞌadoꞌ,
zóaliꞌ Corinto.
Buluíꞌituꞌ libíꞌiliꞌ ca ruíꞌi ládxiꞌdaꞌtuꞌ libíꞌiliꞌ.
12 Channö cabí nácaruꞌ tuz bitiꞌ naca tuꞌ cabí ruíꞌi ládxiꞌtuꞌ libíꞌiliꞌ,
pero libíꞌi cázaliꞌ bitiꞌ ruíꞌi ládxiꞌliꞌ netuꞌ.
13 Naꞌa,
ruíꞌilenaꞌ libíꞌiliꞌ didzaꞌ ca runëꞌ tu bönniꞌ ruíꞌilenëꞌ-biꞌ zxíꞌinëꞌ didzaꞌ,
rnníaꞌ:
Buliꞌbíꞌi queë́tuꞌ ca rúnlentuꞌ libíꞌiliꞌ.
Guliꞌgüíꞌ ladxiꞌ netuꞌ.
Nácaruꞌ ca tu yudoꞌ ga yuꞌë Dios ban
14 Bitiꞌ gácaliꞌ tuz len bönachi bitiꞌ taꞌyéajlëꞌ.
¿Nacxi gácatsö ilaca tuz le naca tsahuiꞌ,
en le cabí naca tsahuiꞌ?
¿Nacxi gácatsö ilaca tuz le naca chul-la,
en le naca beníꞌ?
15 ¿Nacxi gácatsö ilácagaquiëꞌ tuz Cristo,
en Satanás,
tuꞌ xihuiꞌ?
¿Nacxi gácatsö ilácagaquiëꞌ tuz tu bönniꞌ réajlëꞌë Cristo,
en tu bönniꞌ bitiꞌ réajlëꞌë?
16 ¿Nacxi gácatsö ilaca tuz yudoꞌ queëꞌ Dios,
en budóꞌ guiö́j budóꞌ yaga?
Libíꞌi cázaliꞌ nácaliꞌ ca tu yudoꞌ ga yuꞌë Dios ban.
Ca naca lë ni,
Dios caz gunnë́ꞌ:
Sóalenaꞌ légaquiëꞌ,
en tálenaꞌ légaquiëꞌ.
Gacaꞌ Dios quégaquiëꞌ,
ateꞌ légaquiëꞌ iláquiëꞌ bönachi quiaꞌ.
17 Que lë ni naꞌ,
gunnë́ꞌ caꞌ caní:
Guliꞌrúaj ládjagaquiëꞌ,
en buliꞌláꞌalen légaquiëꞌ.
Rnnëꞌ Xanruꞌ:
“Bitiꞌ gútsaꞌliꞌ le ruáꞌ döꞌ,
ateꞌ siꞌ lu naꞌa libíꞌiliꞌ.
18 Nedaꞌ gacaꞌ xuz cázaliꞌ,
ateꞌ libíꞌiliꞌ gácaliꞌ zxíꞌinaꞌ,
bönniꞌ,
en nigula.”
Caní rnnëꞌ Xanruꞌ,
Nu napa caz idútë yöl-laꞌ huáca.