5
Nö́ziruꞌ cateꞌ initi idútë le naca cázaruꞌ,
le naca ca tu yuꞌu láriꞌdoꞌ yödzölió ni,
Dios chinupë́ꞌë tu le cubi queë́ruꞌ,
le naca ca tu yuꞌu le zoa tsaz niꞌ yehuaꞌ yubá,
lë naꞌ nun cazëꞌ Lëꞌ.
2 Que lë ni naꞌ rinnë́ ládxiꞌruꞌ tuꞌ rë́ꞌëniruꞌ tsúꞌuruꞌ le cubi niꞌ,
lë naꞌ naca ca tu lídxiruꞌ niꞌ yehuaꞌ yubá.
3 Tsúꞌuruꞌ le cubi niꞌ ca naꞌ rácuruꞌ tu lariꞌ,
para cabí sóaruꞌ ga bitiꞌ zoa idútë le naca cázaruꞌ.
4 Tsanni ni zóaruꞌ lu idútë le naca cázaruꞌ,
le naca ca tu yuꞌu láriꞌdoꞌ,
rinnë́ ládxiꞌruꞌ lu yöl-laꞌ risëbi ladxiꞌ queë́ruꞌ.
Bitiꞌ runruꞌ caní tuꞌ rë́ꞌëniruꞌ ucáꞌanaruꞌ idútë le naca cázaruꞌ,
pero rë́ꞌëniruꞌ tsúꞌuruꞌ tsaz le cubi niꞌ.
Caní gaca,
ucáꞌanaruꞌ idútë le naca cázaruꞌ le riniti,
ateꞌ tsúꞌuruꞌ lu yöl-laꞌ naꞌbán idú.
5 Dios chinupë́ꞌë yúguꞌtë lë ni queë́ruꞌ,
ateꞌ guchíziëꞌ rëꞌu Dios Böꞌ Láꞌayi,
Nu naca queë́ruꞌ le naca bëꞌ naca löza síꞌiruꞌ lë naꞌ nupë́ꞌë queë́ruꞌ.
6 Que lë ni naꞌ nadipa ládxiꞌruꞌ.
Tsanni ni yúꞌuruꞌ lu le naca cázaruꞌ,
nö́ziruꞌ zóaruꞌ ziꞌtuꞌ ga zoa lidxëꞌ Xanruꞌ.
7 Runruꞌ ca runruꞌ tuꞌ réajlëꞌëruꞌ-nëꞌ Dios,
en calëga tuꞌ zoa bi riléꞌeruꞌ.
8 Tuꞌ runruꞌ löza lë ni,
rë́ꞌëniruꞌ ucáꞌanaruꞌ le naca cázaruꞌ ni para tsöjsóalenruꞌ-nëꞌ Xanruꞌ.
9 Que lë ni naꞌ ruíꞌi ládxiꞌruꞌ gunruꞌ le raza ládxëꞌë Xanruꞌ,
channö ugáꞌanaruꞌ lu idútë le naca cázaruꞌ ni,
o channö tsöjsóalenruꞌ-nëꞌ Xanruꞌ niꞌ.
10 Caní runruꞌ tuꞌ run bayudxi idxinruꞌ yúguꞌtëruꞌ lahuëꞌ Cristo ga niꞌ röꞌë ruchiꞌa rusörö́ëꞌ.
Níꞌirö ubiꞌë que queë́ruꞌ tsca naca le benruꞌ tsanni ni yúꞌuruꞌ lu le naca cázaruꞌ,
channö benruꞌ le naca dxiꞌa o le cabí naca dxiꞌa.
Le ruún rëꞌu tuz len Dios
11 Que lë ni naꞌ,
tuꞌ rádxituꞌ-nëꞌ Dios,
ruíꞌi ládxiꞌtuꞌ uzéajniꞌituꞌ bönachi.
Nö́zinëꞌ Dios ca naca le yuꞌu icja ládxiꞌdoꞌotuꞌ,
ateꞌ ruzxöni ládxaꞌa nö́ziliꞌ dxiꞌa caꞌ libíꞌiliꞌ lë naꞌ yuꞌu icja ládxiꞌdoꞌotuꞌ.
12 Bitiꞌ rubéaj cuintuꞌ dxiꞌa loliꞌ.
Rë́ꞌënituꞌ gataꞌ lataj queë́liꞌ gunliꞌ netuꞌ bal,
para gaca ubíꞌiliꞌ didzaꞌ,
bi guië́liꞌ yuguꞌ bönniꞌ tun ba zxön cuíngaquiëꞌ ca naꞌ tuꞌluíꞌisö lahui cuíngaquiëꞌ,
en calëga ca nácagaquiëꞌ lu icja ládxiꞌdoꞌgaquiëꞌ.
13 Channö nachixi ícjatuꞌ,
naca para gaca yöl-laꞌ ba queëꞌ Dios,
en channö cabí nachixi ícjatuꞌ,
naca para gaca bi uzíꞌiliꞌ xibé.
14 Run bayudxi bi guntuꞌ tuꞌ nadxíꞌinëꞌ Cristo rëꞌu,
tuꞌ chinö́ziruꞌ tuz Nu guti uláz quégaca yúguꞌtë bönachi,
en que lë ni naꞌ naca quégaca yúguꞌtë bönachi tsca nátilengaca Lëꞌ tsözxö́n.
15 Lëꞌ gútiëꞌ uláz quégaca yúguꞌtë bönachi para cabirö ilunëꞌ bönniꞌ nabángaquiëꞌ le nequi quégacasëꞌ,
pero le nequi que Nu naꞌ guti uláz quégaquiëꞌ,
en bubán lu yöl-laꞌ guti.
16 Que lë ni naꞌ,
bítiꞌrö gúnbëꞌëtuꞌ bönachi tsca naca le naláꞌgaca láhuiꞌlö,
en sal-laꞌ canísö bénbëꞌëtuꞌ-nëꞌ Cristo,
bitiꞌ núnbëꞌëtuꞌ-nëꞌ caní naꞌa.
17 Channö nuhuöáca nútiꞌtës bönachi tuz len Cristo,
chinaca bönachi cubi nu naꞌ.
Chigudödi que le gulaca zíꞌalö,
ateꞌ chinucúbigaca yúguꞌtë.
18 Yúguꞌtë lë ni nunëꞌ Dios,
Nu bun rëꞌu tuz len Lëꞌ lu nëꞌë Cristo,
en budödëꞌ lu naꞌtuꞌ guntuꞌ libán ca gaca uluꞌhuöáca yúguꞌtë bönachi tuz len Lëꞌ.
19 Libán runtuꞌ rnna caní:
“Dios guzóalenëꞌ Cristo,
en benëꞌ ga gaca uluꞌhuöáca bönachi yödzölió ni tuz len Lëꞌ,
en bitiꞌ röjnenëꞌ dul-laꞌ gulaꞌbagaꞌ.”
Budödëꞌ lu naꞌtuꞌ didzaꞌ dxiꞌa ni,
ca gaca uluꞌhuöáca bönachi tuz len Dios.
20 Naꞌa,
nácatuꞌ gubáz queëꞌ Cristo,
en raca naꞌa ca Dios caz rátaꞌyuëꞌ loliꞌ lu rúꞌatuꞌ netuꞌ.
Que lë ni naꞌ rátaꞌyutuꞌ loliꞌ uláz queëꞌ Cristo,
guliꞌhuöáca tuz len Dios.
21 Cristo bitiꞌ bi dul-laꞌ benëꞌ,
pero Dios budödëꞌ Lëꞌ ca tu bönniꞌ dul-laꞌ uláz queë́ruꞌ,
para gataꞌ queë́ruꞌ lataj gácaruꞌ tsahuiꞌ ca náquiëꞌ Dios caz tuꞌ nácaruꞌ tuz len Cristo.