4
Dios buéchiꞌ ládxëꞌë netuꞌ,
en budödëꞌ lu naꞌtuꞌ dxin ni runtuꞌ.
Que lë ni naꞌ bitiꞌ raca chopa ládxiꞌtuꞌ.
2 Chibucáꞌanatuꞌ le tun bönachi bagáchiꞌsö,
en le tun ga rutuíꞌiruꞌ.
Cuntu nu rizíꞌ yéꞌetuꞌ,
en bitiꞌ rutsáꞌatuꞌ xtídzëꞌë Dios.
Tuꞌ ruíꞌituꞌ didzaꞌ que le naca idútë li,
ruíꞌi ládxiꞌtuꞌ guntuꞌ le iléquibeꞌe yúguꞌtë bönachi naca dxiꞌa lahuëꞌ Dios.
3 Channö zoa nu bitiꞌ réajniꞌini didzaꞌ dxiꞌa runtuꞌ ba nalí que,
nácagacasö nupa nachul-la nanítigaca bitiꞌ taꞌyéajniꞌi le.
4 Bitiꞌ taꞌyéajlëꞌ bönachi naꞌ.
Ben tuꞌ xihuiꞌ ga naca caní,
nu naꞌ nun cuini ca dios,
en rinná beꞌe bönachi dza ni zóaruꞌ naꞌa.
Ben ga nachul-la nanítigaca,
para cabí ilaꞌléꞌe beníꞌ que didzaꞌ dxiꞌa ca naca yöl-laꞌ beníꞌ queëꞌ Cristo,
Nu naꞌ naca idú ca náquiëꞌ Dios caz.
5 Bitiꞌ runtuꞌ libán que laꞌ cuínsituꞌ,
pero runtuꞌ libán queëꞌ Jesucristo,
en riguíxjöꞌötuꞌ náquiëꞌ Xanruꞌ,
ateꞌ netuꞌ ni nácatuꞌ huen dxin queë́liꞌ tuꞌ nadxíꞌituꞌ-nëꞌ Jesús.
6 Dios,
Nu ben ga buzeníꞌ beníꞌ ga niꞌ guca chul-la,
náquiëꞌ Nu rigúꞌu beníꞌ icja ládxiꞌdoꞌoruꞌ,
le ruzéajniꞌi rëꞌu para gúnbëꞌëruꞌ yöl-laꞌ beníꞌ queëꞌ Dios,
lë naꞌ ruzeníꞌ lahuëꞌ Jesucristo.
Tuꞌ réajlëꞌëruꞌ Dios runruꞌ ca rë́ꞌënëꞌ Lëꞌ
7 Yöl-laꞌ tsahuiꞌ ni yuꞌu icja ládxiꞌdoꞌoruꞌ rëꞌu.
Nácaruꞌ ca yuguꞌ yusuꞌ yu,
para gaca bëꞌ nequi queëꞌ Dios yöl-laꞌ huáca zxön naꞌ,
en calëga que cázaruꞌ.
8 Tuꞌsacaꞌ ziꞌ bönachi netuꞌ,
pero bitiꞌ rudú ládxiꞌtuꞌ.
Rö́ꞌötuꞌ böniga,
pero bitiꞌ raca chopa ládxiꞌtuꞌ.
9 Taꞌbía ladxiꞌ bönachi netuꞌ,
pero bitiꞌ rubéaj ládxëꞌë Dios netuꞌ.
Taꞌzéꞌedeꞌe netuꞌ yu,
pero bitiꞌ tuꞌsuniti netuꞌ.
10 Lu idú le naca caztuꞌ rátiticaꞌstuꞌ tsözxö́n len Jesús,
naꞌ naca bëꞌ lu le naca caztuꞌ nabánituꞌ Lëꞌ.
11 Tsanni ni zóatuꞌ nabantuꞌ,
zóaticaꞌsö bönadxi gátituꞌ tuꞌ néquituꞌ queëꞌ Jesús para gaca bëꞌ nabánituꞌ Lëꞌ lu le naca caztuꞌ le riniti.
12 Caní naca,
zoa bönadxi queë́tuꞌ gátituꞌ,
pero niꞌa que lë ni rataꞌ yöl-laꞌ naꞌbán queë́liꞌ.
13 Nazúaj lu guichi láꞌayi le rnna:
“Guyéajlëꞌa Dios,
ateꞌ que lë ni naꞌ bëꞌa didzaꞌ.”
Lëscaꞌ caní raca queë́tuꞌ,
réajlëꞌëtuꞌ Dios,
en que lë ni naꞌ ruíꞌituꞌ didzaꞌ.
14 Nöztuꞌ ca gunëꞌ Dios,
Nu busubán Xanruꞌ Jesús,
usubanëꞌ caꞌ netuꞌ tsözxö́n len Jesús,
en usudxinëꞌ netuꞌ tsözxö́n len libíꞌiliꞌ lahuëꞌ Lëꞌ.
15 Raca caní yúguꞌtë lë ni para gaca bi uzíꞌiliꞌ xibé.
Channö ilaꞌdeliꞌ ziánrö caꞌ bönachi le ruzáꞌ ládxëꞌë Dios queë́ruꞌ,
ilaꞌnnë́ꞌ:
“Xclenëꞌ Dios”,
ateꞌ gaca yöl-laꞌ ba queëꞌ Dios.
16 Que lë ni naꞌ,
bitiꞌ raca chopa ládxiꞌtuꞌ.
Sal-laꞌ riniti idú le naca caztuꞌ,
yúguꞌtë dza rucubëꞌ Dios le nácatuꞌ lu icja ládxiꞌdoꞌotuꞌ.
17 Le cuídiꞌsö riguíꞌi rizácaꞌruꞌ ni tu chíꞌidoꞌosö run ga gataꞌ queë́ruꞌ le uzíꞌdaꞌaruꞌ xibé le sóaticaꞌsö,
en le nácatërö lesacaꞌ ca gaca gúnbëꞌëruꞌ.
18 Bitiꞌ ruíꞌi ládxiꞌruꞌ le riléꞌeruꞌ luyú ni,
pero le bitiꞌ gaca iléꞌeruꞌ ruíꞌi ládxiꞌruꞌ.
Lë naꞌ riléꞌeruꞌ,
tu chíꞌidoꞌosö zoa,
pero le cabí gaca iléꞌeruꞌ sóaticaꞌsö.