Ca naca didzaꞌ le ruún rëꞌu tuz len Dios
3
¿Naruꞌ réquitseliꞌ run ba zxön cuintuꞌ cateꞌ ruíꞌituꞌ caní didzaꞌ?
¿Naruꞌ runtsö bayudxi uluíꞌituꞌ libíꞌiliꞌ tu guichi le ruluíꞌi le nácatuꞌ?
¿Naruꞌ ral-laꞌ inábituꞌ libíꞌiliꞌ gúnnaliꞌ queë́tuꞌ tu guichi caní,
ca naꞌ tun bal-la bönachi?
2 Libíꞌi cázaliꞌ nácaliꞌ ca tu guichi le ruluíꞌi le nácatuꞌ,
le nazúaj lu icja ládxiꞌdoꞌotuꞌ,
ateꞌ yúguꞌtë bönachi gaca uluꞌlaba le,
en tséajniꞌiguequi le.
3 Le nácaliꞌ naláꞌ lahui ca tu guichi nuzúajëꞌ Cristo,
le gusö́l-lëꞌë lu naꞌtuꞌ.
Bitiꞌ nazúaj tu lu guichi,
pero Böꞌ Láꞌayi queëꞌ Dios ban nuzúajëꞌ le,
calëga tu lu guiö́jtaꞌa,
pero lu icja ládxiꞌdoꞌoliꞌ nuzúajëꞌ.
4 Ruíꞌituꞌ caní didzaꞌ tuꞌ ruzxöni ládxiꞌtuꞌ-nëꞌ Dios tuꞌ zóalenëꞌ Cristo rëꞌu.
5 Bitiꞌ réquituꞌ bi gaca guntuꞌ rácasö queë́tuꞌ,
pero Dios runnëꞌ queë́tuꞌ yöl-laꞌ huáca bi guntuꞌ.
6 Dios caz bennëꞌ queë́tuꞌ yöl-laꞌ huáca guntuꞌ xichinëꞌ lu didzaꞌ cubi naꞌ,
le ruún rëꞌu tuz len Dios.
Didzaꞌ ni bitiꞌ naca tu xibá nazúaj lu guichi,
pero naca tu le nusë́dinëꞌ Dios Böꞌ Láꞌayi rëꞌu.
Xibá naꞌ nazúaj lu guíchisö richugu queë́ruꞌ gátiruꞌ,
pero Dios Böꞌ Láꞌayi nabániruꞌ.
7 Yuguꞌ xibá queëꞌ nazúajgaca lu guichi,
Dios buzúajëꞌ yuguꞌ lu guiö́jtaꞌa,
ateꞌ buluꞌe lahui yöl-laꞌ beníꞌ queëꞌ cateꞌ budödëꞌ le lu nëꞌë Moisés.
Sal-laꞌ gudödi que,
guyë́pitërö yösa beníꞌ lahuëꞌ Moisés.
Caní guca,
bitiꞌ guca uluꞌyú bönachi Israel lahuëꞌ Moisés.
Channö yöl-laꞌ beníꞌ caní yöjtsaga xibá naꞌ,
ateꞌ xibá naꞌ richugu quégaca bönachi ilátigaca,
8 zxö́ntërö naca yöl-laꞌ beníꞌ naꞌ dzaga yuguꞌ le runëꞌ Dios Böꞌ Láꞌayi.
9 Yöjtsaga yöl-laꞌ beníꞌ lë naꞌ ben ga narugu quégaca bönachi ilátigaca.
Zxö́ntërö naca yöl-laꞌ beníꞌ que lë naꞌ run ga rnnëꞌ Dios nácagaca tsahuiꞌ bönachi.
10 Tuꞌ nácatërö lesacaꞌ yöl-laꞌ beníꞌ naꞌ naláꞌ lahui naꞌa,
cuídiꞌsö nagáꞌana yöl-laꞌ beníꞌ naꞌ biláꞌ lahui cateꞌ Dios bunödzjëꞌ xibá queëꞌ quégaca bönachi.
11 Channö guzóa yöl-laꞌ beníꞌ que lë naꞌ guzóa tu chíꞌidoꞌosö,
zxö́ntërö naca yöl-laꞌ beníꞌ que lë ni sóaticaꞌsö.
12 Tuꞌ zoa lë ni runruꞌ löza,
ruíꞌituꞌ didzaꞌ lu yöl-laꞌ rugu ladxiꞌ.
13 Bitiꞌ runtuꞌ ca benëꞌ Moisés,
bucacheꞌ lahuëꞌ len tu láriꞌdoꞌ,
para cabí uluꞌyú bönachi Israel yöl-laꞌ beníꞌ naꞌ zeaj riniti.
14 Gulaꞌchul-la gulaꞌnítiëꞌ yuguꞌ bönniꞌ niꞌ.
Ga ridxintë naꞌa dza cateꞌ tuꞌlabëꞌ guichi que didzaꞌ gula naꞌ le ruún bönachi tuz len Dios,
naca tsca nagáꞌana laꞌ leze láriꞌdoꞌ naꞌ lógaquiëꞌ,
lë naꞌ gaca ugǘëꞌ tuzëꞌ Cristo.
15 Ga ridxintë naꞌa dza,
cateꞌ tuꞌlabëꞌ guichi ga naꞌ nazúaj didzaꞌ queëꞌ Moisés,
zxoa ca tu láriꞌdoꞌ guiö́j lógaquiëꞌ le run ga nachul-la nanítigaquiëꞌ.
16 Cateꞌ nu ruhuöáca queëꞌ Xanruꞌ,
rigúa lë naꞌ run ga nachul-la naniti nu naꞌ.
17 Cateꞌ ni rnnatuꞌ:
“Xanruꞌ”,
ruíꞌituꞌ didzaꞌ queëꞌ Dios Böꞌ Láꞌayi.
Ga zoëꞌ Böꞌ Láꞌayi queëꞌ Xanruꞌ,
niꞌ zoa caz yöl-laꞌ nadzán.
18 Yúguꞌtëruꞌ rëꞌu bitiꞌ bi nusayaj loruꞌ.
Nácaruꞌ ca tu guíë dxili ga naláꞌ yöl-laꞌ beníꞌ que lahuëꞌ Xanruꞌ,
ateꞌ yöl-laꞌ beníꞌ naꞌ queëꞌ Xanruꞌ,
Nu naca Böꞌ Láꞌayi,
rutsáꞌ rëꞌu,
en run ga zeaj rácaröruꞌ ca náquiëꞌ Cristo caz,
en rátaꞌrö queë́ruꞌ yöl-laꞌ beníꞌ queëꞌ.