2
Que lë ni naꞌ bëꞌ ládxaꞌa cabí guídateaꞌ queë́liꞌ zíꞌalö,
para cabí gunaꞌ ga huíꞌiniliꞌ.
2 Channö gunaꞌ nedaꞌ ga huíꞌiniliꞌ,
¿nuzxi caz gun ga udzéjadaꞌ nedaꞌ?
¿Naruꞌ guntsaꞌ ga huíꞌini nu ral-laꞌ gun ga udzéjadaꞌ nedaꞌ?
3 Que lë ni naꞌ buzúajaꞌ queë́liꞌ lu guichi zíꞌalö.
Bitiꞌ gúꞌunidaꞌ guídaꞌ ga zóaliꞌ,
para cabí gunliꞌ libíꞌiliꞌ ga huíꞌinidaꞌ nedaꞌ,
tuꞌ ral-laꞌ gácaliꞌ libíꞌi cázaliꞌ le gun ga udzéjadaꞌ nedaꞌ.
Tuꞌ ruzxöni ládxaꞌa libíꞌiliꞌ,
nözdaꞌ udzéjaliꞌ yúguꞌtëliꞌ channö udzéjadaꞌ nedaꞌ.
4 Cateꞌ niꞌ buzúajaꞌ queë́liꞌ lu guichi lë naꞌ,
gusë́bideꞌe ládxaꞌa,
en buíꞌinideꞌe ládxaꞌa ga bidxintë gurödxaꞌ.
Buzúajaꞌ caní lu guichi,
calëga para gunaꞌ ga huíꞌiniliꞌ,
pero para inö́ziliꞌ ca nadxíꞌideꞌedaꞌ libíꞌiliꞌ.
Ral-laꞌ uniti loruꞌ nu ruáꞌ döꞌ cateꞌ rubíꞌi ladxiꞌ
5 Channö zoëꞌ tu bönniꞌ niꞌ,
bönniꞌ naꞌ busuhuíꞌininëꞌ rëꞌu,
calëga nédaꞌsö busuhuíꞌininëꞌ,
pero huáca innaruꞌ busuhuíꞌininëꞌ yúguꞌtëliꞌ libíꞌiliꞌ.
Rnníaꞌ:
“Huaca innaruꞌ”,
para cabí tödi bëꞌ ichugu bëꞌa queëꞌ bönniꞌ naꞌ.
6 Tscatiꞌ gaz xíguiaꞌ chibenliꞌ látuꞌbiquiꞌ yúguꞌtëliꞌ queëꞌ bönniꞌ naꞌ.
7 Naꞌa,
ral-laꞌ uniti loliꞌ bönniꞌ naꞌ,
en utípaliꞌ ládxëꞌë,
para cabí tödi bëꞌ huíꞌininëꞌ,
en para cabí gaca tsaz chopa ládxëꞌë.
8 Que lë ni naꞌ rátaꞌyuaꞌ loliꞌ gunliꞌ le gaca bëꞌ nadxíꞌiliꞌ-nëꞌ idú ládxiꞌliꞌ.
9 Que lë ni naꞌ caꞌ buzúajaꞌ queë́liꞌ lu guichi lë naꞌ.
Gúꞌunidaꞌ siꞌ bëꞌa libíꞌiliꞌ para inözdaꞌ channö rúnticaꞌsiliꞌ ca rnna xtídzaꞌa.
10 Cateꞌ nu runiti loliꞌ libíꞌiliꞌ,
nedaꞌ caꞌ runiti lahuaꞌ nu naꞌ.
Cateꞌ nu runiti lahuaꞌ,
channö bi ben nu naꞌ runiti lahuaꞌ,
runaꞌ caní uláz queëꞌ Cristo para gaca bi uzíꞌiliꞌ xibé.
11 Caní runaꞌ,
para cabí sequiꞌ Satanás tuꞌ xihuiꞌ ucúl-la rëꞌu,
tuꞌ chinö́ziruꞌ yuguꞌ le rë́ꞌëni gun queë́ruꞌ.
Guröꞌë böniga Pablo lu yödzö Troas
12 Cateꞌ bidxinaꞌ lu yödzö Troas para gunaꞌ libán que didzaꞌ dxiꞌa queëꞌ Cristo,
bénnadëꞌë Xanruꞌ nedaꞌ lataj gunaꞌ libán niꞌ.
13 Sal-laꞌ guca caní,
guröꞌa böniga tuꞌ cabí yöjxácaꞌa-biꞌ biꞌi bö́chiꞌruꞌ Tito niꞌ.
Que lë ni naꞌ buzáꞌalenaꞌ bönachi niꞌ,
ateꞌ guyijaꞌ luyú Macedonia.
Idéliꞌruꞌ tuꞌ zóalenëꞌ Cristo rëꞌu
14 ¡Xclenëꞌ Dios!
Richë́ꞌticaꞌsëꞌ rëꞌu ca tu le naca bëꞌ bidéliꞌnëꞌ Cristo yöl-laꞌ rusölá queë́ruꞌ.
Dios rugunëꞌ dxin rëꞌu para ruluꞌë lahui ca gaca ilúnbëꞌe bönachi Cristo.
Le nácaruꞌ naca ca tu le riláꞌ zxixi,
le riguisi gátiꞌtës.
15 Nácaruꞌ ca tu nöri riláꞌ zxixi,
le ruzéguiꞌë Cristo lahuëꞌ Dios,
en le riguísiëꞌ lógaca nupa nulágaca,
en nupa nanítigaca.
16 Lógaca nupa naꞌ nanítigaca nácaruꞌ ca tu le riláꞌ siguti le naca bëꞌ ilátiëꞌ.
Lógaca nupa naꞌ nulágaca nácaruꞌ ca tu le riláꞌ zxixi le naca bëꞌ ibánticaꞌsiruꞌ.
¿Nuzxi caz naca lesacaꞌ gaca que caní?
17 Bitiꞌ runtuꞌ ca tun zián bönachi,
nupa tuꞌgún dxin xtídzëꞌë Dios ca tu le tutiꞌ,
en toꞌo.
Tuꞌ nasö́l-lëꞌë Dios netuꞌ,
idú ládxiꞌtuꞌ ruíꞌituꞌ didzaꞌ lahuëꞌ Lëꞌ tuꞌ nácatuꞌ tuz len Cristo.