Libán runruꞌ queëꞌ Cristo, ca gudë́ꞌë lëꞌe yaga cruz
2
Caní guca,
böchiꞌ luzáꞌadoꞌ,
cateꞌ bidxinaꞌ queë́liꞌ.
Benaꞌ libán loliꞌ que xtídzëꞌë Dios,
calëga len yöl-laꞌ réajniꞌi quiaꞌ,
en bitiꞌ bëꞌa didzaꞌ lu yöl-laꞌ rácadaꞌ quiaꞌ.
2 Cateꞌ niꞌ guzóalenaꞌ libíꞌiliꞌ,
bëꞌ ládxaꞌa cabí guꞌa didzaꞌ que le yúbölö,
pero ca nácatë queëꞌ Jesucristo bëꞌa didzaꞌ,
ca naꞌ gudë́ꞌë lëꞌe yaga cruz.
3 Guzóalenaꞌ libíꞌiliꞌ lu yöl-laꞌ ricuidiꞌ quiaꞌ,
ateꞌ lu yöl-laꞌ radxi quiaꞌ guzxízidaꞌa.
4 Bë́ꞌlenaꞌ libíꞌiliꞌ didzaꞌ,
en benaꞌ libán que xtídzëꞌë Dios,
calëga ca tuíꞌi didzaꞌ bönachi lu yöl-laꞌ rácadaꞌ quéguequisö,
pero guzóalenëꞌ Dios Böꞌ Láꞌayi nedaꞌ,
ateꞌ guzóalen yöl-laꞌ huáca queëꞌ Dios nedaꞌ,
le guca bëꞌ naca idútë li didzaꞌ bëꞌa.
5 Caní benaꞌ para gaca tséajlëꞌëliꞌ Dios,
calëga tuꞌ biyö́niliꞌ yöl-laꞌ rácadaꞌ quégaca bönachi,
pero tuꞌ biléꞌeliꞌ yöl-laꞌ huáca queë cazëꞌ Dios.
Dios Böꞌ Láꞌayi runëꞌ ga núnbëꞌëruꞌ-nëꞌ Dios
6 Ruíꞌituꞌ didzaꞌ lu yöl-laꞌ rácadaꞌ lógaca nupa chinácarö idú ca taꞌyéajlëꞌ Dios.
Yöl-laꞌ rácadaꞌ ni bitiꞌ naca ca le nápagaca bönachi yödzölió ni,
en bitiꞌ naca ca le nápagaquiëꞌ bönniꞌ taꞌnná bëꞌë dza ni zóaruꞌ naꞌa,
nupa naꞌ taꞌniti caz.
7 Ruíꞌituꞌ didzaꞌ que yöl-laꞌ rácadaꞌ nagachiꞌ,
lë naꞌ runödzjëꞌ Dios,
tuꞌ bigachiꞌ yöl-laꞌ rácadaꞌ naꞌ buzóëꞌ Dios dza niꞌte para uzíꞌiruꞌ xibé.
8 Yuguꞌ bönniꞌ taꞌnná bëꞌë dza ni zóaruꞌ naꞌa bitiꞌ gulúnbëꞌë yöl-laꞌ rácadaꞌ naꞌ.
Laꞌtuꞌ gulúnbëꞌë le,
bitiꞌ uluꞌdë́ꞌë Xanruꞌ nayë́pisëtërëꞌ lëꞌe yaga cruz.
9 Naca ca naꞌ nazúaj lu guichi láꞌayi le rnna:
Chinupë́ꞌë Dios le uluꞌzíꞌ xibé nupa nadxíꞌiguequi Lëꞌ,
yuguꞌ le cuntu nu bleꞌe,
en bitiꞌ biyö́ni,
en bitiꞌ gulaꞌzáꞌ ládxiꞌgaca bönachi ca naca que.
10 Naꞌa,
Dios nuzéajniꞌinëꞌ rëꞌu yuguꞌ lë ni lu nëꞌë Dios Böꞌ Láꞌayi,
tuꞌ ruyú cazëꞌ Dios Böꞌ Láꞌayi yúguꞌtë,
encaꞌ le yuꞌu icja ládxiꞌdaꞌahuëꞌ Dios caz.
11 ¿Naruꞌ gaca inö́zinëꞌ nu bönniꞌ le yuꞌu icja ládxiꞌdaꞌahuëꞌ iaꞌtúëꞌ bönniꞌ?
Tuz böꞌ naca cazëꞌ bönniꞌ naꞌ nözi lë naꞌ.
Lëscaꞌ caní,
cuntu nu nözi le yuꞌu icja ládxiꞌdaꞌahuëꞌ Dios.
Tuzëꞌ Dios Böꞌ Láꞌayi nö́zinëꞌ lë ni.
12 Rëꞌu ni,
bitiꞌ nazíꞌ lu náꞌaruꞌ tu böꞌ ridasö yödzölió ni,
pero nazíꞌ lu náꞌaruꞌ Dios Böꞌ Láꞌayi,
Nu naꞌ ruchíziëꞌ Dios rëꞌu para gaca gúnbëꞌëruꞌ yuguꞌ le buzáꞌ ládxëꞌë Dios queë́ruꞌ.
13 Yuguꞌ lë naꞌ buzáꞌ ládxëꞌë Dios queë́ruꞌ ruíꞌiruꞌ didzaꞌ que,
calëga len didzaꞌ tuꞌsédinëꞌ bönachi rëꞌu len yöl-laꞌ rácadaꞌ quéguequi,
pero len yuguꞌ didzaꞌ rusédinëꞌ Dios Böꞌ Láꞌayi rëꞌu.
Caní naca,
ruzéajniꞌiruꞌ bönachi zóalenëꞌ Dios Böꞌ Láꞌayi légaquiëꞌ ca naca le rusédinëꞌ Dios Böꞌ Láꞌayi rëꞌu.
14 Tu bönniꞌ bitiꞌ zóalenëꞌ Dios Böꞌ Láꞌayi lëꞌ bitiꞌ rizíꞌ lu nëꞌë le rusédinëꞌ Dios Böꞌ Láꞌayi rëꞌu,
tuꞌ réquinëꞌ cáꞌasö naca.
Bitiꞌ gaca tséajniꞌinëꞌ bönniꞌ naꞌ lë ni,
tuꞌ gaca guéquibeꞌenëꞌ tuzëꞌ bönniꞌ zóalenëꞌ Dios Böꞌ Láꞌayi lëꞌ le nazacaꞌ lë ni.
15 Tu bönniꞌ zóalenëꞌ Dios Böꞌ Láꞌayi lëꞌ gaca guéquibeꞌenëꞌ le nazacaꞌ yúguꞌtë,
pero cuntu nu gaca guéquibeꞌe le nazacaꞌ cazëꞌ bönniꞌ naꞌ.
16 Nazúaj lu guichi láꞌayi le rnna:
¿Nuzxi caz nözi le rizáꞌ ládxëꞌë Xanruꞌ?
¿Nuzxi caz gaca uzéajniꞌi Lëꞌ?
Le rizáꞌ ládxëꞌë Cristo yuꞌu icja ládxiꞌdoꞌoruꞌ rëꞌu.