Nácaruꞌ huen dxin tsözxö́n len Dios
3
Que lë ni naꞌ,
böchiꞌ luzáꞌadoꞌ,
bitiꞌ guca güíꞌilenaꞌ libíꞌiliꞌ didzaꞌ ca ruíꞌilenaꞌ-nëꞌ didzaꞌ tu bönniꞌ nudödi cuinëꞌ lu nëꞌë Dios Böꞌ Láꞌayi,
pero bë́ꞌlenaꞌ libíꞌiliꞌ didzaꞌ ca ruíꞌilenaꞌ nu naca bönáchisö didzaꞌ,
bitiꞌ zóalenëꞌ Dios Böꞌ Láꞌayi nu naꞌ.
Nácaliꞌ ca yuguꞌ biꞌi huë́ꞌëni.
Bitiꞌ nácaliꞌ tsutsu ca réajlëꞌëliꞌ-nëꞌ Cristo.
2 Busédidaꞌ libíꞌiliꞌ le cabí naca böniga,
lë naꞌ guca ca nidxiꞌ güíꞌiliꞌ.
Bitiꞌ busédidaꞌ libíꞌiliꞌ le naca böniga ca bëlaꞌ gáguliꞌ.
Bitiꞌ guca tséajniꞌiliꞌ le naca ca bëlaꞌ gáguliꞌ,
en bitiꞌ rácaliꞌ naꞌa.
3 Caní naca,
tuꞌ nácaliꞌ ca nu naca bönáchisö ga ridxintë naꞌa dza.
Tsanni ni ruzxéꞌeliꞌ luzáꞌaliꞌ,
en ridil-la dídzaꞌliꞌ,
en rirúajliꞌ choplö,
nácaliꞌ ca nu naca bönáchisö,
en runliꞌ tuz ca tun bönachi yödzölió ni.
4 Cateꞌ zóalen libíꞌiliꞌ nu rnna daꞌ Pablo nu naꞌ,
en iaꞌtú nu rnna daꞌ Apolos,
nácaliꞌ ca nu naca bönáchisö.
5 ¿Nuzxi caz nacaꞌ nedaꞌ,
Pablo?
¿Nuzxi caz naꞌ Apolos?
Nácatuꞌ huen dxin queëꞌ Dios,
ateꞌ niꞌa que le bentuꞌ guyéajlëꞌëliꞌ Cristo.
Tu tutuꞌ runtuꞌ dxin naꞌ bennëꞌ Xanruꞌ que queë́tuꞌ.
6 Dxin bentuꞌ lu icja ládxiꞌdoꞌoliꞌ naca ca dxin run nu raza ruzóa.
Nedaꞌ guzaꞌ xisedoꞌ,
ateꞌ Apolos guluꞌë nisa,
pero Dios benëꞌ ga gulén,
en guzxö́n xisedoꞌ naꞌ nadúz icja ládxiꞌdoꞌoliꞌ.
7 Caní naca,
látiꞌdoꞌos nazáquiëꞌ bönniꞌ guz,
en látiꞌdoꞌos caꞌ bönniꞌ riguꞌë nisa,
pero nazácaꞌdëꞌë Dios Nu run ga rilén,
en rizxö́n xisedoꞌ naꞌ.
8 Tuz ca nácagaquiëꞌ bönniꞌ razëꞌ,
en bönniꞌ riguꞌë nisa.
Dios ubiꞌë que queë́gaquiëꞌ tsca naca dxin runëꞌ tu tuëꞌ.
9 Nácatuꞌ huen dxin tsözxö́n len Dios,
ateꞌ libíꞌiliꞌ nácaliꞌ ca laꞌ yëla queëꞌ Dios ga runtuꞌ dxin.
Lëscaꞌ caní nácaliꞌ ca tu yuꞌu runëꞌ Dios.
10 Ca naca le buzáꞌ ládxëꞌë Dios quiaꞌ,
nacaꞌ ca tu bönniꞌ huen zöꞌö lo.
Nedaꞌ guluꞌa xilibi zöꞌö,
ateꞌ nu yúbölö richisa zöꞌö naꞌ.
Tu turuꞌ ral-laꞌ uyuruꞌ ca richísaruꞌ zöꞌö lahui xilibi zöꞌö naꞌ.
11 Dios chiguluꞌë tu xilibi zöꞌö le naca Lë cazëꞌ Jesucristo,
ateꞌ cuntu nu gaca cuꞌu iaꞌtú xilibi zöꞌö caní.
12 Dxin runruꞌ queëꞌ Cristo naca ca richísaruꞌ zöꞌö lahui xilibi zöꞌö naꞌ.
Lahui xilibi zöꞌö naꞌ gaca nu gun dxin le naca ca richisa zöꞌö le naca ca le néquini oro,
o plata,
o guiö́j nazácaꞌdaꞌgaca,
o gaca nu gun dxin le naca ca richisa zöꞌö le néquini yaga,
o guizxi,
o guixiꞌ cáꞌasö.
13 Gaca bëꞌ ca naca dxin núngaca tu tu bönachi.
Cateꞌ idxín dza ichúguiëꞌ Dios quégaca bönachi,
iláꞌ lahui dxin nunruꞌ,
tuꞌ tödi dxin naꞌ lu guíꞌ,
ateꞌ guíꞌ naꞌ siꞌ bëꞌ dxin núngaca tu tu bönachi.
14 Channö dxin nunëꞌ tu bönniꞌ urúaj dxiꞌa lu guíꞌ naꞌ,
le naca ca tu zöꞌö guchisëꞌ,
Dios ubiꞌë queëꞌ ca saꞌyéaj dxin nunëꞌ.
15 Channö tsegui dxin nunëꞌ tu bönniꞌ le naca ca tu zöꞌö guchisëꞌ,
unítiëꞌ le rë́ꞌënëꞌ ubiꞌë Dios queëꞌ,
pero ulá cazëꞌ lëꞌ,
ateꞌ gaca queëꞌ ca raca que nu rulá tu lu guíꞌ.
16 ¿Naruꞌ cabí nö́ziliꞌ naca cázaliꞌ yudoꞌ queëꞌ Dios,
ateꞌ zoëꞌ Dios Böꞌ Láꞌayi icja ládxiꞌdoꞌoliꞌ?
17 Channö nu usuniti yudoꞌ queëꞌ Dios,
Dios usunítiëꞌ nu naꞌ,
tuꞌ naca láꞌayi yudoꞌ queëꞌ Dios,
ateꞌ libíꞌiliꞌ naca cázaliꞌ yudoꞌ naꞌ.
18 Bitiꞌ siꞌ yeꞌe cuinliꞌ.
Channö réqui nu nutsaꞌ ládjaliꞌ rácadaꞌ ca tácadaꞌ bönachi yödzölió ni,
ral-laꞌ huöáca nu naꞌ ca tu bönniꞌ bitiꞌ bi nö́zinëꞌ,
para gataꞌ que yöl-laꞌ rácadaꞌ le naca idú.
19 Nu bönniꞌ napzëꞌ yöl-laꞌ rácadaꞌ que yödzölió ni náquiëꞌ tu bönniꞌ bitiꞌ bi nö́zinëꞌ lahuëꞌ Dios.
Nazúaj lu guichi láꞌayi le rnna:
“Dios runëꞌ ga ilaꞌchixi ilaꞌnigui nupa tácadaꞌ,
rugunëꞌ dxin yöl-laꞌ rácadaꞌ quéguequi.”
20 Lëscaꞌ caní rnna:
“Xanruꞌ nö́zinëꞌ nítisö naca le taꞌbequi ícjagaca bönachi tácadaꞌ.”
21 Que lë ni naꞌ,
bitiꞌ ral-laꞌ gunliꞌ zxön le gaca gunëꞌ tu bönniꞌ.
Nequi queë́liꞌ yúguꞌtë.
22 Néquiguequi queë́liꞌ:
Pablo,
en Apolos,
en Cefas,
en yödzölió ni,
en yöl-laꞌ naꞌbán,
en yöl-laꞌ guti,
en dza ni zóaruꞌ naꞌa,
en dza siꞌ zaꞌ.
Yúguꞌtë nequi queë́liꞌ,
23 ateꞌ libíꞌiliꞌ néquiliꞌ queëꞌ Cristo,
ateꞌ Cristo néquinëꞌ queëꞌ Dios.