Dxin tunëꞌ bönniꞌ gubáz nasö́l-lëꞌë Cristo
4
Que lë ni naꞌ,
ral-laꞌ guéquiliꞌ nácatuꞌ netuꞌ huen dxin queëꞌ Cristo,
en nazíꞌ lu naꞌtuꞌ le nagachiꞌ queëꞌ Dios.
2 Yuguꞌ bönniꞌ,
Dios nudödëꞌ lu náꞌagaquiëꞌ uluꞌgunëꞌ dxin le nequi queëꞌ,
run bayudxi ilunëꞌ idú dxiꞌa le tunëꞌ.
3 Bitiꞌ bi ruíꞌi ládxaꞌa channö uchiꞌa usöröliꞌ nedaꞌ,
o channö uluꞌchiꞌa uluꞌsörö́ bönachi yödzölió ni nedaꞌ.
Bitiꞌ caꞌ ruchiꞌa rusörö́ cuinaꞌ.
4 Bitiꞌ ruxö́s ládxiꞌdaꞌahuaꞌ nedaꞌ.
Lë ni bitiꞌ naca bëꞌ bitiꞌ nabágaꞌa xíguiaꞌ.
Xanruꞌ náquiëꞌ Nu ruchiꞌa rusörö́ëꞌ nedaꞌ.
5 Que lë ni naꞌ,
bitiꞌ ral-laꞌ uchiꞌa usöröliꞌ nu bönniꞌ zíꞌalö ca idxín dza que.
Guliꞌcö́z dza niꞌ huödëꞌ Xanruꞌ,
ateꞌ Lëꞌ ubéajëꞌ ga lináꞌ le nagachiꞌ ga chul-la,
en uluꞌë lahui le yuꞌu icja ládxiꞌdoꞌgaca yúguꞌtë bönachi.
Níꞌirö Dios ubiꞌë que queë́gaca bönachi le gun bal léguequi ca ral-laꞌ gaca quéguequi.
6 Naꞌa,
böchiꞌ luzáꞌadoꞌ,
ca naca lë ni,
bëꞌa didzaꞌ que le runtuꞌ netuꞌ,
Apolos,
en nedaꞌ.
Huáca usë́daliꞌ ca runtuꞌ netuꞌ para gunliꞌ le nazúajsö lu guichi láꞌayi,
en bitiꞌ gunliꞌ zxön tuëꞌ bönniꞌ,
en bitiꞌ uzóaliꞌ tsöláꞌalö iaꞌtúëꞌ.
7 ¿Nuzxi bentsö ga nacuꞌ liꞌ lo?
¿Bizxi caz bidéliꞌnuꞌ liꞌ le cabí bennëꞌ Dios quiuꞌ?
Channö Lëꞌ bénnasëꞌ quiuꞌ lë naꞌ dë lu noꞌo,
¿bizx que run ba zxön cuinuꞌ,
réquinuꞌ rácasö quiuꞌ bidéliꞌnuꞌ lë naꞌ?
8 ¿Naruꞌ réquitseliꞌ nadéliꞌtëröliꞌ?
¿Naruꞌ réquitseliꞌ riléꞌeliꞌ yöl-laꞌ tsahuiꞌ queë́liꞌ?
¿Naruꞌ réquitseliꞌ rinná bë́ꞌëliꞌ,
sal-laꞌ bitiꞌ rinná bë́ꞌëtuꞌ netuꞌ?
Niꞌa queëꞌ Xanruꞌ Dios rë́ꞌëndaꞌ inná bë́ꞌëliꞌ para gaca inná bë́ꞌlentuꞌ libíꞌiliꞌ tsözxö́n.
9 Runi nedaꞌ naca queë́tuꞌ,
bönniꞌ gubáz queëꞌ Dios,
ca nuzóëꞌ netuꞌ zéajtuꞌ xibánitë ca naꞌ raca quégaquiëꞌ bönniꞌ chinarugu quégaquiëꞌ ilátiëꞌ lahuiꞌ lógaca bönachi.
Nácatuꞌ ca tu le tuꞌyudaꞌ bönachi yödzölió ni,
encaꞌ ca tu le tuꞌyúdëꞌë gubáz láꞌayi queëꞌ Dios.
10 Tuꞌ rë́ꞌënituꞌ guntuꞌ xichinëꞌ Cristo,
ruíꞌituꞌ bönachi lataj téquiguequi nácatuꞌ bönniꞌ bitiꞌ bi nö́zquequinëꞌ,
pero libíꞌiliꞌ réquiliꞌ rácadaꞌaliꞌ tuꞌ nácaliꞌ queëꞌ Cristo.
Libíꞌiliꞌ réquiliꞌ chinál-laliꞌ,
pero téquiguequi bönachi nacuídiꞌtuꞌ netuꞌ.
Tuꞌzóa bönachi netuꞌ tsöláꞌalö,
pero tun libíꞌiliꞌ bal.
11 Ga ridxintë naꞌa dza,
riduntuꞌ,
en ribídxituꞌ nisa.
Bitiꞌ dë lariꞌ gácutuꞌ.
Tun bönachi netuꞌ ziꞌ,
en bitiꞌ zoa lídxituꞌ.
12 Rusacaꞌ ziꞌ cuintuꞌ,
laꞌ nétuꞌsö runtuꞌ dxin.
Tuꞌlidza bönachi netuꞌ ziꞌ,
pero netuꞌ rinábatuꞌ le gácalen léguequi.
Taꞌbía ládxiꞌgaca bönachi netuꞌ,
pero ruáꞌ rilentuꞌ le.
13 Taꞌnnë́ꞌ queë́tuꞌ,
pero lu yöl-laꞌ nöxaj ladxiꞌ ruíꞌilentuꞌ légaquiëꞌ didzaꞌ.
Ga ridxintë naꞌa dza nácatuꞌ ca bëbu que yödzölió ni,
en ca tu le taꞌrúꞌuna yúguꞌtë bönachi.
14 Ruzúajaꞌ queë́liꞌ caní lu guichi,
calëga tuꞌ rë́ꞌëndaꞌ gunaꞌ ga utuíꞌiliꞌ,
pero rë́ꞌëndaꞌ uzéajniꞌidaꞌ libíꞌiliꞌ,
runaꞌ ca runëꞌ tu bönniꞌ ruzéajniꞌinëꞌ yuguꞌ zxíꞌini cazëꞌ tuꞌ nadxíꞌinëꞌ légacabiꞌ.
15 Sal-laꞌ gaca zián gáyuꞌë bönniꞌ ilaꞌcuáꞌalen libíꞌiliꞌ,
en uluꞌsédinëꞌ libíꞌiliꞌ ca naca queëꞌ Cristo,
tuz nu zoa naca ca xúziliꞌ,
nu naꞌ ben ga néquiliꞌ queëꞌ Cristo.
Lu yöl-laꞌ naꞌbán cubi le nápaliꞌ tuꞌ dzágaliꞌ Cristo,
nedaꞌ caz nacaꞌ ca xúziliꞌ tuꞌ busiyöndaꞌ libíꞌiliꞌ didzaꞌ dxiꞌa.
16 Que lë ni naꞌ,
rátaꞌyuaꞌ loliꞌ güíꞌi ládxiꞌliꞌ gunliꞌ ca runaꞌ nedaꞌ.
17 Que lë ni naꞌ caꞌ risö́l-laꞌa-biꞌ biꞌi Timoteo ga zóaliꞌ.
Tuꞌ rúnlenbiꞌ nedaꞌ dxin queëꞌ Xanruꞌ nácabiꞌ ca zxíꞌini cazaꞌ,
en nácabiꞌ idú ladxiꞌ,
ateꞌ nadxíꞌidaꞌ-biꞌ.
Gunbiꞌ Timoteo ga tsöjnéliꞌ yuguꞌ xibá rusédidaꞌ tuꞌ néquidaꞌ queëꞌ Cristo,
yuguꞌ le rusédidaꞌ yúguꞌtë lataj lógaca yúguꞌtë cöꞌ bönachi queëꞌ Cristo.
18 Bál-laliꞌ run ba zxön cuinliꞌ tuꞌ réquiliꞌ bítiꞌrö udxinaꞌ ga zóaliꞌ.
19 Naꞌa,
laꞌ udxínteaꞌ ga zóaliꞌ channö Xanruꞌ gunnëꞌ nedaꞌ lataj.
Níꞌirö guéquibeꞌedaꞌ,
calë́gasö didzaꞌ tuꞌë bönniꞌ tun ba zxön cuíngaquiëꞌ,
pero guéquibeꞌedaꞌ channö zóalen yöl-laꞌ huáca queëꞌ Dios légaquiëꞌ.
20 Channö nazíꞌ lu náꞌaliꞌ rinná béꞌenëꞌ Dios libíꞌiliꞌ,
bitiꞌ naca bëꞌ naca caní tuꞌ rnnásiliꞌ caꞌ.
Naca bëꞌ naca caní channö zóalen libíꞌiliꞌ yöl-laꞌ huáca queëꞌ Dios.
21 ¿Bízxilö rë́ꞌëniliꞌ?
¿Naruꞌ rë́ꞌëniliꞌ udxinaꞌ ga zóaliꞌ len gubáꞌayi,
para gunaꞌ libíꞌiliꞌ ziꞌ,
o len yöl-laꞌ nadxíꞌi,
en lu yöl-laꞌ nöxaj ladxiꞌ?