Pablo ruchiꞌa rusörö́ëꞌ tuëꞌ bönniꞌ runëꞌ le ruáꞌ döꞌ
5
Rizë́ didzaꞌ zóalenëꞌ libíꞌiliꞌ tuëꞌ bönniꞌ runëꞌ le ruáꞌ döꞌ,
tuꞌ zóalenëꞌ nigula queëꞌ xuzëꞌ.
Le ruáꞌ döꞌ caní bitiꞌ caꞌ tun bönachi bitiꞌ núnbëꞌgaca Dios.
2 Libíꞌiliꞌ run ba zxön cuinliꞌ,
pero ral-laꞌ huíꞌiniliꞌ,
en ubéajliꞌ nu naꞌ run dul-laꞌ naꞌ ga zóaliꞌ.
3 Sal-laꞌ bitiꞌ zóalenaꞌ libíꞌiliꞌ lu idútë le nacaꞌ,
le nácatë zóalenaꞌ libíꞌiliꞌ lu böꞌ naca cazaꞌ.
Ca chizóalen cazaꞌ libíꞌiliꞌ chibuchíꞌa busörö́aꞌ nu naꞌ run dul-laꞌ naꞌ.
4 Cateꞌ udúbiliꞌ queëꞌ Xanruꞌ Jesucristo gunaꞌ libíꞌiliꞌ tsözxö́n lu böꞌ naca cazaꞌ.
Níꞌirö,
len yöl-laꞌ huáca queëꞌ Xanruꞌ Jesús
5 buliꞌdödëꞌ bönniꞌ naꞌ lu naꞌ Satanás tuꞌ xihuiꞌ para initi idútë le naca cazëꞌ,
pero ulá böꞌ naca cazëꞌ dza niꞌ huödëꞌ Xanruꞌ.
6 Bitiꞌ naca dxiꞌa gun ba zxön cuinliꞌ ca naca le runliꞌ.
¿Naruꞌ cabí nö́ziliꞌ didzaꞌ naꞌ rnna:
“Cua zídoꞌos que yöta xtila gun ga chazxaj idútë cúa nazíꞌi le”?
7 Naꞌa,
guliꞌcúa ga zóaliꞌ dul-laꞌ naꞌ le naca ca tu cúa zi gulás,
para gácaliꞌ dxiꞌa.
Níꞌirö gácaliꞌ ca tu cúa cubi le cabí nazíꞌi cúa zi que,
ca naꞌ le nácatë chinácaliꞌ.
Naca queë́ruꞌ ca chizóaruꞌ Laní Pascua cateꞌ tahuëꞌ yöta xtila bitiꞌ nazíꞌ cúa zi que,
en chigulútiëꞌ-baꞌ uláz queë́ruꞌ böꞌcuꞌ zxilaꞌ que Laní Pascua naꞌ,
böꞌcuꞌ zxilaꞌ naꞌ náquiëꞌ Lë cazëꞌ Cristo.
8 Que lë ni naꞌ ral-laꞌ gunruꞌ laní naꞌ,
calëga zóalen rëꞌu cúa zi gulás naꞌ le ruluíꞌi le ruáꞌ döꞌ,
en le cabí nazacaꞌ,
pero ral-laꞌ ugunruꞌ dxin yöta xtila naꞌ bitiꞌ nazíꞌi cúa zi que,
yöta xtila naꞌ ruluíꞌi le naca idú dxiꞌa,
en le naca idútë li.
9 Cateꞌ buzúajaꞌ queë́liꞌ lu guichi zíꞌalö,
gudxi cazaꞌ libíꞌiliꞌ bitiꞌ gunliꞌ tsözxö́n bönniꞌ tunëꞌ le ruáꞌ döꞌ.
10 Gudxaꞌ libíꞌiliꞌ caní,
calëga para ucuítaliꞌ tsaz ga nacuáꞌ bönachi yödzölió ni,
nupa tun le ruáꞌ döꞌ,
en ga nacuáꞌ bönachi taꞌzë́ ládxiꞌgaca le dë que luzë́ꞌeguequi,
en ga nacuꞌë yuguꞌ bönniꞌ gubán,
en bönachi taꞌyéaj ládxiꞌgaca budóꞌ guiö́j budóꞌ yaga.
Para gunliꞌ caní gun bayudxi irúajliꞌ yödzölió ni.
11 Le rë́ꞌëni inná didzaꞌ naꞌ buzúajaꞌ queë́liꞌ zíꞌalö naca para cabí gunliꞌ tu zxön tuëꞌ bönniꞌ rnnëꞌ néquinëꞌ queëꞌ Cristo,
pero runëꞌ dul-laꞌ le lëꞌe,
o rizë́ ládxëꞌë le dë que luzë́ꞌë,
o reaj ládxëꞌë tu budóꞌ néquini,
o rinnë́ xihuëꞌë,
o rizúdxinëꞌ,
o ribanëꞌ.
Bitiꞌ caꞌ gágulenliꞌ tsözxö́n tuëꞌ bönniꞌ caní.
12,13 Bitiꞌ nequi quiaꞌ nedaꞌ uchiꞌa usörö́aꞌ nupa bitiꞌ nabábagaca rëꞌu. Dios uchiꞌa usörö́ëꞌ léguequi. Libíꞌi cázaliꞌ ral-laꞌ uchiꞌa usöröliꞌ nupa nabábagaca libíꞌiliꞌ. Que lë ni naꞌ, guliꞌcúëꞌ ga zóaliꞌ bönniꞌ xihuiꞌ naꞌ.