Bitiꞌ ral-laꞌ ichë́ꞌëruꞌ böchiꞌ luzáꞌaruꞌ lógaca bönachi yúlahuiꞌ
6
Cateꞌ ridil-la dídzaꞌliꞌ tuliꞌ len iaꞌtuliꞌ,
¿nacxi caz rurúguiliꞌ tséajliꞌ yúlahuiꞌ ga uluꞌchiꞌa uluꞌsörö́ nupa bitiꞌ taꞌyéajlëꞌ Cristo libíꞌiliꞌ?
Dxíꞌarö tséajliꞌ lógaca bönachi queëꞌ Cristo para uluꞌchiꞌa uluꞌsörö́ libíꞌiliꞌ.
2 ¿Naruꞌ cabí nö́ziliꞌ nupa néquiguequi queëꞌ Cristo ral-laꞌ uluꞌchiꞌa uluꞌsörö́ yúguꞌtë bönachi yödzölió?
Channö libíꞌi cázaliꞌ uchiꞌa usöröliꞌ bönachi yödzölió,
¿naruꞌ cabí nápaliꞌ yöl-laꞌ réajniꞌi uchiꞌa usöröliꞌ didzaꞌ bizxaj caní?
3 ¿Naruꞌ cabí nö́ziliꞌ ral-laꞌ uchiꞌa usörö́ruꞌ yuguꞌ gubáz láꞌayi?
Rúntërö bayudxi uchiꞌa usöröruꞌ le taca yödzölió ga ni zóaruꞌ naꞌa.
4 Naꞌa,
channö raca tu le run bayudxi nu uchiꞌa usörö́,
lë naꞌ raca yödzölió ni,
¿bizx que rucuáꞌaliꞌ nupa uluꞌchiꞌa uluꞌsörö́ le,
nupa naꞌ bitiꞌ bi dë lu në́ꞌeguequi ládjagaca bönachi queëꞌ Cristo?
5 Rnníaꞌ caní para gunaꞌ ga utuíꞌiliꞌ.
¿Naruꞌ cabí zóalen libíꞌiliꞌ nu raca latiꞌ nu gaca uchiꞌa usörö́ le raca quégaquiëꞌ böchiꞌ luzáꞌaliꞌ?
6 ¿Nacxi caz gaca tu bönniꞌ réajlëꞌë Cristo ichë́ꞌë böchiꞌ luzë́ꞌë yúlahuiꞌ ga uluꞌchiꞌa uluꞌsörö́ bönachi bitiꞌ taꞌyéajlëꞌ Cristo légaquiëꞌ?
7 Le nácatë richixi riníguiliꞌ tuꞌ ridil-la dídzaꞌliꞌ.
¿Bizx que bitiꞌ guáꞌ ilenliꞌ nu ruáꞌ döꞌ queë́liꞌ?
¿Bizx que bitiꞌ guáꞌ ilenliꞌ nu rucáchiꞌlan le dë queë́liꞌ?
8 Libíꞌiliꞌ ruáꞌaliꞌ döꞌ,
en rucachiꞌ lanliꞌ,
ateꞌ runliꞌ caní quégaquiëꞌ böchiꞌ luzáꞌaliꞌ taꞌyéajlëꞌë Cristo.
9,10 ¿Naruꞌ cabí nö́ziliꞌ bitiꞌ ilaꞌyaza bönachi bitiꞌ nácagaca tsahuiꞌ ga rinná bëꞌë Dios? ¡Bitiꞌ siꞌ yeꞌe cuinliꞌ!
Bitiꞌ caꞌ tsaz ga rinná bëꞌë Dios nu run le ruáꞌ döꞌ:
Cuntu nu reaj ladxiꞌ budóꞌ guiö́j budóꞌ yaga,
en cuntu nu riguitsaj xibá que yöl-laꞌ nutsaga naꞌ,
en cuntu nu bönniꞌ run cuinëꞌ ca nigula,
en cuntu nu bönniꞌ zóalenëꞌ laꞌ luzë́ꞌe bö́nniꞌsëꞌ,
en cuntu nu bönniꞌ gubán, en cuntu nu ruhuidiꞌ,
en cuntu nu rizudxi, en cuntu nu rinnë́ xihuiꞌ,
en cuntu nu rucáchiꞌlan.
Bitiꞌ caꞌ tsaz nu run caní ga rinná bëꞌë Dios.
11 Caní gúcaliꞌ bál-laliꞌ libíꞌiliꞌ,
pero naꞌa chinuhuöácaliꞌ dxiꞌa que dul-laꞌ gubágaꞌliꞌ,
en chinéquiliꞌ quez queëꞌ Dios,
en chinuhuöácaliꞌ tsahuiꞌ niꞌa que le benëꞌ Xanruꞌ Jesús.
Böꞌ Láꞌayi queëꞌ Dios runëꞌ ga raca caní.
Idútë le naca cázaruꞌ nequi quez queëꞌ Dios
12 Taꞌnná bönachi:
“Yúguꞌtë dë lataj gunruꞌ.”
Sal-laꞌ nácatë didzaꞌ ni,
bitiꞌ ral-laꞌ gunruꞌ yúguꞌtë.
Sal-laꞌ dë lataj gunaꞌ yúguꞌtë,
bitiꞌ guꞌa lataj bi inná beꞌe nedaꞌ.
13 Taꞌnná caꞌ bönachi:
“Laꞌ huagu naca le tsaz lë́ꞌëruꞌ,
ateꞌ lë́ꞌëruꞌ naca ga tsudzu laꞌ huagu.”
Nácatë didzaꞌ ni,
pero idxín dza usunítiëꞌ Dios laꞌ huagu,
encaꞌ lë́ꞌëruꞌ.
Dios benëꞌ idútë le naca cázaruꞌ,
calëga para ugunruꞌ le dxin gunruꞌ le ruáꞌ döꞌ.
Naca para uziꞌë xibé Xanruꞌ,
ateꞌ Xanruꞌ náquiëꞌ para uzíꞌ xibë́ꞌ idútë le naca cázaruꞌ.
14 Dios busubanëꞌ Xanruꞌ Cristo lu yöl-laꞌ guti.
Lëscaꞌ caní,
len yöl-laꞌ huáca queëꞌ usubanëꞌ rëꞌu.
15 ¿Naruꞌ cabí nö́ziliꞌ,
idútë le nácaliꞌ naca tuz len le naca cazëꞌ Cristo?
¿Nacxi caz gaca cúaliꞌ tu le daꞌ Cristo,
en gunliꞌ ga taꞌ tu nigula udá dzaga?
¡Bitiꞌ caꞌ ral-laꞌ gunliꞌ caní!
16 ¿Naruꞌ cabí nö́ziliꞌ channö tu bönniꞌ zóalenëꞌ-nu nigula udá dzaga,
náquiëꞌ tuz len lënu?
Ca naca lë ni nazúaj lu guichi láꞌayi le rnna:
“Ilácagaquiëꞌ ca tuz bönachi iropëꞌ naꞌ.”
17 Naꞌa,
nu bönniꞌ náquiëꞌ tuz len Xanruꞌ,
náquiëꞌ tuz len Lëꞌ lu böꞌ naca cazëꞌ.
18 Que lë ni naꞌ,
bitiꞌ caꞌ gunliꞌ le ruáꞌ döꞌ.
Bítiꞌtës dul-laꞌ yúbölö runëꞌ tu bönniꞌ,
níꞌilö lu le naca cazëꞌ runëꞌ dul-laꞌ naꞌ.
Nu bönniꞌ runëꞌ dul-laꞌ le lëꞌë,
runëꞌ dul-laꞌ le dzaga lë cazëꞌ.
19 ¿Naruꞌ cabí nö́ziliꞌ idútë le naca cázaliꞌ naca yudoꞌ queëꞌ Dios Böꞌ Láꞌayi?
Dios caz nuchizëꞌ Dios Böꞌ Láꞌayi naꞌ libíꞌiliꞌ,
ateꞌ Lëꞌ zoëꞌ icja ládxiꞌdoꞌoliꞌ.
Que lë ni naꞌ bitiꞌ nequi queë́ziliꞌ idútë le naca cázaliꞌ.
Naꞌa,
nequi queëꞌ Dios.
20 Dios gúꞌuëꞌ libíꞌiliꞌ len tu le zxön le gudizxjëꞌ.
Guliꞌgún dxin idútë le nácaliꞌ,
encaꞌ böꞌ naca cázaliꞌ para gaca queëꞌ Dios yöl-laꞌ ba,
tuꞌ néquiguequi queëꞌ Dios idútë le naca cázaliꞌ,
encaꞌ böꞌ naca cázaliꞌ.