Rusë́dinëꞌ Pablo ca naca que yöl-laꞌ nutsaga naꞌ
7
Naꞌa,
ubiꞌa didzaꞌ yuguꞌ le rinábiliꞌ nedaꞌ,
le buzúajliꞌ quiaꞌ lu guichi.
Gácarö dxiꞌa queëꞌ nu bönniꞌ channö cabí sóalenëꞌ-nu nigula.
2 Tuꞌ tundaꞌ bönachi le ruáꞌ döꞌ ga niꞌ zóaliꞌ,
yúguꞌtë bönniꞌ nabábagaquiëꞌ libíꞌiliꞌ ral-laꞌ ilaꞌcuáꞌlenëꞌ-nu nigula que queë́gaquiëꞌ,
ateꞌ yúguꞌtë nigula ral-laꞌ ilaꞌcuáꞌlennu-nëꞌ bönniꞌ que queë́gacanu.
3 Bönniꞌ naꞌ zóanu nigula queëꞌ ral-laꞌ gunëꞌ queë́nu nigula queëꞌ ca naca yöl-laꞌ run que yöl-laꞌ nutsaga naꞌ,
en laꞌ lë́bisö ral-laꞌ gunnu nigula len bönniꞌ queë́nu.
4 Bitiꞌ dë lu náꞌasönu nigula le naca cázanu,
pero bönniꞌ queë́nu dë lu nëꞌë caꞌ le.
Lëscaꞌ caní,
bitiꞌ dë lu náꞌasëꞌ bönniꞌ le naca cazëꞌ,
pero nigula queëꞌ dë lu náꞌanu caꞌ le.
5 Bitiꞌ ral-laꞌ ilaꞌdáꞌbaguëꞌë luzáꞌagaquiëꞌ bönniꞌ,
en nigula naꞌ,
nutsaga náꞌagaquiëꞌ.
Huácasö caꞌ channö ilunëꞌ tuz didzaꞌ bitiꞌ ilaꞌdzáguiëꞌ tu chíꞌisö para gaca uluꞌlidzëꞌ Dios idú ládxiꞌgaquiëꞌ.
Tödi naꞌ,
bönniꞌ naꞌ ral-laꞌ sóalenëꞌ-nu nigula queëꞌ leyúbölö,
para cabí sequiꞌ Satanás tuꞌ xihuiꞌ gun ga tsázagaquiëꞌ nöza dul-laꞌ tuꞌ cabí gaca ilaꞌnná beꞌe cuíngaquiëꞌ.
6 Lë ni reaꞌ libíꞌiliꞌ naca tu le runnëꞌ Xanruꞌ libíꞌiliꞌ lataj.
Bitiꞌ naca le gunná bëꞌë.
7 Runi nedaꞌ gácarö dxiꞌa uluꞌgáꞌanëꞌ tuz yúguꞌtë bönniꞌ,
ca naꞌ zoaꞌ tuzaꞌ nedaꞌ.
Tu tuëꞌ bönniꞌ riziꞌë tsca le runödzjëꞌ Dios queëꞌ gunëꞌ.
Tuëꞌ riziꞌë tu le runödzjëꞌ,
ateꞌ iaꞌtúëꞌ riziꞌë iaꞌtú le runödzjëꞌ.
8 Naꞌa,
reaꞌ nupa zóagaca tuz,
encaꞌ yuguꞌ nigula uzëbi,
gácarö dxiꞌa quéguequi uluꞌgáꞌana tuz ca naꞌ zoaꞌ tuz nedaꞌ.
9 Channö cabí gaca ilaꞌnná beꞌe cuíngaquiëꞌ,
huáca uluꞌtsaga náꞌagaquiëꞌ,
tuꞌ gácarö dxiꞌa uluꞌtsaga náꞌagaquiëꞌ,
en cabí ilaꞌzë́ ládxiꞌgaquiëꞌ le ruáꞌ döꞌ.
10 Rinná béꞌedaꞌ nupa chinutsaga në́ꞌeguequi,
en calëga nédaꞌsö runaꞌ xibá ni,
pero Lë cazëꞌ Xanruꞌ runëꞌ le,
rnnëꞌ:
“Bitiꞌ uláꞌalennu tu nigula bönniꞌ queë́nu.”
11 Channö nu nigula uláꞌalennu-nëꞌ bönniꞌ queë́nu,
ral-laꞌ ugáꞌananu túzinu,
o huöácanu tuz len bönniꞌ queë́nu naꞌ.
Lëscaꞌ caní tu bönniꞌ bitiꞌ ral-laꞌ ucáꞌanëꞌ-nu nigula queëꞌ.
12 Naꞌa,
nédaꞌsö reaꞌ iaꞌzícaꞌrö bönachi,
en calëga rnnëꞌ Xanruꞌ caní,
rnníaꞌ:
Channö zoëꞌ nu böchiꞌ luzáꞌaruꞌ réajlëꞌë Cristo,
ateꞌ nigula queëꞌ bitiꞌ réajlëꞌënu Xanruꞌ,
en channö rë́ꞌëninu ugáꞌanalennu lëꞌ,
bitiꞌ ral-laꞌ uláꞌalenëꞌ-nu.
13 Lëscaꞌ caní rnníaꞌ:
Channö zóanu nu nigula zanruꞌ réajlëꞌënu Cristo,
ateꞌ bönniꞌ queë́nu bitiꞌ réajlëꞌë Xanruꞌ,
en channö rë́ꞌënnëꞌ ugáꞌanalenëꞌ-nu,
bitiꞌ ral-laꞌ uláꞌalennu lëꞌ.
14 ¡Caní ral-laꞌ ilunëꞌ!
Bönniꞌ cabí réajlëꞌë naꞌ,
Dios riléꞌenëꞌ lëꞌ ca tu bönniꞌ néquinëꞌ quez queëꞌ tuꞌ náquiëꞌ tuz len nigula queëꞌ réajlëꞌënu Cristo,
ateꞌ nigula caní,
bitiꞌ réajlëꞌënu,
Dios riléꞌenëꞌ-nu ca tu nigula néquinu quez queëꞌ tuꞌ nácanu tuz len bönniꞌ queë́nu náquiëꞌ böchiꞌ luzáꞌaruꞌ réajlëꞌë Cristo.
Laꞌtuꞌ cabí naca caní,
ilácabiꞌ zxíꞌinigaquiëꞌ ca yuguꞌ biꞌi lan lahuëꞌ Dios.
Naꞌa,
nácagacabiꞌ quez queëꞌ Dios.
15 Nu bönniꞌ o nigula nu cabí réajlëꞌ Cristo,
channö rë́ꞌëni uláꞌalen nu naꞌ nutsaga náꞌalen,
huáca caꞌ.
Bitiꞌ run bayudxi ugáꞌanalen nu naꞌ böchiꞌ luzáꞌaruꞌ o zanruꞌ nu réajlëꞌ Cristo,
tuꞌ bulidzëꞌ Dios rëꞌu para cö́zaruꞌ tsáhuiꞌdoꞌ.
16 ¡Caní ral-laꞌ gaca!
Nadxi caꞌ liꞌ,
nigula,
huáca gunuꞌ ga ulë́ꞌ bönniꞌ quiuꞌ,
ateꞌ nadxi caꞌ liꞌ,
bönniꞌ,
huáca gunuꞌ ga ulanu nigula quiuꞌ.
17 Ral-laꞌ gunruꞌ tu turuꞌ tsca le bennëꞌ queë́ruꞌ Xanruꞌ,
encaꞌ tsca guca queë́ruꞌ cateꞌ bulidzëꞌ Dios rëꞌu para guéquiruꞌ queëꞌ.
Rusë́didaꞌ yúguꞌtë cöꞌ bönachi queëꞌ Cristo xibá ni.
18 Channö Dios bulidzëꞌ nu bönniꞌ narugu lu xipë́lëꞌë le naca bëꞌ néquinëꞌ queëꞌ Dios,
ral-laꞌ ugáꞌanëꞌ caní,
zoa lu xipë́lëꞌë lë naꞌ naca bëꞌ.
Lëscaꞌ caní,
channö Dios bulidzëꞌ nu bönniꞌ bitiꞌ narugu lu xipë́lëꞌë lë naꞌ naca bëꞌ,
bitiꞌ ral-laꞌ ichúguiëꞌ lë naꞌ lu xipë́lëꞌë.
19 Bitiꞌ bi nazacaꞌ lë naꞌ narugu lu xipë́lëꞌë tu bönniꞌ,
en channö bitiꞌ narugu lu xipë́lëꞌë bönniꞌ lë naꞌ naca bëꞌ,
bitiꞌ bi nazacaꞌ.
Le nácadaꞌ lesacaꞌ naca gunruꞌ ca rinná bëꞌ xibá queëꞌ Dios.
20 Ral-laꞌ ugáꞌanëꞌ tu tuëꞌ bönniꞌ ca naꞌ gúquiëꞌ cateꞌ niꞌ bulidzëꞌ Dios lëꞌ.
21 Channö bulidzëꞌ liꞌ cateꞌ niꞌ nacuꞌ bönniꞌ nadóꞌo,
bitiꞌ cöꞌu böniga tuꞌ nacuꞌ caní,
pero channö gataꞌ quiuꞌ lataj irujuꞌ lu naꞌ xanuꞌ,
buzíꞌ xibé lataj naꞌ gataꞌ quiuꞌ irujuꞌ.
22 Channö bulidzëꞌ Xanruꞌ nu bönniꞌ cateꞌ niꞌ nadoꞌë,
lahuëꞌ Xanruꞌ náquiëꞌ ca nu bönniꞌ narúajëꞌ lu nëꞌë xanëꞌ naꞌ,
para gunëꞌ xichinëꞌ Xanruꞌ.
Lëscaꞌ caní,
channö bulidzëꞌ Xanruꞌ nu bönniꞌ cateꞌ niꞌ narúajëꞌ lu nëꞌë xanëꞌ naꞌ,
bönniꞌ ni náquiëꞌ ca tu bönniꞌ nadóꞌo queëꞌ Cristo.
23 Zxö́ntërö le gudizxjëꞌ Dios,
gúꞌuëꞌ libíꞌiliꞌ.
Que lë ni naꞌ bitiꞌ ral-laꞌ gutiꞌ cuinliꞌ lu náꞌagaca bönachi.
24 Que lë ni naꞌ caꞌ,
böchiꞌ luzáꞌadoꞌ,
ral-laꞌ sóaliꞌ lahuëꞌ Dios tsca guca queë́liꞌ tu tuliꞌ cateꞌ niꞌ bulidzëꞌ Dios libíꞌiliꞌ.
25 Ca naca quégaca nupa bitiꞌ nutsaga náꞌagaca,
bitiꞌ bi gunná béꞌenëꞌ Xanruꞌ nedaꞌ.
Caní runi nedaꞌ,
ateꞌ huáca uzxöni ládxiꞌliꞌ nedaꞌ tuꞌ ruhuéchiꞌ ládxëꞌë Xanruꞌ nedaꞌ.
26 Tuꞌ taca zián le raca queë́ruꞌ dza ni zóaruꞌ naꞌa,
runi nedaꞌ gácarö dxiꞌa channö uluꞌgáꞌanëꞌ yúguꞌtë bönniꞌ ca nácagaquiëꞌ naꞌa.
27 Channö nutsaga náꞌlenuꞌ-nu nigula,
bitiꞌ uláꞌalenuꞌ-nu.
Lëscaꞌ caní,
channö zuꞌ tuzuꞌ,
bitiꞌ quiljuꞌ tu nigula para utsaga náꞌlenuꞌ-nu.
28 Naꞌa,
channö utsaga náꞌlenuꞌ-nu nigula,
bitiꞌ gunuꞌ dul-laꞌ,
en channö tu biꞌi nigula utsaga náꞌalenbiꞌ-nëꞌ bönniꞌ,
bitiꞌ gunbiꞌ dul-laꞌ,
pero ilaꞌguíꞌi ilaꞌzacaꞌ nupa nutsaga náꞌagaca yödzölió ni,
ateꞌ rë́ꞌëndaꞌ gunaꞌ ga uláliꞌ lu yöl-laꞌ riguíꞌi rizacaꞌ naꞌ.
29 Naꞌa,
reaꞌ libíꞌiliꞌ lë ni,
böchiꞌ luzáꞌadoꞌ.
¡Chizóa idxín dza údxi!
Que lë ni naꞌ,
yuguꞌ bönniꞌ nutsaga náꞌlengaquiëꞌ-nu nigula ral-laꞌ iluíꞌ ládxiꞌgaquiëꞌ Dios,
ca runëꞌ nu bönniꞌ bitiꞌ nutsaga náꞌalenëꞌ nigula.
30 Lëscaꞌ caní,
nupa taꞌbödxi yechiꞌ ral-laꞌ uluꞌdzeja lahuëꞌ Dios ca run nu bitiꞌ ribödxi,
ateꞌ nupa tuꞌdzeja ral-laꞌ ilaꞌcuáꞌ nöxaj lahuëꞌ Dios ca run nu bitiꞌ rudzeja,
ateꞌ nupa toꞌo ral-laꞌ ilaca ca nu bitiꞌ bi dë que.
31 Nupa tuꞌgún dxin le dë yödzölió ni ral-laꞌ ilaca ca nu bitiꞌ ruíꞌi ladxiꞌ le dë yödzölió ni,
tuꞌ udödi quégaca le riléꞌeruꞌ yödzölió ni.
32 Rë́ꞌëndaꞌ bitiꞌ ubi uguíꞌiliꞌ.
Tu bönniꞌ bitiꞌ zóanu nigula queëꞌ ruíꞌi ládxëꞌë le nequi queëꞌ Xanruꞌ,
naca gunëꞌ le raza ládxëꞌë Xanruꞌ.
33 Tu bönniꞌ nutsaga náꞌlenëꞌ-nu tu nigula ruíꞌi ládxëꞌë le raca yödzölió,
naca gunëꞌ le raza ládxiꞌnu nigula queëꞌ.
34 Lëscaꞌ caní raca queë́nu tu nigula nutsaga náꞌlennu-nëꞌ bönniꞌ,
en queë́nu nigula naꞌ zóanu túzinu.
Nigula naꞌ zóanu túzinu ruíꞌi ládxiꞌnu le nequi queëꞌ Xanruꞌ,
naca sóanu quez queëꞌ Dios lu le naca cázanu,
en lu böꞌ naca cázanu.
Nigula naꞌ nutsaga náꞌlennu-nëꞌ tu bönniꞌ ruíꞌi ládxiꞌnu le raca yödzölió ni,
naca gunnu le raza ládxëꞌë bönniꞌ queë́nu.
35 Yuguꞌ lë ni reaꞌ libíꞌiliꞌ para uzíꞌiliꞌ xibé lë ni,
en calëga para uzágaꞌa xinö́ziliꞌ.
Rë́ꞌëndaꞌ gunliꞌ le ral-laꞌ gunliꞌ,
para gunliꞌ xichinëꞌ Xanruꞌ idú ládxiꞌliꞌ.
36 Channö zoëꞌ tu bönniꞌ réquinëꞌ bitiꞌ naca dxiꞌa ugáꞌanabiꞌ túzibiꞌ biꞌi nigula raꞌbandoꞌ queëꞌ,
en chizóa iz queë́biꞌ,
en rë́ꞌënideꞌebiꞌ utsaga náꞌalenbiꞌ-nëꞌ bönniꞌ,
huáca utsaga náꞌalenbiꞌ-nëꞌ.
¡Bitiꞌ gunbiꞌ dul-laꞌ!
37 Channö chinún tsutsu xtídzëꞌë bönniꞌ naꞌ,
en bitiꞌ run bayudxi gunëꞌ caní,
en dë lu nëꞌë naca gunëꞌ,
en chinún tsutsu xtídzëꞌë ugáꞌanabiꞌ túzibiꞌ,
gunëꞌ le naca dxiꞌa bönniꞌ naꞌ.
38 Caní naca,
nu ruíꞌi lataj biꞌi que utsaga náꞌalenbiꞌ-nëꞌ bönniꞌ,
run le naca dxiꞌa,
pero nu run ga ugáꞌanabiꞌ túzibiꞌ run le nácarö dxiꞌa.
39 Nigula naꞌ nutsaga náꞌlennu-nëꞌ bönniꞌ,
rinná beꞌe xibá que yöl-laꞌ nutsaga naꞌ lënu tsanni ni zoëꞌ nabanëꞌ bönniꞌ queë́nu.
Channö gátiëꞌ bönniꞌ queë́nu,
gataꞌ lu náꞌanu utsaga náꞌlennu-nëꞌ nu bönniꞌ rë́ꞌëninu,
channö réajlëꞌë Xanruꞌ bönniꞌ naꞌ.
40 Runi nedaꞌ gácarönu bicaꞌ ba channö ugáꞌananu túzinu,
en réquidaꞌ Böꞌ Láꞌayi queëꞌ Dios runëꞌ nedaꞌ tzazxö́n.