Le taꞌgúꞌu bönachi lógaca budóꞌ guiö́j budóꞌ yaga
8
Naꞌa,
guꞌa didzaꞌ ca naca que le rëꞌaj ráguruꞌ,
lë naꞌ gulaꞌgúꞌu bönachi lógaca budóꞌ guiö́j budóꞌ yaga.
Taꞌnná bönachi:
“Yúguꞌtëruꞌ náparuꞌ yöl-laꞌ réajniꞌi.”
¡Nácatë didzaꞌ ni!
Yöl-laꞌ réajniꞌi caní run ga run ba zxön cuinruꞌ,
pero yöl-laꞌ nadxíꞌi queë́ruꞌ luzáꞌaruꞌ run ga rácalenruꞌ luzáꞌaruꞌ.
2 Channö zoëꞌ nu bönniꞌ réquinëꞌ chiréajniꞌinëꞌ,
bitiꞌ bi réajniꞌininëꞌ ca ral-laꞌ tséajniꞌinëꞌ,
3 pero nu bönniꞌ nadxíꞌinëꞌ Dios,
Dios caz zóalenëꞌ bönniꞌ naꞌ.
4 Naꞌa,
ca naca que le rëꞌaj ráguruꞌ,
lë naꞌ gulaꞌgúꞌu bönachi lógaca budóꞌ guiö́j budóꞌ yaga,
nö́ziruꞌ bitiꞌ bi nazácaꞌgaca budóꞌ guiö́j budóꞌ yaga naꞌ yödzölió ni,
en cúnturö nu zoa naca Dios.
5 Sal-laꞌ nacuáꞌ le téquiguequi bönachi nácagaca dios,
le nacuáꞌ lúzxiba,
en le nacuáꞌ luyú,
ateꞌ zián le tuꞌlidza bönachi,
en tuíꞌi lágaca:
dios,
encaꞌ:
xan,
6 pero queë́ruꞌ rëꞌu:
Tuzëꞌ náquiëꞌ Dios,
Lëꞌ Xuz.
Lëꞌ benëꞌ yúguꞌtë le riléꞌeruꞌ,
ateꞌ zóaruꞌ nabanruꞌ para tseaj ládxiꞌruꞌ Lëꞌ.
Tuzëꞌ náquiëꞌ Xanruꞌ,
Lëꞌ Jesucristo.
Lu nëꞌë Lëꞌ,
Dios benëꞌ yúguꞌtë le dë,
ateꞌ nabániruꞌ Lëꞌ.
7 Calëga yúguꞌtë böchiꞌ luzáꞌaruꞌ taꞌyéajniꞌinëꞌ lë ni.
Bal-lëꞌ,
nupa niꞌ zíꞌalö gulaꞌyéaj ládxiꞌgaca budóꞌ guiö́j budóꞌ yaga,
ga ridxintë naꞌa dza tëꞌaj tahuëꞌ le gulaꞌgúꞌu bönachi lógaca budóꞌ guiö́j budóꞌ yaga,
ateꞌ téquinëꞌ napa yöl-laꞌ huáca que budóꞌ naꞌ.
Tuꞌ cabí naca idú ládxiꞌgaquiëꞌ,
que lë ni naꞌ téquinëꞌ nabágaꞌgaquiëꞌ xíguiaꞌ channö tahuëꞌ lë naꞌ.
8 Bitiꞌ gun le guíꞌaj gáguruꞌ ga gunëꞌ Dios rëꞌu bal.
Channö gáguruꞌ le,
bitiꞌ gácaröruꞌ dxiꞌa,
en channö cabí gáguruꞌ le,
bitiꞌ gácaröruꞌ cáꞌasö.
9 Dë lu náꞌaliꞌ guíꞌaj gáguliꞌ bítiꞌtës.
Guliꞌgún chiꞌi cuinliꞌ para cabí gunliꞌ ga ilaꞌchixi ilaꞌnigui nupa bitiꞌ naca idú ca taꞌyéajlëꞌ Cristo.
10 Nadxi caꞌ liꞌ réquinuꞌ napuꞌ yöl-laꞌ réajniꞌi ca naca lë ni,
en huáca gaguꞌ bítiꞌtës.
Channö cöꞌu xilataj budóꞌ guiö́j budóꞌ yaga,
en guíꞌaj gaguꞌ le gulaꞌgúꞌu bönachi lo budóꞌ guiö́j budóꞌ yaga naꞌ,
ateꞌ channö nu böchiꞌ luzóꞌo bitiꞌ naca idú ládxëꞌë iléꞌenëꞌ liꞌ,
röꞌu raguꞌ niꞌ,
nadxi caꞌ gunuꞌ ga gahuëꞌ lë naꞌ gulaꞌgúꞌu bönachi lo budóꞌ guiö́j budóꞌ yaga naꞌ.
11 Caní gaca,
tuꞌ réquinuꞌ napuꞌ yöl-laꞌ réajniꞌi,
gunuꞌ ga ichixi iníguinëꞌ böchiꞌ luzóꞌo bitiꞌ naca idú ládxëꞌë.
¿Naruꞌ guntsoꞌ caní queëꞌ böchiꞌ luzóꞌo,
niꞌa que nu naꞌ gútiëꞌ Cristo?
12 Channö caní gunuꞌ,
gunuꞌ dul-laꞌ tuꞌ usubáguꞌu böchiꞌ luzóꞌo xíguiaꞌ,
en gunuꞌ ga ichixi iníguinëꞌ tuꞌ cabí naca idú ládxëꞌë,
en gunuꞌ caꞌ dul-laꞌ le ruzóa Cristo tsöláꞌalö.
13 Que lë ni naꞌ,
channö le guíꞌaj gahuaꞌ gun ga ichixi iníguinëꞌ böchiꞌ luzáꞌa,
bítiꞌrö gahuaꞌ bëlaꞌ naꞌ,
para cabí gunaꞌ ga gunëꞌ böchiꞌ luzáꞌa dul-laꞌ.