Le dë lu nëꞌë nu bönniꞌ gubáz nasö́l-lëꞌë Cristo
9
¿Naruꞌ cabí nacaꞌ gubáz nasö́l-lëꞌë Cristo?
¿Naruꞌ cabí nadéliꞌdaꞌ yöl-laꞌ rusölá?
¿Naruꞌ cabí biléꞌedaꞌ-nëꞌ Xanruꞌ Jesús?
¿Naruꞌ cabí nácaliꞌ queëꞌ Cristo niꞌa que dxin benaꞌ nedaꞌ uláz queëꞌ Xanruꞌ?
2 Nadxi caꞌ téquiguequi iaꞌzícaꞌrö bönachi bitiꞌ nacaꞌ gubáz nasö́l-lëꞌë Cristo.
Libíꞌiliꞌ run bayudxi guéquiliꞌ nacaꞌ gubáz queëꞌ Cristo.
Tuꞌ nácaliꞌ queëꞌ Xanruꞌ,
le naca cázaliꞌ naca bëꞌ nacaꞌ gubáz nasö́l-lëꞌë Xanruꞌ.
3,4 Nacuáꞌ nupa taꞌzíꞌ quidzaꞌ nedaꞌ. Caní rubiꞌa didzaꞌ, reaꞌ légaquiëꞌ: Dë lu naꞌa inabaꞌ le guíꞌaj gahuaꞌ tuꞌ runaꞌ dxin ni.
5 Lëscaꞌ caní dë lu naꞌa utsaga náꞌalenaꞌ-biꞌ tubiꞌ biꞌi nigula zanruꞌ réajlëꞌëbiꞌ Cristo para gunbiꞌ nedaꞌ tsözxö́n ga ridáꞌ,
ca naꞌ tunëꞌ iaꞌzícaꞌrëꞌ gubáz nasö́l-lëꞌë Cristo,
en yuguꞌ bönniꞌ bö́chëꞌë Xanruꞌ,
encaꞌ Pedro.
6 ¿Naruꞌ réquiliꞌ tuzaꞌ nedaꞌ,
en Bernabé ral-laꞌ guntuꞌ dxin lahuiꞌ dza,
para idzö́lituꞌ le gágutuꞌ?
7 ¿Nuzxi caz bönniꞌ rejëꞌ gudil-la,
ateꞌ riguizxjëꞌ laꞌ cuinsëꞌ?
¿Nuzxi caz bönniꞌ rudë́ꞌë tu laꞌ yëla que lubá uva,
en bitiꞌ rahuëꞌ le ribía lubá naꞌ?
¿Nuzxi caz bönniꞌ rapa chiꞌë-baꞌ böꞌcuꞌ zxilaꞌ,
en bitiꞌ reꞌjëꞌ nidxiꞌ quégacabaꞌ?
8 Bitiꞌ guéquiliꞌ laꞌ nédaꞌsö ruáꞌa caní didzaꞌ.
Lëscaꞌ caní rnna le nazúaj lu guichi lu xibá queëꞌ Moisés.
9 Lu xibá queëꞌ Moisés nazúaj lu guichi le rnna:
Bitiꞌ cuꞌu du rúaꞌabaꞌ bëdxi cateꞌ rulíbibaꞌ zxoaꞌ xtila.
Bëꞌë Dios didzaꞌ ni,
calë́gasö tuꞌ ruíꞌi ládxëꞌë-baꞌ bëdxi,
10 pero para uzíꞌiruꞌ caꞌ xibé rëꞌu.
Que lë ni naꞌ nazúaj lu guichi didzaꞌ naꞌ,
ateꞌ bönniꞌ naꞌ rugáꞌanëꞌ-baꞌ bëdxi,
encaꞌ bönniꞌ naꞌ runëꞌ ga tuꞌlíbibaꞌ bëdxi zxoaꞌ xtila,
iropëꞌ naꞌ ral-laꞌ ilunëꞌ löza ilaꞌziꞌë que le ruláꞌ luyú naꞌ.
11 Naꞌa,
channö bentuꞌ dxin ga zóaliꞌ,
le naca ca dxin guz gúꞌuna,
lë naꞌ naca queëꞌ Dios Böꞌ Láꞌayi,
¿naruꞌ réquitseliꞌ bitiꞌ ral-laꞌ uzíꞌituꞌ xibé tu le doꞌ dë queë́liꞌ ca naꞌ ruziꞌë xibé bönniꞌ guz gúꞌuna le rulapëꞌ?
12 Iaꞌzícaꞌrö bönachi tuꞌzéajniꞌinëꞌ libíꞌiliꞌ tuꞌziꞌë xibé le dë queë́liꞌ.
¿Naruꞌ cabí rálaꞌtërö uzíꞌituꞌ xibé netuꞌ le dë queë́liꞌ?
Catu caz buziꞌtuꞌ xibé lë ni dë lu naꞌtuꞌ,
pero biáꞌ gulentuꞌ yúguꞌtë para gaca guntuꞌ libán que didzaꞌ dxiꞌa ca naca queëꞌ Cristo.
13 Nöz quéziliꞌ ca raca quégaca nupa tun dxin que yudoꞌ,
tuꞌzíꞌ xibé gun que yudoꞌ.
Lëscaꞌ caní nupa taꞌgúꞌu rön quégacabaꞌ böaꞌ bëdxi lu bucugu láꞌayi queëꞌ Dios,
tahuëꞌ bëlaꞌ quégacabaꞌ böaꞌ bëdxi naꞌ.
14 Lëscaꞌ caní nuzóëꞌ Xanruꞌ ca ral-laꞌ gaca quégaquiëꞌ bönniꞌ tunëꞌ libán que didzaꞌ dxiꞌa.
Nupa tuꞌzíꞌ xibé libán naꞌ tunëꞌ ral-laꞌ uluꞌgagu légaquiëꞌ.
15 Nedaꞌ catu caz buziꞌa xibé lë ni dë lu naꞌa,
ateꞌ lë ni ruzúajaꞌ lu guichi ni bitiꞌ naca le rinábini nu bi gunna quiaꞌ.
Run ba zxön cuinaꞌ tuꞌ cabí nazxjaꞌ cateꞌ runaꞌ libán que didzaꞌ dxiꞌa.
Guë́ꞌënitëraꞌ gátiaꞌ ca guꞌa lataj nu innë́ runaꞌ libán naꞌ tuꞌ nazxjaꞌ.
16 Bitiꞌ dë lu naꞌa gun ba zxön cuinaꞌ tuꞌ runaꞌ libán que didzaꞌ dxiꞌa,
tuꞌ run bayudxi gunaꞌ libán que.
Bicaꞌ bayechiꞌ nedaꞌ channö cabí gunaꞌ libán que didzaꞌ dxiꞌa.
17 Laꞌtuꞌ runaꞌ libán tuꞌ rë́ꞌëni quézidaꞌ,
huáca inabaꞌ lazxjaꞌ,
pero run bayudxi gunaꞌ libán,
tuꞌ naca tu le busubáguëꞌë Dios nedaꞌ gunaꞌ.
18 ¿Bizxi lazxjaꞌ uziꞌtsaꞌ xibé channö?
Ruziꞌa xibé le raza ládxaꞌa tuꞌ cabí nazxjaꞌ cateꞌ runaꞌ libán que didzaꞌ dxiꞌa.
Bitiꞌ caꞌ ruziꞌa xibé lë naꞌ dë lu naꞌa tuꞌ runaꞌ libán que didzaꞌ dxiꞌa.
19 Naꞌa,
sal-laꞌ cuntu nu yuꞌa lu nëꞌe,
chibén cuinaꞌ ca tu bönniꞌ nadóꞌo quégaca yúguꞌtë bönachi para gaca gunaꞌ ga uluꞌlágaca ziánrö caꞌ bönachi.
20 Cateꞌ runaꞌ libán lógaca bönachi judío,
run cuinaꞌ ca tu bönniꞌ judío para gaca gunaꞌ ga uluꞌlágaca bönachi judío naꞌ.
Bönachi judío naꞌ tun ca rinná bëꞌ xibá queëꞌ Moisés.
Que lë ni naꞌ run cuinaꞌ ca tu bönniꞌ runëꞌ ca rinná bëꞌ xibá naꞌ sal-laꞌ bitiꞌ yuꞌa lu naꞌ xibá naꞌ.
Caní runaꞌ para gaca gunaꞌ ga uluꞌlágaca nupa tun ca rinná bëꞌ xibá naꞌ.
21 Cateꞌ runaꞌ libán lógaca bönachi izáꞌa,
nupa bitiꞌ rinná beꞌe xibá queëꞌ Moisés léguequi,
run cuinaꞌ ca tu bönniꞌ ziꞌtuꞌ naꞌ,
para gaca gunaꞌ ga uluꞌlë́ꞌ.
Bitiꞌ rucáꞌanaꞌ cáꞌasö xibá queëꞌ Dios.
Nedaꞌ runaꞌ ca rinná bëꞌ xibá queëꞌ Cristo.
22 Run cuinaꞌ ca tu bönniꞌ bitiꞌ naca idú ca réajlëꞌë Cristo para gaca gunaꞌ ga uluꞌlágaca nupa naꞌ bitiꞌ naca idú ca taꞌyéajlëꞌ Lëꞌ.
Run cuinaꞌ ca nácagaca yúguꞌtë bönachi para gaca gunaꞌ ga uluꞌlágaca bal-la bönachi naꞌ.
23 Lu yúguꞌtë lë ni runaꞌ,
runaꞌ ga taꞌyöni bönachi didzaꞌ dxiꞌa,
para gaca uziꞌa xibé tsözxö́n len libíꞌiliꞌ didzaꞌ dxiꞌa naꞌ.
24 Chinö́z quéziliꞌ ca tunëꞌ bönniꞌ nútsaꞌgaquiëꞌ lu huitaj.
Taꞌxítiꞌë yúguꞌtëꞌ,
pero tuzëꞌ bönniꞌ idéliꞌnëꞌ uziꞌë xibé lataj lo.
Lëscaꞌ caní ral-laꞌ gunliꞌ xichinëꞌ Dios,
gácaliꞌ ca bönniꞌ nútsaꞌgaquiëꞌ lu huitaj,
para idéliꞌliꞌ uzíꞌiliꞌ xibé le ubiꞌë Dios queë́liꞌ.
25 Yúguꞌtë bönniꞌ,
cateꞌ tuꞌpáꞌa cuíngaquiëꞌ para gaca ilaꞌyáziëꞌ lu huitaj,
taꞌnná beꞌe cuíngaquiëꞌ lu yúguꞌtë le tunëꞌ.
Tunëꞌ caní para ilaꞌdéliꞌnëꞌ tu breguiꞌ zin le inítitë,
pero idéliꞌruꞌ rëꞌu tu le uzíꞌticaꞌsiruꞌ xibé.
26 Que lë ni naꞌ,
nacaꞌ nedaꞌ ca tu bönniꞌ idú ládxëꞌë rixítiꞌë.
Nacaꞌ caꞌ ca tu bönniꞌ,
idú ládxëꞌë ridil-lëꞌ.
Bitiꞌ rucudxaꞌ lu böꞌös.
27 Ca runëꞌ bönniꞌ naꞌ rulidzëꞌ bönachi para tsöjtsázagaca lu huitaj,
runaꞌ caꞌ nedaꞌ,
runaꞌ libán para uluꞌlágaca bönachi.
Bönniꞌ naꞌ nútsëꞌë lu huitaj runëꞌ ga gaca tsutsu idútë le naca cazëꞌ,
en rinná béꞌenëꞌ le.
Lëscaꞌ caní runaꞌ nedaꞌ,
para cabí unítiaꞌ xilatjaꞌ lu dxin queëꞌ Dios.