Bitiꞌ ral-laꞌ tseaj ládxiꞌruꞌ budóꞌ guiö́j budóꞌ yaga
10
Rë́ꞌëndaꞌ uzéajniꞌidaꞌ libíꞌiliꞌ,
böchiꞌ luzáꞌadoꞌ,
ca guca quégaquiëꞌ xuz xtóꞌotuꞌ.
Dios benëꞌ ga gulúꞌu zxul-la tu böaj yúguꞌtëꞌ.
Lëscaꞌ caní,
gulaꞌdödëꞌ yúguꞌtëꞌ gatsaj láhuiꞌlö nísadoꞌ.
2 Lu böaj niꞌ,
en lu nísadoꞌ niꞌ,
guca quégaquiëꞌ ca raca que nu ridila nisa.
Lë naꞌ guca quégaquiëꞌ guca bëꞌ guláquiëꞌ tuz len Moisés.
3 Lëscaꞌ caní,
gulahuëꞌ yúguꞌtëꞌ yöta xtildoꞌ naꞌ bunödzjëꞌ Dios Böꞌ Láꞌayi quégaquiëꞌ.
4 Gulë́ꞌajëꞌ yúguꞌtëꞌ nisa naꞌ bunödzjëꞌ Dios Böꞌ Láꞌayi quégaquiëꞌ,
tuꞌ gulë́ꞌajëꞌ nisa birúaj lëꞌe guiö́j naꞌ buluꞌe lahui Dios Böꞌ Láꞌayi,
guiö́j naꞌ gulaꞌbáninëꞌ légaquiëꞌ.
Ca guca guiö́j naꞌ naca cazëꞌ Cristo,
nabániruꞌ Lëꞌ.
5 Sal-laꞌ guca caní,
bitiꞌ guyaza ládxëꞌë Dios yúguꞌtëꞌ.
Que lë ni naꞌ gulátiëꞌ lu lataj cáꞌasö.
6 Yúguꞌtë lë ni naca tu le ruzéajniꞌi rëꞌu,
para cabí së ládxiꞌruꞌ le ruáꞌ döꞌ,
ca naꞌ gulaꞌzë́ ládxiꞌgaquiëꞌ légaquiëꞌ.
7 Bitiꞌ ral-laꞌ tseaj ládxiꞌruꞌ budóꞌ guiö́j budóꞌ yaga,
ca naꞌ gulunëꞌ bal-lëꞌ légaquiëꞌ.
Nazúaj lu guichi láꞌayi le rnna:
“Gulaꞌböꞌë bönniꞌ niꞌ,
en gulëꞌaj gulahuëꞌ,
ateꞌ gulaꞌyasëꞌ,
en gulunëꞌ laní que budóꞌ naꞌ.”
8 Bitiꞌ ral-laꞌ gunruꞌ le ruáꞌ döꞌ,
ca naꞌ gulunëꞌ bal-lëꞌ légaquiëꞌ le ruáꞌ döꞌ,
ateꞌ tu dzasö gulátiëꞌ idú ca tsonna-uruáꞌ milëꞌ.
9 Bitiꞌ ral-laꞌ siꞌ bë́ꞌëruꞌ Xanruꞌ,
ca naꞌ gulaꞌzíꞌ bëꞌë Lëꞌ bal-lëꞌ légaquiëꞌ,
ateꞌ gulátiëꞌ tuꞌ guláguyaꞌabaꞌ bëla síniaꞌ légaquiëꞌ.
10 Lëscaꞌ caní,
bitiꞌ ral-laꞌ innëruꞌ queëꞌ Dios ca naꞌ gulaꞌnnë́ꞌ queëꞌ bal-lëꞌ légaquiëꞌ,
ateꞌ tuëꞌ gubáz láꞌayi queëꞌ Dios busunítiëꞌ légaquiëꞌ.
11 Yúguꞌtë lë ni le gulaca quégaquiëꞌ xuz xtóꞌotuꞌ,
tuꞌzéajniꞌi rëꞌu,
en nazúaj lu guichi láꞌayi para gun gadxi rëꞌu,
tuꞌ chizóaruꞌ dza chizóa údxi que yödzölió ni.
12 Que lë ni naꞌ,
nu réqui chinal-la,
ral-laꞌ gun chiꞌi cuini,
para cabí ichixi inigui.
13 Ca naca le taꞌzíꞌ bëꞌ libíꞌiliꞌ raca caꞌ quéguequi yúguꞌtë bönachi.
Dios runëꞌ ca rnnëꞌ,
en bitiꞌ guꞌë lataj bi siꞌ bëꞌ libíꞌiliꞌ le cabí gaca guáꞌ ilenliꞌ,
pero cateꞌ bi siꞌ bëꞌ libíꞌiliꞌ,
uluíꞌinëꞌ libíꞌiliꞌ naca gaca irúajliꞌ lu naꞌ tuꞌ xihuiꞌ,
para gaca guáꞌ ilenliꞌ.
14 Que lë ni naꞌ,
böchiꞌ luzáꞌadoꞌ,
bitiꞌ tseaj ládxiꞌliꞌ budóꞌ guiö́j budóꞌ yaga.
15 Ruíꞌilenaꞌ libíꞌiliꞌ didzaꞌ ca ruíꞌilenaꞌ didzaꞌ nupa taꞌyéajniꞌi.
Buliꞌchiꞌa buliꞌsörö́ didzaꞌ ni guꞌa.
16 Cateꞌ inábiruꞌ-nëꞌ Dios gun láꞌayëꞌ le rë́ꞌajruꞌ cateꞌ rusubanruꞌ ca gútiëꞌ Cristo,
lë naꞌ rë́ꞌajruꞌ ruluíꞌi nácaruꞌ tuz len Cristo,
en ruzíꞌiruꞌ xibé le benëꞌ Cristo cateꞌ bulaljëꞌ xichönëꞌ cateꞌ gútiëꞌ lëꞌe yaga cruz.
Lëscaꞌ caní,
yöta xtila naꞌ ruzxúzxjaruꞌ,
en ráguruꞌ,
ruluíꞌi dzágaruꞌ-nëꞌ Cristo,
en ruzíꞌiruꞌ xibé le benëꞌ Cristo cateꞌ budödëꞌ idútë le naca cazëꞌ uláz queë́ruꞌ.
17 Sal-laꞌ zianruꞌ nácaruꞌ,
yúguꞌtëruꞌ ráguruꞌ tuz yöta xtila naꞌ,
en que lë ni naꞌ nácaruꞌ ca tuz bönachi.
18 Buliꞌyútsöcaꞌ ca tunëꞌ bönniꞌ Israel.
Bönniꞌ niꞌ tahuëꞌ lahuëꞌ Dios le taꞌguꞌë lu bucugu láꞌayi queëꞌ,
lë naꞌ tahuëꞌ ruluíꞌi dzágagaquiëꞌ Dios.
19 ¿Bizxi rnna didzaꞌ ni ruáꞌa?
Bitiꞌ rnníaꞌ napa budóꞌ guiö́j budóꞌ yaga yöl-laꞌ huáca,
en le taꞌgúꞌu bönachi lógaca budóꞌ guiö́j budóꞌ yaga naꞌ bitiꞌ napa yöl-laꞌ huáca.
20 Caní rnníaꞌ:
Lë naꞌ taꞌgúꞌu bönachi bitiꞌ núnbëꞌgaquiëꞌ Dios lógaca budóꞌ guiö́j budóꞌ yaga,
taꞌgúꞌu lógaca böꞌ xihuiꞌ,
en calëga lahuëꞌ Dios.
Rë́ꞌëndaꞌ bitiꞌ idzágaliꞌ yuguꞌ böꞌ xihuiꞌ.
21 Bitiꞌ gaca guíꞌjaliꞌ le ruluíꞌi nácaruꞌ tuz len Xanruꞌ,
encaꞌ lë naꞌ uluíꞌi nácaliꞌ tuz len yuguꞌ böꞌ xihuiꞌ.
Bitiꞌ gaca gáguliꞌ le ruluíꞌi dzágaruꞌ-nëꞌ Xanruꞌ,
encaꞌ le uluíꞌi dzágaliꞌ yuguꞌ böꞌ xihuiꞌ.
22 ¿Naruꞌ gúntsaruꞌ ga uzxéꞌenëꞌ Xanruꞌ?
¿Naruꞌ réquitseliꞌ nápatëröliꞌ yöl-laꞌ huáca ca napëꞌ Lëꞌ?
Le dë lu náꞌaruꞌ gunruꞌ, en ca ral-laꞌ idxíꞌigacruꞌ-nëꞌ böchiꞌ luzáꞌaruꞌ
23 Naca idútë li didzaꞌ naꞌ rnna:
“Yúguꞌtë dë lu náꞌaruꞌ gunruꞌ.”
Naꞌa,
nedaꞌ rnníaꞌ:
Calëga yúguꞌtë ral-laꞌ gunruꞌ.
Yúguꞌtë dë lu náꞌaruꞌ gunruꞌ,
pero calëga yúguꞌtë gun ga gácarö idú ca réajlëꞌëruꞌ Cristo.
24 Ral-laꞌ güíꞌi ládxiꞌruꞌ gunruꞌ le gun ga gaca dxiꞌa quégaquiëꞌ böchiꞌ luzáꞌaruꞌ,
en calë́gasö le gun ga gaca dxiꞌa que laꞌ cuínsiruꞌ.
25 Bítiꞌtës bi tutiꞌ bönachi lu yë́ꞌëyi,
huáca gáguliꞌ,
en bitiꞌ bi ral-laꞌ inábaliꞌ que,
para cabí cuéqui böniga ládxiꞌdoꞌoliꞌ.
26 Nazúaj lu guichi le rnna:
“Queëꞌ Xanruꞌ nequi yödzölió ni,
encaꞌ yúguꞌtë le dë yödzölió ni.”
27 Channö ulidzëꞌ tu bönniꞌ bitiꞌ réajlëꞌë Dios libíꞌiliꞌ para guídaliꞌ lidxëꞌ,
ateꞌ guë́ꞌëniliꞌ tséajliꞌ,
guliꞌgagu yúguꞌtë le cuꞌë loliꞌ,
en bitiꞌ bi inábaliꞌ que,
para cabí cuéqui böniga ládxiꞌdoꞌoliꞌ.
28 Channö nútiꞌtës nu guíë libíꞌiliꞌ:
“Lë ni gulaꞌguꞌë lo budóꞌ guiö́j budóꞌ yaga”,
bitiꞌ gáguliꞌ lë naꞌ para gaca dxiꞌa que nu naꞌ gudíxjöiꞌi caní libíꞌiliꞌ,
en para cabí cuéqui böniga ládxiꞌdaꞌahuëꞌ.
29 Rnníaꞌ:
Para cabí cuéqui böniga ládxiꞌdaꞌahuëꞌ bönniꞌ naꞌ gudíxjöiꞌinëꞌ caní libíꞌiliꞌ,
en calëga para cabí cuéqui böniga ládxiꞌdoꞌoliꞌ libíꞌi cázaliꞌ.
Nadxi caꞌ nu inábini nedaꞌ,
inná:
“¿Bizx que ral-laꞌ uzóaꞌ tsöláꞌalö le dë lu naꞌa gunaꞌ tuꞌ ribequi böniga ládxiꞌdaꞌahuëꞌ bönniꞌ yúbölö?”
30 Huáca inná caꞌ nu naꞌ:
“Channö guíaꞌ-nëꞌ Dios:
Xclenuꞌ,
niꞌa que lë naꞌ rahuaꞌ,
¿bizx que nu uzegui nedaꞌ didzaꞌ niꞌa que lë naꞌ rahuaꞌ?”
31 Channö bi gáguliꞌ o bi guíꞌjaliꞌ,
o bítiꞌtës bi gunliꞌ,
guliꞌgún yúguꞌtë para gaca queëꞌ Dios yöl-laꞌ ba.
32 Bitiꞌ bi gunliꞌ le gun ga ilaꞌchixi ilaꞌnigui bönachi judío,
en bitiꞌ gunliꞌ le gun ga ilaꞌchixi ilaꞌnigui bönachi bitiꞌ nácagaca judío,
en bitiꞌ gunliꞌ le gun ga ilaꞌchixi ilaꞌnigui bönachi queëꞌ Dios.
33 Guliꞌgún ca runaꞌ nedaꞌ.
Ruíꞌi ládxaꞌa gunaꞌ le ilaꞌyaza ládxiꞌgaca yúguꞌtë bönachi,
en bitiꞌ ruíꞌi ládxaꞌa gunaꞌ le uziꞌa xibé laꞌ nédaꞌsö,
pero le uluꞌzíꞌ xibé iaꞌzícaꞌrö bönachi para uluꞌlágaca.