11
Guliꞌgún ca runaꞌ nedaꞌ,
ca naꞌ nedaꞌ caꞌ runaꞌ ca benëꞌ Cristo.
Le tunnu nigula lógaca bönachi queëꞌ Cristo
2 Runaꞌ libíꞌiliꞌ zxön,
böchiꞌ luzáꞌadoꞌ,
tuꞌ röjnéticaꞌsiliꞌ nedaꞌ,
en nazíꞌ lu náꞌaliꞌ xibá budödaꞌ lu náꞌaliꞌ.
3 Naꞌa,
rë́ꞌëndaꞌ tséajniꞌiliꞌ rinná béꞌenëꞌ Cristo yúguꞌtë bönniꞌ,
ateꞌ bönniꞌ rinná béꞌenëꞌ-nu nigula,
ateꞌ Dios rinná béꞌenëꞌ Zxíꞌinëꞌ,
Bönniꞌ naꞌ náquiëꞌ Cristo.
4 Channö tu bönniꞌ rulidzëꞌ Dios,
o ruꞌë didzaꞌ uláz queëꞌ Dios,
en dxía icjëꞌ xiluꞌë,
rucáꞌanëꞌ Cristo cáꞌasö.
5 Naꞌa,
channö tu nigula rulídzanu Dios,
o ruíꞌinu didzaꞌ uláz queëꞌ Dios,
en bitiꞌ bi zxoa ícjanu,
rucáꞌananu bönniꞌ queë́nu cáꞌasö,
en naca queë́nu ca naca queë́nu tu nigula narugu guitsaꞌ ícjanu.
6 Channö tu nigula cabí bi zxoa ícjanu,
ral-laꞌ irugu caꞌ guitsaꞌ ícjanu.
Channö gun ga utuíꞌinu nigula naꞌ channö nu chugu guitsaꞌ ícjanu,
ral-laꞌ bi ixóa ícjanu.
7 Tu bönniꞌ bitiꞌ bi ral-laꞌ udxía icjëꞌ cateꞌ ridxinëꞌ lahuëꞌ Dios,
tuꞌ náquiëꞌ ca naca cazëꞌ Dios,
ateꞌ lë naꞌ náquiëꞌ bönniꞌ ruluíꞌi lahui yöl-laꞌ zxön queëꞌ Dios,
pero le nácanu nigula naꞌ ruluíꞌi lahui yöl-laꞌ zxön queëꞌ bönniꞌ queë́nu.
8 Cateꞌ benëꞌ Dios bönachi,
bitiꞌ bubéajëꞌ bönniꞌ naꞌ lu nigula.
Nigula naꞌ,
lu bönniꞌ naꞌ bubéajëꞌ-nu.
9 Lëscaꞌ caní,
bitiꞌ benëꞌ Dios bönniꞌ para uzíꞌinu xibë́ꞌ nigula,
pero benëꞌ nigula para uziꞌë xibánu bönniꞌ.
10 Que lë ni naꞌ,
nigula naꞌ ral-laꞌ ixóa ícjanu le ruluíꞌi zoa nu rinná beꞌe lënu tuꞌ tuꞌyúëꞌ gubáz láꞌayi queëꞌ Dios rëꞌu.
11 Naꞌa,
lahuëꞌ Xanruꞌ,
tu bönniꞌ riquinnëꞌ-nu nigula queëꞌ,
ateꞌ nigula naꞌ riquíninu-nëꞌ bönniꞌ queë́nu.
12 Ca naꞌ benëꞌ Dios,
bubéajëꞌ-nu nigula lu bönniꞌ,
lëscaꞌ caní naꞌa,
yúguꞌtë bönniꞌ náljlengaquiëꞌ-nu nigula,
ateꞌ yúguꞌtë rirúaj lu nëꞌë Dios.
13 Buliꞌchiꞌa buliꞌsörö́ laꞌ libíꞌisiliꞌ.
¿Naruꞌ ral-laꞌ ulídzanu-nëꞌ Dios tu nigula bitiꞌ bi zxoa ícjanu?
14 ¿Naruꞌ cabí rusëdi libíꞌiliꞌ yöl-laꞌ nácatë quégaca bönachi,
ral-laꞌ utuíꞌinëꞌ bönniꞌ naꞌ ruꞌë lataj itunna guitsaꞌ icjëꞌ?
15 Naꞌa,
channö natúnna guitsaꞌ ícjanu tu nigula,
naca yöl-laꞌ lachi queë́nu,
tuꞌ bëꞌë Dios queë́nu guitsaꞌ ícjanu para usubín ícjanu.
16 Channö zoa nu guë́ꞌëni táꞌbagaꞌ didzaꞌ ni,
canísö nazíꞌ lu naꞌtuꞌ runtuꞌ,
en lë́bisö tun yuguꞌ cöꞌ bönachi queëꞌ Dios.
Bönachi Corinto tuꞌcáꞌana cáꞌasö le rëꞌaj ráguruꞌ para usubanruꞌ ca gútiëꞌ Xanruꞌ
17 Bitiꞌ runaꞌ libíꞌiliꞌ bal ca naca le uzéajniꞌidaꞌ libíꞌiliꞌ naꞌa.
Le runliꞌ bitiꞌ run ga raca dxiꞌa queë́liꞌ cateꞌ rudúbiliꞌ queëꞌ Cristo,
pero run ga raca queë́liꞌ le cabí naca dxiꞌa.
18 Risí lahuaꞌ ruzéajniꞌidaꞌ libíꞌiliꞌ lë ni taꞌguíxjöiꞌi bönachi nedaꞌ,
taꞌnná:
“Cateꞌ rudúbiliꞌ queëꞌ Cristo,
narúajliꞌ choplö”,
ateꞌ réajlëꞌa nadxi caꞌ naca caní.
19 Run bayudxi ilaꞌcuáꞌalen libíꞌiliꞌ nupa tuꞌsedi le cabí nácatë para ilaca bëꞌ nupa nácagaca idú bönachi queëꞌ Cristo.
20 Que lë ni naꞌ,
cateꞌ rudúbiliꞌ,
lë naꞌ ráguliꞌ tsözxö́n bitiꞌ naca le rëꞌaj ráguruꞌ para usubanruꞌ ca gútiëꞌ Xanruꞌ.
21 Caní naca,
tuꞌ runliꞌ bayudxi tu tuliꞌ ráguliꞌ le nuáꞌaliꞌ que queë́liꞌ cateꞌ ráguliꞌ tsözxö́n,
ateꞌ que lë ni naꞌ ridunliꞌ bál-laliꞌ,
ateꞌ iaꞌbál-laliꞌ rëꞌaj ráguliꞌ ga ridxintë rizúdxiliꞌ.
22 ¿Naruꞌ cabí zoa lídxiliꞌ ga huáca guíꞌaj gáguliꞌ?
Ca naꞌ runliꞌ,
rucáꞌanaliꞌ bönachi queëꞌ Dios cáꞌasö,
en runliꞌ ga tuꞌtuíꞌi nupa bitiꞌ bi dë quéguequi.
¿Bizxi caz guíaꞌ libíꞌiliꞌ?
¿Naruꞌ guntsaꞌ libíꞌiliꞌ bal?
Bitiꞌ caꞌ runaꞌ libíꞌiliꞌ bal ca naca lë ni runliꞌ.
Le rëꞌaj ráguruꞌ para usubanruꞌ ca gútiëꞌ Xanruꞌ
23 Xanruꞌ caz budödëꞌ lu naꞌa lë naꞌ busédidaꞌ libíꞌiliꞌ,
ca naꞌ benëꞌ Xanruꞌ Jesús yëla niꞌ cateꞌ nu budödi Lëꞌ lu náꞌagaquiëꞌ bönniꞌ gulútiëꞌ Lëꞌ.
Gudélëꞌë yöta xtila,
24 en cateꞌ budxi gudxëꞌ Dios:
“Xclenuꞌ”,
buzxuzxjëꞌ le,
en gunnë́ꞌ:
“Guliꞌgagu.
Lë ni naca xipë́laꞌa le nayuzxaj uláz queë́liꞌ.
Guliꞌgún caní,
para usubanliꞌ ca gaca quiaꞌ nedaꞌ.”
25 Lëscaꞌ caní,
gudödi gulahuëꞌ,
gudélëꞌë tu zxígaꞌdoꞌ,
en gunnë́ꞌ:
“Le yudzu zxígaꞌdoꞌ ni naca xichönaꞌ,
le run tsutsu didzaꞌ cubi rucáꞌana tsahuiꞌ.
Guliꞌgún caní yúguꞌtë luzuí guíꞌjaliꞌ le,
para usubanliꞌ ca gaca quiaꞌ nedaꞌ.”
26 Caní gaca ga idxintë dza huödëꞌ Xanruꞌ.
Yúguꞌtë luzuí gáguliꞌ yöta xtila caní,
en guíꞌjaliꞌ que le yudzu zxígaꞌdoꞌ caní,
uluíꞌiliꞌ lahui ca gútiëꞌ Xanruꞌ.
Ca ral-laꞌ gunruꞌ cateꞌ guíꞌaj gáguruꞌ para usubanruꞌ ca gútiëꞌ Xanruꞌ
27 Que lë ni naꞌ,
nútiꞌtës nu gagu yöta xtila ni o guíꞌaj que le yudzu zxígaꞌdoꞌ ni queëꞌ Xanruꞌ,
en bitiꞌ run le bal,
nabagaꞌ xíguiaꞌ nu naꞌ,
en run dul-laꞌ,
tuꞌ rucáꞌana xipë́lëꞌë Xanruꞌ,
encaꞌ xichönëꞌ cáꞌasö.
28 Que lë ni naꞌ,
ral-laꞌ uchiꞌa usörö́ruꞌ laꞌ cuínsiruꞌ tu turuꞌ,
ateꞌ níꞌirö huáca gáguruꞌ yöta xtila ni,
en guíꞌajruꞌ que le yudzu zxígaꞌdoꞌ ni.
29 Nútiꞌtës nu rëꞌaj ragu lë ni,
en bitiꞌ run le bal tuꞌ cabí réquibeꞌe ruluíꞌi le guca queëꞌ Xanruꞌ,
rusubagaꞌ cuini dul-laꞌ niꞌa que lë naꞌ rëꞌaj ragu.
30 Que lë ni naꞌ teꞌe zián nupa dzágagaca libíꞌiliꞌ,
en taꞌcuídiꞌ,
ateꞌ ziánguequi chinátigaca.
31 Laꞌtuꞌ uchiꞌa usörö́ruꞌ laꞌ cuínsiruꞌ,
bitiꞌ uchiꞌa usörö́ëꞌ Xanruꞌ rëꞌu.
32 Channö gun bayudxi uchiꞌa usörö́ëꞌ Xanruꞌ rëꞌu,
usacaꞌ ziꞌë rëꞌu,
para cabí irugu queë́ruꞌ cateꞌ ichúguiëꞌ quéguequi bönachi yödzölió ilátigaca.
33 Que lë ni naꞌ,
böchiꞌ luzáꞌadoꞌ,
cateꞌ udúbiliꞌ para guíꞌaj gáguliꞌ para usubanliꞌ ca gútiëꞌ Xanruꞌ,
guliꞌcöza luzáꞌaliꞌ.
34 Channö zoa nu ridún,
ral-laꞌ gagu nu naꞌ ga naca lu yuꞌu lidxi,
para cabí gun bayudxi uchiꞌa usörö́ëꞌ Dios libíꞌiliꞌ cateꞌ udúbiliꞌ.
Nacuáꞌ iaꞌbal-la le runliꞌ,
pero ucáꞌanaꞌ tsahuiꞌ yuguꞌ lë naꞌ cateꞌ uduyúaꞌ libíꞌiliꞌ.