Yuguꞌ yöl-laꞌ huáca runnëꞌ queë́ruꞌ Dios Böꞌ Láꞌayi
12
Naꞌa,
böchiꞌ luzáꞌadoꞌ,
rë́ꞌëndaꞌ tséajniꞌiliꞌ ca zeaj naca yöl-laꞌ huáca runnëꞌ queë́ruꞌ Dios Böꞌ Láꞌayi.
2 Nöz quéziliꞌ ca guca cateꞌ niꞌ bitiꞌ réajlëꞌëniliꞌ Cristo,
bë́ꞌëliꞌ lataj gulaꞌchë́ꞌ bönachi libíꞌiliꞌ ga yúbölö.
Guyéaj ládxiꞌliꞌ budóꞌ guiö́j budóꞌ yaga,
le cabí taꞌnnë́.
3 Que lë ni naꞌ,
ruzéajniꞌidaꞌ libíꞌiliꞌ caní,
rnníaꞌ:
Ladaj yúguꞌtë nupa tuíꞌi didzaꞌ uláz queëꞌ Böꞌ Láꞌayi queëꞌ Dios,
cuntu nu gaca innë́ xihuiꞌ queëꞌ Jesús,
en nitúëꞌ gaca innë́ꞌ:
“Jesús náquiëꞌ Xanruꞌ”,
channö cabí zóalenëꞌ Dios Böꞌ Láꞌayi nu naꞌ.
4 Naꞌa,
nadzáꞌgaca tu tu le runnëꞌ Dios Böꞌ Láꞌayi queë́ruꞌ,
pero tuzëꞌ náquiëꞌ Böꞌ Láꞌayi naꞌ.
5 Lëscaꞌ caní,
nadzáꞌgaca tu tu dxin riguꞌë Xanruꞌ lu náꞌaruꞌ,
pero tuzëꞌ náquiëꞌ Xanruꞌ naꞌ.
6 Nadzáꞌgaca caꞌ tu tu yöl-laꞌ huáca náparuꞌ le rúniruꞌ xichinëꞌ Dios,
pero tuzëꞌ náquiëꞌ Dios,
Nu naꞌ runna yöl-laꞌ huáca naꞌ queë́ruꞌ para gunruꞌ xichinëꞌ.
7 Dios runnëꞌ que queë́ruꞌ tu le naca bëꞌ náparuꞌ yöl-laꞌ huáca queëꞌ Dios Böꞌ Láꞌayi,
lë naꞌ ruzíꞌiruꞌ xibé yúguꞌtëruꞌ.
8 Dios Böꞌ Láꞌayi runödzjëꞌ queëꞌ tu bönniꞌ yöl-laꞌ huáca ruꞌë didzaꞌ len yöl-laꞌ rácadaꞌ,
ateꞌ iaꞌtúëꞌ bönniꞌ,
Lë cazëꞌ Böꞌ Láꞌayi runödzjëꞌ queëꞌ yöl-laꞌ huáca ruꞌë didzaꞌ lu yöl-laꞌ réajniꞌi.
9 Lëscaꞌ caní,
Lë cazëꞌ Dios Böꞌ Láꞌayi naꞌ runödzjëꞌ queëꞌ iaꞌtúëꞌ bönniꞌ yöl-laꞌ réajlëꞌ Cristo bi gunëꞌ,
ateꞌ iaꞌtúëꞌ bönniꞌ runödzjëꞌ queëꞌ yöl-laꞌ huáca ruúnëꞌ nupa teꞌe.
10 Iaꞌtúëꞌ bönniꞌ runödzjëꞌ queëꞌ yöl-laꞌ huáca runëꞌ yuguꞌ yöl-laꞌ huáca que yehuaꞌ yubá,
ateꞌ iaꞌtúëꞌ bönniꞌ ruꞌë lëꞌ lataj ruꞌë didzaꞌ uláz queëꞌ Dios,
ateꞌ iaꞌtúëꞌ bönniꞌ runödzjëꞌ queëꞌ yöl-laꞌ huáca réquibeꞌenëꞌ channö böꞌ dzaga nu bönniꞌ nequi queëꞌ Dios,
o nequi que tuꞌ xihuiꞌ.
Runödzjëꞌ queëꞌ iaꞌtúëꞌ bönniꞌ yöl-laꞌ huáca ruꞌë didzaꞌ yúbölö le cabí nazëdëꞌ,
ateꞌ queëꞌ iaꞌtúëꞌ bönniꞌ yöl-laꞌ huáca rudödëꞌ didzaꞌ yúbölö naꞌ bitiꞌ nazëdëꞌ.
11 Yúguꞌtë lë ni runëꞌ Lë cazëꞌ Dios Böꞌ Láꞌayi,
tuꞌ runödzjëꞌ que tu tu bönachi tsca rë́ꞌëni quézinëꞌ.
Yúguꞌtëruꞌ nácaruꞌ ca tuz bönachi
12 Ca naꞌ naca tuz idútë le naca cázaruꞌ,
sal-laꞌ zián le nagudiꞌ dzágalenruꞌ,
ateꞌ le zián naꞌ nagudiꞌ dzágalenruꞌ nácagaca tuz idútë le naca cázaruꞌ,
lëscaꞌ caní naca queëꞌ Cristo.
13 Tuꞌ zóalenëꞌ Lë cazëꞌ Dios Böꞌ Láꞌayi rëꞌu,
lë ni naca queë́ruꞌ ca tu le nadílaruꞌ nisa,
le naca bëꞌ nácaruꞌ ca tuz bönachi,
sal-laꞌ nácaruꞌ yuguꞌ bönniꞌ judío,
en yuguꞌ bönniꞌ ziꞌtuꞌ,
encaꞌ yuguꞌ bönniꞌ nadóꞌogaquiëꞌ,
en yuguꞌ bönniꞌ bitiꞌ nadóꞌogaquiëꞌ.
Yúguꞌtëruꞌ,
Dios bëꞌë rëꞌu lataj síꞌiruꞌ le runödzja cazëꞌ Böꞌ Láꞌayi.
14 Naꞌa,
lu idútë le naca cázaruꞌ,
zián le nagudiꞌ dzágalenruꞌ,
en calëga tuz.
15 Laꞌtuꞌ huáca güíꞌi didzaꞌ níꞌaruꞌ,
huanná:
“Tuꞌ cabí nacaꞌ nëꞌë bönniꞌ,
bitiꞌ néquidaꞌ queëꞌ”,
didzaꞌ ni bitiꞌ gun ga bitiꞌ nequi queëꞌ bönniꞌ naꞌ.
16 Laꞌtuꞌ huáca güíꞌi didzaꞌ nágaruꞌ,
huanná:
“Tuꞌ cabí nacaꞌ guiö́j lahuëꞌ,
bitiꞌ néquidaꞌ queëꞌ bönniꞌ ni”,
didzaꞌ ni bitiꞌ gun ga bitiꞌ nequi queëꞌ bönniꞌ naꞌ.
17 Laꞌtuꞌ naca guiö́j loruꞌ idútë le naca cázaruꞌ,
¿nacxi gaca yö́niruꞌ?
Laꞌtuꞌ naca nágaruꞌ idútë,
¿nacxi gaca iléꞌe zxínaꞌruꞌ?
18 Naꞌa,
Dios nucuꞌë yúguꞌtë le nagudiꞌ dzágalenruꞌ ca gúꞌuni quézinëꞌ Lëꞌ.
19 Laꞌtuꞌ naca tuz le nagudiꞌ dzágalenruꞌ,
bítiꞌrö soa idú ca naca cázaruꞌ.
20 Naꞌa,
ca nácaruꞌ,
zián le nagudiꞌ dzágalenruꞌ,
pero tuz le nácaruꞌ.
21 Que lë ni naꞌ,
guiö́j loruꞌ bitiꞌ gaca guíë náꞌaruꞌ,
inná:
“Bitiꞌ riquindaꞌ liꞌ.”
Lëscaꞌ caní,
ícjaruꞌ bitiꞌ gaca guíë níꞌaruꞌ,
inná:
“Bitiꞌ riquindaꞌ libíꞌiliꞌ.”
22 Naꞌa,
yuguꞌ le nagudiꞌ dzágalenruꞌ,
lë naꞌ réquiruꞌ nácagacarö cuídiꞌsö,
lë ni naquíniröruꞌ.
23 Lëscaꞌ caní,
yuguꞌ le nagudiꞌ dzágalenruꞌ,
le réquiruꞌ nácagacarö cáꞌasö,
lë ni rugácuröruꞌ dxiꞌa,
en yuguꞌ le réquiruꞌ bitiꞌ ral-laꞌ iláꞌ lahui,
rugácuröruꞌ caꞌ dxiꞌa.
24 Bitiꞌ run bayudxi gunruꞌ caní que le nácarö lachi que le néquiniruꞌ.
Dios benëꞌ idútë le naca cázaruꞌ,
en benëꞌ ga nácarö lesacaꞌ lë naꞌ réquiruꞌ rëꞌu nácarö cáꞌasö.
25 Caní benëꞌ,
ateꞌ bitiꞌ narúajgaca choplö le nagudiꞌ dzágalenruꞌ,
tuꞌ tun chiꞌi luzë́ꞌeguequi tu iaꞌtú.
26 Channö gaca ziꞌ tu le néquiniruꞌ,
ilaca ziꞌ tsözxö́n len le yúguꞌtë le néquiniruꞌ naꞌ,
en channö tu le néquiniruꞌ zoa bi ruzíꞌ xibé,
yúguꞌtë le nagudiꞌ dzágalenruꞌ tuꞌzí xibé tsözxö́n le.
27 Naꞌa,
libíꞌi cázaliꞌ dzágaliꞌ idútë le naca cazëꞌ Cristo,
ateꞌ tu tuliꞌ nácaliꞌ ca yuguꞌ le nagudiꞌ dzágalenëꞌ.
28 Lëscaꞌ caní,
ladaj bönachi queëꞌ Cristo,
Dios nucuꞌë nupa tun xichinëꞌ.
Ga naca lo nucuꞌë yuguꞌ bönniꞌ gubáz queëꞌ Cristo.
Ga naca buropi nucuꞌë yuguꞌ bönniꞌ tuꞌë didzaꞌ uláz queëꞌ.
Ga bunni nucuꞌë yuguꞌ bönniꞌ tuꞌsédinëꞌ luzáꞌaruꞌ.
Níꞌirö nucuꞌë nupa tun yuguꞌ yöl-laꞌ huáca que yehuaꞌ yubá.
Níꞌirö nucuꞌë nupa tuꞌún nupa teꞌe.
Níꞌirö nucuꞌë nupa tácalen böchiꞌ luzáꞌaruꞌ.
Níꞌirö nucuꞌë yuguꞌ bönniꞌ tuꞌluíꞌinëꞌ rëꞌu dxin gunruꞌ.
Níꞌirö nucuꞌë yuguꞌ bönniꞌ tuꞌë didzaꞌ yúbölö bitiꞌ nazë́dagaquiëꞌ.
29 Calëga yúguꞌtëꞌ nácagaquiëꞌ gubáz queëꞌ Cristo.
Calëga yúguꞌtëꞌ tuꞌë didzaꞌ uláz queëꞌ Dios.
Calëga yúguꞌtëꞌ tuꞌsédinëꞌ luzáꞌaruꞌ.
Calëga yúguꞌtëꞌ tunëꞌ yuguꞌ yöl-laꞌ huáca que yehuaꞌ yubá.
30 Calëga yúguꞌtëꞌ dë lu náꞌagaquiëꞌ uluꞌúnëꞌ nupa teꞌe.
Calëga yúguꞌtëꞌ tuꞌë didzaꞌ yúbölö bitiꞌ nazë́dagaquiëꞌ.
Calëga yúguꞌtëꞌ tuꞌdödëꞌ didzaꞌ yúbölö bitiꞌ nazë́dagaquiëꞌ.
31 Guliꞌgüíꞌ ládxiꞌliꞌ cuꞌë Dios lu náꞌaliꞌ yuguꞌ yöl-laꞌ huáca naꞌ nácagacarö lesacaꞌ.
Naꞌa,
uluíꞌidaꞌ libíꞌiliꞌ tu le nácarö lesacaꞌ ca yúguꞌtë lë ni.