Yöl-laꞌ nadxíꞌi
13
Sal-laꞌ gaca guꞌa xtídzaꞌgaca bönachi le cabí nazëdaꞌ,
encaꞌ xtídzaꞌgaquiëꞌ gubáz láꞌayi queëꞌ Dios,
pero channö cabí nadxíꞌidaꞌ luzáꞌa,
didzaꞌ guꞌa bitiꞌ gácarö lesacaꞌ ca bö le run gui rucö́dxiruꞌ o guíë rutíl-laruꞌ luzë́ꞌe.
2 Sal-laꞌ nazíꞌ lu naꞌa guꞌa didzaꞌ uláz queëꞌ Dios en tséajniꞌidaꞌ yúguꞌtë le nagachiꞌ,
en yúguꞌtë didzaꞌ réajniꞌi,
en sal-laꞌ naca idú ca réajlëꞌa Dios ga ridxintë huáca cúaꞌ yuguꞌ guíꞌa,
pero channö cabí nadxíꞌidaꞌ luzáꞌa,
bitiꞌ bi nazácaꞌa.
3 Sal-laꞌ quísiaꞌ idútë le dë quiaꞌ para ugahuaꞌ yuguꞌ bönachi yechiꞌ,
en sal-laꞌ udödaꞌ idútë le nacaꞌ ga uluꞌzegui bönachi le tuꞌ réajlëꞌa Cristo,
pero channö cabí nadxíꞌidaꞌ luzáꞌa,
bitiꞌ caꞌ uziꞌa xibé lë naꞌ runaꞌ.
4 Nu bönniꞌ nadxíꞌinëꞌ luzë́ꞌë,
ribözëꞌ zxön ladxiꞌ.
Náquiëꞌ dxiꞌi ladxiꞌ,
en bitiꞌ ruzxéꞌenëꞌ luzë́ꞌë.
Nadxíꞌinëꞌ luzë́ꞌë idú ládxëꞌë.
Bitiꞌ run ba zxön cuinëꞌ,
en bitiꞌ run cuinëꞌ lo.
5 Bitiꞌ runëꞌ le ruáꞌ döꞌ.
Bitiꞌ rudúliꞌnëꞌ le dë queëꞌ.
Bitiꞌ rilétenëꞌ,
en bitiꞌ röjnenëꞌ döꞌ guluíꞌi bönachi queëꞌ.
6 Bitiꞌ caꞌ rudzéjanëꞌ cateꞌ nu run le ruáꞌ döꞌ.
Rudzéjanëꞌ cateꞌ nu run le naca idútë li.
7 Ruáꞌ rilenëꞌ bítiꞌtës bi gun luzë́ꞌë queëꞌ.
Réajlëꞌticaꞌsëꞌ luzë́ꞌë.
Rúnticaꞌsëꞌ löza gun luzë́ꞌë le naca dxiꞌa.
Ribö́zaticaꞌsëꞌ zxön ladxiꞌ.
8 Bítiꞌrö tödi que yöl-laꞌ nadxíꞌi.
Huadödi que le dë lu náꞌagaca bönachi iluíꞌi didzaꞌ uláz queëꞌ Dios.
Huadxín dza cateꞌ bítiꞌrö gataꞌ lu náꞌagaca bönachi iluíꞌi didzaꞌ yúbölö le cabí nazë́dagaca,
ateꞌ huadödi que yöl-laꞌ réajniꞌi quéguequi bönachi.
9 Látiꞌdoꞌos réajniꞌiruꞌ naꞌa,
en látiꞌdoꞌos caꞌ ruíꞌiruꞌ didzaꞌ uláz queëꞌ Dios.
10 Cateꞌ idxín le naca idú,
níꞌirö údxi que lë naꞌ naca látiꞌdoꞌos.
11 Cateꞌ niꞌ nacaꞌ bíꞌidoꞌ,
bëꞌa didzaꞌ ca bíꞌidoꞌ,
en gulequi icjaꞌ ca bíꞌidoꞌ,
en guzáꞌ ládxaꞌa ca bíꞌidoꞌ.
Cateꞌ bigulaꞌ bucáꞌanaꞌ le nequi que bíꞌidaꞌahuaꞌ.
12 Naꞌa le riléꞌeruꞌ naca ca le riléꞌeruꞌ cateꞌ ruyú cuinruꞌ tu lu guíë dxílidoꞌ.
Bitiꞌ riléꞌeruꞌ idú ca naca.
Dza níꞌirö iléꞌeruꞌ idú ca naca yúguꞌtë.
Naꞌa núnbëꞌa látiꞌdoꞌos.
Dza níꞌirö gúnbëꞌa yúguꞌtë ca naꞌ Dios caz núnbëꞌë nedaꞌ.
13 Naꞌa,
nacuáꞌticaꞌsö yöl-laꞌ réajlëꞌ queë́ruꞌ Dios,
en yöl-laꞌ run löza queë́ruꞌ Dios,
en yöl-laꞌ nadxíꞌi queë́ruꞌ luzáꞌaruꞌ.
Nacuáꞌ yonna ni,
pero le naca lo naca yöl-laꞌ nadxíꞌi.