Tuꞌgapa Dios luzë́ꞌeguequi bönachi queëꞌ Cristo
16
Riguꞌa-nu lu náꞌaliꞌ Febe,
nigula zanruꞌ dáꞌanu Xanruꞌ.
Nácanu nigula huen dxin queëꞌ Dios dzáganu bönachi queëꞌ Cristo nacuáꞌ yödzö Cencrea.
2 Uláz queëꞌ Xanruꞌ guliꞌsíꞌ lu náꞌaliꞌ-nu nigula naꞌ,
ca ral-laꞌ ilún bönachi queëꞌ Cristo.
Guliꞌgácalen lënu,
unö́dzjaliꞌ queë́nu bítiꞌtës bi riquínnu.
Lë cázanu gúcalennu bönachi zián,
en gúcalennu caꞌ nedaꞌ.
3 Guliꞌgapa Dios Priscila,
en Aquilo,
nupa naꞌ gulunlen nedaꞌ tsözxö́n dxin queëꞌ Jesucristo.
4 Chopëꞌ ni gulaꞌdödëꞌ ga guzóa bönadxi ilátiëꞌ para gulunëꞌ ga cabí gátiaꞌ nedaꞌ,
ateꞌ reaꞌ légaquiëꞌ:
“Xclenliꞌ”,
en calë́gasö nedaꞌ,
pero lëscaꞌ yúguꞌtë böchiꞌ luzáꞌaruꞌ nabábagaquiëꞌ gapa nacuáꞌ bönachi queëꞌ Cristo bitiꞌ nácagaca judío,
tëꞌë légaquiëꞌ:
“Xclenliꞌ.”
5 Guliꞌgapa Dios bönachi queëꞌ Cristo tuꞌdubëꞌ lu yuꞌu lídxigaquiëꞌ Priscila,
en Aquilo naꞌ.
Guliꞌgapa Dios Epeneto,
bönniꞌ naꞌ nadxíꞌidaꞌ.
Bönniꞌ ni guyéajlëꞌë Cristo zíꞌatëlö ca yúguꞌtë bönachi luyú Acaya.
6 Guliꞌgapa Dios María,
nigula naꞌ bennu dxin zxön queëꞌ Cristo ga niꞌ rudúbiliꞌ libíꞌiliꞌ.
7 Guliꞌgapa Dios Andrónico,
en Junias,
yuguꞌ bönniꞌ uládz quiaꞌ.
Yuguꞌ bönniꞌ ni gulaꞌdzúnlenëꞌ nedaꞌ tsözxö́n lidxi guíë,
en nadéliꞌgaquiëꞌ lataj lo ladaj bönniꞌ gubáz nasö́l-lëꞌë Cristo.
Lëscaꞌ gulaꞌyéajlëꞌë Cristo zíꞌalö ca nedaꞌ.
8 Guliꞌgapa Dios Amplias,
bönniꞌ naꞌ nadxíꞌidaꞌ,
en néquinëꞌ queëꞌ Xanruꞌ.
9 Guliꞌgapa Dios Urbano,
bönniꞌ naꞌ bénlenëꞌ netuꞌ tsözxö́n dxin queëꞌ Jesucristo.
Guliꞌgapa Dios Estaquis,
bönniꞌ naꞌ nadxíꞌidaꞌ.
10 Guliꞌgapa Dios Apeles,
bönniꞌ naꞌ naca bëꞌ réajlëꞌë Cristo.
Guliꞌgapa Dios nupa nacuáꞌ lidxëꞌ Aristóbulo.
11 Guliꞌgapa Dios Herodión,
bönniꞌ uládz quiaꞌ.
Guliꞌgapa Dios nupa nacuáꞌ lidxëꞌ Narciso,
en taꞌyéajlëꞌë Xanruꞌ.
12 Guliꞌgapa Dios Trifena,
en Trifosa,
nigula naꞌ tunnu dxin queëꞌ Xanruꞌ.
Guliꞌgapa Dios Pérsida,
nigula naꞌ bennu dxin zxön queëꞌ Xanruꞌ,
ateꞌ nadxíꞌiruꞌ-nu.
13 Guliꞌgapa Dios Rufo,
bönniꞌ rö queëꞌ Xanruꞌ.
Guliꞌgapa Dios xinë́ꞌë Rufo naꞌ,
nácanu caꞌ ca xináꞌ cazaꞌ.
14 Guliꞌgapa Dios Asíncrito,
en Flegonte,
en Hermas,
en Patrobas,
en Hermes,
encaꞌ yuguꞌ böchiꞌ luzáꞌaruꞌ dáꞌgaquiëꞌ Xanruꞌ,
nacuáꞌlenëꞌ légaquiëꞌ.
15 Guliꞌgapa Dios Filólogo,
en Julia,
en Nereo,
en nigula zanëꞌ Nereo naꞌ,
encaꞌ Olimpas,
en yúguꞌtë böchiꞌ luzáꞌaruꞌ taꞌyéajlëꞌë Cristo,
nacuáꞌlenëꞌ légaquiëꞌ.
16 Guliꞌgapa Dios luzáꞌaliꞌ,
unídaꞌliꞌ luzáꞌaliꞌ lu yöl-laꞌ nadxíꞌi queë́liꞌ.
Tuꞌgapëꞌ Dios libíꞌiliꞌ yúguꞌtë böchiꞌ luzáꞌaruꞌ nabábagaquiëꞌ gapa nacuáꞌ bönachi queëꞌ Cristo luyú ni.
17 Naꞌa,
rátaꞌyuaꞌ loliꞌ,
bö́chaꞌadoꞌ,
guliꞌgún ga ilaca bëꞌ nupa tun ga irúajliꞌ choplö,
en tun ga ichixi iníguiliꞌ,
tuꞌ tuꞌsë́dinëꞌ le cabí röjlö́z le nazë́daliꞌ.
Guliꞌcuíta ga nacuáꞌ bönachi caní
18 tuꞌ cabí tun xichinëꞌ Jesucristo.
Tunëꞌ dxin para bi gataꞌ quégacasëꞌ,
en taꞌzíꞌ yéꞌenëꞌ yuguꞌ bönniꞌ nöxaj ladxiꞌ,
tuꞌgunëꞌ dxin didzaꞌ nöxaj ladxiꞌ,
en didzaꞌ tséajlëꞌëruꞌ le cabí nácatë.
19 Rizë́ didzaꞌ ca naꞌ runliꞌ ca rnna xtídzëꞌë Xanruꞌ,
ateꞌ taꞌyöni yúguꞌtë bönachi.
Que lë ni naꞌ rudzéjadaꞌ niꞌa que le runliꞌ libíꞌiliꞌ.
Naꞌa,
rë́ꞌëndaꞌ gácaliꞌ sinaꞌ gunliꞌ le naca dxiꞌa,
en calëga gunliꞌ le ruáꞌ döꞌ.
20 Dios,
Nu run ga zóaruꞌ dxi ladxiꞌ,
siꞌ gunëꞌ ga ucúl-laliꞌ Satanás,
tuꞌ xihuiꞌ.
Rinábidaꞌ-nëꞌ Xanruꞌ Jesucristo uzáꞌ ládxëꞌë queë́liꞌ le gácalen libíꞌiliꞌ.
21 Biꞌi Timoteo,
biꞌi naꞌ rúnlenbiꞌ nedaꞌ tsözxö́n dxin,
rugápabiꞌ Dios libíꞌiliꞌ.
Lucio,
en Jasón,
en Sosípater,
yuguꞌ bönniꞌ uládz quiaꞌ,
tuꞌgapëꞌ Dios libíꞌiliꞌ.
22 Nedaꞌ,
Tercio,
ruzúajaꞌ lu guichi didzaꞌ ni ruꞌë Pablo,
rugapaꞌ Dios libíꞌiliꞌ,
dzáguiëꞌ Xanruꞌ nedaꞌ.
23 Gayo,
bönniꞌ ni ruꞌë nedaꞌ lataj zoaꞌ lidxëꞌ,
en ruꞌë caꞌ lataj tuꞌdubi yúguꞌtë bönachi queëꞌ Cristo ni,
rugapëꞌ Dios libíꞌiliꞌ.
Erasto,
bönniꞌ yuꞌu lu nëꞌë dumí que yödzö ni,
rugapëꞌ Dios libíꞌiliꞌ.
Bö́chiꞌruꞌdoꞌ Cuarto rugapëꞌ Dios libíꞌiliꞌ.
24 Rinábidaꞌ-nëꞌ Xanruꞌ Jesucristo uzáꞌ ládxëꞌë queë́liꞌ yúguꞌtëliꞌ le gácalen libíꞌiliꞌ.
¡Caꞌ gaca!
Yöl-laꞌ ba Dios
25 Naꞌa,
rigúꞌutuꞌ-nëꞌ yöl-laꞌ ba Dios,
Nu gaca gun tsutsu libíꞌiliꞌ ca naca didzaꞌ dxiꞌa runaꞌ libán que,
en ca naca libán runaꞌ ca naca queëꞌ Jesucristo,
en ca naca le chibuluꞌë lahui Dios que le bigachiꞌ queëꞌ,
lë naꞌ bucáchëꞌë Lëꞌ dza niꞌte ga bidxintë naꞌa dza.
26 Naꞌa chibuluꞌë lahui lë ni yuguꞌ lu guichi buluꞌzúajëꞌ bönniꞌ guluꞌë didzaꞌ uláz queëꞌ Dios ca naꞌ gunná cazëꞌ Dios,
Nu zóaticaꞌsö.
Naꞌa raca libán que lógaca yúguꞌtë bönachi para gaca ilaꞌyéajlëꞌ Cristo,
en ilún ca rnna xtídzëꞌë.
27 ¡Niꞌa que le benëꞌ Jesucristo,
gácaticaꞌsö yöl-laꞌ ba queëꞌ laꞌs dui Dios,
Nu rácatërö caz!
¡Caꞌ gaca!