Ral-laꞌ gunruꞌ le raza ládxëꞌë böchiꞌ luzáꞌaruꞌ
15
Que lë ni naꞌ,
channö nácaruꞌ tsutsu ca réajlëꞌëruꞌ Cristo,
ral-laꞌ guáꞌ ilenruꞌ nupa naꞌ nagul-la ládxiꞌgaca ca taꞌyéajlëꞌ Cristo.
Bitiꞌ ral-laꞌ gunruꞌ le raza ládxiꞌruꞌ laꞌ cuínsiruꞌ.
2 Yúguꞌtëruꞌ ral-laꞌ gunruꞌ le raza ládxëꞌë böchiꞌ luzáꞌaruꞌ para gaca dxiꞌa queëꞌ,
en idipa ládxëꞌë ca réajlëꞌë Cristo.
3 Caní ral-laꞌ gunruꞌ,
tuꞌ cabí benëꞌ Cristo le guyaza ládxëꞌë laꞌ cuinsëꞌ,
pero guca queëꞌ ca naꞌ nazúaj lu guichi láꞌayi,
le rnna:
“Budubágaꞌgaca nedaꞌ yuguꞌ didzaꞌ xihuiꞌ guluíꞌi nupa gulaꞌnnë́ xihuiꞌ quiuꞌ Liꞌ,
Dios.”
4 Yúguꞌtë le buluꞌzúajëꞌ lu guichi láꞌayi dza niꞌte,
buluꞌzúajëꞌ lu guichi para usëdi rëꞌu.
Lë naꞌ nazúaj lu guichi láꞌayi run ga ribö́zaruꞌ zxön ladxiꞌ,
en ruhuë́ tsahuiꞌ rëꞌu.
Que lë ni naꞌ zoa le runruꞌ löza.
5 Rinábidaꞌ-nëꞌ Dios,
Nu run ga ribö́zaruꞌ zxön ladxiꞌ,
en Nu ruhuë́ tsahuiꞌ rëꞌu,
gunëꞌ ga gunliꞌ tuz ca rusácaꞌliꞌ queë́liꞌ,
para gácaliꞌ ca naꞌ rë́ꞌënëꞌ Jesucristo.
6 Caní ral-laꞌ gunliꞌ para gácaliꞌ tuz,
cúꞌuliꞌ-nëꞌ tsözxö́n yöl-laꞌ ba Dios,
Xuzëꞌ Xanruꞌ Jesucristo.
7 Que lë ni naꞌ,
para gaca yöl-laꞌ ba queëꞌ Dios,
guliꞌsíꞌ lu náꞌaliꞌ tuliꞌ iaꞌtuliꞌ ca naꞌ Cristo guzxíꞌ lu nëꞌë caꞌ rëꞌu.
8 Caní ral-laꞌ gunliꞌ,
tuꞌ reaꞌ libíꞌiliꞌ:
Bidëꞌ Jesucristo,
en gúcalenëꞌ bönachi judío,
ateꞌ caní buluꞌe lahui naca idútë li didzaꞌ ruꞌë Dios,
ateꞌ benëꞌ ga buluꞌdxín le guzxíꞌ lu nëꞌë Dios unödzjëꞌ quégaquiëꞌ xuz xtóꞌotuꞌ.
Yuguꞌ bönachi izáꞌa ilaꞌyöni didzaꞌ dxiꞌa
9 Bidëꞌ caꞌ Cristo para benëꞌ ga ilaꞌgúꞌu Dios yöl-laꞌ ba nupa bitiꞌ nácagaca judío tuꞌ ruhuéchiꞌ ládxëꞌë Dios légaquiëꞌ.
Ca naca lë ni nazúaj lu guichi láꞌayi le rnna:
Que lë ni naꞌ,
uluꞌa lahui le nacuꞌ Liꞌ
lógaca bönachi idútë yödzölió,
en gul-laꞌ quiuꞌ yöl-laꞌ ba.
10 Ga yúbölö nazúaj lu guichi láꞌayi le rnna:
Libíꞌiliꞌ,
bönachi idútë yödzölió,
buliꞌdzéjalen bönachi queëꞌ Dios.
11 Ga yúbölö nazúaj caꞌ lu guichi láꞌayi le rnna:
Guliꞌcuꞌë Xanruꞌ yöl-laꞌ ba,
yúguꞌtëliꞌ bitiꞌ nácaliꞌ judío.
Guliꞌtséaj ladxiꞌ Lëꞌ,
yúguꞌtëliꞌ zóaliꞌ idútë yödzölió.
12 Lëscaꞌ caní buzúajëꞌ Isaías lu guichi le rnna:
Iláꞌ lahui Nu nababa diꞌa dza queëꞌ Isaí.
Gaca lo Nu naꞌ para inná beꞌe nupa bitiꞌ nácagaca judío.
Nupa ni ilún löza Lëꞌ.
13 Rinábidaꞌ-nëꞌ Dios,
Nu run ga runruꞌ löza,
gunëꞌ ga udzéjadeꞌeliꞌ,
en ga soa dxi ládxiꞌliꞌ tuꞌ réajlëꞌëliꞌ Lëꞌ,
en gunëꞌ ga gaca idú ca runliꞌ löza,
tuꞌ zóalen yöl-laꞌ huáca queëꞌ Dios Böꞌ Láꞌayi libíꞌiliꞌ.
14 Böchiꞌ luzáꞌadoꞌ.
Chinö́z quézidaꞌ rúnticaꞌsiliꞌ le naca dxiꞌa,
en dëdaꞌ yöl-laꞌ réajniꞌi queë́liꞌ para gaca uzéajniꞌiliꞌ luzáꞌaliꞌ.
15 Naꞌa nacaꞌ rugu ladxiꞌ,
ruzúajaꞌ queë́liꞌ lu guichi ni,
bö́chaꞌa,
en rusáꞌa ládxiꞌliꞌ tuꞌ zoa le buzáꞌ ládxëꞌë Dios quiaꞌ nedaꞌ.
16 Que lë ni naꞌ runaꞌ xichinëꞌ Jesucristo lógaca bönachi bitiꞌ nácagaca judío,
en runaꞌ libán que didzaꞌ dxiꞌa queëꞌ Dios,
para gaca uguꞌa bönachi bitiꞌ nácagaca judío lu nëꞌë Dios,
nupa naꞌ gurö́ cazëꞌ Dios Böꞌ Láꞌayi queëꞌ Lëꞌ.
Ilácagaquiëꞌ ca tu le rigúꞌuruꞌ lu nëꞌë Dios,
le raza ládxëꞌë Lëꞌ.
17 Naꞌa,
tuꞌ rúnlenaꞌ tsözxö́n Jesucristo dxin,
dë lu naꞌa tsaza ládxaꞌa ca naca le nunaꞌ lu xichinëꞌ Dios.
18 Lëscaꞌ rurúguidaꞌ inníaꞌ ca naca lë naꞌ benëꞌ Cristo lu naꞌa nedaꞌ,
benëꞌ ga tun bönachi bitiꞌ nácagaca judío ca rnna xtídzëꞌë Dios.
Lë ni benëꞌ Lëꞌ,
bugunëꞌ dxin didzaꞌ bëꞌa nedaꞌ,
en yuguꞌ dxin benaꞌ nedaꞌ.
19 Lu naꞌa nedaꞌ bugunëꞌ dxin caꞌ le nácagaca bëꞌ buluꞌe lahui Lëꞌ,
en yuguꞌ yöl-laꞌ huáca zxön benëꞌ,
en yöl-laꞌ huáca naꞌ queëꞌ Dios Böꞌ Láꞌayi le guzóalen nedaꞌ.
Caní guca,
gusí lahuaꞌ runaꞌ libán lu yödzö Jerusalén,
ateꞌ idú gásibiꞌilö ga ridxintë luyú Ilírico,
chinunaꞌ libán que didzaꞌ dxiꞌa ca naca queëꞌ Cristo.
20 Bëꞌ ládxaꞌa benaꞌ libán que didzaꞌ dxiꞌa ga bitiꞌ bilaꞌyöni bönachi ca naca queëꞌ Cristo.
Laꞌtuꞌ gunaꞌ libán ga chibilaꞌyöni bönachi,
gunaꞌ nedaꞌ ca runëꞌ tu bönniꞌ ruguélëꞌë lahui dxin zxön chinunëꞌ bönniꞌ yúbölö.
21 Ca benaꞌ nedaꞌ naca ca naꞌ nazúaj lu guichi láꞌayi le rnna:
Ilaꞌléꞌe nupa nacuáꞌ ga cuntu nu ben libán queëꞌ Lëꞌ,
en ilaꞌyéajniꞌi nupa catu caz bilaꞌyöni ca naca queëꞌ.
Rë́ꞌënëꞌ Pablo tsejëꞌ yödzö Roma
22 Que lë ni naꞌ,
sal-laꞌ zián luzuí gúꞌunidaꞌ guídaꞌ ga zóaliꞌ,
bitiꞌ guca guídaꞌ.
23 Naꞌa,
chibudxi benaꞌ dxin quiaꞌ yuguꞌ lataj ni,
en chirë́ꞌëndaꞌ zián iz guídaꞌ ga zóaliꞌ.
24 Que lë ni naꞌ,
cateꞌ tsejaꞌ luyú España,
tödaꞌ ga zóaliꞌ libíꞌiliꞌ,
tuꞌ runaꞌ löza uduyúaꞌ libíꞌiliꞌ,
en udzéjalendaꞌ libíꞌiliꞌ.
Tödi niꞌ huáca ugúꞌuliꞌ nedaꞌ nöza.
25 Naꞌa ral-laꞌ tsejaꞌ Jerusalén,
tsöjuꞌa tu le gácalen nupa niꞌ néquiguequi queëꞌ Cristo.
26 Caní gunaꞌ,
le gulaꞌyaza ládxiꞌgaquiëꞌ bönniꞌ nacuꞌë luyú Macedonia,
en luyú Acaya,
buluꞌtubëꞌ bi tuꞌnödzjëꞌ quéguequi bönachi yechiꞌ dzágagaca bönachi queëꞌ Cristo,
nacuꞌë Jerusalén.
27 Gulaꞌyaza ládxiꞌgaquiëꞌ bönniꞌ bitiꞌ nácagaquiëꞌ judío gulunëꞌ lë ni.
Le nácatë naca tu le rál-laꞌgaquiëꞌ quégaca bönachi judío niꞌ.
Channö bönniꞌ bitiꞌ nácagaquiëꞌ judío tuꞌziꞌë xibé le nácagaca queëꞌ Dios niꞌa que le núngaca bönachi judío,
lëscaꞌ ral-laꞌ ilácalenëꞌ bönachi judío naꞌ,
uluꞌgunëꞌ dxin le dë quégaquiëꞌ.
28 Que lë ni naꞌ,
cateꞌ údxi udödaꞌ lu náꞌagaca bönachi judío lë naꞌ buluꞌnödzjëꞌ bönniꞌ ni,
níꞌirö tödaꞌ ga zóaliꞌ libíꞌiliꞌ cateꞌ tsejaꞌ luyú España.
29 Cateꞌ guídaꞌ ga zóaliꞌ,
runaꞌ löza idxínlenaꞌ yúguꞌtë le ruzíꞌiruꞌ xibé niꞌa que didzaꞌ dxiꞌa queëꞌ Cristo.
30 Niꞌa queëꞌ Xanruꞌ Jesucristo,
en niꞌa que yöl-laꞌ nadxíꞌi ruchíziëꞌ Dios Böꞌ Láꞌayi icja ládxiꞌdoꞌoruꞌ,
rátaꞌyuaꞌ loliꞌ,
bö́chaꞌadoꞌ,
ulídzaliꞌ-nëꞌ Dios tsözxö́n len nedaꞌ,
inábiliꞌ-nëꞌ gácalenëꞌ nedaꞌ.
31 Guliꞌnabi-nëꞌ Dios gunëꞌ ga uláꞌ nedaꞌ lu náꞌagaquiëꞌ bönniꞌ bitiꞌ taꞌyéajlëꞌë nacuꞌë luyú Judea,
en gunëꞌ ga ilaꞌyaza ládxiꞌgaquiëꞌ ilaꞌziꞌë lë naꞌ tsöjuꞌa lu náꞌagaquiëꞌ bönniꞌ nácagaquiëꞌ queëꞌ Cristo,
nacuꞌë Jerusalén.
32 Guliꞌnabi-nëꞌ caꞌ,
channö naca ca rë́ꞌënëꞌ Dios,
gunnëꞌ nedaꞌ lataj idxinaꞌ queë́liꞌ len yöl-laꞌ rudzeja quiaꞌ,
para uzíꞌ ládxiꞌlenaꞌ libíꞌiliꞌ.
33 Naꞌa rinábidaꞌ-nëꞌ Dios,
Nu run ga zoa dxi ládxiꞌruꞌ,
sóalenëꞌ yúguꞌtëliꞌ.
¡Caꞌ gaca!