Bitiꞌ ral-laꞌ siꞌ quídzaꞌruꞌ böchiꞌ luzáꞌaruꞌ
14
Guliꞌgüíꞌ lataj nu réajlëꞌ Cristo gun libíꞌiliꞌ tsözxö́n sal-laꞌ bitiꞌ naca idú ca réajlëꞌ nu naꞌ Lëꞌ.
Bitiꞌ tíl-lalenliꞌ nu naꞌ ca nácagaca le runi nu naꞌ huáca nu gun.
2 Ca naca lë ni,
nacuꞌë bönniꞌ runi légaquiëꞌ huáca ilahuëꞌ yúguꞌtë le tagu bönachi,
pero iaꞌbal-lëꞌ bönniꞌ,
tuꞌ cabí naca idú ca taꞌyéajlëꞌë Cristo,
tágusëꞌ le raza ruzóaruꞌ.
3 Naꞌa,
bönniꞌ naꞌ rahuëꞌ yúguꞌtë bitiꞌ ral-laꞌ uzóëꞌ tsöláꞌalö nu bönniꞌ bitiꞌ rahuëꞌ yúguꞌtë,
en lëscaꞌ caní,
bönniꞌ naꞌ bitiꞌ rahuëꞌ yúguꞌtë bitiꞌ ral-laꞌ siꞌ quídzëꞌë bönniꞌ naꞌ rahuëꞌ yúguꞌtë,
tuꞌ nazíꞌ lu nëꞌë Dios iropëꞌ bönniꞌ naꞌ taꞌyéajlëꞌë Cristo.
4 ¿Nuzxi caz liꞌ,
rizíꞌ quídzuꞌu bönniꞌ huen dxin que nu yúbölö?
Bönniꞌ naꞌ náquiëꞌ huen dxin queëꞌ Dios,
lahuëꞌ Xan cazëꞌ urúajëꞌ tsahuiꞌ o bitiꞌ urúajëꞌ tsahuiꞌ.
Channö urúajëꞌ tsahuiꞌ lahuëꞌ Dios,
naca tuꞌ gun cazëꞌ Xanruꞌ Dios ga urúajëꞌ tsahuiꞌ.
5 Nadxi caꞌ zoëꞌ nu bönniꞌ runrëꞌ bal tu dza ca runëꞌ bal iaꞌzícaꞌrö dza,
ateꞌ bönniꞌ yúbölö,
tuz ca runëꞌ bal yúguꞌtë dza.
Tu turuꞌ ral-laꞌ usë́dadaꞌaruꞌ channö naca dxiꞌa le runruꞌ.
6 Bönniꞌ naꞌ runëꞌ bal tu dza,
runëꞌ le bal para tseaj ládxëꞌë Xanruꞌ,
ateꞌ bönniꞌ naꞌ bitiꞌ runëꞌ bal dza naꞌ,
para tseaj ládxëꞌë Xanruꞌ bitiꞌ runëꞌ bal dza naꞌ.
Lëscaꞌ caní,
bönniꞌ naꞌ rahuëꞌ yúguꞌtë,
rahuëꞌ caní para tseaj ládxëꞌë Xanruꞌ,
en rëꞌë Dios:
“Xclenuꞌ”,
ateꞌ bönniꞌ naꞌ bitiꞌ rahuëꞌ yúguꞌtë,
bitiꞌ rahuëꞌ le para tseaj ládxëꞌë Xanruꞌ,
en rëꞌë caꞌ Dios:
“Xclenuꞌ.”
7 Bitiꞌ zoëꞌ nabanëꞌ queë́zëꞌ nitúëꞌ bönniꞌ nabábalenëꞌ rëꞌu,
en bitiꞌ ratiëꞌ queë́zëꞌ nitúëꞌ bönniꞌ.
8 Channö zóaruꞌ nabanruꞌ,
para tseaj ládxiꞌruꞌ-nëꞌ Xanruꞌ zóaruꞌ nabanruꞌ,
en channö gátiruꞌ,
para gaca yöl-laꞌ ba queëꞌ Xanruꞌ gátiruꞌ.
Caní naca,
channö zóaruꞌ nabanruꞌ o channö gátiruꞌ,
nequi quéziruꞌ queëꞌ Xanruꞌ.
9 Que lë ni naꞌ caꞌ gútiëꞌ Cristo,
en bubanëꞌ,
para gáquiëꞌ Xángaca nupa chinátigaca,
en nupa nabángaca.
10 Naꞌa liꞌ,
¿bizx que richugu bëꞌu böchiꞌ luzóꞌo?
¿Bizx que ruzúꞌ tsöláꞌalö böchiꞌ luzóꞌo?
Yúguꞌtëruꞌ idxinruꞌ lahuëꞌ Cristo ga uchiꞌa usörö́ëꞌ rëꞌu.
11 Ca naca lë ni nazúaj lu guichi láꞌayi,
rnna:
Rnnëꞌ Xanruꞌ:
“Niꞌa quiaꞌ nedaꞌ caz,
uluꞌzechu zxíbigaca yúguꞌtë bönachi lahuaꞌ nedaꞌ.
Ilaꞌguixjöꞌ yálajdoꞌ nacaꞌ Dios.”
12 Caní naca,
uchiꞌa usörö́ëꞌ Dios yúguꞌtëruꞌ.
Bitiꞌ ral-laꞌ gunruꞌ ga ichixi iníguinëꞌ böchiꞌ luzáꞌaruꞌ
13 Que lë ni naꞌ,
bítiꞌrö ral-laꞌ ichugu béꞌeruꞌ luzáꞌaruꞌ,
pero ral-laꞌ gun yúdxiruꞌ cabí gunruꞌ ga ichixi iníguinëꞌ böchiꞌ luzáꞌaruꞌ,
en para cabí gunruꞌ ga gunëꞌ dul-laꞌ.
14 Nöz quézidaꞌ bitiꞌ bi dë le ráguruꞌ le gaca gun ga bítiꞌrö nácaruꞌ tsahuiꞌ lahuëꞌ Dios,
ateꞌ röjlö́z lë ni didzaꞌ bëꞌë Xanruꞌ Jesús.
Channö réquinëꞌ tu bönniꞌ zoa bi gaca gun ga bítiꞌrö náquiëꞌ tsahuiꞌ lahuëꞌ Dios,
queëꞌ bönniꞌ ni,
caní naca.
15 Channö rusuhuíꞌinnuꞌ böchiꞌ luzóꞌo,
tuꞌ raguꞌ le runi lëꞌ bitiꞌ ral-laꞌ gáguruꞌ,
bitiꞌ runuꞌ ca ral-laꞌ gun nu nadxíꞌi böchiꞌ luzë́ꞌe.
Bitiꞌ bi ral-laꞌ gaguꞌ le gun ga gaca chopa ládxëꞌë bönniꞌ naꞌ,
gútiëꞌ Cristo uláz queëꞌ.
16 Que lë ni naꞌ,
bitiꞌ bi gunliꞌ le gun ga ilaꞌnnë́ xihuiꞌ bönachi que le rusácaꞌliꞌ queë́liꞌ naca tsahuiꞌ.
17 Cateꞌ rinná béꞌenëꞌ Dios rëꞌu,
bitiꞌ ruíꞌi ládxiꞌruꞌ le guíꞌaj gáguruꞌ,
pero ruíꞌi ládxiꞌruꞌ gácaruꞌ tsahuiꞌ,
en sóaruꞌ dxi ladxiꞌ,
en udzéjaruꞌ,
yuguꞌ le gaca gunruꞌ tuꞌ zóalenëꞌ Dios Böꞌ Láꞌayi rëꞌu.
18 Nútiꞌtës nu run xichinëꞌ Cristo ca nácagaca lë ni,
run le raza ládxëꞌë Dios,
ateꞌ urúaj dxiꞌa lógaca bönachi.
19 Que lë ni naꞌ ral-laꞌ gunruꞌ le ilún ga gataꞌ le ribequi dxi ládxiꞌruꞌ len yúguꞌtë bönachi,
en le ilún tsutsu turuꞌ iaꞌturuꞌ ca réajlëꞌëruꞌ Cristo.
20 Bitiꞌ bi ral-laꞌ gaguꞌ le gun ga gaca chopa ladxiꞌ nu naꞌ nuzóëꞌ Dios.
Nácatë lë naꞌ taꞌnná bönachi:
“Yúguꞌtë dë lataj gáguruꞌ”,
pero gunruꞌ le ruáꞌ döꞌ channö gunruꞌ ga ichixi iníguinëꞌ luzáꞌaruꞌ tuꞌ nözi lë naꞌ ráguruꞌ.
21 Gácarö dxiꞌa cabí gaguꞌ bëlaꞌ,
en cabí guíꞌjuꞌ xisi uva nal-la,
en bitiꞌ bi gunuꞌ le gun ga ichixi iníguinëꞌ böchiꞌ luzóꞌo,
o le gun ga gaca chopa ládxëꞌë,
o le gun ga huö́aj ládxëꞌë ca réajlëꞌë Cristo.
22 Channö réajlëꞌu dë lataj bi gunuꞌ,
ral-laꞌ gunuꞌ le lahuëꞌ Dios ga zuꞌ tuzuꞌ.
Bicaꞌ ba bönniꞌ naꞌ bitiꞌ ruxösa ládxiꞌdaꞌahuëꞌ lëꞌ tuꞌ nözi lë naꞌ runi lëꞌ dë lataj gunëꞌ,
23 pero bönniꞌ naꞌ raca chopa ládxëꞌë tuꞌ nözi le rahuëꞌ,
nabáguëꞌë xíguiaꞌ,
tuꞌ runëꞌ le cabí runi lëꞌ dë lataj gunëꞌ.
Naca dul-laꞌ yúguꞌtë le runruꞌ,
le cabí runi rëꞌu dë lataj gunruꞌ.