13
Yúguꞌtëliꞌ ral-laꞌ gunliꞌ ca taꞌnnë́ꞌ bönniꞌ yúlahuiꞌ.
Dios caz budödëꞌ lu náꞌagaquiëꞌ yöl-laꞌ unná bëꞌ nápagaquiëꞌ,
en nucuꞌë xilátjagaquiëꞌ bönniꞌ ni dë lu náꞌagaquiëꞌ yöl-laꞌ unná bëꞌ.
2 Que lë ni naꞌ,
nu ridáꞌbagaꞌ yúlahuiꞌ ridáꞌbagaꞌ le nuzóa cazëꞌ Dios,
ateꞌ nupa taꞌdáꞌbagaꞌ caní,
nabágaꞌgaca xiguiaꞌ.
3 Nacuꞌë bönniꞌ yúlahuiꞌ,
calëga para uluꞌzenëꞌ bach nu run le naca dxiꞌa,
pero para uluꞌzenëꞌ bach nu ruáꞌ döꞌ.
Channö rë́ꞌënuꞌ gunuꞌ ga bitiꞌ uluꞌzenëꞌ liꞌ bach,
ben le naca dxiꞌa,
ateꞌ urujuꞌ dxiꞌa lógaquiëꞌ.
4 Náquiëꞌ bönniꞌ yúlahuiꞌ niꞌa nëꞌë Dios para gácalenëꞌ liꞌ,
pero channö runuꞌ le ruáꞌ döꞌ,
ral-laꞌ gádxinuꞌ,
tuꞌ cabí nuꞌë nítisö xiyaga yúlahuiꞌ.
Náquiëꞌ niꞌa nëꞌë Dios para uzíꞌ lëbëꞌ,
gunëꞌ xíguiaꞌ nu ruáꞌ döꞌ.
5 Que lë ni naꞌ run bayudxi gunliꞌ ca rnnëꞌ bönniꞌ naꞌ dë lu nëꞌë,
calë́gasö tuꞌ budödëꞌ Dios lu nëꞌë gunëꞌ libíꞌiliꞌ xíguiaꞌ,
pero lëscaꞌ para soa dxi ládxiꞌdoꞌoliꞌ lahuëꞌ Dios.
6 Que lë ni naꞌ caꞌ riguizxaj lázaliꞌ que yúlahuiꞌ,
tuꞌ nácagaquiëꞌ bönniꞌ yúlahuiꞌ niꞌa nëꞌë Dios,
en tunëꞌ le nudödi cazëꞌ lu náꞌagaquiëꞌ.
7 Guliꞌguízxaj yúguꞌtë bönachi le rál-laꞌliꞌ quégaquiëꞌ.
Guliꞌguízxaj lázaliꞌ lu naꞌ nu ral-laꞌ quizxaj lázaliꞌ.
Guliꞌguízxaj dumí nu ral-laꞌ quízxjaliꞌ.
Guliꞌgadxi nu ral-laꞌ gádxiliꞌ,
en guliꞌgún bal nu ral-laꞌ gunliꞌ bal.
8 Cuntu nu bi ral-laꞌ gál-laꞌliꞌ que,
pero tuz ral-laꞌ idxíꞌiliꞌ luzáꞌaliꞌ,
tuꞌ chibén idú ca rinná bëꞌ xibá queëꞌ Dios nu nadxíꞌi luzë́ꞌe.
9 Caní taꞌnná bëꞌ xibá naꞌ:
Bitiꞌ gunuꞌ dul-laꞌ le riguitsaj xibá que yöl-laꞌ nutsaga naꞌ.
Bitiꞌ gútiuꞌ bönachi.
Bitiꞌ cuanuꞌ.
Bitiꞌ inníoꞌ que luzóꞌo le cabí nácatë.
Bitiꞌ së ládxuꞌu le dë que luzóꞌo.
Yuguꞌ xibá ni,
en yúguꞌtë xibá iaꞌzícaꞌrö,
údxi gun nu run ca rnna didzaꞌ rnna caní:
Bidxíꞌi luzóꞌo ca nadxíꞌi cuinuꞌ.
10 Nu naꞌ nadxíꞌi luzë́ꞌe bitiꞌ bi run que luzë́ꞌe le ruáꞌ döꞌ.
Caní naca,
nu naꞌ nadxíꞌi luzë́ꞌe run idú ca rinná bëꞌ xibá queëꞌ Dios.
11 Guliꞌgún caní tuꞌ nö́ziliꞌ ca raca dza ni zóaruꞌ naꞌa,
en nö́ziliꞌ caꞌ chibidxín dza usubán ládxiꞌliꞌ ca rubán nu chiguxi,
tuꞌ chizóarö gal-laꞌ dza uláruꞌ lu le ruáꞌ döꞌ ca guca cateꞌ niꞌ gusí loruꞌ réajlëꞌëruꞌ Cristo.
12 Ga zóaruꞌ naꞌa naca ca chiꞌi dzö́ꞌölö,
ateꞌ chizóa tödi rëla naꞌ,
pero ga naꞌ zoëꞌ Cristo naca ca lahuiꞌ dza,
ateꞌ chizóa tsöjsóaruꞌ niꞌ.
Que lë ni naꞌ ral-laꞌ ucáꞌanaruꞌ le tun bönachi ga naca chul-la que dul-laꞌ.
Ca naꞌ rugacu cuinëꞌ tu bönniꞌ rejëꞌ gudil-la le run chiꞌi lëꞌ lu gudil-la,
ral-laꞌ taruꞌ lu beníꞌ queëꞌ Dios,
le gun chiꞌi rëꞌu lu naꞌ tuꞌ xihuiꞌ.
13 Para gunruꞌ caní ral-laꞌ gunruꞌ dxiꞌa ca ral-laꞌ gun nu ridá lahuiꞌ dza.
Bitiꞌ ral-laꞌ súdxiruꞌ,
en cabí gágulëꞌëruꞌ.
Bitiꞌ ral-laꞌ gunruꞌ le ruáꞌ döꞌ,
en calëga le gun ditaj rëꞌu.
Bitiꞌ ral-laꞌ tíl-lalenruꞌ luzáꞌaruꞌ,
en cabí uzxéꞌeruꞌ luzáꞌaruꞌ.
14 Naꞌa,
ral-laꞌ un cuinliꞌ lu icja ládxiꞌdoꞌoliꞌ ca náquiëꞌ Xanruꞌ Jesucristo,
en bitiꞌ güíꞌi ládxiꞌliꞌ gunliꞌ le rizë́ ládxiꞌliꞌ lu yöl-laꞌ bönáchisö queë́liꞌ.