Ral-laꞌ udödi cuinruꞌ quez queëꞌ Dios
12
¡Böchiꞌ luzáꞌadoꞌ!
¡Ruhuéchiꞌ ládxëꞌë Dios rëꞌu!
Que lë ni naꞌ rátaꞌyuaꞌ loliꞌ udödi cuinliꞌ lu nëꞌë Dios,
gácaliꞌ ca tu le naca ban rigúꞌuruꞌ lahuëꞌ Dios,
para gácaliꞌ quez queëꞌ,
le gaca tu le tsaza ládxëꞌë Dios.
Lë ni ral-laꞌ gunliꞌ,
ca saꞌyéaj le reaj ládxiꞌruꞌ-nëꞌ Dios.
2 Bítiꞌrö gunliꞌ laꞌ lë́bisö ca tun bönachi dza ni zóaruꞌ naꞌa,
pero guliꞌgaca bönachi cubi tuꞌ nucubëꞌ Dios icja ládxiꞌdoꞌoliꞌ.
Guliꞌgún caní para gaca inö́ziliꞌ le naca dxiꞌa rë́ꞌënëꞌ Dios gunliꞌ,
lë naꞌ raza ládxëꞌë,
en le naca idú.
3 Naꞌa,
tuꞌ zoa le buzáꞌ ládxëꞌë quiaꞌ Dios,
reaꞌ yúguꞌtëliꞌ:
Bitiꞌ gun ba zxön cuinliꞌ,
le cabí ral-laꞌ gunliꞌ,
pero ral-laꞌ gácaliꞌ nöxaj ladxiꞌ ca ribequi ícjaliꞌ,
tsca naca yöl-laꞌ réajlëꞌ queë́liꞌ Dios le bennëꞌ que queë́liꞌ.
4 Ca naꞌ naca tuz idútë le naca cázaruꞌ,
sal-laꞌ zián le nagudiꞌ dzágalenruꞌ,
en calëga tuz dxin tun yúguꞌtë le zián naꞌ nagudiꞌ dzágalenruꞌ,
5 lëscaꞌ caní naca queë́ruꞌ.
Sal-laꞌ zianruꞌ zóaruꞌ,
nácaruꞌ ca tuz le naca cázaruꞌ tuꞌ nácaruꞌ tuz len Cristo,
ateꞌ que lë ni naꞌ yúguꞌtëruꞌ nácaruꞌ tuz turuꞌ len iaꞌturuꞌ.
6 Tu turuꞌ dë lu náꞌaruꞌ tu le bennëꞌ queë́ruꞌ Dios,
ateꞌ nadzáꞌgaca tu tu tsca naca le buzáꞌ ládxëꞌë que queë́ruꞌ.
Bönniꞌ naꞌ Dios bunödzjëꞌ queëꞌ guꞌë didzaꞌ uláz queëꞌ,
tsca réajlëꞌë Lëꞌ,
ral-laꞌ guꞌë didzaꞌ bönniꞌ naꞌ.
7 Bönniꞌ naꞌ Dios bunödzjëꞌ queëꞌ gunëꞌ xichinëꞌ,
dxíꞌadoꞌ ral-laꞌ gunëꞌ dxin naꞌ.
Bönniꞌ naꞌ Dios bunödzjëꞌ queëꞌ usédinëꞌ bönachi,
dxíꞌadoꞌ ral-laꞌ usédinëꞌ bönachi.
8 Bönniꞌ naꞌ Dios bunödzjëꞌ queëꞌ uzéajniꞌinëꞌ bönachi,
dxíꞌadoꞌ ral-laꞌ uzéajniꞌinëꞌ légaquiëꞌ.
Bönniꞌ bi unödzjëꞌ que nu yúbölö,
idú ládxëꞌë ral-laꞌ unödzjëꞌ.
Bönniꞌ rinná béꞌenëꞌ bönachi,
idú ládxëꞌë ral-laꞌ gunëꞌ caní.
Bönniꞌ rácalenëꞌ luzë́ꞌë,
len yöl-laꞌ rudzeja ral-laꞌ gunëꞌ caní.
Yuguꞌ le ral-laꞌ gun nu nequi queëꞌ Cristo
9 Ral-laꞌ idxíꞌiliꞌ luzáꞌaliꞌ idú ládxiꞌliꞌ.
Buliꞌcáꞌana le ruáꞌ döꞌ.
Guliꞌgüíꞌ ládxiꞌliꞌ gunliꞌ le naca dxiꞌa.
10 Guliꞌdxíꞌi-guéquinëꞌ luzáꞌaliꞌ
ca nadxíꞌiguecliꞌ-nëꞌ böchiꞌ cázaliꞌ.
Ca runliꞌ-nëꞌ bal luzáꞌaliꞌ
ral-laꞌ gunliꞌ ga gácarëꞌ lo ca nácaliꞌ laꞌ cuínsiliꞌ.
11 Buliꞌtípaticaꞌsö ládxiꞌliꞌ,
en bitiꞌ gácaliꞌ xöhuëdi.
Guliꞌgún xichinëꞌ Xanruꞌ idú ládxiꞌliꞌ.
12 Buliꞌdzeja tuꞌ zoa le runliꞌ löza.
Guliꞌcö́z zxön ladxiꞌ cateꞌ bi riguíꞌi rizácaꞌliꞌ.
Buliꞌlídzaticaꞌsëꞌ Dios.
13 Buliꞌnödzaj quégaca bönachi queëꞌ Cristo
tsca nayádzjaguequinëꞌ.
Guliꞌgüíꞌ lataj ga ilaꞌcuáꞌ nupa taꞌdxín queë́liꞌ.
14 Guliꞌnábinëꞌ Dios gunëꞌ dxiꞌa
quégaca nupa taꞌbía ládxiꞌgaca libíꞌiliꞌ.
Guliꞌnaba gaca dxiꞌa quégaquiëꞌ,
en bitiꞌ udxíaliꞌ légaquiëꞌ döꞌ.
15 Buliꞌdzéjalen nupa tuꞌdzeja.
Guliꞌcö́dxilen nupa taꞌbödxi.
16 Guliꞌgaca tuz len luzáꞌaliꞌ.
Bitiꞌ gun ba zxön cuinliꞌ,
pero guliꞌgún tsözxö́n yuguꞌ bönniꞌ nöxaj ladxiꞌ.
Bitiꞌ guéquiliꞌ chinadéliꞌliꞌ idútë yöl-laꞌ réajniꞌi.
17 Cuntu nu ubíꞌiliꞌ que,
bitiꞌ guáꞌaliꞌ döꞌ que nu ruáꞌ döꞌ queë́liꞌ.
Guliꞌgún dxiꞌa quégaca yúguꞌtë bönachi.
18 Channö huáca,
tsca séquiꞌliꞌ,
guliꞌcö́z dxiꞌa
len yúguꞌtë bönachi.
19 Böchiꞌ luzáꞌadoꞌ,
bitiꞌ uzíꞌ lë́biliꞌ bönachi laꞌ libíꞌisiliꞌ,
pero guliꞌgüíꞌ lataj ubiꞌë Dios quégaca bönachi naꞌ,
tuꞌ nazúaj lu guichi láꞌayi le rnna:
Nedaꞌ cazaꞌ uzíꞌ lëbaꞌ.
Nedaꞌ ubiꞌa quégaca bönachi.
Channö zoëꞌ nu bönniꞌ bitiꞌ ridzáguiëꞌ liꞌ dxiꞌa,
en ridunëꞌ,
bëꞌë le gahuëꞌ.
Channö ribidxëꞌ nisa,
bëꞌë le guíꞌjëꞌ.
Cateꞌ gunuꞌ caní,
gunuꞌ ga utuíꞌinëꞌ bönniꞌ naꞌ.
21 Bitiꞌ guꞌu lataj inná beꞌe le ruáꞌ döꞌ liꞌ,
pero gunná beꞌe le ruáꞌ döꞌ naꞌ,
ugunuꞌ dxin le naca dxiꞌa.