Nupa nulágaca ladaj bönachi Israel
11
Naꞌa rnníaꞌ:
¿Naruꞌ nusán nëꞌë Dios bönachi Israel?
¡Bitiꞌ caꞌ naca caní!
Nedaꞌ caz nacaꞌ bönniꞌ Israel.
Nacaꞌ zxíꞌini xiꞌsóëꞌ Abraham,
en nababaꞌ diꞌa dza queëꞌ Benjamín,
zxíꞌini cazëꞌ Israel naꞌ.
2 Dios bitiꞌ nusán nëꞌë bönachi queëꞌ,
nupa naꞌ gurö́ cazëꞌ queëꞌ dza niꞌte.
¿Naruꞌ cabí núnbëꞌëliꞌ lë naꞌ nazúaj lu guichi láꞌayi ca naꞌ benëꞌ Elías?
Bulidzëꞌ Dios,
en buzéguiëꞌ bönachi Israel didzaꞌ,
gunnë́ꞌ:
3 “Xan,
chigulútiëꞌ bönniꞌ guluꞌë didzaꞌ uláz quiuꞌ,
en buluꞌquinnajëꞌ yuguꞌ bucugu láꞌayi quiuꞌ ga buzéguigacatuꞌ-baꞌ böaꞌ bë́dxidoꞌ loꞌ Liꞌ.
Tuzaꞌ nedaꞌ nagáꞌanaꞌ quiuꞌ,
ateꞌ të́ꞌënnëꞌ ilútiëꞌ caꞌ nedaꞌ.”
4 Naꞌa,
¿bizxi didzaꞌ bubiꞌë Dios?
Caní gunnë́ꞌ:
“Nun chíꞌigaca cazaꞌ-nëꞌ quiaꞌ tsónnalalaj yuꞌ chi gáyuꞌë bönniꞌ bitiꞌ tuꞌzechu zxíbigaquiëꞌ lo budóꞌ guiö́j naꞌ nazíꞌi le Baal.”
5 Lëscaꞌ caní naca dza ni zóaruꞌ naꞌa,
nagáꞌanagaca bal-la bönachi Israel,
nupa naꞌ gurö́ cazëꞌ queëꞌ Dios tuꞌ ruzáꞌ ládxëꞌë caní quégaquiëꞌ.
6 Channö naca le ruzáꞌ ládxëꞌë caní quégaquiëꞌ,
bitiꞌ naca niꞌa que tu le gaca ilunëꞌ.
Laꞌtuꞌ guca niꞌa que tu le gaca gunruꞌ,
lë naꞌ ruzáꞌ ládxëꞌë queë́ruꞌ Dios bítiꞌrö gaca tu le ruzáꞌ ládxëꞌë queë́ruꞌ.
7 ¿Bizxi caz innaruꞌ naꞌa?
Lë naꞌ gulaꞌguíljëꞌ bönniꞌ Israel,
bitiꞌ bilaꞌdéliꞌnëꞌ,
pero chibilaꞌdéliꞌ le nupa niꞌ gurö́ cazëꞌ queëꞌ Dios,
ateꞌ iaꞌzícaꞌrëꞌ naꞌ,
Dios benëꞌ zidi icja ládxiꞌdoꞌgaquiëꞌ.
8 Ca naca lë ni nazúaj lu guichi láꞌayi,
rnna:
“Dios benëꞌ ga nácagaquiëꞌ chul-la niti.”
Caní benëꞌ,
en sal-laꞌ gaca ilaꞌléꞌenëꞌ le runëꞌ,
en ilaꞌyönnëꞌ xtídzëꞌë,
bitiꞌ caꞌ taꞌyéajniꞌinëꞌ.
Caní naca quégaquiëꞌ ga ridxintë dza ni zóaruꞌ naꞌa.
9 Ca naca lë ni bëꞌë caꞌ David didzaꞌ,
gunnë́ꞌ:
Yuguꞌ laní quégaquiëꞌ uluꞌhuöáca le ilaꞌzö́n légaquiëꞌ,
en ca tu yalaj ga ilaꞌrö́linëꞌ.
Ilaca caꞌ le ilún ga ilaꞌchíxinëꞌ,
en ca tu le uzíꞌ lëbi légaquiëꞌ.
10 Ilaꞌchul-la guiö́j lógaquiëꞌ,
para cabí ilaꞌléꞌenëꞌ.
Ilaꞌyechu tsaz cúdzuꞌgaquiëꞌ tuꞌ iluꞌë yuaꞌ.
Ca gaca uluꞌlágaca bönachi bitiꞌ nácagaca judío
11 Naꞌa rnníaꞌ:
¿Naruꞌ gulaꞌchíxinëꞌ yuguꞌ bönniꞌ judío ga bidxintë gulaꞌnítiëꞌ tsaz?
¡Bitiꞌ caꞌ guca caꞌ!
Gulaꞌdáꞌbaguëꞌë xtídzëꞌë Dios,
ateꞌ naꞌa Dios ruꞌë lataj uluꞌlágaca nupa bitiꞌ nácagaca judío para gunëꞌ ga uluꞌzxéꞌenëꞌ yuguꞌ bönniꞌ judío léguequi.
12 Le gulunëꞌ bönniꞌ judío,
gulaꞌchíxinëꞌ,
ben ga bidxín quégaca bönachi yödzölió ni le naca ca tu yöl-laꞌ tsahuiꞌ.
Channö caní guca,
gutaꞌ yöl-laꞌ tsahuiꞌ quégaca nupa bitiꞌ nácagaca judío tuꞌ gulaꞌnítiëꞌ yuguꞌ bönniꞌ judío,
zxö́ntërö gaca le gataꞌ quéguequi cateꞌ yuguꞌ bönniꞌ judío naꞌ uluꞌhuöáquiëꞌ queëꞌ Dios.
13 Naꞌa reaꞌ libíꞌiliꞌ bitiꞌ nácaliꞌ judío,
rnníaꞌ:
Tuꞌ nacaꞌ gubáz nasö́l-lëꞌë Dios lógaca nupa bitiꞌ nácagaca judío,
runaꞌ zxön lë naꞌ dë lu naꞌa
14 para nadxi caꞌ huáca gunaꞌ ga uluꞌzxéꞌenëꞌ bönniꞌ uládz quiaꞌ libíꞌiliꞌ,
en caní gunaꞌ ga uluꞌlë́ꞌ bal-lëꞌ.
15 Channö buluꞌhuöáca bönachi nacuáꞌ idú yödzölió queëꞌ Dios tuꞌ buluꞌnítiëꞌ yuguꞌ bönniꞌ judío xilátjagaquiëꞌ,
zxö́ntërö gaca le gataꞌ quéguequi cateꞌ uluꞌhuöáziëꞌ xilátjagaca cazëꞌ naꞌ.
Gaca ca raca cateꞌ tuꞌbángaca nupa chinátigaca.
16 Channö rigúꞌuruꞌ quez queëꞌ Dios cúa níladoꞌ rubéajruꞌ zíꞌalö,
lëscaꞌ cúa naꞌ nagáꞌana naca quez queëꞌ,
en channö uzóaruꞌ quez queëꞌ Dios luí yaga,
lëscaꞌ ilaca quez queëꞌ niꞌa nëꞌe yaga naꞌ.
17 Nácagaquiëꞌ bal-lëꞌ bönniꞌ judío ca niꞌa nëꞌe tu yaga olivo narúgugaca,
ateꞌ libíꞌiliꞌ,
ca niꞌa nëꞌe tu yaga olivo guíꞌa,
yöjtáꞌaliꞌ yaga olivo dxiꞌa naꞌ,
en buáziliꞌ xilátjagaca nupa naꞌ gurúgugaca,
en ruzíꞌiliꞌ xibé luí,
en xichöni yaga olivo dxiꞌa naꞌ.
18 Que lë ni naꞌ,
bitiꞌ gun ba zxön cuinliꞌ,
bitiꞌ uzóaliꞌ tsöláꞌalö nupa nácagaca ca niꞌa nëꞌe naꞌ narúgugaca.
Channö run ba zxön cuinliꞌ,
ral-laꞌ inö́ziliꞌ calëga libíꞌiliꞌ rugáguliꞌ luí yaga naꞌ,
pero luí yaga naꞌ rugagu libíꞌiliꞌ.
19 Nadxi caꞌ innóꞌ:
“Gulaꞌrugu niꞌa nëꞌe yaga naꞌ para gaca tsáziaꞌ nedaꞌ xilátjagaca.”
20 Nácatë didzaꞌ ruꞌu,
pero gulaꞌrúguiëꞌ tuꞌ cabí gulaꞌyéajlëꞌë,
ateꞌ yöjtóꞌo liꞌ yaga naꞌ tuꞌ réajlëꞌu Dios.
Que lë ni naꞌ,
bitiꞌ ral-laꞌ gun ba zxön cuinuꞌ,
pero ral-laꞌ gádxinuꞌ Dios.
21 Channö benëꞌ Dios léguequi xíguiaꞌ,
nupa naꞌ nácagaca caz niꞌa nëꞌe yaga dxiꞌa naꞌ,
¿naruꞌ cabí gunëꞌ xíguiaꞌ caꞌ liꞌ?
22 Buyútsöcaꞌ naꞌa ca náquiëꞌ dxiꞌi ladxiꞌ Dios,
en ca rúndëꞌë caꞌ xíguiaꞌ.
Le nácatë rúndëꞌë xíguiaꞌ nupa naꞌ gulaꞌchixi,
pero náquiëꞌ dxiꞌi ladxiꞌ len liꞌ.
Que lë ni naꞌ,
ral-laꞌ gúnticaꞌsuꞌ ca saꞌyéaj yöl-laꞌ dxiꞌi ladxiꞌ queëꞌ naꞌ,
para cabí ichúguiëꞌ caꞌ liꞌ lu yaga queëꞌ naꞌ.
23 Lëscaꞌ caní gaca quégaquiëꞌ channö cabí uluꞌgáꞌanëꞌ lu yöl-laꞌ cabí réajlëꞌ quégaquiëꞌ,
tsöjtáꞌgaquiëꞌ leyúbölö lu yaga naꞌ,
tuꞌ napëꞌ Dios yöl-laꞌ huáca gunëꞌ ga tsöjtáꞌgaquiëꞌ le leyúbölö.
24 Nacuꞌ liꞌ ca tu niꞌa nëꞌe gurugu lu yaga olivo guíꞌa,
en yöjtóꞌo yaga olivo dxiꞌa ga cuntu nu udáꞌ tu niꞌa nëꞌe yaga guíꞌa.
Yénniꞌtërö huáca quégaquiëꞌ,
nácagaca cazëꞌ niꞌa nëꞌe yaga dxiꞌa naꞌ,
huáca tsöjtáꞌgaquiëꞌ leyúbölö lu yaga quéguequi cazëꞌ naꞌ.
Ca gaca uluꞌlágaca bönachi Israel
25 Bö́chaꞌadoꞌ,
rë́ꞌëndaꞌ inö́ziliꞌ lë ni bigachiꞌ,
para cabí gun ba zxön cuinliꞌ ca naca yöl-laꞌ réajniꞌi queë́liꞌ.
Buluꞌhuöáca bal-la bönachi Israel zidi ladxiꞌ,
ateꞌ caní iláquiëꞌ ga idxinrö dza chinayázgaca yúguꞌtë bönachi bitiꞌ nácagaca judío ga rinná bëꞌë Dios,
nupa naꞌ ral-laꞌ uluꞌlágaca.
26 Tödi naꞌ gataꞌ lataj uluꞌlë́ꞌ caꞌ yúguꞌtë bönniꞌ Israel,
ca naꞌ nazúaj lu guichi láꞌayi,
rnna:
Irúaj yödzö Sión Nu rusölá,
en ugúa le ruáꞌ döꞌ nabágaꞌgaca zxíꞌini xiꞌsóëꞌ Jacob.
27 Lë ni naca didzaꞌ dzaga gúnlenaꞌ légaquiëꞌ
cateꞌ ugúaꞌ dul-laꞌ nabágaꞌgaquiëꞌ.
28 Caní naca,
gulaꞌdáꞌbaguëꞌë didzaꞌ dxiꞌa,
ateꞌ Dios guléaj ládxëꞌë légaquiëꞌ para gaca uláliꞌ libíꞌiliꞌ,
pero nadxíꞌinëꞌ caꞌ légaquiëꞌ,
tuꞌ gurö́ cazëꞌ queëꞌ xuz xtóꞌogaquiëꞌ.
29 Tsaz runödzjëꞌ Dios le runödzjëꞌ,
en tsaz rulidzëꞌ bönachi.
30 Ca naꞌ naca queë́liꞌ,
zíꞌatëlö bitiꞌ benliꞌ ca rnna xtídzëꞌë Dios,
ateꞌ naꞌa ruhuéchiꞌ ládxëꞌë Dios libíꞌiliꞌ tuꞌ cabí gulunëꞌ yuguꞌ bönniꞌ judío ca rnnëꞌ.
31 Lëscaꞌ caní naca quégaquiëꞌ naꞌa,
bitiꞌ tunëꞌ ca rnnëꞌ Dios,
pero caní gácasö ga idxinrö dza huéchiꞌ ládxëꞌë Dios légaquiëꞌ,
ca ruhuéchiꞌ ládxëꞌë libíꞌiliꞌ naꞌa.
32 Dios guléaj ládxëꞌë yúguꞌtë bönachi para ilaꞌdáꞌbaguëꞌë xtídzëꞌë,
para gaca huéchiꞌ ládxëꞌë yúguꞌtëꞌ.
33 Zxö́ntërö naca yöl-laꞌ tsahuiꞌ queëꞌ Dios,
lë naꞌ naca yöl-laꞌ huáca zxön,
en yöl-laꞌ réajniꞌi queëꞌ.
Cuntu nu gaca tséajniꞌi le nuzóëꞌ Dios gunëꞌ,
en bitiꞌ gaca nu inözi yuguꞌ le runëꞌ Dios.
34 ¿Nuzxi caz guyéajniꞌi le guzáꞌ ládxëꞌë Xanruꞌ?
¿Nuzxi caz buzéajniꞌi Lëꞌ?
35 ¿Nuzxi caz bi bunödzaj queëꞌ Dios para gun bayudxi bi ubiꞌë Dios que?
36 Yúguꞌtë le dë narúajgaca lu nëꞌë Dios,
en taca lu nëꞌë,
en nácagaca para uziꞌë xibéguequi.
¡Gácaticaꞌsö queëꞌ Dios yöl-laꞌ ba!
¡Caꞌ gaca!