10
Libíꞌiliꞌ,
bö́chaꞌadoꞌ,
le rizë́ ládxaꞌa,
en le rinábidaꞌ-nëꞌ Dios gunëꞌ quégaca bönachi Israel naca gunëꞌ ga uluꞌlë́ꞌ.
2 Runaꞌ ba nalí quégaquiëꞌ,
idú ládxiꞌgaquiëꞌ tuíꞌi ládxiꞌgaquiëꞌ Dios,
pero calëga len yöl-laꞌ réajniꞌi idú.
3 Bitiꞌ nö́zguequinëꞌ ca runëꞌ Dios,
runsëꞌ ga nácaruꞌ tsahuiꞌ,
pero të́ꞌënnëꞌ ilún cuíngaquiëꞌ tsahuiꞌ rácasö quégaquiëꞌ,
en bitiꞌ taꞌcuꞌë nöxaj ladxiꞌ lahuëꞌ Dios para gaca gunëꞌ légaquiëꞌ tsahuiꞌ.
4 Budxi benëꞌ Cristo le rë́ꞌëni gun xibá queëꞌ Moisés,
benëꞌ ga gaca uluꞌhuöáca tsahuiꞌ yúguꞌtë nupa ilaꞌyéajlëꞌ Lëꞌ.
5 Ca naca que nu huöáca tsahuiꞌ tuꞌ run ca rinná bëꞌ xibá queëꞌ Dios,
buzúajëꞌ Moisés lu guichi le rnna caní:
“Bönniꞌ naꞌ gunëꞌ idútë ca rinná bëꞌ xibá naꞌ,
soëꞌ ibanëꞌ tuꞌ gunëꞌ caní.”
6 Naꞌa,
ca naca que nu huöáca tsahuiꞌ tuꞌ réajlëꞌ Dios,
rnna caní:
“Bitiꞌ innóꞌ lu icja ládxiꞌdoꞌo,
bitiꞌ innóꞌ:
¿Nuzxi caz cuen niꞌ yehuaꞌ yubá?”
Lë ni naca,
para gun nu naꞌ ga huötjëꞌ Cristo,
7 en bitiꞌ innóꞌ:
“¿Nuzxi caz huötaj ga dë lataj que nupa chinátigaca?”
Lë ni naca,
para gun nu naꞌ ga cuenëꞌ Cristo,
urúajëꞌ lu yöl-laꞌ guti.
8 Naꞌa,
¿bizxi caz rnna?
Caní rnna:
“Galaꞌ ga zuꞌ zoa caz xtídzëꞌë Dios.
Lu ruꞌu,
en lu icja ládxiꞌdoꞌo zoa xtídzëꞌë naꞌ.”
Lë ni naca didzaꞌ que le réajlëꞌëruꞌ Dios runtuꞌ libán que,
rnnatuꞌ:
9 “Channö didzaꞌ guꞌu gaca bëꞌ Jesús náquiëꞌ Xanuꞌ,
en uyéaj lëꞌu idú ládxuꞌu Dios busubanëꞌ Lëꞌ lu yöl-laꞌ guti,
ulóꞌ liꞌ.”
10 Lu icja ládxiꞌdoꞌoruꞌ réajlëꞌëruꞌ Jesús para gácaruꞌ tsahuiꞌ,
ateꞌ len didzaꞌ ruíꞌiruꞌ,
ruluíꞌiruꞌ lahui le náquiëꞌ Jesucristo para uláruꞌ.
11 Nazúaj lu guichi láꞌayi le rnna:
“Bitiꞌ caꞌ uluꞌtuíꞌi yúguꞌtë nupa taꞌyéajlëꞌ Lëꞌ.”
12 Dios,
laꞌ tuz ca ruíꞌi ládxëꞌë yuguꞌ bönniꞌ judío,
encaꞌ yuguꞌ bönniꞌ idútë yödzölió,
tuꞌ Lë cazëꞌ Xanruꞌ náquiëꞌ Xángaquiëꞌ yúguꞌtëꞌ,
en nápadëꞌë bi unödzjëꞌ quégaca yúguꞌtë nupa tuꞌlidza Lëꞌ.
13 Ca naca lë ni nazúaj lu guichi láꞌayi,
rnna:
“Uluꞌlá yúguꞌtë nupa uluꞌlidza Lëꞌ Xanruꞌ.”
14 ¿Nacxi gaca uluꞌlidzëꞌ Lëꞌ channö cabí taꞌyéajlëꞌë Lëꞌ?
¿Nacxi gaca ilaꞌyéajlëꞌë Lëꞌ channö catu caz bilaꞌyönnëꞌ ca naca queëꞌ?
¿Nacxi gaca ilaꞌyönnëꞌ channö cuntu nu zoa nu gun libán lógaquiëꞌ?
15 ¿Nacxi caz gaca ilunëꞌ libán channö cuntu nu isöl-laꞌ légaquiëꞌ?
Ca naca lë ni nazúaj lu guichi,
rnna:
“Bicaꞌ bágaca nupa naꞌ ilaꞌdxinëꞌ ga nacuáꞌ bönniꞌ röjéngaquiëꞌ libán que le ribequi dxi ládxiꞌruꞌ,
en tunëꞌ libán que didzaꞌ dxiꞌa.”
16 Naꞌa,
calëga yúguꞌtëꞌ gulaꞌzíꞌ lu náꞌagaquiëꞌ didzaꞌ dxiꞌa.
Ca naca lë ni,
Isaías gunnë́ꞌ:
“Xan,
¿nuzxi caz guyéajlëꞌ le bentuꞌ libán que?”
17 Caní naca,
ilaꞌyéajlëꞌ Lëꞌ nupa ilaꞌyöni,
ateꞌ lë naꞌ ral-laꞌ ilaꞌyöni naca didzaꞌ ruꞌë Cristo.
18 Naꞌa rnníaꞌ:
¿Naruꞌ cabí bilaꞌyönnëꞌ?
Le nácatë bilaꞌyönnëꞌ,
ca naꞌ nazúaj lu guichi láꞌayi,
le rnna:
Idútë yödzölió bilaꞌyöni chíꞌiguequi.
Yúguꞌtë lataj bilaꞌdxín xtídzaꞌguequi.
19 Lëscaꞌ rnníaꞌ:
¿Naruꞌ cabí guléquibeꞌenëꞌ bönniꞌ Israel lë ni?
Le nácatë guléquibeꞌenëꞌ le.
Ga risí lo,
bëꞌë didzaꞌ Moisés uláz queëꞌ Dios,
gunnë́ꞌ:
Gun cazaꞌ ga uzxéꞌeliꞌ,
tuꞌ idxíꞌidaꞌ bönachi bitiꞌ nabábagaca libíꞌiliꞌ.
Niꞌa quégaca bönachi cabí taꞌyéajniꞌi gunaꞌ ga leliꞌ.
20 Gudödi niꞌ gúcadëꞌë rugu ladxiꞌ Isaías naꞌ,
en bëꞌë didzaꞌ uláz queëꞌ Dios,
gunnë́ꞌ:
Bilaꞌdzöli nedaꞌ nupa bitiꞌ gulaꞌguílaj nedaꞌ.
Buluíꞌi lahuaꞌ lógaquiëꞌ bönniꞌ bitiꞌ bi gulaꞌnábinëꞌ nedaꞌ.
21 Naꞌa,
ca naca quégaquiëꞌ bönniꞌ Israel,
Isaías naꞌ bëꞌë didzaꞌ uláz queëꞌ Dios,
gunnë́ꞌ:
“Idú dza bulí naꞌa,
bulidzaꞌ bönachi bitiꞌ túngaca ca rnna xtídzaꞌa,
en taꞌdáꞌbagaꞌ nedaꞌ.”