Dios gurö́ cazëꞌ queëꞌ bönachi Israel
9
Ruáꞌa didzaꞌ idútë li tuꞌ néquidaꞌ queëꞌ Cristo,
ateꞌ röjlö́z didzaꞌ ni le naca queëꞌ Dios Böꞌ Láꞌayi le yuꞌu icja ládxiꞌdaꞌahuaꞌ.
¡Bitiꞌ rizíꞌ yëꞌa!
2 Ruhuíꞌinideꞌedaꞌ,
en risë́biticaꞌsö ládxaꞌa
3 tuꞌ raca ládxaꞌa gunaꞌ ga uluꞌlë́ꞌ böchiꞌ luzáꞌa,
bönniꞌ uládz quiaꞌ.
Laꞌtuꞌ huácalen légaquiëꞌ,
guë́ꞌëni quézidaꞌ ubéaj ládxëꞌë Dios nedaꞌ,
en uláꞌalenaꞌ Cristo.
4 Yuguꞌ bönniꞌ uládz quiaꞌ naꞌ nácagaquiëꞌ zxíꞌini xiꞌsóëꞌ Israel,
ateꞌ Dios bëꞌë légaquiëꞌ lataj ilácagaquiëꞌ zxíꞌini cazëꞌ.
Yöl-laꞌ zxön queëꞌ Dios guzóalen légaquiëꞌ,
ateꞌ Dios budödëꞌ lu náꞌagaquiëꞌ didzaꞌ rucáꞌana tsahuiꞌ,
encaꞌ xibá queëꞌ.
Bulidzëꞌ légaquiëꞌ para tseaj ládxiꞌgaquiëꞌ Lëꞌ,
ateꞌ budödëꞌ lu náꞌagaquiëꞌ yuguꞌ le guzxíꞌ lu nëꞌë gunëꞌ le ilún tsahuiꞌ bönachi.
5 Nácagaquiëꞌ zxíꞌini xiꞌsóagaquiëꞌ xuz xtóꞌotuꞌ Abraham,
en Isaac,
en Jacob,
ateꞌ ladaj diꞌa dza quégaquiëꞌ,
ca naca yöl-laꞌ bönachi queëꞌ,
guljëꞌ Cristo,
Nu naca caz Dios,
en rinná béꞌenëꞌ yúguꞌtë.
¡Rácaticaꞌsö queëꞌ yöl-laꞌ ba!
¡Caꞌ gaca!
6 Sal-laꞌ yúguꞌtë bönniꞌ uládz quiaꞌ bitiꞌ nazíꞌ lu náꞌagaquiëꞌ Cristo,
bitiꞌ ral-laꞌ innaruꞌ:
Nítisö böáca xtídzëꞌë Dios.
Calëga yúguꞌtë zxíꞌini xiꞌsóëꞌ Israel nácagaquiëꞌ idú bönachi Israel,
nupa néquiguequi queëꞌ Dios.
7 Sal-laꞌ gúljagaquiëꞌ zián zxíꞌini xiꞌsóëꞌ Abraham,
bitiꞌ guláquiëꞌ yúguꞌtëꞌ idú zxíꞌini xiꞌsóëꞌ Abraham,
pero guca ca naꞌ nazúaj lu guichi láꞌayi,
le rnna:
“Yuguꞌ zxíꞌini xiꞌsóëꞌ Isaac ilaca idú zxíꞌini xiꞌsúꞌ.”
8 Caní naca,
nupa nácagaca zxíꞌinëꞌ tu bönniꞌ néquinëꞌ queëꞌ Dios,
calëga yúguꞌtëꞌ nácagaquiëꞌ zxíꞌinëꞌ Dios.
Lëscaꞌ caní,
nácagaca idú zxíꞌini xiꞌsóëꞌ Abraham núpasö naꞌ náljagaca niꞌa que lë naꞌ guzxíꞌ lu nëꞌë Dios.
9 Lë naꞌ guzxíꞌ lu nëꞌë Dios unödzjëꞌ queëꞌ Abraham rnna caní:
“Iaꞌtú iz naꞌa dza huödaꞌ,
ateꞌ Sara quiuꞌ uzóanu-biꞌ tubiꞌ biꞌi bö́nniꞌdoꞌ.”
10 Calë́gasö lë ni guca caní,
pero lëscaꞌ cateꞌ Rebeca niꞌ nuáꞌanu-biꞌ yuguꞌ biꞌi bö́nniꞌdoꞌ queëꞌ Isaac,
xuz xtóꞌotuꞌ,
11-13 cateꞌ niꞌ siꞌ iláljabiꞌ,
en bitiꞌ bi núnigacabiꞌ le naca dxiꞌa o le ruáꞌ döꞌ,
Dios gudxëꞌ-nu Rebeca naꞌ,
gunnë́ꞌ:
“Biꞌi bönniꞌ zíꞌalö quiuꞌ gunbiꞌ xichinbiꞌ biꞌi buropi.”
Didzaꞌ ni röjlö́z lë naꞌ nazúaj lu guichi ca gunnë́ꞌ Dios,
le rnna:
“Bidxíꞌidaꞌ-nëꞌ Jacob,
en calëga Esaú.”
Caní guca,
bugáꞌana tsutsu le buzóëꞌ tsaz Dios ca naca lë naꞌ chigurö́ cazëꞌ.
Que lë ni naꞌ bitiꞌ raca caní niꞌa que tu le gaca ilún bönachi,
pero naca caní tuꞌ ribö́ cazëꞌ Dios nu rulidzëꞌ.
14 ¿Bizxi caz innaruꞌ naꞌa?
¿Naruꞌ runtsëꞌ Dios le cabí naca tsahuiꞌ?
¡Bitiꞌ caꞌ runëꞌ caní!
15 Dios gudxëꞌ Moisés,
gunnë́ꞌ:
“Huéchiꞌ ládxaꞌa nu rë́ꞌëndaꞌ huéchiꞌ ládxaꞌa,
en güíꞌi ládxaꞌa nu rë́ꞌëndaꞌ güíꞌi ládxaꞌa.”
16 Que lë ni naꞌ,
bitiꞌ raca caní niꞌa que le të́ꞌëni caz bönachi,
o tuꞌ runëꞌ bayudxi nu bönniꞌ,
pero naca tuꞌ rë́ꞌëni quézinëꞌ Dios,
ruhuéchiꞌ ládxëꞌë bönachi.
17 Ca naca lë ni nazúaj lu guichi láꞌayi ca naꞌ Dios gudxëꞌ Faraón,
gunnë́ꞌ:
“Que lë ni naꞌ buzóaꞌ liꞌ ga rinná bëꞌu para uluꞌa lahui yöl-laꞌ huáca quiaꞌ ga zuꞌ,
en gunaꞌ ga ilunbëꞌ bönachi idútë yödzölió le nacaꞌ nedaꞌ.”
18 Caní naca,
Dios ruhuéchiꞌ ládxëꞌë nu rë́ꞌëni quézinëꞌ,
en lëscaꞌ caní runëꞌ zidzaj icja ládxiꞌdaꞌahuëꞌ nu bönniꞌ rë́ꞌënëꞌ gunëꞌ zidzaj icja ládxiꞌdaꞌahuëꞌ bönniꞌ naꞌ,
ca naꞌ benëꞌ queëꞌ Faraón naꞌ.
19 Naꞌa guië́liꞌ nedaꞌ:
“Channö caní naca,
¿bizx que rusubáguëꞌë Dios bönachi xíguiaꞌ?
¿Nuzxi caz gaca táꞌbagaꞌ le rë́ꞌëni quézinëꞌ Dios gunëꞌ?”
20 ¡Bitiꞌ caꞌ naca caní!
¿Nuzxi caz liꞌ rnníoꞌ que Dios?
¿Naruꞌ huácatsö tu yusuꞌ néquini yu guíë bönniꞌ huen röꞌö,
inná:
“¿Bizx que benuꞌ nedaꞌ caní?”
21 ¿Naruꞌ cabí dë lu nëꞌë bönniꞌ huen röꞌö gunëꞌ que gunaꞌ naꞌ tu yusuꞌ nu ugún le dxin ga lináꞌ,
en que laꞌ gunaꞌ náꞌasö gunëꞌ iaꞌtú yusuꞌ nu ugún le dxin ga bitiꞌ naca lináꞌ?
22 Rë́ꞌëni quézinëꞌ Dios uluꞌë lahui ca gunëꞌ xíguiaꞌ nu ruáꞌ döꞌ en gunëꞌ ga gaca bëꞌ yöl-laꞌ huáca queëꞌ,
pero lu yöl-laꞌ riböza zxön ladxiꞌ queëꞌ biáꞌ gulénëꞌ yuguꞌ bönniꞌ niꞌ ral-laꞌ ichúguiëꞌ quégaquiëꞌ,
yuguꞌ bönniꞌ naꞌ nabágaꞌgaquiëꞌ xíguiaꞌ,
en run bayudxi usunítiëꞌ légaquiëꞌ.
23 Caní runëꞌ Dios para gaca bëꞌ nácatërö lesacaꞌ yöl-laꞌ ruzáꞌ ladxiꞌ queëꞌ,
lë naꞌ ruluꞌë lahui lógaca nupa naꞌ ruhuéchiꞌ ládxëꞌë,
bönniꞌ naꞌ buzóëꞌ quégaquiëꞌ zíꞌatëlö uluꞌziꞌë xibé yöl-laꞌ zxön queëꞌ.
24 Yuguꞌ bönniꞌ caní bulidzëꞌ Dios.
Calë́gasö bulidzëꞌ netuꞌ,
bönachi judío,
pero lëscaꞌ bulidzëꞌ bönachi izáꞌa.
25 Ca naca lë ni nazúaj lu guichi láꞌayi ca naꞌ bëꞌë didzaꞌ Oseas uláz queëꞌ Dios,
gunnë́ꞌ:
Nupa bitiꞌ nácagaca bönachi quiaꞌ,
guꞌa láguequi:
Bönachi quiaꞌ,
ateꞌ nupa naꞌ bitiꞌ bidxíꞌidaꞌ,
guꞌa láguequi:
Nupa nadxíꞌidaꞌ.
26 Laꞌ náꞌasö ga gunníaꞌ quéguequi:
“Bitiꞌ nácaliꞌ bönachi quiaꞌ”,
siꞌ láguequi:
“Yuguꞌ zxíꞌinëꞌ Dios ban.”
27 Naꞌa,
ca naca quégaca zxíꞌini xiꞌsóëꞌ Israel,
Isaías gunnë́ꞌ:
Sal-laꞌ ilaꞌyanëꞌ zxíꞌini xiꞌsóëꞌ Israel,
en iláquiëꞌ tsca naca yuzxi tu raꞌ yegu zxön,
uluꞌlë́ꞌ nabábasëꞌ.
28 Xanruꞌ Dios laꞌ guntëꞌ ga gaca idútë
lë naꞌ ichúguiëꞌ quégaca bönachi yödzölió ni.
29 Lëscaꞌ caní Isaías bëꞌë didzaꞌ zíꞌatëlö,
gunnë́ꞌ:
Dios,
Xanruꞌ unná bëꞌ idú,
laꞌtuꞌ cabí bucáꞌanëꞌ queë́ruꞌ yuguꞌ zxíꞌini xiꞌsóaruꞌ,
ugáꞌanaruꞌ ca yödzö Sodoma,
en yödzö Gomorra,
yuguꞌ yödzö naꞌ busunítiëꞌ Dios.
Bönachi Israel, en didzaꞌ dxiꞌa
30 ¿Bizxi caz innaruꞌ naꞌa?
Yuguꞌ bönniꞌ bitiꞌ nabábagaquiëꞌ Israel chibilaꞌdéliꞌnëꞌ nuhuöácagaquiëꞌ tsahuiꞌ lahuëꞌ Dios,
en bitiꞌ gulunëꞌ bayudxi uluꞌhuöáquiëꞌ tsahuiꞌ lahuëꞌ Dios,
pero nuhuöácagaquiëꞌ tsahuiꞌ tuꞌ taꞌyéajlëꞌë Dios.
31 Naꞌa,
sal-laꞌ gulunëꞌ bayudxi yuguꞌ bönniꞌ Israel ilunëꞌ ca rinná bëꞌ xibá queëꞌ Dios,
le ral-laꞌ gun ga ilácagaquiëꞌ tsahuiꞌ,
bitiꞌ bilaꞌdéliꞌnëꞌ le ral-laꞌ gataꞌ quégaquiëꞌ tuꞌ tunëꞌ ca rinná bëꞌ xibá naꞌ.
32 ¿Bizx que naꞌ guca caní?
Caní guca,
tuꞌ cabí gulunëꞌ caní lu yöl-laꞌ réajlëꞌ quégaquiëꞌ Dios,
pero rácasö quégaquiëꞌ gulë́ꞌënnëꞌ ilunëꞌ ca rinná bëꞌ xibá naꞌ,
ateꞌ que lë ni naꞌ gulaꞌchíxinëꞌ,
o huáca innaruꞌ:
Yöjchéguꞌgaquiëꞌ lu lë naꞌ nazíꞌi le:
Guiö́j Ga Nu Röjcheguꞌ.
33 Ca naca lë ni nazúaj lu guichi láꞌayi,
rnna:
¡Buliꞌyú!
Uzóaꞌ-nëꞌ yödzö Sión bönniꞌ naꞌ
gáquiëꞌ ca tu guiö́j ga nu tsöjcheguꞌ,
guiö́j naꞌ gun ga nu ichixi inigui.
Nu tséajlëꞌ Lëꞌ,
bitiꞌ caꞌ utuíꞌi nu naꞌ.